1Cor 8 | XteSC | STEP | Uda, ne kayapu, akecada tali keca dinin, sundi, ‘Nun nai bo cadi, si erepra gispal dopkamep’ tenen, tu keca galepra kareamenge ngeda, upu pepkusene. Sun Allah tep, teka tenerum nesaladi, “Jeptepe do, gum do?” pepra, asipetepnerum upuda pepkusene. Akeca yuma tep nengeda, nun yuma kael keamupke. Dinino, lumdongona gume. ‘Nunda ila kael nesala kunupe,’ teneramenge nesalada, ila kange erepra gemenunge. Ukunung dinin, yuk nesala tep, ‘Bicau tenepra makudanapu kunkamepe,’ teneramenge nesalada, yuk neng tep, dipru kwa dipra makuramengepa, nun yuma telep kupbanupe.

1 Corinthians 8

Tali keca dinin, ‘Nun nai bo cadi, si erepra gispal dopkamep’ tenen, karerami jen keca tep, pepu upu

1 Uda, ne kayapu, akecada tali keca dinin, sundi, ‘Nun nai bo cadi, si erepra gispal dopkamep’ tenen, tu keca galepra kareamenge ngeda, upu pepkusene. Sun Allah tep, teka tenerum nesaladi, “Jeptepe do, gum do?” pepra, asipetepnerum upuda pepkusene. Akeca yuma tep nengeda, nun yuma kael keamupke. Dinino, lumdongona gume. ‘Nunda ila kael nesala kunupe,’ teneramenge nesalada, ila kange erepra gemenunge. Ukunung dinin, yuk nesala tep, ‘Bicau tenepra makudanapu kunkamepe,’ teneramenge nesalada, yuk neng tep, dipru kwa dipra makuramengepa, nun yuma telep kupbanupe.

2 Ware ngebo do yuma, ‘Neda akeca-keca yuma ila kael ngebo konum kunune’ tenen, gemere ngeboda, tek sisi pio walwal nesala utopu tupa kurure. Allahdi nun tep, ‘Kael kepmengedi ukupra kunkamenge,’ tenepseutopu men kurure. 3 Dinino, ware nesala do yuma, Allah tep sun kange dipru, er deikipu deriramenge nesalada, Allahdi anesala, er kaele.

4 Ukuda, tali keca dinin, ‘Nun nai bo er si erepkamep’ tenen, gam kure keca popra, tu dopra isok si pepra, deriramenge kecada, “Nun teka tenenup nesala jena telep do, gum do?” pepra asipetepnerum ngeda pepkusene. Nun yuma konum kael keamupke. Tek sisi Allahda, er tenpu kurure. Yuk Allah ton men kununge. Ange tep nengeda, ‘Nun nai’ tenen, tali keca si eremenge keca yumada, tali kecapu kurure. Ada nong men kupkamre keca, Allah utopu men kurure. 5 Nun kaele, yuk teka tenena gum nesaladi, ‘Nun nimi deiyo ngebo’ tenen, tali-tali keca si pepra, eremenge keca weik akwapmare. Anengdi, im deiki kure keca cap, tuai mutu neitam kure keca cap, akeca si erepra, ‘Nun Nimi Deiyo Ngebo Allah akurure’ tenen, meri pepra, akeca si eremnunge.

6 Sun teka tenena nesalada ukunung dinino, nun teka tenenup nengda nun kaele. Nun nai bo Allah, er tenpu kurure. Yuk ton pio gume. Erda Gam Kuna Deiyo Ngebo kurura cadi, er deiki dipapu akeca-keca yuma ketekeipra deiamseue. Ukupseua tep ngeda nundi, ‘Nun gam kunupada, Allah er si eremna cap, er pelpu dona cap tep, kunkamepe’ tenen, kunupe. Ange utopu, nun Ila Nimi Deiyo Ngebo tenpupu kurure. Erda, Yesus Kristus kurure. Allahdi peipupa, Yesus pel dopka deiki di, akeca-keca yuma ketekepra deiamseue. Tonda, Yesus er pel dopseua deiki dipapu, lyepra deipseua tep, er puto deiki dipu gam kunupe.

7 Ukuda, nun Allah tep teka tenenup nesalada, ange yuma konum kael kepmepu dinin, nesala ban-ban yuma aupu moupra kapul men kael keami. Ton nesalada, ukutaru teka konum tenepi dinin, men di isok si cap, tali keca si cap, tapakra pio eremnapu kuramya cadi, yuk nengdi isok si eremna tep, domba bisam popra, tu kareramenge nge dopra, jepmenge taruda, mambul kange doupra, ‘Mali kupmepe,’ tenenunge. Ada sundi, ‘Uo, adomba tuda, isok si eremna tep karepmanga cadi, isok er mawa keca tupa kurure,’ tenenunge. Sun kange dipru neitamai, Yesus tep teka tenenge putoda, bounpu kurura cadi, ‘Akeca jeptene do, gum do?’ tenen, tenimtonapu kunga deiki di, ‘Uo mali kupnun’ tenen, mambul kange doununge. Ukunga deiki di, sun kange dipru mali kudidanunge.

8 Dinino, ne kayapu. Jen keca jemepya deiki di, Allah cap dipru dukdongopra kikiman men kunupe. Jen keca jemepya deiki di, Allahda, ‘Anengda telep, anengda mali,’ men teneserure. Ware jen keca do yuma, ange jemepya pe, men jemepya peda, adeiki di telep kuna cap, mali kuna cap, men kudidanupe. Jen jenada, mambul pio gume. Akeca-keca yumada tali lupra jena telepe pua.

9 Allah er kangeda, ‘Jen kecada ila mambule,’ men teneserura cadi, sun teka tenena nesaladi putarepa, ‘Ange jepkune,’ tenepmumtopu, tali lupra jeptume. Ukunada, teleppu dinino, ukuprumu pangeda, sun kange dipru neitam, teka tenenange tupa men wisiamre nesala epsengedi, ‘Uo, akeca jenmangada, mali kunung do?’ tenepmengepa, sun dipru konum wisipseu nesaladi, aneng tep, ‘Mali kudirum’ tenen, kange moupra kunkamrume, pepsene. Ada, sun anengda, dipru kapul men wisipu taruda, Allah er dumsisi bisi banmankapmengedi, yan giso dukredi podiramretopu, sun kael nengdi akeca-keca yuma, tali lupra jepruma deiki di, ‘Sun kange dipru puto kapul men kunge nengda, mali kudirum’ tenen, pepsene.

10 Aupu deiyoda ake. Sunda, ‘Adomba tu, isok si erepkup’ tenen, galepra deipmangu dinino, asi eremenge kecada tek sisi keca gume. Tonda, ‘Jen jemepya deiki di, Allah tep men yaniptepe’ tenen, konum kael keprum nengdi, akeca kunumameng ati wekra jepmumpane, sun teka tenenange cap, dipru cap kapul men wisiramredi, wang-wang peramre nesala epsengedi, ‘Mali kunung do?’ tenesengedi, ‘Sun kange wang-wang peprur’ tenen, pepsene. Ada, sun aneng epsenga deiki di, ‘Uda, yuk nengdi, isok tep karemenge keca, sun teka tenenge nengdi, tali lupra jenmangtopu, nun peda ukuptepe’ tenen, kika deipra, akeca dopra jenge pangeda, amendada sundi, ‘Uo, nun mali kunmape’ tenen, teniptopmengopda, adeiki sun pedi mambul kange doupra mali kudidanunge. Ada, ‘Sun kael nengdi, yambul walwal tupa kunge nesala tep, mali kudirum’ tenen, pepsene.

11 Uo, ne kayapu, anesala utopu nesalada, sun teka tenena ngeda, tupa men wisiamre neng peda, ‘Aneng lyepkamne’ tenen, Kristus depu. Sun weit yapu utopu nesala kunung dinino, sunda akeca yuma kael keamumdi, akeca jemumpa epsenga deiki di, ‘Angeda mali,’ tenenung keca dinin, kika deipra jepmengepa, adeiki di aneng sun teka tenenange mali kuprepa, puto boun kupkamre. 12 Ange lap pepmasentopu, sun kael nengdi, Yesus tep teka tenepipa, sun weite-du utopu kunung nesala dinin, sun teka tenenange men wisiamre nesala tep, mali kuprumpa, sun anesaladi, ‘Uo’ tenen, mambul kange doupmengopda, tek sisada sun kael nengdi, Kristus tep mali kupra deipmarume. Tonda sun kael nengdi, sun dipru kapul men wisipu neng tep, sun dipru mali kupra deipmarume.

13 Ange tep nengeda, ne kangeda ake. Sundi, isok si eremna tep, karepmenge keca nedi jepnepa, ne weit yapu neng epnengedi, ‘Angeda mali,’ tenenung dinin, ‘Ne epnenga deiki di, tali lupra jengepa, mali kange doupnung,’ tenenune. ‘Ukupra tenepnung’ tenen, ne dingeda, ‘Amenda taru akecada ton cap pio men jenkamne,’ tenenune. Ada tali tep gume. Ada, ‘Ne kune keca deiki di, sun kange dipru kapul men wisipu nesala, sun teka tenenange mali kupra deipsenun’ tenen, pepsene.