1Cor 9 | XteSC | STEP | Uda, yuk upu ton pepkusene. Neda, ware ngebodi ateng koupra talepneua tep, ne tenenetopu men kuptene do? Gume, nedi, ‘Ukupkune,’ tenenetopu kunune. Allahdi ne tep, ‘Ne upu peterembana tep, gonga kemna deiyo ngebo Rasul ngebo kunkamre’ tenen, wepra men deipneupa, pel men donun do? Wepra deipneupa, er pelpu donun do? Gume, erdi wepra deipneupa apelpu talepra donune. Tonda, nun Deiyo Ngebo Yesus ne asuru di men diramsi do? Gume, ne asuru di er diramsi. Yuk nengdi ne tep, “Gume, erda tali ngebo,” penenung dinino, sun Korintus mutu nesala tenipetepso. Yesus cap dipru dukdongopra pel doramsipane, apel doramsa nong kupu ngeda, sun teka men teneprum do, gum do? Gume, ne wa peiamsa nongda, sun konum teka tenepruma tep pepne. Ne wa peamsa nong kupu ngeda, sun ca.

1 Corinthians 9

Yuk nengdi, “Paulusda Allah upu peteremna deiyo ngebo, Rasul men kurure,” pepipa, Paulusdi tamupra pepu upu

1 Uda, yuk upu ton pepkusene. Neda, ware ngebodi ateng koupra talepneua tep, ne tenenetopu men kuptene do? Gume, nedi, ‘Ukupkune,’ tenenetopu kunune. Allahdi ne tep, ‘Ne upu peterembana tep, gonga kemna deiyo ngebo Rasul ngebo kunkamre’ tenen, wepra men deipneupa, pel men donun do? Wepra deipneupa, er pelpu donun do? Gume, erdi wepra deipneupa apelpu talepra donune. Tonda, nun Deiyo Ngebo Yesus ne asuru di men diramsi do? Gume, ne asuru di er diramsi. Yuk nengdi ne tep, “Gume, erda tali ngebo,” penenung dinino, sun Korintus mutu nesala tenipetepso.

Yesus cap dipru dukdongopra pel doramsipane, apel doramsa nong kupu ngeda, sun teka men teneprum do, gum do? Gume, ne wa peiamsa nongda, sun konum teka tenepruma tep pepne. Ne wa peamsa nong kupu ngeda, sun ca.

2 Uda, yuk mutu nesala tep nengeda, “Erdi gonga kepra men peteremamseupa, teka men tenepmupke. Nun Allah upu peteremna deiyo ngebo men kuserure,” pepnetenge dinino, sun Korintus mutu nesala tep nengeda, tek sisi Allah upu peteremamsipa, teka tenepruma cadi, neda sun tep, sun nai bo utopu kusenune. Ne cap, Kristus cap dipru dukdongopra kunemedi, sun Korintus mutu nesala tep, er upu peteremamsisipa, teka tenepruma tep, apel doramsa nong katuai kupka deiki di, nun yuma kaele, ‘Paulusda, tek sisi Allah er upu peteremna tep, gonga kemna deiyo ngebo kurure’ tenen, kael kemnupe. 3 Sun yuk nengdi ne tep, “Er Paulusda gume. Tali ngebopu kurure,” penenge nesala tep, arup pepmasen upupu lap pedinune. Aupu pepnepa, gekepmengyopda, adeiki dipu kael kepnetenge. Tek sisi Allahdi wepra deipneupa, er upu dopra peterembanapu kunune.

“Nun Allah upu peteremna deiyo neng peda, yuk neng sun nong deiki, ikin keca men derinupe,” pepu upu

4 Uda, ne kayapu, ne cap, nun Allah upu peteremna deiyo neng cap yumadi, Allah upu peterepmepepa gekenge nengdi, jen cap, me cap karepsengepa, men jeptepe do? Gume, nun deiyo cadi, akeca karepsengopda jeptepe. 5 Tonda, sun Allah upu peteremna deiyo neng dinin, yuk Rasul neng cap, Yesus er weit yapu cap, Peterus cap sun yumadi, sun domi nerapu cap, kikiman peterep embanunge. Sunda sun nerapu cap peterep embaramengtopu, nedi ton, teka tenepu ner men doptenya tep, penerum do? Gume, ne deiyo tep, ‘Dopkune,’ teneptenyopda, ner doptene. 6 Yuk peteremna nengda, yuk neng melipmenga deiki di kunung dinin, ne cap, Barnabas cap, yuk nengdi nun tep melipra karena gum dipapu, nun butenepuda, tali pel dopnemnya deiki dipu, jen jepra kunkamnem do? Nun butenepu tep, yuk nesaladi men makupsetenge do?

7 Uda, sun ton tenipetepso. Ukupmanto ngeda, ware jen talen ngebodi, er pel dorenge tep, er kunumna karena gum dinin, er pe co bo deiki dipu kurur do? Gume. Ware ngebodi, wa peamrepane, wa kouamre keca nong kuptudi wisiptuopda, men kipra jeptu do? Ware nerdi bisam peiramtua, popra kaleptengedi, aner tep kareptengepa men jeptu do? Gume, ayumada men kupmanto.

8 Aupu pepmasenada, tali nimi kange deiki dipapu pepmasen do? Gume, Allahdi peipupa, Musadi sekeiamu upu neitamaida, aupu deiyo utopu men peserur do? Sun ton tenipetepso. 9 Allahdi peipupa Musadi aupu sekeiamu. ^{▼▼Musa sengamu upu lap pena upuda, nomor 35 dirume.}
‘Sapi bisamdi sun pel donmaser taruda, ‘Erdi ton nun jagung dopra jeprur’ tenen, er sipyal tapu di men koupdongopkurume.’ (Ulangan 25:4)

Allahdi aupu peipunge deiyoda, ada sapi bisampu tep pepu do? Nimi ton tenena tep aupu peipseu do? 10 Gume, tek sisi Allahdi nimi cap tep tenepudi, aupu peipseu. ‘Tek sisi nimi bicau’ tenen, melimdana tep aupu peipseu. Wa tu palina ngebo cap kouamengepa, nong kupredi wisiprepa, kirbana ngebo cap, ‘Wa peipmapepane, amenda nong kuprepa, kipkameng kecada, bokra karepsengepa, nun cap kikiman jenkamep’ tenen, wa peipdatenge teptoda telepe pua. Mesumpu pel dopmengepa, amenda taru men bokra karepmengopda, ada pio mali. Ange tep nengeda, Allahdi nun yuma tep teneamseudi, aupu peipupa, Musadi sekamu.

11 Ange tep nengeda, sun wa koun nesaladi yal keca kouamengepane, amenda taru bongopredi nong kupra wisipyopda, bokra karepmengepa jeramengtopu, nundi Allah upu gonga kepra yal keca utopu peteremamsepu. Ukuramepua cadi, ukutaruda, tali akwaptu keca karepsetumpa, men doproptepe do? Karepsemumpa dopropmepyopda, sundi, ‘Uo angeda ikin weik keca nun nong deiki deipsengedi, moropmasenge,’ tenenkamserum do?

12 Uda, yuk peteremna neng amenda taru yaidi, ukutaru peteremengepa, tali kange deipra karemum ngeda, telep dinin, nun menmena taru peteremamsepu. Atep, ila telep ngeda, nun pe tep ngeda akeca karepsetume. Tek sisi pepman do, mok pepman do? Tek sisingepu pepmasene. Peteremna deiyo neng kuramepua deiki di, akeca yuma mororamtepe dinino, nundi peteremamsepu taruda, ‘Kristusdi nimi lyemna kai telep upu tep, dabal kuprepa, men gekepnung’ tenen, akeca-keca yuma men mororamsepu. Angepu gum dinin, ikin kwamseunge yumada, ‘Dakwapye’ tenen, nundi sun tep pio men mororamsepu.

13 Uda, ange utopu ton pepkusene. Allah er si eremna tep, karerbarameng ati pum pel donge deiyo nengdi, akati kareryakarameng keca di bokra, sun jen keca doronunge. Tonda, Yahudi yala nesalada, ‘Allahdi nun mali keca gum kupra deipkamser’ tenen, gam kun keca popra, gel yakra deiamya deiki, uku sengnungai deriryakanunge. Akeca derinungai pel donge deiyo nengdi, gam keca popra derinung keca bokra, sun jen tep doronunge. Ange kunungada, sun ton men tenipmarumdi, moupra men kael keprum do?

14 Aupu pepmasentopu, Yesusdi upepra deipseue. “Ware ngebo do yuma, sundi ne kai telep upu, nimi lyemna upu peteremenge nengda, peteremengepa, sun upu gekenge nesaladi, aneng tep sun talenung keca bokra, sun peteremna neng tep makupra karenkamenge. Sun peteremenga deiki di, yuk neng karepmengepa, jen jepra kunkamenge,” pepra deipseue.

15 ‘Akeca-keca yuma, ne menenga keca utopu cadi, walito karepkunenge’ tenen, mororamsetene dinin, ange men mororamsisi. Tonda, asurat sekeipmasenada, ‘Sun Korintus mutu nesaladi akeca-keca karenkamnenge’ tenen, men sekmasene. Gume. “Allah upu peteremne taru yumada, menenga keca morona gum di, mesum dipu peteremnune,” pepra, yuk neng tep kange deipra lap penuna cadi, sundi ato keca karepnemumyopda, aupuda ton cap men peptene. Ne depnyopda, ada yambul ikin pua dinino, nedi Allah upu mesum dipu men peterepsetenyopda, ila ikine kange doupra kunkamne.

16 Aupu pepmasen dinino, Allah er upu, nimi lyemna tep kai telep upu peteremne taruda, kange erepnedi, “Neda pio telep ngebo kunune,” pepra men gemeptene. Angeda gume. Yesusdi ne tep, ‘Paulusda, ne upu dopra peterembenkamre’ tenen, wepra deipneue. Yesusdi wepra deipneua cadi, apelda men taptene. Allah upu peteremne pel tapnyopda, pio ikine kupnetue. Ukupnyopda, Allah ila di wenepnetue.

17 Dinino, Allahdi, “Apel dopneo,” pepra men deipnetupa, ne kange dipapu Allah upu petereptene teptoda, sun geken nesala tep, menenga keca moroptenepa, karepnetengopda, ‘Walito karepmanenge,’ teneptene. Dinino, ne kange dipapu men peteremnune. Allahdi, “Ne upu, nimi lyemna upu dopra peteremkamrume,” pepneudi, wepra deipneua tep, erdi peipneutopu, er pel dopra kunune. 18 Ange tep nengeda, wareto menenga keca dopropkamne do? Ne menenga dorona utopu keca pepkusene. Ada ake. Peteremna deiyo ngebo kununa cadi, adeiki di co bo moroptene dinin, ange gume. Akeca-keca morona gum dipapu, mesum dipu peterepnyopda, ne kange deipkamne. Ne kange derina tep peteresenune. Ne menenga utopu keca dorona tep ngeda ange pua.

19 Yuk neng sun co bo deiki kunupra deipneidi, “Nun pel mesum dipu tali pel dopseo,” pepra talenengepa, sun pel melimna ngebo men kunune. Tali ngebo kunun dinino nedi, ‘Allah upu peterepnepa, nesala weik gekepmengedi, weika di teka tenenkameng’ tenen, yuk nesala yuma, sun amutara bukra, sun tali pel melimna ngebo utopu kupra kunune. 20 Yahudi yala nesala cap kikiman kuramsi taruda, ‘Yahudi yala nesala kurameng utopu kupnyopda, Allah upu peterepnepa gekepmengedi, Yesus teka tenenkameng’ tenen, sun kurameng kecapu talepra kuramsi. Neda, mem upu Musa sekeiamu upu amutara bukra, amem keca yuma talepra men kunun dinino, sun yuk nesaladi, ‘Aupuda ila mambule’ tenen, talepra kunge nesala cap, kikiman kuramsi taruda, sun kuramengtopu kuramsi. Ukupra kuramsa deiyoda, ‘Allah upu peterepnepa, gekepmengedi, Yesus teka tenenkameng’ tenen, kuramsi.

21 Yahudi yala gum nesala yumada, Allahdi, ‘Ukunkamrume, angeda men kunkamrume,’ peipupa, Musadi sekeiamu mem upu men gekeramya cadi, aupu talepra men kununge. Sundi akeca-keca yuma tenena gum di, tali lupra kurameng nesala cap kikiman kuramsi taruda, sun kuramengtopu kuramsi. Musa sekeiamu upu yuma tenena gum di, tali kuramsinge deiyoda, ‘Ukupne dingeda, Allah upu peterepnepa gekepmengedi, Yesus teka tenenkameng’ tenen, kuramsi. Tek sisi Allahdi, “Angeda kunkamrume, angeda men kunkamrume,” pesere upuda, men tamnune. Kristusdi pesere upu talepra dumsisipu kunune. Angeda pio men taptene.

22 Dinino, sun kange dipru neitam teka tenenungada, kapul men wisiamu nesala cap, kikiman kuramsi taruda, ‘Yesus teka tenenkameng’ tenen, sundi kuramitopu kuramsi. Ada, sun anengdi, ‘Uo, mankau di mali kupnup’ tenen, akeca-keca tapra kuramitopu, ne peda akeca tapra kuramsi. Wareto nesala do yuma, ayala-ayala nesala yuma, sun kuramengtopu, sun cap kikiman kuramsi taruda, mali kuna gum dinin, sun kurameng kecapu talepra kuramsi. Deiyoda, ‘Ukupne dingeda, Allah upu, nimi lyemna tep telep upu peterepnepa gekepmengedi, Yesus teka tenenkameng’ tenen, kuramsi.

23 Akuramsinge yuma cap, ange tupa kune keca yuma cap deiyoda, ‘Nesala ban-ban yuma, Allah er nimi lyemna upu, er kai telep upu gekepmengedi, Yesus teka tenenkameng’ tenen, kunune. Tonda, ukupne pangeda, Allahdi, “Ne nyapu tep, telep keca karenkamsene,” pepra peamseutopu, ‘Ne cap, sun cap, nun yumadi, kikiman dopropmepedi, teleppu kunkamep’ tenen, kunune.

“‘Allah er pel telep kupra donkamep’ tenen, pio pe deipra, puto di pel donkamepe,” pepu upu

24 Ne kayapu, tenipterepso. Sun kamet pen nengda, ‘Menenga keca dopropkup’ tenen, nimi denge weika di sepdaro banung dinin, menmena bisbisa kamre ngebopu, menenga keca dororure. Ange men kael kepmarum do? Ange tep sun peda, ‘Allahdi menenga keca tek sisinge karepkamsere ngeda, dopropkupe’ tenen, pio piripra telep kupra kunkamrume.

25 ‘Menenga keca doproptepe’ tenen, palepra kamet penge nesalada, kapul kupmenge taruda, menmenada ketenemna tep, ‘Nun nong puto kepkamser’ tenen, sunumna tep sepra banunge. Pele weik donungada, ‘Menenga keca dopropkamep’ tenen, kununge. Dinino, sun doronung kecada, keana keca pua. Atep, sun kamet pen nengdi dopropkameng kecada, amenda gum kupkamre. Dinino nunda, ‘Nun kange dipru puto kemdina cap, telep kunkamser’ tenena cap, pio puto di piripetenupada, menenga keca, gum kupkamrenge dorona tep gume. Nunda, ‘Allahdi karenkamser kecada, men gum kupkamrengepu dopropkamep’ tenen, kunupe. Akecada pio kunkamre.

26 Ange tenena tep nengeda, nepuda, yuk neng kuramengtopu men kunune. Ada sundi, kware kuprepa, ‘Amutu benkune,’ tenena gum di, kange douna gum dipapu, lukdangedi, kwepdanen embaramengtopu men kunune. Tonda, yuk nengdi buru getepra tukra podarameng nengda, sun ban-banapra tali-tali poramenga utopu men kunune. Neda, kael ngebodi, yuk ngebo er nong deikipu dipdongopra poramretopu kunune.

27 Ada, nedi tali-talipu men kunune. ‘Allahdi peseretopu dumsisipu kunkamne’ tenen, ne nong cap, ne kange dipru cap tep, pio moupra kalengdanune. Ada tali tep gume. ‘Yuk neng gekepkameng’ tenen, Allah upu konum peteremne dinin, amendada, ne peda mali kupnyopda, Allahdi menenga keca karepkamnere ngeda, ‘Ne peda men dopropnun’ tenen, pio pe deipra piripetepnedi, ne dipru kalengdanune. Ne Paulusdi pepsene.