1 John 2

‘Teka tenena nengdi, mali kupnung’ tenen, pepu upu

1Ne nyapu ne kange derisenune. ‘Sunda mali men kunkamruma’ tenen, aupu seksene. Dinino, ware neng do yuma, mali kupmengopda, nun dipru kwa dimna cap, makuna cap tep, Allah damai tupa-tupa upu melipra peserur ngebo tenpu kuserure. ‘Allahdi sun tuai mutu nesala poptaprur’ tenen, Yesus Kristusdi, nun makuna tep, telep upu pepredi, upu sengrure. Allah damai melimna upu peserur ngeboda, Yesus Kristus pua. Yesus Kristusda, Pio Dumsisipu Kurure.

2Nun mali tenenup keca cap, mali kunupe keca cap, gum kupra derina tep, konum kunupseudi, lyepra deipseue. Allahdi nun mali kunup keca tep wenepra popsetu dinin, ‘Sun popsenun’ tenen, nun yo pununa tep, Allah teneamutopu, sun mali nengdi Yesus popipa, er yapi embeua deiki di, nun mali kun keca yuma daepra, gum kupra deriserepa, Allahdi kaukemdongoserure. Ada, nun mali kunup kecapu gume. Nesala ban-ban yuma sun mali kunge keca pepe daepredi lyemrure.

3Allahdi, “Ukunkamrume, ange ton men kunkamrume,” perur upu yuma gekepra dombaramepya deiki di, ‘Allah cap, nun cap, kikiman kunupe,’ tenenupe. Ada kange bongtona gum di, ‘Tek sisi er cap kunupe,’ tenenupe. 4Ware ngebo do, “Ne cap, Allah cap, kikiman kunume,” pepra tali pertamrur dinin, Allahdi, “Ukunkamrume, ange ton men kunkamrume,” perur upuda, men gekepra dombarur ngeboda, angeboda, mok upupu perure. Tonda, tek sisi upu er dipruai men kurure.

5Dinino, ware nesala do yuma, Allah er upu moupra gekepra dombanunge nengda, sundi Allah tep, ‘Nun naie’ tenen, tek sisi kange pio deipra kununge. Anengda, sun dipruai bicau tenena kecada, konum wisipka tep, Allahdi nimi tuai nesala bicau teneretopu, sun peda nimi tep, bicau tenenunge. Yuk neng tep bicau tenenungada, men suktalepkamre. 6Ware nesala do, yuma, “Teka tenepsidi, Allah cap, ne cap, kikiman kunume,” penge nengda, adipapu Yesus kuramutopu kunkamnunge. Yuk ton gume. Ukuramepya deiki dipu, ‘E, Allah cap, nun cap kikiman kunupe,’ tenepra kael kemnupe. Atep, Yesus kuramutopu men kunge nengda, “Allah cap nun cap kikiman kunupe,” tali peptaptenge dinin, ada mok upupu penunge.

7Uda ne kayapu, “Ukunkamrume,” pepsen upuda, ukupunge men seksene. Gume, gonga kepra teka teneprum taru adine, dipdongopra ataru neitamai yuma konum gekeramrum upupu seksene. Aupuda ake. “Sun yuma kange deipdana bicau tenepra kunkamrume,” pepne. Aupu, “Ukunkamrume,” pepmasen upuda, Allah upu deiki konum gekeramrumnge dinin, ne Yohanesdi ka di ton cap pepsene. Ada, sun yuma kange deipdana bicau tenepra kunkamrume pepsene.

8Asekman upuda, ukupu upu gume pepman dinino, ton yambul ukupunge utopu kurure. Uda, “Ukunkamrume,” pepmasen upuda, Yesus er kuramunge cap, uda Yesus er upu doproprumdi, kurumu keca cap, adeiki di, ‘Ada tek sisi kupupa,’ tenepra dinupe. Allah upu deiki di, kange kunungna keca dirin kupbanmaryanen, kange dirin kecada, konuman dirin kupmare. Ange tep nengeda, “Allah upu gekepra doproprum ngeda, aupuda tek sisipu kurure,” pepmasene. Yesusda dirine utopu kurura cadi, tek sisi dirin kecada konum dinupe.

9Ware neng do, yuma, “Nunda dirine neitamai kunupe,” penge neng dinino, sundi yuk nesala tep, ‘Anengda, nun songe,’ tenepra mali kunung nengda, ukutaru pe, yuk taru pe, kunungna neitamaipu tupa kununge. 10Ware neng do yuma, sundi yuk neng tep, bicau tenepra, telep kupra kunung nesalada, dirinaipu tupa kununge. Ukununga tep, sun kuramenga deiki di yuk neng ton mali men kunkamenge. 11Ange utopu gum dinin, ware neng do yuma, sundi yuk neng tep, ‘Anengda nun songe,’ tenepra, mali kunung nesalada, kunungnaipu tupa kununge. Ada tek sisi kuna keca men kael kepya tep, walwal utopu kungedi, amenda kunkamre keca yuma men tenenunge. Ada asuru pun nengdi, bisi baramengai men dingedi, yukai baramengtopu, anengda mali kupra walwal kunga deiki di, sun ban bisi men tenenunga tep pepne. Ada, sun kange tenena gum di, asuru pun neng kuramengtopu kununge.

12Sun kaberto nengda, nedi bicau tenesenuna tep, ne nyaputo kurume. Sun mali tenerumu keca cap, mali kurumu keca cap, Yesus Kristus er si deiki, Allahdi, ‘Sun mali kurami dinin, ange teppu menmena men popkune’ tenen, yaproudi, tali kange doupke. Ukupudi, sun mali kuramrumnge yumada, konum kaukeamseudi, sun mali ngeda gum kupra deipke. Ange tep nengeda, aupu seksene. 13Sun tek sisi wisi nengda, ne nai yaputo kurume. Akeca-keca yuma kapul men kwamu taru, menop di er tenpu kuramu ngebo, Allah konum kael keprume. Allah konum kael kepruma tep, aupu seksene. Sun kaber nengda, Pio Mali Kurur Ngebo, Kain Jen Ngebo konum bisipra yaniptapruma tep, aupu seksene. Tonda, ne nyapu utopu nengda, nun nai Allah konum teka tenepra kael kepruma tep, aupu seksene.

14Ne nai yapu utopu nengda, akeca-keca yuma kapul men ketekeiamu taru, menop taru di, er tenpu kuramu ngebo Allah konum teka tenepra kael kepruma tep, aupu seksene. Sun kaber nengda, sun dipru wisipseupa, sun dipru dimpeprap kurumnya deiki di puto kupseu. Tonda, Allah er upu teka teneprumdi, talepra dombarume. Tonda, Pio Mali Kurur Ngebo, Kain Jen Ngebo konum bisipra yaniptaprume. Ange yuma tep nengeda, aupu seksene.

“Tali tuai keca tep, apu talepra, kange men derinkamrume,” pepu upu

15Tali tuai yuma cap, aneitamai kure keca yuma cap tep, ‘Uo, angeda pio taleptene,’ men tenenkamrume. Wareng do yuma, Kain Jen Ngebodi talerur keca cap, atalepra kunge nesala cap tep, ‘Angeda ne mawa’ tenen, taleprumnyopda, nun Nai bo Allah tep tek sisa kange men derirume. 16Angeda mesum tep men pepsene. Deiyoda, tuai tara kurur keca yumada, mali kunge nesala, sun putaramrenge cap, sundi, ‘Uo, ange doproptepe’ tenen, asuru di epra putaramrenge cap, sun bunga do, sun talepra gemenange yuma, akecada, nun nai Allah ernge gume. Amali tenena cap, mali putana cap, ayumada Kain Jen Ngebo erngepu kurure. 17Atuai kure keca yuma cap, mali kunge nesala sun putaramrenge yuma capda, gum kupkamre. Ange yuma gum kupbankamre dinino, ware ngebo do yuma, Allah erdi tenepra pesere upupu gekepra dombaramenge nengda, pio gam kunkamenge. Pio men depkamenge.

‘Yesus si yanipkamep’ tenen, yakasenung neng tep, “Kange moupkamrume,” pepu upu

18Ne nyapu tep kange derisenune. Ukuda, sirya taru di Yesus yaryopda, tuai kapu keca yuma gum kupkamre taruda, konum damai kupsere. “Amenda Yesus Kristus Yanipkamra Deiyo Ngebo yankamre ja,” peramipa, gekeramrumtopu, ukutaru konuma. Konum yanmanto kupmare. Erdi Kristus si yanipra yankamretopu, er nyapu peda, ‘Kristus si yanipkamep’ tenen, nun damai konum yakasenunge. Ukununga deiki di, ‘Tek sisi sirik taru konum damai kupmare,’ tenenupe.

19Anengda, nun tapra nun kan-kan di yukai bendopi dinino, nun kange cap, sun kange cap kikiman gume. Nun teka tenepra, nun kange tenenup utopu neng kuramtenge teptoda, nun tamna gum di, nun cap kikiman kuramtepe. Dinino, sundi nun tapra bendopidi, yuk tara keproipa, epmupudi, sun kurami keca kael kepmupke. Ada, ‘Aneng sun kan-kan dadi, tenpu ngebo pe ton nun teka tenepra kange tenenuptopu, sun peda, teka men tenenunge’ tenen, kael keamepu.

20Sun atapsei nengda, ukunung dinino, sunda gume. Yesusda, mali kuna keca tenpu pe men kurure. Allahdi er Lek Sambalada, Yesusdi karepseupa, sun dipruai wekseu. Tonda sun yuma, er tek sisi upu konum kael keprume. 21‘Allah er tek sisi upuda sun walwale’ tenen, aupu men seksene. Angeda gume. Allah er upuda, konum kael keprume. Tonda, er tek sisi upu neitamaida, mok upu tenpu pe men kurure. Ange butene tep nengeda, sun dipru kwa dimna tep, aupu seksene.

22Mok upu perur ngeboda, wareto ngebo do? Erda, ‘Allahdi Yesus Kristus nesala ban-ban yuma lyepredi taleprepa, domembenkamenge’ tenen, dokotepseu ngeboda, ‘Yesus er tenpua’ tenen, teka men tenepredi, “Ada men kupmanto,” perure. Aupu perur ngeboda, mok upupu perure. Er peretopu penge nengda, Kristus tep, yanina neng kununge. Sundi Allah pe, er Mi Yesus pe, teka tenena gum di, ‘Yanipra tapkamep’ tenen, bisirterenunge. 23Allah er Mi Yesus tep, teka men tenengedi, wilipra tamnung nesalada, Allah pe teka teneprap men talenunge. Ange utopu, Allah er Mi Yesus tep teka tenengedi talenung nesalada, er nun nai Allah peda teka tenepra talenunge.

24Sun kange dipru moupkamrume. Ada, gonga kepra teka teneprum taru dinin, ataru yuma gekeramrum upuda, ‘Mankau di tapronup’ tenen, pio moupkamrume. Aupuda, tamna gum di, sun dipruai pio kuseryopda, sun pe cap, Allah er Mi Yesus cap, Allah cap, kikiman kunkamrume. 25Allahdi, “Karepkamsene,” pediramseu upuda ake. “Ada, pio gam kuna deiyo keca karepkamsene,” peipseu. 26Uda yuk nengdi utenesenunge. ‘Anengda, kange yuk tenepmengepa, nundi dopra yuk mali bisi dubetepepa, nunpu domyasetenge,’ tenesenunge. Utenepmengedi, ‘Dalupra dubesenunga’ tenen, asurat seksene.

27Dinino, sunda Allah er Lek Sambala Yesusdi karepseuada, sun dipruai wekamudi, tup kurura tep, tali nesaladi pepsetenge upuda, men putaserure. Aneng pesenge upuda, men gekenkamrume. Dinino, Allah er Lek Sambaladi akeca-keca yuma peteremserure. Akeca yuma peteremsere ngeda, moupra gekenkamrume. Er pe, er peteremrenge pe, tek sisipu kurure, tali gume. Atep nengeda, erdi peserengepu gekepra dombarumnyopda, Yesus cap kikimanpu kunkamrume, pepsene.

“Pio teleppu kunge nesalada, Allah er nyapu kununge,” pepu upu

28Uda ne nyapu kange derisenune. Ukuda pio teka tenepra, Yesus upupu dombankamrume. Ukuramepepane, amenda Yesus yaryopda, nun ali kuna cap, kwar dangna cap gum di, ‘Tali kange doupkamep’ tenen, pepne. 29Sun kaele, Yesusda mali keca tenpu pe men kurure. Pio teleppu kurura tep, er nyapu pape teleppu kununge. Ada, ware neng do, yuma, sun telep-teleppu kunge nesalada, sun nongda gam kurami dinin, sun kange tenenange cap, sun dipru cap, dena utopu kuramupane, Yesus lyepseudi gam bukra deipseua tep, ukutaruda, teleppu kununge, pepne. Ada, nun yuma peda ukunupa tep, ne Yohanesdi pepne.