1 John 3

Nun nai Allahdi nun tep ila di bicau teneserya tep pepu upu

1Ne kayapu, ne mambul upu pepkunada, gekeneso. Nun nai Allahdi bicau pio weike teneserura deiki di, er nyapu kemdiserure. Ukusere ada, tali gume. Tek sisi Allahdi er nyapu kemdiserura tep, tek sisi er nyapu kunupe. Tali kunge nesalada, Yesus teka men tenepya tep, sundi nun tep nengeda, ‘Sunda Allah er nyapu kununge’ tenen, teka men tenesenunge. Sun peda, Allah nyapu tek sisa teka tenepra men kununge.

2Ne kayapu ne kange deipsene. Ukutaruda, Allah er nyapu kunupe. Amenda nun nong kunkamepada, kapul men lap pepsei. Dinino, nun kaele. Yesus er yankamre taruda, er nong pe, er kure keca pe, tek sisi kuretopu epkamepa tep, nun pe er kuretopu kunkamepe. 3Yesus kuretopu kunkamepe, teka tenepra pio dinge nesala yumada, ukununge. Ada, ‘Dipru mali kupnerur’ tenen, kange bongtona gum di, mali kuna keca yuma pio tamnapu kununge. Ada, ‘Yesus telep-telep kuretopu kunkamep’ tenen, kununge.

4Mali kunge nesalada, sun mali tenena cap, mali kuna cap deiki di, Allahdi, “Ukuna meme,” peipu upu yanitamnunge. Tek sisi mali kunada, Allah upu yanitamna. 5Dinino, sun kaele. Nun mali tenenup keca yuma cap, mali kunup keca yuma cap, Yesusdi, ‘Gum kupra daepkamne’ tenen, yaue. Tonda, Yesus er dipru neitamai mali kun keca tenpu pe men kurure. Teleppu kurure. 6Yesus teka tenepra, er cap kikiman kunge nesalada, tupa-tupa mali men kununge. Sun tupa mali kupbange nesalada, Yesus men dirami. Tonda, Yesus teka tenepra, er pe men kael keami.

7Ne nyapu gekepso. Yuk nengdi, ‘Nun peteremepya deiki di, nun tarapu domyasetenge,’ tenesenung nesala yuma tep, sun mok upu men gekenkamrume. Ware nesala do yuma, sun kunge keca dumsisipu kupra kunge nesalada, telep nengpu kununge. Ada, Yesus er pe dumsisi kuretopu, kununge.

8Ange utopu, ware nesala do yuma, sun mali-mali kunge nesalada, Kain Jen Ngebo er nyapupu, pio tup kununge. Warya tep do? Gume, ada Allahdi akeca-keca yuma ketekeipu taru dinin, aneitam taru yumada, Kain Jen Ngebodi Allah upu yanipudi, mali kuramutopu tupa kurura tep, er nyapu pape, utopu kununge. Allah er Mi Sisadi, ‘Ukupkamne,’ tenemudi, yanamnga deiyo kecada ake. Ada, ‘Kain Jen Ngebo er mali kuna yuma cap, mali pel doramrenge yuma cap, gum kupra deipnedi, dopra dopkamne’ tenen, Yesus yau.

9Allah er lyepredi ukupu kange tenenange cap, uku dipru cap, dongorur nesalada, Allah er Sambala sun dipruai tup kurura tep, anesaladi tupa-tupa er upu yanipra mali men kuptenge. Sun kange tenenange cap, dipru tenenange yuma cap, Allah lyepudi ukupungepu konum karepseua tep, sundi tupa mali men kuptenge.

10Uda ton nesalada, Allah er nyapu kununge. Dinino, ‘Yuk nesalada, Kain Jen Ngebo er nyapu kununge,’ tenepra kael kemnup deiyo kecada ake. Ada, Allah er upu peretopu, gekepra men dombanung nesalada, Allah er nyapu men kununge. Tonda, ange utopu, ware nesala do yuma, sundi yuk neng tep, bicau tenena gum di, men makunung nesala pape, Allah er nyapu men kununge. Ne Yohanesdi upepne.

Kange deipdana, melimdankamnupa tep, pepu upu

11Sun teka teneprum taru adine, ataru yuma gekeramrum upuda, ton cap pepkusene. Aupuda ake. Nundi bicau tenepra makudanapu kunkamepe, pepsene. 12Uda Kainda, Kain Jen Ngebo er upu gekena ngebo kuramudi, er weit bo Habel poptapudi, kuramutopu men kunkamrume. Kaindi er weit bo poptapu ngeda, ware keca deiyo tep do? Deiyo ake. Kain er kuramu keca yuma malipu kuramu dinino, er weit bo Habelda, dumsisipu kuramnga tep, Kaindi yu kupupa, Kaindi Habel poptapu.

13Atep nengeda, ne weit yapu utopu nengo, sun Yesus teka men tenenung nengdi, “Nun songe,” peprap yu di kuprepa, mali kupsengopda, lukdana men tenimtonkamrume. 14Ware nesala do yuma, sundi yuk neng tep, bicau tenena gum di, men makunung nesalada, gam kuna deiyo keca men dopropipa, sun dipruai men kurure. Sun pio tali depkameng nesala, tali nongpu tup kununge.

Dinino, nunda aneng utopu men kunupe. Menop di nun kange tenenange cap, dipru cap, dena utopu kuramupu dipunen, ukutaruda, Yesusdi konum gam bukra deipseue. Pio gam kunkamepa tep, kange di ton cap, men depkamepe. Akeca kael kemnupa deiyo kecada ake. Ada, nundi yuk neng tep, kange deipdana, bicau tenepra melimdanupe. ‘Bicau tenepra melimepya deiki di, ka di ton cap men depkamepe’ tenen, kael kemnupe. 15Nesala yuma, sundi yuk neng tep, songe tenengedi, yu kupra wilipra kunge nesalada, nimi pon nesala utopu kununge. Tonda, sun kaele, nimi ponge nengda, pio gam kuna deiyo keca sun dipruai men kurure.

16Uda talinge tep gume. ‘Bicau tenepra makunada, pio tek sisinge dan nge do?’ tenena tep, Yesusdi er kuramunge tenipkurume. Bicau tenepseudi, ‘Sun men depkamenge’ tenen, nun tep depudi, lyepseu. Ange tep nengeda, nun pape utenenkamepe.

‘Nun kupsere keca yuma cap, nun kupe keca yuma cap deiki di, nundi yuk neng tep, bicau tenepra makudanapu kunkamepe. Akeca-keca yuma pe, nun mawa tenena gum di, yuk neng tep makudanapu kunkamepe. Nundi yuk neng tep, meliamepya deiki di, nun depmepya pe, popsenga pe, telepe pua,’ tenenkamepe.

17Ware nesala do? Yuk tali kankan kunge nesala, sundi akeca-keca putaprepane, akapu keca yuma talepra kunung nengdi, asuru di epmenge dipunen, pio bicau tenena gum tep, men makununge. Ukuramenge nesalada, Allahdi nimi tep bicau teneseretopu, anengda yuk nimi tep, ware kupra bicau teneptenge do? Gume. Allahdi nimi bicau tenena karesere kecada, sun dipruai men kurure.

18Ne nyapu, nun yumadi yuk neng tep, “Nun bicau tenepra makunkamsepe,” pepra, tali upu deiki dipu men pertamkamnupe. Angeda gume. Allah upu deiki peseretopu, tek sisipu yuk neng tep, bicau tenepra makunkamepe. 19Allahda, akeca-keca yuma kael keamudi, er ila kaele di tenerur kecada, pio weike kurure. Nun kange tenenange neitamai di, mali keca kusere dipunen, Allahdi, “Gume, ne tep konum teka tenepra ne nong deiki sun kange konum deipnei. Atep, sun dipru mali kure ngeda, tupa-tupa men tenenkamne,” tenepredi, tali kange doserure.

20Tonda, nimi makuramepya deiki di, Allah moron taru do, nundi, ‘Uo, nun kupe keca yumada, Allah diserure,’ tenepe taru do yuma, ali gum di, tali kange deiprap Allah tep moronkamepe. 21Ne kayapu, nun pe kange di, ‘Ne mali kunune’ tenen, ali di men tenepdapyopda, Allah moron taru do, er damaito kupe taru do yumada, ali gum di, telep kangepu doupra, kwar dangna gum di, Allah moronkamnupe. 22Tonda, Allahdi, “Ukunkamrume,” pepsere upu yuma moupra gekeprap dombapedi, er kange derirur pelpu donupe. Ukupmepe dingeda, ware keca do yuma, nun putapser keca, ‘Erdi makupkuser’ tenen, Allah tep moropmepyopda, gekeseredi, akeca yuma kareserepa, doronkamepe.

23Uda Allahdi, “Ukunkamrume,” perur upuda ake. Tenpu ngeda, Allahdi, “Ne Mi Sisa Yesus Kristus teka tenenkamrume,” peserure. Ton ngeda, Allahdi peipseuto, “Sundi bicau tenepra makudanapu kunkamrume,” peserure. 24Ware nesala do yuma, Allahdi, “Ukunkamrume,” peserur upu gekepra dombanung nesalada, Allah cap dukdongoprap, kikiman kununge. Tonda Allah sun dipru neitamai kurure. ‘Allah tek sisi nun dipru neitamai kuserure’ tenen, kael kemnupa deiyo kecada ake. Ada, Allah er Lek Sambala karepseua deiki di kael kemnupe.