1Jo 4 | XteSC | STEP | Ne kayapu, Allah er tek sisi upu gum dinin, yuk mok upu dopra peterembanung neng weike kununge. Amok upu peteremna nengdi, mutu-mutu yuma konum yakasenunge. Ange tep nengeda, ne kayapu, anengdi, “Allah er Sambaladi pepneu upu pesenupe,” pepra tali pertamnung upuda, aupu gekepra, teka men tenenkamrume. Tali lupra teka tenena gume. ‘Allah er Sambaladi peipupa, peteremnung do, gum do?’ tenen, nimidi penung upu yumada, ‘Tek do, mok do?’ tenen, kunupetepkamrume.

1 John 4

“Mok upu peteremsenung atep, ‘Sun penge upu yuma, tek do, mok do?’ tenen, kunupetepkamrume,” pepu upu

1 Ne kayapu, Allah er tek sisi upu gum dinin, yuk mok upu dopra peterembanung neng weike kununge. Amok upu peteremna nengdi, mutu-mutu yuma konum yakasenunge. Ange tep nengeda, ne kayapu, anengdi, “Allah er Sambaladi pepneu upu pesenupe,” pepra tali pertamnung ^{▼▼tali pertamnung – Aupu pepkada, Nabi Falsu perameng neng tep pepu. Anengda, “Nunda, Allah er upu lap pena deiyo neng kunupe,” penung dinin, mok upupu pertamnunge. Ato kunge neng tep, ‘Nabi falsu’ penupe.} upuda, aupu gekepra, teka men tenenkamrume. Tali lupra teka tenena gume. ‘Allah er Sambaladi peipupa, peteremnung do, gum do?’ tenen, nimidi penung upu yumada, ‘Tek do, mok do?’ tenen, kunupetepkamrume.

2 ‘Tek do, mok do?’ tenen, kunupetepkamrum ngeda, lap pepkusene. Ada, tek sisi Allah er Sambala puto deiki pesunungada, katuai kael kemna keca ake. ‘Yesus Kristus nimi nong utopu kupra konum yaue’ tenen, teka teneprap katuai penung nesalada, Allah er Sambala puto deiki penunga tep, Allah er nyapu kununge. 3 Ange utopu gum dinino, sundi, “Yesus tuai yau dinin, nimi nong utopu nong gume. Angeda, tek sisi gume,” tenengedi, penung nesalada, Allah er Sambala puto deiki di men penunge. Pio gume, sun yuke. Aupu penung nengda, Yesus Kristus Yanipkamra Deiyo Ngebo, er puto deiki di sun taleprepa penunge. Ada, “Yesus Kristus Yanipkamra Deiyo Ngebo, amendada yankamre ja,” peramipa, gekeramrum ngeboda, angebo pua. Er konum yaudi tuai tara embarure.

4 Ne nyapu utopu nengo, sunda Allah tep, teka tenepra talerum nengda, sun dipruai kusere ngebo, Allah, er puto pio weike kurure. Dinino, mok upu peteremenge neng yuma, sun dipruai kuredi, talere ngeboda, Kain Jen Ngebo er puto meteke. Ange tep nengeda, Allah er puto deiki taleserepa kuruma cadi, Kain Jen Ngebo er talepre neng yuma, konum yanipra bisiptamrume.

5 Mok upu peteremenge nengda, sun nai Kain Jen Ngebo talerya deiki di, er tenerur kecapu tenepra upu penunge. Kain Jen Ngebodi er tenere ngepu tenepra penunga tep, yuk tali kange dounge nengdi, aupu gekenunge. 6 Dinino, nunda Allah er nyapu kunupe. Er puto deiki kupedi upu peramepepane, Allah teka tenepra pio talenung nesaladi, nun upu gekesenunge. Allah er nyapu gekesenung dipunen, teka tenena gum di, Allah men talengedi kunung nesalada, nun penup upu pio men gekesenunge.

Allah weika di bicaue teneseretopu, nun bicaue tenepra, makudanapu kunkamepa tep, pepu upu

7 Ne kayapu, nun yumadi bicau tenepra makudanapu kunkamepe. Ada, bicau tenena cap, makuna cap deiyo kecada, Allahdi kareserura tep, pepne. Sundi yuk nesala tep, bicau tenepra makurameng nesalada, Allahdi sun kange tenenange konum gam bukra deipupa, sundi ‘Allah teka’ tenen, talepra kununge. 8 Allahda, pio bicau tenerur ngebo kurure. Allahda ukurura tep, ware neng do yuma, sundi yuk nesala tep, bicau tenena gum di, men makunung nesalada, Allah teka tenepra men talenunge. 9 Allahdi utenepu. ‘Yesus pel dopkamra deiki di, sun pio gam bukra Yesus puto deiki kunkameng’ tenen, Allah er Mi Sisa tenpupu kuramu dipunen, nun tuai mutu neitamai, nun tuai neng yuma tep, Yesus konum karepsue. Yesus karepseua deiki di, ‘Allahdi nun tep, pio bicau teneserure’ tenen, kael kemnupe.

10 Tek sisi bicau tenena ngeda ake. Ada, nundi mankau kuramupudi, Allah tep kange men deamupke. Ukuramupu dinino, nun mali kupe keca yuma akwamupane, ‘Sun yo pununa tep, Ne Mi Sisa Yesus popmenga deiki di, sun mali keca kunupredi, daepkamre’ tenen, Allah erdi bicau tenepseudi, er Mi Sisa karepsue. Ukupseuada, tek sisi bicau tenena ngeda adano, pepne.

11 Uda ne kayapu, Allahdi nun tep, weika di pio bicau tenepseua tep, nun pape bicau tenepra makudanapu kunkamepe. 12 Ware neng do yuma, nesaladi Allah er nong pe men diramupu dinino, nundi bicau tenepra makudanapu kupmepyopda, Allah nun dipru neitamai kuserure. Tonda ukupmepyopda, erdi bicau tenena deiyo keca kareserepa, nun dipruai kuseredi, wisiserure. 13 Allahdi er Lek Sambala konum karepseua deiki di, ‘Allahda, nun dipruai kuseredi, nun cap, Allah cap, dukdongoprap kikiman kunupe,’ konum tenenupe. 14 Tonda, nun nai Allahdi, ‘Ne Mi Sisa nesala ban-ban yuma lyepkamre,’ tenepunge cap, utenepudi Yesus dokotepseua deiki di ^{▼▼Nimi Lyemna Deiyo Ngebo Yesus – Alkitab neitamaida, Nimi Lyemna Deiyo Ngebo sengami ngeda, ton taru Allah tenena tep sengami. Ton taruda, Yesus tenena tep sengami dinino, deiyoda, Yesus er yapi deiki di nun mali kun keca daepseua deiki di, nun dena tep punupseupa, Allahdi lyemserure. Yohanesdi Yesus tenepudi aupu seku. Tonda, lap pena upu nomor 17 dirume.} yapupa, epmupunge cap, aupu butene tupa lap penupe.

15 Ware neng do yuma, ‘Yesusda Allah er Mi Sisa kurure’ tenen, teka tenepra, talepmengedi katuai di penung nengda, sun dipruai Allah kurepa, sun cap, Allah cap, dipru dukdongoprap kikiman kununge. 16 Ange tep nengeda, Allahdi nun tep, bicau tenesere atep, nun nimi tuai nengdi, ‘Allah er deiki dipu makunkamser’ tenen, Allah er nong deikipu kange derinkamepe. Allahda nimi tep, pio bicau tenenapu kurure. Allah bicau tenerurtopu, sundi yuk neng tep, pio bicau tenepra kunge nesalada, Allah sun dipruai kurepa, Allah cap dukdongopra kikiman kununge.

17 Nesala ban-ban yuma tep, Allahdi wenepra upu bokeipkamser taruda, ‘Sun kwar dangna gum di, tali kangepu doupkameng’ tenen, kange deridana deiyo keca kareserepa, nun dipru neitamai kuredi nun dipruai wisiserure. Ada, nun tuai kupe taru yumada, Kristus er kuretopu, nun pe kunupa tep, pepsene.

18 Nundi yuk neng tep, kange deipdapedi, dipru dukdongopmepe pangeda, ‘Poryankamseng do?’ tenen, kware men kunkamsere. Tonda, nundi Allah er deiki kange deipmepyopda, Allah tep, ‘Wenepra popkamser do?’ tenen, kware men kunkamsere.

Kware kunada ada, ‘Wenepra popkamsenge do?’ tenen, keca tep, tek sisi bicaue tenena deiki di, kware tenena keca yumada sengdongorure. ‘Allahdi popsurur do?’ tenen, kware tupa kure ngeboda, er kange deridana deiyo kecada kapul men wisipke. 19 Allahdi nun tep, menmena bicau tenepudi makupseua tep, nun peda amendapu, Allah er deiki kange deipmepedi, yuk neng tep, bicau tenepra makupmepedi, kange deridanupe.

20 Ware ngebo do, yuma, “Neda, Allah tep kange derinune,” perur dipunen, erda meneng damai nesala tep, bicau tenena gum di, songe tenepra, men makure ngeboda, angeboda, er kurenge cap, er perenge cap, ayuma mok ngebopu kurure. ‘Angeda warya tep do?’ tenena gume.

Uda meneng damai kungepa dire nesala dipunen, bicau tenepra kange men derirure. Er meneng damai dire nesala, bicaue tenepra men melimrura tep, er asuru di men dire kecada, bicau men teneptue. Ange tep nengeda, Allah er damai akurepane, erdi men dirur ngebo cadi, Allah tep kange men deiptue. 21 Tonda, Allahdi, “Ukunkamrume,” peipseu upuda ake. “Ada, Allah tep kange derinkamrum nesala yumada, adipapu sun meneng damai nesala pe, bicau tenepra makudankamrume,” pepra peipseu, pepne.