1Jo 5 | XteSC | STEP | ‘Nesala ban-ban yuma lyepredi taleprepa, domembankameng ngebo, Yesus erpu kurure’ tenen, teka tenenung nesala yumada, sun kange tenenange cap, sun dipru cap, dena utopu kuramu dinin, Allahdi konum gam bukra deipu. Tonda, nun nai Allah tep, sun kange deipmenge nesala yumada, er Mi Sisa pe, sun kange derinunge.

1 John 5

Allah er Mi Sisa Yesus tep, teka tenena upu

1 ‘Nesala ban-ban yuma lyepredi taleprepa, domembankameng ngebo, Yesus erpu kurure’ tenen, teka tenenung nesala yumada, sun kange tenenange cap, sun dipru cap, dena utopu kuramu dinin, Allahdi konum gam bukra deipu. Tonda, nun nai Allah tep, sun kange deipmenge nesala yumada, er Mi Sisa pe, sun kange derinunge. 2 Allah er nyapu tep, ‘Tek sisi bicau tenenup do, gum do?’ tenen, tenimtonapu kunupa tep, ange kael kemepe keca pepkusene. ‘Allah er nyapu tep tek sisi bicau tenepra makunupe’ tenen, kael kemepya deiyo kecada, ake. Ada, Allah tep nun kange deiprap, erpu talepmepedi, er pesere upu yuma gekepra dombaramepya deiki dipu, kael kemnupe.

3 Tek sisi Allah tep kange derinupada ake. Ada erdi, “Ukunkamrume,” pesere upu yumada, ‘Teka’ tenen, gekepra dombanupa tepa. Yuk keca ton gume. Er upu gekepra dombaramtepya deiki dipu, “Allah tep kange derinupe,” peptepya.

4 Ware nesala do yuma, sundi teka tenepipa, Allahdi sun dipru gam bukra deipu nesala yumada ukununge. Ada, tali teka tenena gum nesala, sun kungenge cap, tenengenge cap, putaramrenge cap, teka tenena nesaladi, akeca yuma yanipra bisiptapi. Allah teka tenenge nengdi, tuai mali kecada konum bisiptapya tep, ‘Allah er upu yuma dombanada, ikine kuserure,’ men tenenunge. Allah er upupu dombanunge. Allahdi sun kange tenenange cap, dipru cap, konum gam bukeipka tep, Allah er upu kanam dipu dombanunge. Ikine gume. Amali kuna yuma bisiryanina deiyo kecada, nun teka tenepmepya deiki dipu, akeca yuma bisipra yanitamnupe.

5 Tali tuai mali keca yuma bisipra yanitamre ngeboda, ware ngebo do? Ada, ‘Yesus erda Allah er Mi Sisa kurure’ tenen, teka tenepra kurur ngebo pua. Yuk neng ton gume. 6 ‘Yesus Kristus erda, tek sisi Allah er Mi Sisa kurure’ tenen, kael kemnupa deiyo kecada ake. Ada, Yohanesdi, Yesus me dongopupa kupunge cap, uda sundi Yesus popipa, er yapi embeunge cap, abutene keca deiki di kael kemnupe. ‘Yesusda, Allah er Mi Sisa kurure,’ tenenupada, tenpu keca deiki dipu gume. Yohanesdi Yesus me dongopupa kupunge cap, sun popipa yapi embeunge cap, abutene keca deiki di, teka tenepra kael kemnupe.

7 ‘Yesus Kristus, erda Allah er Mi Sisa kurure’ tenen, katuai kael kemna kecada, weneri kurure. Tenpu ngeda, Allah er Lek Sambaladi aupu peserure. Tonda, Yohanesdi Yesus me dongopu taru adine, Yesusda pel dopbaramnganen popipa, im deiki welepunge yuma deiki di ton kael kemnupe. 8 Aweneringe kael kemepya deiyo kecada, Allah er Sambala cap, Yohanes me dongopunge cap, Yesus yapi embeunge cap, aweneri keca di kikiman utopu peserure. Amsepu perura tep, ‘Allah er Mi Sisada, Yesus er tenpua’ tenen, kael kemnupe.

9 Nimi tali tuai nesaladi upu pepsengepane, sun upu gekepra teka tenenupe. Ukunup dinino, Allahdi Allah upu deiki di pesere upuda, mambule weike. Tali neng penge upuda yambul pua. Allahdi er Mi Sisa tep, lap pepu upuda, Allah er pedipapu pepra karepseua tep, er upuda mambule weike. 10 Allah er Mi Sisa tep, teka tenepra talenung nesalada, Allahdi er mi tep pesere upu, sun dipruai kurure. Allahdi pesere upu teka men tenenge nesalada, “Allah erda mok ngebo kurure,” peramengetopu kununge. Ada, sunda Allahdi er Mi Sisa tep lap pepra karepseu upu, teka men tenenunga tep pepne.

11 Allahdi er Mi Sisa tep, lap pepra karepseu upuda ake. Allahdi pio gam kuna deiyo keca konum karepsue. Agam kuna deiyo kecada, er Mi Sisa Yesus deiki dipu kareserure. 12 Allah er Mi Sisa Yesus teka tenepra talere ngeboda, gam pio kunkamre. Allah er Mi Sisa Yesus teka tenena gum di, Yesus men talere ngeboda, gam pio men kunkamre. Ato ngeboda, nong yopu kurura tep, Yesus er cap kikiman gam men kunkamrenge.

Allah morona tep, pepu upu

13 Uda sunda, ‘Allah er Mi Sisa teka’ tenen, talepra kurum nesalada, ‘E, nunda tek sisi gam pio kunkamepe’ tenen, ‘Kange bongtona gum di, tek sisi kael keprumudi, dipru dimpepra kunkamrum’ tenen, ne Yohanesdi sun tep, aupu sekeipsene. 14 Nun Allah morope taru yumada, kange bongtona gum di, tek sisi konum tenenup keca pepkusene. Ada, Allahdi, ‘Ange telepe. Nedi ukunkamne. Sunda, ukupkamenge,’ teneseretopu, Allah moropmepe pangeda, Allah gekeseredi, melimserure. 15 Ange utopu, nun kaele. Ware keca do, yuma, nundi Allah tep, moropmepe pangeda, Allah tek sisi amul di gekeserura tep, gekepserya deiki di, nun moropmepe keca yuma, tek sisi karepkamser ja.

16 Uda Allahdi wenepra portamserur utopu, mali kuna keca gum dinin, ware ngebo do yuma, er meneng damai kurur ngebodi mali kuramrepane, epre dingeda, amali kuramre ngebo tep, Allah moronkamrure. Allah moropre pangeda, Allahdi amali kuramre ngebo tep, lyepra deiprepa, gam kunkamre. Ne pepmasi ngeda, sun mali kungepa, Allahdi wenemrur dinin, amali kuramengepa men porenge tep, pepne. Ton yala mali kuramenge ngeda, amendada Allahdi portamrepa, denunge. Amali kuramenge tep nengeda, Allah moronkamrume men pepsene. 17 Mali kuna kecada, ake. Ada, Allah upu yaniptaprap, mali kuramenge nge yuma tep, pepne. Ton mali kuna keca, mali kupmenge pangeda, Allahdi wenemrur dinin, pio men denunge.

Allahdi gam bukra deipseu nesala, nun kunup keca tep, pepu upu

18 Nun kaele, Allahdi sun dipru gam bukra deipu nesala yumada, tupa-tupa mali men kununge. Allah er Mi Sisa wepra deipu ngeboda, Yesus, erdi anesala tep, ‘Mali kupnung’ tenen, pio melipra kalengrure. Yesusdi sun tep ukupre pangeda, pio Mali Deiyo Ngebo, Kain Jen Ngebodi, mali men kweipsetue. Ton, dalupra men dopropsetue.

19 Uda, ‘Allah er nyapu kunupe’ tenen, konum kael kepmupu dinino, tali tuai keca yuma cap, Allah teka men tenenge nesala yuma cap, Mali Deiyo Ngebo, Kain Jen Ngebo, erdi moupra talerya deiki di, aneng yuma er upupu gekepra kununge. 20 Ton kael kepmupunge, ton pepkusene. Ada, ‘Sunda Pio Tek Sisi Allah, teka tenepra talepkamenge’ tenen, Allah er Mi Sisa Yesus yaudi, kael kemna deiyo keca konum karepseue. Pio Tek Sisi Allah cap, nun cap, dipru dukdongopseupa kikiman kunupe. Angepu gume. Allah er Mi Yesus Kristus er pe cap, nun cap, dipru dukdongopseupa, kikiman kunupe. Yesus Kristus erda, Tek Sisi Allah er nong tenpu kurure. Tonda, erda, Pio Gam Kuna Deiyo Ngebo kurure.

21 Ne nyapu utopu nesalao, nedi sun tep kange derisenune. ‘Akecada, Allah utopu kurure, tenengedi makupkamser’ tenen, tali si sipeprap eremenge keca yumada, sundi pio tamkamrume. Akeca men talenkamrume. Beiprap karenaipu kunkamrume.

Telepe ne Yohanesdi akonum pepne.