1Ki 1 | XteSC | STEP | Ataruda, Israel nesala, sun ila nimi deiyo ngebo Raja Daudda konum wisi deipu. Wisi deipudi, baripu bungamnga cadi, er melimna nengdi, ‘Bupu kuptupa, telep kupra maptue,’ tenepidi, er asonda selimut weika di ton, tokra deipnepa, akason deikipu maramu. Maramu dinin, er nongda bulpu pio kuramu.

1 Kings 1

Nimi deiyo ngebo Raja Daud, wisi deipu taru kupinge tep, seki upu

1 Ataruda, Israel nesala, sun ila nimi deiyo ngebo Raja Daudda konum wisi deipu. Wisi deipudi, baripu bungamnga cadi, er melimna nengdi, ‘Bupu kuptupa, telep kupra maptue,’ tenepidi, er asonda selimut weika di ton, tokra deipnepa, akason deikipu maramu. Maramu dinin, er nongda bulpu pio kuramu. 2 Ukuramnga tep nengeda, Raja Daud er pel dona tep melimna nengdi upepi, “Nun deiyo ngebo Raja, telep ngeda, ‘Kan cap kikiman maprurumdi, bupu kemdinkamker’ tenen, kaber ner ton epra duyankamkepe. Akaber nerapuda, nimidi pio ton dona gum nerpu dinin, kan cap keana tep kunada, kaber ner ton epra duyankamkepe. Ukupkepepa, erdi Raja kan tep kalekra melimkamkere, adeiki nun deiyo ngebo Raja, kan mapkumem taruda, er aner cap maprerumpa, kan nongda bupu kunkamkere.

3 Upepra, sun aneng yumadi Israel mutu neitamai yumada, urasin pio telep kaber ner tep erbei. Ukupra enmaianen, Sunem mutu pio urasin telep kaber ner tenpu, er sida Abisag epi. Epi dingeda, Abisag adipapu doupra, nimi deiyo ngebo Raja Daud er damai duyai. 4 Ukupi pangeda, Abisagdi Raja Daud er melimna cap, tonda er kalengna cap kuramu. Dinino, ataru neitamai yumada, Raja Dauddi, akaber ner ton men nyakamu.

Nimi tenpu, er si Adoniadi, ‘Nimi deiyo ngebo Rajada, nepu keptene’ tenen, pepu upu

5 Men taruda, Raja Dauddi, er mi Absalom konum deipu dinin, amenda taruda, sal mi ton deipu. Atep, Raja Daud er sal mi butene ngebo er si Adonia, er angeboda, Absalom er weit bo kuramu. Angebo er nin sida Hagit. Adonia erda, konum nepbaramnganen, wisi konum kupu taru neitamai di, salnong-nong kepudi, “Nepuda, Israel nesala yuma talepnedi, sun ila deiyo ngebo kunkamne ja,” pepudi, ereipdapu. ‘Neda ila nimi deiyo ngebo Rajada, nepu kepkamne,’ teneramu. Uteneramnga tep nengeda, mar podarban taru bukra ban keca, er si kereta kuda cap, kuda bisam deiki bukra, ban jen talena neng cap, tonda, Adonia er pe melimna tep, lima puluh (50) jen talena neng yuma cap, ketenepra deipu. Atep nengeda, puto di akeca yumada, balila dipapu kuna ngebo kuramu.

6 Er nai bo Raja Daud, er mi Adoniadi mali kupmana peda, er nai bodi ton pio men wenemamu. Tonda, Raja Dauddi, Adonia tep, “Kanda ware deiyo keca tep, ange kupmarem do?” pepra, pio men wenepra asimpeteramu. Adoniadi, teneramutopu tali lupra kuramu. Tonda, Adoniada, urasin pio telep ngebo kuramu. Er duboda, Absalom kuramu. 7 Adaonia dakuramnganen, daneitam taruda, Zeruya er mi Yoab cap, imam Abyatar cap, sun damai bena, upu talepmau. Upu talenmaiyanen, Yoab cap, imam Abyatar cap, sundi er Adonia teneramu ngeda, sun peda, ‘Angeda pio telepe. Raja kepkamre,’ tenepmare ngeda, nun ton melipkamneme. Er tamna kepkamneme,’ teneprei. 8 Sun buteneda, ‘Angeda telepe,’ teneprei dinin, yuk nengda, ‘Angeda telepe,’ men tenerami. Ada, imam Zadok cap, Yoyada er mi Benaya cap, nabi Natan cap, yuk neng ton Simei cap, Rei cap, uda Raja Daud er melipra embana jen talena neng capda, Adonia er tamna men kepi.

9 Ukupra dakuramyanen, tenpu tumida, mutu si tep, “Zohelet Gel perami mutu damai ada, En-Rogel me bungna damai, Adoniadi domba bisam cap, sapi bisam jemnge cap, sapi bisam mi galemna telep kupra nenmainge yuma cap, popra keteneipu. Ange ukupu taruda, Raja Dauddi deiamu neng, er kayapu yuk neng yuma tep, “Sun ton akalemna jeryankurume,” pepra kongpepu. Tonda, Daud er ati bo pel dona neng, sun Yehuda mutu deiyo kepra taleami neng cap, “Akailya jeryankurume,” pepra kongpepupa sun yuma bei. 10 Sun aneng yuma bei dinino, Adonia er dubo Salomo cap, nabi Natan cap, tonda Benaya cap, ton ngeboda Raja Daud, ‘Yu nengdi nun Raja popsenung’ tenen, Daud er kalekra melimna ngebo sisa capda, ton pio men kongpepu.

Salomo nimi deiyo ngebo Raja erepra deipinge tep upu

11 Amambul neng ton men kongpepka tep, nabi Natan adipapu Salomo er nin Basyeba damai bena antapu. Antapu dingeda, nabi Natandi Batsyeba tep upepu, “Nimi deiyo ner kanda, Salomo er nin kurume. Kanda aupu ton kapul men gekepmum do? Ada, Hagit er mi Adoniadi, ‘Nimi deiyo ngebo Raja kepkamne,’ tenen, keteneipmaupa, nimi weika di, konum erepra deipi. Tonda, ‘Raja kepmare,’ penmang upuda, kan ton men gekepmarem do? Ange utopu, nun Raja Daud erdi aupu yumada, men kael kepmare,” pepra, nabi Natandi Batsyeba tep bena asipetepu. 12 Ila ngebo Salomo cap, kanda er nin Batsyeba cap, ‘Nun lyepropdankuneme,’ tenepretum teptoda, ne pepkusentopu kupkurerume.

13 Batsyeba, kan adipapu menmena, Raja Daud er damai bememdi, aupu pepkurume. “Ne deiyo ngebo Raja, neda kan amutarapu kunedi, kan pelpu melimnune. Men taruda, kandi ne tep, apedina upu deiki di peipnemum do, gum do? Ada, ‘Ne Raja Daud pununa tep, deiyo kemna ngeboda, kan mi Salomopu, Israel nesala sun ila nimi deiyo ngebo Raja kepredi, ila nimi deiyo ngebo bungnungai peda, erdi ange dopra, acapu bungredi, Israel nesala talenkamrure,’ pepra, konum peamnemum adano. Ange tep nengeda, ware keca deiyo tep, yuk ngebo nimi si Adonia, er dipapu Raja konum keipmarem do?” pepra asipetepkurume. Ada, kan Batsyebadi, Raja Daud, er damai bena asipetepkurume,” pepu.

14 Tonda, nabi Natandi aupu ton dukdongopra pepu, “Nimi deiyo ngebo Raja Daud damai bena, apepmaken upu bena pemem taru dipapu, ne peda nabi Natan, amenda taru Raja Daud er damai yanedi, kan pepmamem upu tep, ‘Ada tek penmakera,’ pepra, kan upu yana puto keipkamane,” pepu. 15 Upepupa, amenda taru Batsyeba adipapu Raja Daud, er man ati neitamai weku. Ataru neitamaida, Raja Daud konum pio wisi deiamu. Tonda, ukuamu taruda, Sunem mutu kaber ner, er si Abisag, er dipapu Daud melimamu.

16 Ataruda, Batsyebadi Raja Daud er gispal dona tep, er damai bena gutam tu dipdongopu. Ukupupa, Raja Daud erdi Batsyeba tep asipetepu, “Kanda, ‘Uo, ne deiyo ngebo Dauddi ukupnetue’ tenen, putanmaker ngeda, ware tenepmaremdi, ne damai yanmarem do?” pepu. 17 Batsyeba erdi tamupra pepu, “Ne deiyo ngebo Raja, neda kan amutarapu kunedi, kan pelpu melimkenune. Naio, kanda Raja Daud, kandi si eremrum Allah Yahweh, er si deiki di, ne tep, men taruda, kandi ne tep, apedina upu deiki di peipnemume. Ada, ‘Ne Raja Daud pununa tep, deiyo kemna ngeboda, kan mi Salomopu, Israel nesala sun ila nimi deiyo ngebo Raja kepredi, ila nimi deiyo ngebo bungnungai peda, erdi ange dopra acapu bungredi, Israel nesala talenkamrure,’ pepra, konum peamnemum adano.

18 Dinino ukutaruda, nimi deiyo ngebo Raja, kan men kael kepmamumpapu, kan mi butene ngebo Adoniada, ‘Nimi deiyo ngebo Raja kunkamne’ tenen, ereipdanmaupa, nimi weikanun ton, er tara konum kepmanga cadi, erda Raja konum kunmare. 19 Tonda, Adoniadi, sapi bisam jemnge cap, sapi bisam mi galemna telep kupra nenmaunge cap, domba bisam cap yuma, konum Allah si eremna tep karepmare. Ukupmardi, kanda Rajadi deiamum nyapu yuma cap, imam Abyatar cap, tonda Raja Daud, kan jen talena neng, sun deiyo ngebo Panglima Yoab peda, akailya jena tep, kong pepmaupa yanmangu. Dinino, kan amutara kure ngebo, kan mi Salomoda, men kongpepmaupa, men yaue,” peprapudi, Batsyebadi Daud tep pepu.

20 Upepudi, ange ton dukdongopra pepu. “Nun deiyo ngebo Raja, kanda pio tek sisi ngebo, Israel mutu neitamai kunung nesala yumadi, nun deiyo ngebo Raja Daud, kan pununa ngebo tep, ‘Dauddi, ware ngebo Raja tekeipserepa, amenda taru nun talenkamser do? Ware ngebodi, Raja Daud er ila nimi deiyo tep, bungrurai bena bukredi, nun ton talenkamser do?’ tenen, dinapu kununge. 21 Kandi, ‘Angebo wepra deipsene. Er dipapu angebo ton, ne punupneredi, sun Israel nesala talenkamsere,’ pepra, lap men peipsemem pangeda, amenda taru nun deiyo ngebo Raja Daud, kandi aupu lepsisikra men pepmem dipapu depmemnyopda, ne cap, ne mi Salomo cap, nun tep nengeda, Adoniadi, ‘Sunda mali upu peamnereiya tep, mali kuprei,’ penkamsere.” Batsyebadi, Raja Daud tep pepu.

22 Batsyebadi Raja Daud damai benmaudi, aupu yuma bena penmau taru dipapu, nabi Natan peda, nimi deiyo ngebo Raja er ati pumbon yau. 23 Ayau ngeda, nimi yuk nengdi, Raja Daud er damai beidi, “Nabi Natanda, konum yanmare,” pepi. Upepipa, Batsyeba adipapu bura tara beu. Ukupu pangeda, nabi Natan adipapu Raja Daud er damai beu. Wekra beu dingeda, Daud er gispal dona tep, Natan er gutam tu dipdongopraipu, giso genepdongoprapudi, Raja damai buku. 24 Ukupu dingeda, nabi Natan, erdi Raja Daud tep asipetepu. “Ne deiyo ngebo Raja Daud, kanda pio tek sisi ngebo kurume. Kandi, Adonia tep, ‘Erda ne nimi deiyo ngebo kunun ngeda, erdi yo punupnerdi nimi deiyo Raja kemna tep, tekamre. Erdi ne ila nimi deiyo kemna tep, ne bungnunaipu er dipapu abukamre ja,’ peiamum do, gum do?” pepra bena asipetepu.

25 Asipetepmakenada, tali tep gume. Atep atumida, Adonia erdi, Allah er si eremna tep, domba bisam cap, sapi bisam jemnge cap, sapi mi telep galemnange cap, weika di popra karenmardi si eremare. Ukupmardi, Adonia erdi er kayapu kandi deipmum neng yuma cap, tonda, Raja kan jen talena neng, sun deiyo ngebo Panglima Yoab cap, tonda imam Abyatar cap tep, kong pepmaue. Ukupmaupa, ukutaru sun Adonia cap, kikiman ila kailya kalepmarnge jenmang taruda, er tep gispal donmangdi upenmange, ‘Ada, Raja Adonia kanda pio talenkamserema cadi, kanda gam pio kunkamreme,’ penmange.’

26 Dinino naio, Adoniadi ne ton men kong pepmanue. Tonda, imam Zadok cap, Benaya cap, kan amutara kure ngebo, kan mi Salomo cap, ton pio men kong pepmaseu. 27 Atep, asipetepkene naio. Ange yumada, tek sisi ne deiyo ngebo Raja, kandi, ‘Adoniadi ne yo punupnerdi, Raja kunkamre,’ tenena tep peipmumpa apel yuma donmar do? Tonda, kan amutara pel dona neng yuma tep, ‘Ne yo pununada, angebo dipapu Raja kunkamre,’ pepra, men lap pepsemumpapu kunmar do? Er pe kange dipapu ange yumada kunmar do?” pepra asipetepu.

Dauddi, ‘Ne mi Salomoda, Israel sun nimi deiyo ngebo Raja kepkamre’ tenena tep, wepra deipu upu

28 Israel nesala, sun ila nimi deiyo ngebo Raja Dauddi, ‘Batsyeba yankure’ tenen, “Aner tep upupkurume,” pepu pangeda, nimi upupipa, Batsyeba gekepudi tamupra Daud damai yana er urasin tara teku. 29 Aner yan teku taruda, animi deiyo ngebo Raja Dauddi pepu. “Tek sisi ne mi Salomodi Israel nesala sun deiyo ngebo Raja kunkamre. Apepmanada, ‘Pio tek sisi kupkamre, tenenkamrum’ tenen, Allah er si Yahweh, ^{▼▼Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda lap pena upu nomor 49 dirume.} Pio Gam Kuna Deiyo Ngebo, er si deiki di pepne. Ne ikin kuramneu taru yumada, Yahwehdi ne kange mun kuramsi taru neitamai yuma, meliamneua deiki di lyepramneue.”

30 “Ne ka nero, kan tep men di, ‘Ukupkamne,’ pepra pedina upu pepkesitopu, atumi deiki di tek sisi kupkamne. Ada, ‘Ne depnyopda, ne pununa tep, kan deipmum mi Salomo, er dipu Israel nesala sun ila nimi deiyo ngebo Raja kunkamre. Raja bungna keca deiki bungamsidi, nimi deiyo ngebo kuramsitopu, ukutaruda Salomodi kunkamre. Ukupredi ne yo punupkamnera tepa.’ Ange pepkesi ngeda, tali men peptapsi. Israel nesala tep, ‘Sun kange ikine kupnung’ tenen, melipra pio kalengrur Allah Yahweh, er si deiki di konum pepkesa tep, apepmantopu tek sisi nong kupkamre,” Dauddi Batsyeba tep pepu.

31 Upepu pangeda, Batsyebadi Raja Daud gispal dona tep, gutam tu dipra, tuaipu dinmaudi pepu. “Uo, Raja Daud, kanda ne deiyo ngebo kurume. Ne putanere ngeda pepkukene. Ada, ‘Kanda gam tupa pio kunkamruma’ tenen, putanerure,” pepu. 32 Upepupa, Dauddi tamupra pepu. “Allah er si eremna ati pumbon pel dore ngebo er si Sadok cap, tonda Allah er upu lap pena deiyo ngebo Natan cap, tonda Yoyada er mi Benaya cap tep sun damai bena pepkurume,” upepra deipu. Upepupa, nimidi perbei pangeda, aneng yuma Daud damai yai. 33 Sun aneng yuma, er ati yai pangeda, sun aneng melimna tep, er amutara pel don neng ton ketenepra deipudi, Dauddi aupu pepu. “Sun yuma ne mi Salomo damai bemumpa, ne pe keledai bisam bali deiki bukrepa, Gihon mutu dubenkurume.

34 Gihon mutu bemum dingeda, Allah er ati pumbon pel don ngebo Sadok cap, Allah er upu lap pena ngebo Natan capdi, Salomoda Israel nesala sun ila nimi deiyo ngebo kemna tep, minyak me gwepra er giso deiki likeipkamrenge. Ukupra konum erepra deiprenge pangeda, sun yuk nengdi pung pena keca er si terompet pung pepkamenge. Ukupmengepa, sun yumadi, ‘Nun Raja Salomoda, gam pio tupa kunkamre,’ pepra, er tep gudinkamrume.

35 Konum ereipmum dingeda tamupra ne damai duyankamarume. Yaryopda, ne yo pununa tep, Raja bungna keca deiki bukredi, ila nimi deiyo ngebo kunkamre. Ada, Israel yala nesala cap, Yehuda yala nesala cap tep, ne taleamsitopu, talepredi sun deiyo ngebo kunkamre. ‘Ukupkamre’ tenen, nedi Salomo konum wepra deipne,” Raja Dauddi pepu.

36 Upepupa, Yoyada er mi Benayadi Raja Daud tep pepu. “Tek sisi Allah ^{▼▼Allah – Ayat 36 neitamaida, Ibrani upu deiki di, Allah er si pena tep, ‘Adonay’ pepra seki. Sun kael kemna tep, aupu deiyo ngeda, jenek kupra sekmepu.}, akeca-keca yuma taleredi, ila puto weik ngebodi teneamutopu konum kupkamepe. Daud kanda ne deiyo ngebo Raja kuruma cadi, kan amutarapu kunune. Allahdi melimkerure. Allah dipapu, ‘Salomoda Raja Israel kunkamre,’ pepkamre ja. 37 Ne deiyo ngebo Raja Daud, Allahda, akeca-keca yuma taleredi, ila puto weik ngebodi meliamkeupa, telep dipapu pel doramuma utopu, Salomo peda melimrepa, telep kupra nun talepra kunkamsere. Allah melimserya deiki, kandi taleamsemum taruda, telep kuramepu dinin, ‘Salomodi talenkamser taru pio telep kunkamser’ tenen, pepne,” Benayadi Raja Daud tep pepu.

38 Atep ngeda Sadok cap, Natan cap, Yoyada er mi Benaya cap, Kereti yala neng cap, tonda Peleti yala neng cap, sun yumadi, Salomo damai kwererbei. Er damai beiyopda, Raja Daud, er keledai bisam karepipa, Salomo akeledai bisam bali deiki bukupa, sun yuma kikiman Gihon mutu bei.

39 Konum bei dingeda, Allah er ati pumbon pel don ngebo Sadokdi zaitun co du minyak me, telep lyom mau di kipra, Allah er upu pena ati deiamyai di dopra, Salomo giso deiki dikra deipu. Ukupka deiyoda, ‘Salomo nun Raja kunkamser’ tenen, wepra deipmepe, tenena tep kupu. Ukupupa, ton neng dingeda, pung pena keca er si terompet pung penmai. Pung penmai taruda, awekmai nesala yumadi, “Nun Raja Salomo pio tupa gam kunkamre,” pepra ila upu di penmaidi gudinmai.

40 Konum kupi pangeda, Salomo mepra banmaupa, sun atara neng yumadi, er amnyo tara amenda yakanmaidi, bung-bung pena er si suling deiki di pung penmaipa, yuk nengdi, mut telep-telep penmai pangeda, amutu yumada ila lelim pepyakanmaia tep, ataruda mutu yuma long-long pepu.

41 Sun aneng yuma akunmai taruda, yuk ngebo er si Adonia, ‘Ne ila nimi deiyo ngebo kunkamne,’ tenereamudi, ‘Ereipnetenge’ tenen, er cap, er kayapu neng yuma cap, ila kailya kalepra deipmaunge jenmai taruda, arup ila di penmai nengdi, Raja Salomo telepe pena tep, ila di penmaipa, Adonia cap, er kayapu cap gekepi. Pung pena keca, er si terompet upu gekenmaipa, tenpu ngebo er si Yoabdi asipetepu. “Ortara kota neitamaida ila lelim penmangada, ware keca deiyo tep do?” pepra asipetepu.

42 Asimpetenmau taru dipapu, Allah er si eremna ati pum pel dona deiyo ngebo er si Abiyatar, er mi Yonatandi sun damai yau. Yaupa, Adoniadi, “Telepe, akati wekroyo. Kanda telep kuna ngebo cadi, ‘Tek sisi kai telep upu duyanmasereme,’ tenepkene,” pepu.

43 Upepupane, Yonatandi tamupra pepu. “Gume naio. Nun ila nimi deiyo ngebo Raja Daud amutara kunupe. Dauddi peipupa, nimidi er mi Salomo doupra, ‘Nun ila nimi deiyo ngebo, Raja kunkamsere’ tenen, ereipmaipa, nun ukupu deiyo ngebo tek sisi Raja kunkamsere. 44 Raja Dauddi peipupa, Allah er si eremna ati pumbon pel dona deiyo ngebo er si Sadok cap, tonda Allah er upu lap pena deiyo ngebo Natan cap, Yoyada er mi Benaya cap, tonda sun Kereti yala neng cap, Peleti yala neng cap, sun yumadi Salomo doupra, Daud er keledai bisam bali deiki bukupa, Gihon mutu dubenmai.”

45 “Gihon mutu dubenmai pangeda, Allah er si eremna ati pumbon pel dona deiyo ngebo er si Sadok cap, tonda Allah er upu lap pena deiyo ngebo Natan capdi, ‘Salomo nun Raja kunkamser’ tenen, wepra deipmareidi, zaitun co du minyak me gwepra Salomo giso deiki dikra deiprei. Ukupreiya tep nengeda, abulupmai neng yuma capdi, Daud damai konum welerbanmaidi, upu lelim weika di penmangdi gudinmangpa, alelim gekenmarume,” Yonatandi Adonia tep pepu. 46 Aupu pepu dingeda, aupu ton dukdongopra pepu. “Angepu gum dinin, ila nimi deiyo ngebodi, ila bungna keca deiki bungruraida, Salomo konum bukmare. Ada Raja kemna tep bukmare.

47 Tonda, nun ila nimi deiyo ngebo Raja Daud, er amutara pel dona deiyo neng, ila neng yumadi, ‘Er telepe,’ pedana tep konum yanmange.” Yanmangdi upenmange. “Nun nai bo Daud, kandi telep kupra taleamsemum dinin, ukutaruda, kan mi Salomodi talenkamser taruda, ‘Pio telep kunkamser’ tenen, Allah moronmape. Tonda, Daud kanda, mambul pel weik doramuma deiki di, kan sida ila si kwapkeupa, nimi weika di kael keamkei.

Dinin, ‘Kan mi Salomo er sida, pio ila mambul pel doptupa, ila puto si kuprepa, nimi pio weika di kael kemkamemetenge’ tenen, Allah moronkamepe,” penmange. Upenmaipa, nun nai bo Raja Dauddi, Allah er gispal dona tep, er giso genepdongoprapudi pepu. “Uo ne nai Allah, kan si Yahweh tep, ‘Pio telepe,’ pepkene.

48 Ne nai Allah Yahweh, kandi nun Israel nesala tep pio kalekra melimserume. Kandi meliamnemumpa, kapul men depsa tep, ukutaruda, ne yo pununa tep, Israel nesala talenkamra deiyo ngebo, Salomo konum epmane. Nedi, Israel nesala taleramsi taru, bungamsi keca deiki di Salomo bukredi, anesala talenkamre ja. Atep, ‘Telepe’ pepkene naio.” Raja Dauddi, Allah tep pepu. Ange yumada, Yonatandi Adonia cap, er kayapu neng cap tep lap pepu. 49 Yonatandi penmau upu neitamai, Raja Dauddi, ‘Ne yo pununa ngebo konum epmane,’ pepu. Konum lap pepu pangeda, Adonia er kayapu neng yumadi, mali kange doupidi, ‘Uo’ tenen, kware kupupa, tekrapidi, adipapu akati tapra sepdara yuk-yuk bendopi.

50 Sun ukunmaipane, Adonia puda, ‘Raja Salomodi ware kupkamner do?’ tenen, kware weik kupupa, sepdara beu. Er beu atida, ada Allah er si eremna ati pumbon dinin, akati deipmai keca bena talepu. Ada, Allah er karen keca derinai, co lase di dopi bekin dinin, dana-dana tara takke keca ^{▼▼takke keca – Mesba deiki dana-dana dumbari takke keca kwamu ngeda, akeca gambar dina tep, Imamat 4:7 dinkurume.} dumbari belepunge bena talepu. Erdi akeca talepmaunge deiyoda, ‘Akeca talepnepa, tali lupra men popnengedi, bicau tenepra kaukepkamnenge’ tenen, bena talepu.

51 Ukupu pangeda, yuk nengdi kael kepidi, Raja Salomo er damai bena lap pepi. “Naio angebo Salomo, Adoniada, ‘Raja Salomodi ne popkuner do?’ tenen, kware kunmara cadi, Allah er si eremna ati pumbon dinin, er karen keca derinai, co lase di dopi bekin dinin, dana-dana tara belepunge talepra kunmare. Erdi upepkere, ‘Uo, ne kware cadi, Raja Salomodi, ‘Angebo Adonia, ne amutara kure ngeboda, parang ya di doupra, tek sisi angebo men poptapkamne,’ pepra, pedina upu puto di peipnetupa teka teneptene,’ pepu.” Sun anengdi Raja Salomo tep lap pepi.

52 Upepipa, Raja Salomodi tamupra pepu. “Er kure keca dipetepmepedi, mali kuna gum dinin, dumsisipu kuryopda, tek sisi er tep men popkamepe. Men popmepepa, er giso potong neitamaida, tenpunge peda tuai men sakamre. Dinino, erdi mali kupyopda, tek sisi er tep poptapmepepa, depkamre ja,” Raja Salomodi pepu.

53 Upeprapudi, nimi ton doproipupa, bei pangeda, Adoniadi, Allah er si eremna ati pumbon dinin, er karen keca derinai, co lase di dopi bekin dinin, dana-dana tara belepunge talepra kunmaupane, aneng bena epi. Epidi, anengdi Adonia doupra Raja Salomo damai dubei pangeda, Adoniadi Salomo er gispal dona tep, giso genepdongopu. Ukupupa, Salomodi, angebo Adonia tep pepu. “Ukutaruda, kan pe ati tamupra berume,” pepupa, beu.