1Ki 10 | XteSC | STEP | Nimidi, “Raja Salomoda Allah Yahweh, er sipu eremrure. Salomo cap Allah, er si Yahweh cap, telep kupra kikiman kurerunge,” peramipa Syeba mutu taleamu nerdi tupa gekeramnga tep, er damai beu. Beudi, ‘Tek kurur do, gum do, tenen, ikin upu deiki di asipetepnedi, kurpetenkamne,’ tenepudi, er damai bena asipetepu.

1 Kings 10

Syeba mutu ila nimi deiyo ner, Raja Salomo damai Yerusalem mutu yaua tep upu

1 Nimidi, “Raja Salomoda Allah Yahweh, er sipu eremrure. Salomo cap Allah, er si Yahweh ^{▼▼Yahweh – Allah er si, tek sisi ngeda, Yahweh kurure. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} cap, telep kupra kikiman kurerunge,” peramipa Syeba mutu taleamu nerdi tupa gekeramnga tep, er damai beu. Beudi, ‘Tek kurur do, gum do, tenen, ikin upu deiki di asipetepnedi, kurpetenkamne,’ tenepudi, er damai bena asipetepu. 2 Syeba mutu ila nimi deiyo ner, Yerusalem mutu benkou taruda, kunumna weik keca, men nukmanto pio weika di kipra dubeu. Er talepra kuramu keca dopra beu ngeda, unta bisam pio weik, tonda aunta bisam deiki di kunumna weik nintong telep keca er sida rempah-rempah cap, kamo telep keca gat gel cap, tonda kunumna weik keca er sida emas cap doupra, Salomo damai beu. Beu dingeda, aner er dipru neitamai di teneramunge yuma Salomo tep asipetepupa, upu sisingamrei.

3 Syeba mutu nimi deiyo nerdi akeca-keca yuma tep asipupane, abena asipunge yumada, tenpunge peda ton walwal kupupa men tapudi, ange yuma tep Salomodi aupu yuma tenepra lap peramu. 4 Ukupka cadi, anerdi Salomo ila kale kemamudi, er pe tep ila nimi deiyo ngebo Raja kun ati cap, akati dona tep ila mambul pel doramunge cap, er asuru di epu.

5 Tonda, Salomo er jen keca derinmainge cap, er amutara mambul pel doramya deiyo neng cap, er damai sun lelepra bungaminge cap, akati pel dona tep melimna neng cap, er melimna neng, sun kamo pio telep opkal yangdiraminge cap, Salomo er me jen mau ketenepra dekarami neng cap, tonda Allah gispal dona tep, gam keca popra uku dongoramunge cap, Allah Yahweh, er si eremna ati cap, akeca-keca yuma diramudi, ‘Uo, angeda tek sisi pio mambule,’ teneramudi, ila kange deipra mambul kange doupu. Aner pio telep kange doupudi upepu.

6 “Uo Raja Salomo, ne mutu kuramsidi gekeramsipa, ‘Raja Salomodi ukupra-ukupra pel doramu. Tonda, erda pio ila kael ngebo kurure,’ pepra perami ngeda, ukutaru ne pe asuru di yana epnedi kael kepne. Aperamneinge yumada, pio tek sisi peramnei. 7 Pumun taruda, aperami upu yumada, men teka teneramsi dinin, ukutaruda ne pe asuru di konum yan epne. Dinino, ne kangeda, tek sisi kan kael deiki telep kupra deriramum keca cap, ila isomka kurumnge cap yumada jenek men peramnei. Sundi, yambulanunpu lap peramneipa gekeramsi dinin, ukutaruda ne konum yana epmane. Ange yumada pio mambul weike.

8 Ange tep, ne kangeda kan nyapsilip yumada sun kange deipra kununge tenepne. Ada kan amutara mambul pel dongedi, ila neng melimkenge neng cap, yuk tali neng dinin, kan melimkenge neng cap yumada, kan damai yangepa, kan ila kael keamuma deiki di upu pemempa gekenunge. Atep, ne kangeda, sun pio kange deipra kununge tenepne.

9 Ange tep nengeda, kan nai bo Allah, er si Yahweh tep, ‘Erda pio telepe,’ pepne. Allahdi kan tep, kange deiamkeudi, kan tep ‘Israel nesala sun ila deiyo ngebo kepkamre’ tenen, wepra deiamkeupa, Israel nesala talerume. Allah er si Yahwehdi ukupkada tali tep gume. Ada Yahwehdi Israel nesala tep, bicau teneramudi, ukutaru tupa tenerura deiki di, kan wepra deipkeupa Israel nesala sun nimi deiyo ngebo Raja konum kurume. Wepra deipkeudi, ‘Angebo ukunkamre,’ teneramkeuada, ‘Israel nesala, sun makuna tep, tek sisingepu, pel dopra baredi, sun kunkamengtopu telep kupra upu bongdina tep, telep kupbankamre,’ tenepkeudi, wepra deipkeue.” Syeba mutu ila nimi deiyo nerdi Raja Salomo tep pepu.

10 Upepu dingeda, Syeba mutu ila nimi deiyo nerdi Salomo tep, maton don keca duyanmaunge karepu. Erdi karepu ngeda, kunumna weik keca er si emasda, er ikinda empat ribu kilogram cap, tonda kamo pio telep keca kunumna weik gel er sida batu permata cap, ton ngeda nintong pio telep keca er si rempah-rempah weik cap karepu. Anintong telep keca rempa-rempa cap, tonda, ‘Jen keca tau pepkamre’ tenen, tapakra derirameng keca cap duyau ngeda, pio men nukmanto weike. Yuk taru yumada yuk nengdi Salomo tep, ange weiknge utopu ton men karerami. Akeca yumada Syeba mutu ila nimi deiyo nerdi Salomo tep karepu.

11 Tonda, Raja Hiramdi peipupa, er laut mokon deiki embarami keca, er sida kapal laut kiprapidi, kunumna weik keca er sida emas, pio telep ngeda, Ofir mutu di duyana kipipa, akapal deiki duyai. Tonda pio kamo telep co er sida kayu cendana cap, tonda kunumna weik urasin telep gel ton weika di duyai. 12 Duyai pangeda, Raja Salomodi urasin telep co, kayu cendana dopropudi, Allah Yahweh, er si eremna ati pumbon dinin, ila ayumnya co utopunge deipu.

Tonda, er pe kun ati pumbon ton deipu. Tonda, aco cakrapidi, telep bung-bung pena keca er si kecapi cap, gambus cap petupra deipi. Ataru akamo telep coda pio weike, men nukmanto duyai. Ataru adine, aneitam taru cap, ukutaru cap peda, aco weika di duyai autopunge ton men di men pio dekaraminge. Pio weik ngeda, atarupu duyai.

13 Tonda, Raja Salomo er pedi tenepunge ton, er kunumna weik keca deriramngai di dopra, Syeba mutu ila nimi deiyo ner tep tali lupra karepu. Tonda, Syeba mutu ila deiyo ner, er pedi teneramudi Salomo tep moropmau kecada, Raja Salomodi aner karepu. Akeca yuma konum karepupa, anerdi konum dopropkopda, er cap, er kikiman yai neng yuma cap, ka tamupra sun pe mutu bei.

Raja Salomo isomka kepunge tep, seku upu

14 Raja Salomo tep kareryakarami kunumna weik kecada, pio weike. Keteng tamun tenpu deiki di, kunumna weik keca kamo telepnge, er sida emas ikinda, men nukmanto dua puluh lima ribu kilo peramengtopu, er damai duyana kareryakaramipa dororamu. 15 Tonda yuk nengdi karerami ngeda, nukra men pepmepe. Ada sun bunga kunumna ati deiyo neng cap, sun Arab mutu deiyo neng cap, sun pala tara talepra gubenur kurami neng cap, aneng-aneng yuma dekaramidi, Salomo tep karerami ngeda men nuki dinin, akunumna weik kecada, pio weike karerami.

16 Salomodi ila tempayan emas gat gel kamo telepnge deiki di dopra dua ratus perisai betapu tonda gat gel kamo telepnge emas ikinda enam ratus deiki di betapu. 17 Gat gel urasin telepnge emas tempayan deiki di dengeda tiga ratus perisai betapu, tonda perisai yambul ngeda, tiga minggu deiki di betapu. Ukupu dingeda, Salomodi akeca yuma doupra Libanon mutu bura ati men deipu.

18 Salomodi er bungnaida gaja bisam si cap gat gel emas kamo telepnge cap tapakra betapu. 19 Abungne keca lyoma di wilimu ngeda ngantan bari kepudi abungnai amnyo tarada sapi bisam utopu keca deipu. 20 Tonda lyom bungna keca ngantan bari betapra deiki tara dana-danada pus utopu keca er sida singa utopu keca dua belas betapra deipu. Deipupa er pedi tek neng atopu kupu. Ada yuk mutu nimi deiyo neng peda men kuramenge kupu.

21 Salomo er me jen mau cap, tonda Libanon mutu bura ati dopra deiamu keca yumada, gat gel kamo telepnge, er si emas dipapu betapra deiamu, tonda kunumna weik keca dinin, er si perakda, ange dopra akati keca tep men betamu. Ada mesum tep gume. Raja Salomodi ila nimi deiyo ngebo keamu taruda, kunumna weik keca er sida perak, amutu nesaladi, ‘Agatda mambul weik gume,’ teneramya tep, emasnge pu dopra betamamu.

22 Ada, Salomo er mokon deiki embana umpenada, Tarsis mutu nengdi domi. Ange cap, Hiram mutu deiyo ngebo mokon deiki umpena cap, keteng tamun weneri neitamai dinin, ue tenpu gat gel kamo telepnge er sida emas cap, tonda gat keca kamo telepnge dinin, boun nge cap, tonda gaja bisam utopu keca cap, bura tara kuramunge er si kera cap, tonda merak ma cap, doupra yakaramu. 23 Raja Salomoda yuk mutu nimi deiyo neng kemami utopu ngebo guma. Yuk mutu ton ila nimi deiyo neng, Raja neng kurami dinin, sun isomka cap, ila kael cap kurami ngeda, yambul weik pua. Dinino, Salomo erda pio tek sisi ila kael kemna cap, pio ila isomka cap ngebo kuramu.

24 Ban-ban yuma kurami nesaladi, ‘Salomo cap antapmepedi, Allahdi pepra deipupa kael keamu keca, Salomo dipru neitamai kapu ngeda, erdi pepsetupa, kael kepkamep’ tenen, yakarami. 25 ‘Ange kael keptepe’ tenena tep yakarami taruda, er karena tep keca, yuk-yuk doupra yakarami kecada ake. Kamo telep keca dinin, kunumna weik keca er sida emas cap, perak cap, tonda lyom opkal telepnge cap, mar cap, jen cap, parang cap, uda jen talen nengdi talenung keca yuk yala yuma cap, tonda nintong telep keca er sida rempa-rempa cap, ‘Jen keca tau pepkamre’ tenen, tapakra derirami keca yala-yala yuma cap, kuda bisam cap, keledai bisam cap, aketeng tamun yuma duyakaramidi, Raja Salomo tep karerami. Atep nengeda, Salomoda pio ila isomka ngebo kuramu.

26 Raja Salomodi tu deiki embana tep keca, er si kereta kuda ngeda, weika di ton cap keteneipu. Akeca gipra dubana tep, kuda bisam weika di ton keteneipu. Akeca deiki bukra, nimi porbana tep, jen talena nengda, weik ton keteneipu. Nimi porbana tep, kereta kuda ngeda, denge weik seribu empat ratus (1,400) ton ketenepra deipu. Akeca gipra dubana tep, Kuda bisam keteneipu ngeda, denge weik dua belas ribu (12,000) ketenepra deipu. Ange yuma neitamai di, bokrapudi ton ngeda, er pe kuramuai Yerusalem ati arum neitamai deipu. Ton tara ngeda bokra, yuk-yuk mutu neitamai, ortara ati arum damai ton deipu.

27 Tonda, Raja Salomodi pio telep kupra pel doramnga deiki di, amutu yuma talepra kuramu taruda, Yerusalem mutu neitamaida, kunumna weik keca, er si perak dopra, bena deriramngada, denge pio weik akwamnga cadi, tali gel sisada, yuma tara yuma, tali dakuramretopu kupra, pio weik kwamu. Tonda, Libanon mutu paramu cemara coda, kunumna weik co kwamu dinin, Yerusalem mutu neitamaida, aco ton pio weik kwamnga cadi, tali daparamu ara, co weik kuramra utopu kwamu. 28 Tonda Raja Salomoda, er pel doramnga deiki di, er kuda bisam pio weika di kunuprapudi Yerusalem mutu tamupra dekaramupa, pio weik kwamu. Ton ngeda, Kilikia mutu, tonda er si Mesir mutu baramidi, kuda bisam doupra, tamupra duyakarami. Ton ngeda, Kue mutu, tonda er si Silisia mutu benamidi, kuda bisam ton doupra, tamupra duyakarami. Akuda bisam yumada, co bo tapangna gum di, sun amutu-amutu nesaladi, kunumamitopu kupra, aco bo deiki dipu, kunumamidi, doupra duyakarami.

29 Ataruda, tapu gerekdongopra tu deiki deipra buknedi, kuda gipropnepa ban keca, er si kereta kuda, nimi porbanange tep nengeda, Mesir mutu di doupra yakarami. Tenpu Kereta perang er kunumnada, kunumna weik keca, er si perak denge weik, enam ratus (600) deiki di kunumami. Tonda tenpu kuda bisam telepnge, er kunumnada, denge weik seratus lima puluh (150) uang perak deiki di kunumami. Tonda, Salomo er bung keca kunumna deiyo kepra pel dona neng dipapu, akereta cap, akuda bisam cap yumada, tamupra yuk mutu taleami deiyo neng tep kunumami. Ada, Het yala nesala talepra, kurami nimi deiyo neng, sun damai kunumbarami. Tonda, Siria mutu, tonda er si Aram mutu, nimi deiyo kepra taleami neng, sun damai kunumbarami.