1Ki 12 | XteSC | STEP | Ataruda Rehabeam adipapu Sikem mutu beu. Deiyoda, Israel nesala ataru kurami nesala yuma buluprapidi, ‘Rehabeamda nun nimi deiyo ngebo Raja kunkamsera tep, erepra deipkupe,’ tenepidi sun peda Sikem mutu bei.

1 Kings 12

Israel nesaladi, Raja Rehabeam tep, ‘Nun songe,’ pepra yanipi upu

1 Ataruda Rehabeam adipapu Sikem mutu beu. Deiyoda, Israel nesala ataru kurami nesala yuma buluprapidi, ‘Rehabeamda nun nimi deiyo ngebo Raja kunkamsera tep, erepra deipkupe,’ tenepidi sun peda Sikem mutu bei. 2 Tonda atarupu Nebat er mi Yerobeamda, ‘Salomodi popnerur’ tenen, Mesir mutu dabena kuramupane, tupa acapu kupu. Yuk nengdi, ‘Rehabeam tekeipkamenge,’ pepipa gekepu. Gekepu dingeda Mesir mutu tapra, ka di tamupra Israel mutu neitamaipu yau.

3 Yerobeam yau pangeda, Israel nesala kurami nengdi Yerobeam tep upu peipipa yau. Yau pangeda, Yerobeam cap, Israel nesala cap sun yuma wisiprapidi, Rehabeam damai bei. Bei dingeda sundi Rehabeam tep pepi. 4 “Kan nai bo Salomodi nun tep ikin kecapu deriramseue. Ila ikin pel weik dimamseupa, kange mun weik kuramepu. Dinin ukutaruda kandi kanam kupra deipsememdi, kange mun kuserenge gum kupra deipkusemem pangeda, kan pepsememtopu kunkamepe,” pepi. 5 Upepi dinin, Rehabeamdi aneng tep tamupra pepu. “Ukutaruda tamupra benmamumnyane, ue weneri konum mapmumnyopda, ortumida ka di tamupra ne damai yankamarume,” pepu. Upepupa, anesala yuma bendopi.

6 Bendopi pangeda, Rehabeamdi er tep ‘Ukunkamrume,’ pepra upu daramdina tep melimna neng sun asipetena tep beu. Anengda wisi neng cadi, men di er nai bo Salomo cap, kikiman kuramidi perami neng tep, Rehabeamdi aneng sun damai perbeu. “Nedi asipetepsene. Sundi pepneso. Neda arup upu pepmaneng nesala tep, ware kuprap upu penkamne do?” pepra asipetepu. 7 Upepu pangeda, awisi nengdi tamupra pepi. “Gume kao, kan dipru neitamaida, ‘Nimi kan-kan melimna utopu ngebo kupnedi, aneng melipkamne,’ tenepmemdi, anesala sun putapretopu, sun tep ‘Telepe,’ pepkamrume. Upepmemnyopda, amenda taru yumada, anengdi kan tep pio tek sisipu melimkamkenge. Sundi kan amutara kungedi kan upu gekepra pio melimkamkenge,” pepi.

8 Upepi dinin, Rehabeamdi sun upu men gekepudi tapu. Wisi nengdi pepi upu tapu dingeda, yuk neng, er amutara kuramidi, er pel melipra domi neng damai beu. Anengda, tali kaber neng tep asipetepu. Tonda akaber nengda, er Rehabeam cap, aneng cap sun keteng tamunda amsepu, milo nyapu taru di dipra, adine kikiman nepbaramya cadi, erdi sun upupu gekepu. 9 Akaber neng tep asipetepudi, “Arup taru moropmaneng nesalada, ‘Kan nai bodi ikin keca nun nong deiki deriramseu dinin, kandi ange dopra kanam kupra deipsetum do?’ pepneiya tep, anesala tep nengeda, ware kupra pepkamne do?” pepra asipetepu.

10 Asipetepupa, akaber nengdi, tamupra pepi. “Gume, anengdi, ‘Kan nai bo ikin keca nun nong deiki deipseu dinin, kandi kanam kupra deipserume,’ pepra moropmakeng nesala tep nengeda, sun damai upepkurume. ‘Gume, ne nai bodi taleamseu tarada kanam utonun kuramrum dinin, nedi talenkamsen taruda, pio ikin weik kunkamrume.’

11 Ne nai bo Daud taleamseuada, ‘Yu di ikin keca nun nong deiki deriramseu,’ teneramrum dinin, neda erdi kuramu utopu gume. Erdi sun deiki deriramseu ngeda, tek sisi kanam pua. Nedi sun nong deiki derinkamsen ngeda, pio ikin weike kunkamsere. Tonda, ne naidi sun wenemna tep, tali tapu di bongoramseu dinin, ne dingeda, sun wenemna tep, takke keca dopropnedi, sun nong bol deiki bongopkamsene. Apepmaptopu ange upepkurume,” pepi. Ada kaber nengdi Rehabeam tep pepi.

12 Uda, ue weneri tumi konum kupu pangeda, nimi deiyo ngebo ‘Uwe weneri tumi konum kupyopda ne damai tamupra yankamrume,’ peputopu, Yerobeam cap, er kapu neng yuma cap tamupra nimi deiyo ngebo Rehabeam damai bei. 13 Bei pangeda, Rehabeamdi ila yu upu deiki di aneng tep puto di pepu. Ada, er nai bo men di upu meliami wisi nengda, ‘Bouna di pepkamrume,’ pepi ngeda utopu gum dinin, Rehabeamdi ila upu deiki di tali-tali upu bena peptapu. 14 Rehabeamdi pepu ngeda, er cap kikiman kurami neng, sun kaber nengdi peipmainge utopu sun damai bena pepu. “Ne nai bodi sun tep ila ikin pel dipseudi tali tapu di wenepra poramseu dinin, neda ange utopu gume, neda tek sisi ikin pel dimsenedi, takke keca gatnge di popra wenemkamsene,” pepu.

15 Ange tep nengeda, Raja Rehabeamdi er damai yana moropi neng tep, men gekepudi, mali upupu peptapu. Ukupu dinino, erdi betapra men tenepu dinin, tek sisi akupu ngeda, ake. Ada ange-ange yuma kupu ngeda, ada tali nimi dipapu gume. Ada Allah er si Yahwehdi, ‘Ukupkamre,’ teneramutopu kupu. Tonda nimi tenpu Silo mutu kuramu ngebo, erda nabi Ahia tep Allahdi er si Yahwehdi, ‘Ukupkamre,’ peiputopu kupu. Angeda, Allahdi, Ahia tep peipupa, Ahiadi, Nebat er mi Yerobeam tep pepra deiamu ngeda, ‘Tek sisa kupkamre’ tenen, kupu. Atep, ange yumada, Allah er ja. Dinino, Rehabeamdi ange yumada betapra men tenepu.

16 Israel nesala yumadi dipetepidi, nimi deiyo ngebo Rehabeamdi Israel neng sun upu men gekepmanto kupu pangeda, sundi adeiyo ngebo tep pepi. “Rehabeam er yala nengda Daud yala pua. Atep, nunda ware keca kuptepya deiki di Daud er yala neng cap, telep kupra kikiman kutepe do? Nunda ware kupra kuptepya deiki di Isai er mi Daud, er yala neng cap kikiman kutepe do? Sundi deipipa, dadeipdanen yakarami neng yumada, nun cap kikiman men kunkamepe.

Atep nengeda, nun yuk Israel nesala, yala-yala yumada bendopkamepe! Rehabeamda er yuk dakunkamre. Er cap, er yala neng cap, ada Dauddi deipupa, dadeipdanen yakarami yala neng yumada, sun pedi, sun pe tara neng tep kalekra melipdankamenge. Nun puda, yuk kunkamepe.” Upepi dingeda, sun Israel nesala dinin, yuk yala-yala yumadi, sun pe ati tamupra bendopidi, Daud er yala nengpu utapropi.

17 Ukupi pangeda, Rehabeamda Israel yala nesala dinin, Yehuda yala neng kurami mutu, sun kuramyaipu tamupra bei. Tonda, Rehabeamda tupa sun ila nimi deiyo ngebo Raja tekudi anesalapu talepra kuramu. 18 Amenda taruda, Rehabeam nimi deiyo ngebo Raja kuramu taruda, er amutara kurami neng, sun pel dimna tep deiyo ngebo er sida Adoniram kuramu. Rehabeamdi angebo Adoniram tep, ‘Israel nesala ikin pel dipkamre’ tenen, wepra deipupa, amutu neitamai beu dinin, sun Israel neng yumadi, ‘Rehabeam cap, er nyapsilip capda, nun songe,’ tenepidi, gel doprapidi, angebo Adoniram popipa depu. Depu pangeda, Rehabeam erda ange epudi, menmena er kuda gipra tu deiki embana keca, er sida kereta kuda, akeca deiki bukrapudi, sepdara Yerusalem mutu tamupra beu.

19 Ukuramya tep, atumi di gonga kepidi, ataru adine abuku sekmepu taruda, sun Israel nesalada, Daud er yala neng tep, ‘Nun songe’ teneramidi, nimi deiyo-deiyo nengdi perami upu pio men gekenunge. Tamnapu kununge. 20 Akunmai taru Israel nesaladi gekenmaipa, ‘Yerobeamda Mesir mutu di tamupra yare,’ pepipa gekepi dingeda, upupipa yau. Yau pangeda, Israel nengdi, ‘Yerobeamda nun Raja kunkamser’ tenen, erepra deipi.

Ukupi dingeda, Israel nesala yala-yala yuma, anengdi, Yerobeam tep er upu gekepra kurami dinin, Yehuda yala nesalapuda, sun gume. Sun Yehuda yala neng, ayala tenpu peda, ‘Pio gume, Dauddi deipupa deipdanen barami nesalada, er yala neng tep, nun deiyo neng kunkamenge. Yuk yala nengdi gume,’ teneramidi, ayala neng tepapu, sun amutara bukra, sun upu gekerami. Atep nengeda, Yehuda yala neng dipu, Rehabeam tep, ‘Nun Raja adano,’ teneramidi kurami.

21 Ukuramya tep, Rehabeamda Yerusalem mutu tamupra beu taruda, erdi upupupa, sun Yehuda yala neng yuma cap, sun Benyamin yala neng cap bulupra deipu. Sun ayala butene yai nengda, nimi weik 180 ribu jen talen neng bulupra yai. Bulupra yaiya deiyoda ake. Ada, Israel nesala yuk yala-yala yuma tep, ‘Popra bisbisa kapkamepe’ tenen, bupra yai.

Tonda, ‘Aneng yuma popbisipmepedi, Raja Salomodi deipu mi, nun nai bo Rehabeamda, er dipapu nun deiyo ngebo, Raja kepseredi, amutu yuma er dipu talenkamsere’ tenen, Yehuda yala neng cap, Benyamin yala neng yuma cap bupra yaidi, sun Israel neng dinin, yuk-yuk yala neng porbana tep ketenepi.

Allah er si Yahwehdi Yerobeam tep, “Sun Israel tara nesala tep, men porbenkurume,” pepra deipu upu

22 Sun Yehuda yala neng cap, Benyamin yala neng capdi, ‘Israel neng dinin, yuk yala-yala neng yuma popbisipkamepe,’ tenepidi ketenepi dinin, Allah er si Yahwehdi, tenpu ngebo er si Semaya tep upu peryau. Semayada, Allah er upu lap pena ngebo kuramu. 23 Allah er si Yahwehdi Semaya tep pepu. “Salomo er mi Rehabeam, ada Yehuda yala neng sun deiyo ngebo tep upu pepkamrume. Ada er tepapu gume, Rehabeam cap, sun Yehuda yala neng yuma cap, Benyamin yala neng yuma cap, tonda, sun yuk neng yuma cap tep, upepkamrume.

24 ‘Gekepkurume. Allah er si Yahwehdi upepsere. Sun yumada tenpu ila yala utopu nesala kurume. Atep nengeda, sun yala neng kan-kan dakunge Israel neng cap, sun deiyo ngebo Yerobeam cap tep, men porbenkamrume. Sun Yehuda neng cap, Benyamin yala neng cap, sun pe ati tamupra bendopso. Akupkamrenge yumada, ne Allah ja. Ne si Yahweh kunune. Ne deiki dipapu Rehabeam sakamre. Erda Raja tupa men kunkamre,’ Allahdi pepsere.” Allahdi Semaya tep peipupa, Semayadi Yehuda yala neng cap, Benyamin yala neng cap tep lap pepu. Upepka tep nengeda, aneng yuma Allah er si Yahwehdi, ‘Sun pe ati tamupra bendopso,’ pepupa gekepidi bei.

Yerobeamdi, tali keca si eremna tep, sapi bisam urasin utopu petupra deipu upu

25 Ange yuma konum kupu pangeda, Yerobeam erda nimi deiyo ngebo konum kepu taruda, adipapu Efraim yala neng talepra kurami tara, Sikem mutu bena kuramu. Ada, ‘Nimidi poryankamnunga’ tenen, akeca-keca yuma ketenepra deipupa, puto weik kepu. Ukupudi, ke taru tep amutu kuramnganen, adine yuk mutu ton er sida Peniel mutu beudi, amutu ton puto kemna tep keteneipu. 26 Konum kupu dingeda, Yerobeam er dipruai di tenenmau. ‘Israel tara nesala, yala-yala kunge nesala yumada, ‘Daud er yala nengdi talenkamsenge. Ukupmengopda, atara yumada, ayala neng dipu nun nimi deiyo neng kupra talenkamsenge,’ tenepmengedi, Daud yala neng tarapu kepropkamenge. Yerobeamdi teneramu.

27 Tonda anesala ukupmangdi, Allah Yahweh, er si eremna ati Yerusalem mutu karerbenkamenge. Ada Yerusalem bengedi, sun mali kupmange keca kaukemna tep, gam keca popra, Allah karepmengedi uku dongorbenkamenge. Ukuramengada, Yerusalem mutupu debanunga cadi, ukupmenga deiki di, sun nai Raja Rehabeam tep, ‘Nun nai,’ pepra er tara kepropkameng ja. Rehabeamda, Yehuda yala neng, sun ila nimi deiyo ngebo Raja kurure. Er kuryaipu melipra bena ereipmenge dingeda, anesaladi, ne yana popkamnenge,’ Yerobeamdi uteneramu.

28 Ukupra ange yuma teninmauanen, tenepkopda, yuk neng cap upu sisingmaiyane, ‘Angeda ukuptene,’ konum tenepudi nimi deiyo ngebodi, kunumna weik gat keca er sida emas dopropudi, jem sapi urasin utopu petupra butene ketekepra deipu Ukupu dingeda erdi amutu kurami Israel nesala tep pepu. “Sunda Yerusalem mutupu barumada ikin di baramrum do? Ukutaruda Israel nesala sun dipetepso. Israel nesala sun tep Mesir mutu neitamai di lyepseudi doupra yakaramseu allah-allahda, sapi bisam urasin utopu ngeda akunmare,” pepu.

29 Yerobeamdi upepra ange konum kupkopda, tenpu sapi bisam mi urasin utopu ketenepra deipu ngeda, Betel mutu deipu. Ton yuk ngeda Dan yala neng kurami mutu deipu. 30 Ukupu pangeda, amutu nesaladi akeca si eremna tep Betel mutu cap, Dan mutu cap, benamidi akeca si eremamidi. Dan mutuda karenai dinin, amutu peda bena akeca si eremami. Anesala ange ukuramya deiki di, sun yuma ila di mali kurami.

31 Yerobeamdi Allah er si eremna tep si eremna ati yuk-yuk dopembaramu. Angeda, Allahdi, “Ukuna meme,” peramnga cadi, mali weik kuramu. ^{▼▼Ataruda nimidi, ‘Allah er si eremna tep, gam keca popmepedi, er tep karenkamepe’ tenen, mutu gon deiki akati domidi welepra Allah tep karerbarami dinin, pumun taruda, Allahdi, “Ukuna meme. Angeda men kunkamrume. Nedi ‘Ace pua’ pepsene mutupu, ne si deipkamne mutupu bena ne gispal dona tep, karen keca karenkamnerumdi, ne si eremkamnerume. Yukai pio meme,” konum peiamu. Atep nengeda, angebodi akati-akati tupa dopembaramu ngeda, mali weik kuramu.} Ukuramudi, imam-imam neng yuma aca pel dona tep erepra deriramu. Erdi, ‘Aneng imam neng pel donkameng’ tenen, wepra deriramu nengda, Lewi yala neng gum dinin, ‘Dakwapye’ tenepudi, yuk yala-yala neng sun neitamai di aneng wepra deipu. Ukupkada pio mali kupu.

32 Yerobeamdi ange kuna tep go konum keteneipudi, sun Yehuda yala nesala kurami mutu di ware dengeda ban bari neitamai dinin, ila tumi tanggal lima belas tumi deiki kailya kalepra kuraminge utopu, er kange dipapu, ‘Ban war neitamai, atanggal lima belas deiki di kailya kalepkamepe,’ pepra deipudi, gam keca poprapudi, pala gel taplakra yakeipmaiyai deiki uku dongopu. Yerobeamdi agam keca popra isok tep karepu ngeda, Betel mutupu bena asapi urasin utopunge si eremna tep karepudi uku dongopu. Tonda, Betel mutu dinin, mutu gon deiki Allah si eremna tep er kange dipapu ati dopu ngeda, ‘Imam nengdi pel donkamenge’ tenen, tali imam-imam neng wepra ereipupa pel dorami. Ange peda mali weik kupu.

33 Akupu ngeda, Yerobeam er pe kange dipapu, ware ban bari (8) kupne taru, atumi tanggal lima belas kupne taruda, asapi bisam urasin utopu keca si eremna tep, Betel mutu gam keca popra uku dongopu. Akeca uku dongopkaida, ada pala gel taplakra yakeipkai deiki deipu. Ange tep nengeda, er dipapu tenepnedi, ‘Awar, atanggal deiki di, ila kailya kalepra isok si eremkamepe,’ tenepra baramudi, pala gel taplakra yakeipkai deiki di karerbaramu. Akupunge yumada, pio ila mali weik kupu.