1 Kings 13

Yehuda mutu ngebodi, Allah er pel doramunge tep, pepu upu

1Yerobeamda, Allah karena tep, gel pala taplakra deiaminge, er si mesba damai tekudi, ‘Siltong telep keca uku dongopnedi, Allah Yahweh tep karepkune,’ tenenmau. Ange tenenmau taruda, Yehuda mutu neitamaida, dortaru kupkamrenge tep, Allah Yahwehdi peiprepa, gekepnedi, aupu lap pena ngebo, nabi ton kuramu. Ukuramnga cadi, er angebo tep, Allahdi, “Kanda adipapu Betel mutu benkurume,” peipu. Upeipupa, anabi Betel mutu beu taruda, Yerobeam erda, mesba damai tekmaudi, ‘Allah tep karena keca uku dongopkun,’ tenenmau. 2Allah Yahwehdi anabi er kange dipru neitamaida, dorkunkamu keca tep, “Ukupra pepkurume,” peipupa, anabi ngebo gekepudi, adipapu amesba damai di yana pepu. Ada, “Uo, Kanda amutu mesbao, amutu mesbao, Allah Yahwehdi kan tep aupu pepra deipkere. Ada, amenda taruda, Raja Daud er nyapu neng neitamai di, sal mi ton deipkamenge. Ami er sida, ‘Yosia,’ pepkamenge. Uo, amesba-amesbao, ne Allah tep teka men tenenung dinin, tali isok si eremengedi, imam-imam pel utopunge talepra dongedi, isok si eremnung nengda, angebo Yosiadi, aneng poptapredi, kan deiki di sun nong uku dongopkamrure. Sun aimam utopu nengda, tali isok si eremnung ati di, ne Allah si eremna tep, mesba deiamneiyai dam yangedi, ‘Nun ton amesba deiki dipu, siltong telep keca uku dongopkamepe’ tenen, yakankamenge. Yosiadi ayankameng nengda, poptapredi, sun nong cap, sun nimi yo cap doupra, kan deikipu uku sekra dongopre pangeda, ukudi akeca yuma jepropredi, gawal dakamre.

3Atumi dipapu, anabi ngebodi, ‘Ne upu geken nengda, pio tek sisi tenepkamneng’ tenen, Allah er puto deiki di, petenkemna keca ton karepkamre. Atep, aupu ton cap dukdongopra pepu. “Amesbada urupra sakamare. Ukuprepa, amesba deiki sikke kapu ngeda, yamupra tuai sakamare. Apepnetopu konum kupyopda, sun amutu nengdi, ‘Aupuda, tek sisi Allah erdi pepra deipmau upu, yan pepmaseu’ tenen, kael kepkamrume,” pepra, nabi ngebodi pepu.

4Anabi aupu bena pepupa, ataru dipu Yorebeam gekepudi, tenepu. ‘Gume, angeboda, pio mali upu pepmara deiki di, nun mesba konum mali kweipmasere’ tenen, akati damai tengmai neng tep pepu. “Er anabi ngeboda, mali upu yan penmara tep, tomopso,” pepra, buru dum bupupu dinin, adipapu Yorebeam er buruda, meiyal sepupa, tamupra men doropmanto kupu. 5Tonda, ataru dipapu, dato-dato di amesbada dakra sakudi, amesba deiki kamo sikkeda yamupra, tuai saku. Ada, Allah Yahweh erdi, ‘Ukupkamre,’ pepra, deipmaupa, anabi gekepudi, yana peipmaua utopu kupu.

6Ukupu pangeda, Raja Yorebeamdi anabi tep upepu, “Uo, ne moropkene. Kandi ne tep, kan nai Bo Allah Yahweh tep moropkunerume. Moropnemempa, Allah erdi ne tep bicau tenepneredi, ne buru miyal sepmaner ngeda, kwetepra deipkamanere,” pepra moropu. Upepra moropupa, anabidi er angebo moroputopu, Allah tep, “Naio angebo meliprume,” pepra moropupa, adipu Raja Yorebeam, er buru miyal sepmau ngeda, melipra kwetepupa, telep kupu. 7Ukupu pangeda, animi deiyo ngebo Raja Yerobeamdi, Allah upu peiprepa, lap pena ngebo nabi tep upepu, “Kanda ne pe ati yamempa, ne ati di, jena tonpa jepkuneme. Tonda, nedi kan tep, maton don keca ton karepkukene,” pepu.

8Upepupa, nabidi tamupra Yerobeam tep upepu, “Gume, ne deiyo ngebo Rajao, kan talepra kumem keca ton, wilipra karepkunetuma peda, angeda tek sisi men doroptenye. Deiyoda ake. Nedi Raja kan ati yatenepa, jen keca cap, me cap, tonpa men jepteneme. 9Ada, tali tep men pepkene. Deiyoda, Allah Yahwehdi ne tep, ‘Kanda amutu kunkamarem taruda, jen keca cap, me cap dopra men jepkamrume,’ peipmanere. Tonda, ‘Tamupra yakankumem taruda, benmamem bisi deiki di, tamupra men yankamrume. Yuk bisi kepra yankamrume,’ peipmanere,” pepu. 10Anabidi aupu yuma konum pepra seng pepkopda, er adipu tamupra, yanmau bisi tapra, yuk bisi di kepra beu.

Betel mutu neitamaida, wisi nabi tenpu ton kuramnga tep upu

11Ataru peda, Betel mutu neitamaida, nabi tenpu ton, pio wisi deiamu ngebo kuramu cadi, anabi er nyapudi, Allah er peipu upu lap pena tep nabi ngebo, Yehuda mutu neitamai dinin, Betel mutu yanmaudi, atumi kunmaupa, epmai keca yuma cap, tonda nabidi nimi deiyo ngebo Raja tep, pepmau upu gekepmange nge yuma capda, sun nai bo damai bena, nukeipipa gekepu. 12Aupu gekepu dingeda, anabi wisi ngebodi, er nyapu tep tamupra asipu. “Yehuda mutu ngebo, Allah er upu lap pena ngebo, nabi tamupra er mutu benkou taruda, dan tara bisi beu do?” pepra asipetepu. Asipetepupa, er nyapudi, sun nai bo dopra, epmangu bisi damai bena, “Betel mutu yanmau nabi beu bisida, abisi beuada ake,” pepra benbenepidi, lap pepi. 13Upepipa, aneng sun nai bodi er nyapu tep, “Ne benkuna cadi, sun adipapu kuda bisam bukra bana ngeda, ketenepra deipnemumpa, bukra benkune,” pepu. Upepupa, er nyapudi ketenepra deipipa, akuda bali deiki bukra, abanmau bisi amenda dombeu.

14Yehuda mutu neitamai kuramu dinin, Betel mutu yana, upu peipmau nabi banmau bisida, awisi nabi amenda dombeudi banmauane, Betel mutu yanmau nabi, erda ila co tekamnga amutara, kawai bena bukapupa antaprei. Antapreiopda, awisi nabidi, Yehuda mutu kuramu dinin, Betel mutu yana mambul upu peipmau nabi tep, “Kanda, Allahdi peiprepa, er upu lap pena deiyo ngebo nabi kurum do?” pepra, bena asipetepu. Ukupupa, “Teka neda Yehuda mutu neitamai kunun nabi, abukman adano,” pepu. 15Atep nengeda, Betel mutu kuramu nabi wisi ngebodi pepu. “Kanda yakamempa, ne ati kan cap, tonpa jena jepkunema tep, ne cap tonpa benkuneme,” pepu.

16Upepupane, Yehuda mutu kuramu nabidi tamupra upepu. “Gume, kan cap jen keca tonpa men jepteneme. Ada, kandi ne tep, ‘Nun tonpa jen jepkuneme,’ pepra, napnerem ngeda, men gekepkukene. Deiyoda, Allahdi, ‘Angeda men kupkamreme,’ peipneua cadi, amutu neitamai di, jen keca jena cap, me cap pio men jeptene. 17Ada tali men pepkene. Allah Yahwehdi ne tep, ‘Kan amutu bememdi, keana taru tep dakunkumem taruda, jen keca jena cap, me capda, pio men jepkamrume,’ pepmanere. Tonda, ‘Amutu bankumem taru benmamem bisipu, amenda tamupra yakan taru peda, abisipu men yankamrume,’ peipmanere,” Yehuda mutu kuramu nabidi pepu.

18Upepu pangeda, Betel mutu kuramu nabi, wisi ngebodi tamupra, Yehuda mutu kuramu nabi tep, mok upu peptapu ada, “Ne peda nabi kunune. Kan kurem utopu ngebo, ne peda kunune. Allah Yahweh, er im deiki pel don ngebo, malaikatdi, ne damai yana, upu pepra deipmanerdi, ‘Angeboda doupra, kan ati duyankurume,’ pepmanere. Atep nengeda, kanda ne ati jen keca tonpa jepkuneme,” pepra, mawa di mok upu deiki pepu. 19Upepu pangeda, Yehuda mutu neitamai kuramu ngebo, Allah er pel dona tep, nabi ngeboda melipupa, Betel mutu kuramu nabi, wisi ngebo cap, er ati bereidi, er angebo cap jen keca bena jeprei.

20Akati bena, sun aneng jen keca tonpa jerei taruda, Allah Yahwehdi, Betel mutu kuramu nabi, wisi ngebo tep, dato-dato di upu yana peipupa, anabi er kange dipru neitamai di gekepu. 21Upeipupa, awisi nabi erdi, Yehuda mutu neitamai di, er ati ukupu yanmaudi, jen keca jenmau nabi tep upepu. “Uo, kanda gekepneo. Allah Yahwehdi kan tep peipker upuda ake. Kan nai Allah Yahwehdi pepra deipmakeu upuda, men gekepmaremdi, er peipmakeu upu yaniptapmarema deiki di, bisbisa kapra balila kunmareme. 22Akupmarema deiki, kandi me cap, jen keca cap konum jepmareme. Ada, Allahdi kan tep, ‘Angeda kuna gume,’ pepra, konum peipmakeu dinin, ange konum kupmarema cadi, kan wenemna tep, adipapu popkerepa, depkamarem ja. Tonda, depmemnyopda, kan yala nesala depmengepa peinungai, kan nong doupra, men peipkamakenge,” pepu.

23Sun jen keca konum jepreiyopda, Betel mutu kuramu wisi nabidi, Yehuda mutu kuramu ngebo, Allah er peiamu upu lap pena tep nabi tep, bisi benkoua tep, er pe keledai bisam bali deiki bungna keca dopra, er pe keledai bali deiki dopra deipudi, Yehuda mutu nabi tep karepupa, bisi banmau. 24Ukupupa, Allah er pel don ngebo, Yehuda mutu kuramu nabida, adipapu bisi banmauane, bisi neitamai bau taruda, pus kamo utopu keca, er si singa ila yu ngeda, er inipmaua di yanapudi, anabi popupa depu. Depudi, er nongda saka bisi embaramya neitamaipu dourbeudi, acapu kapmau dinin, er anabi bukra banmau keledai bisam peda, er angebo depmaua, damaipu tekmau. Tonda, pus kamo utopu keca, singa ila yunge peda, meneng damai apu tekmau.

25Ukupmaupanen, amenda taru abisi banmai nesaladi, adepmau nabi ngebo cap, er damai tekmau singa cap, epiyopda, sun adipapu Betel mutu ati arum dopra kurami nesala tep, akupmaupa epmai nge yuma bena lap perbei. Ada, wisi nabi ngebo kuramu mutu, Betel mutu bena lap pepi. 26Upepipa, Betel mutu kuramu wisi nabida, aupu gekepkopda, erdi upepu, “Tek sisi, Allah er pel dona tep, Yehuda mutu kuramu nabi ngebo, Allah Yahwehdi peipmau upu men gekepmaua tep, Allahdi pus kamo utopu keca, singa ila yunge doroipmarpa, bisi neitamai di yana popmare. Ada, Allah Yahweh erdi, ‘Ukupkamane,’ peipmau utopu konum kupmare,” pepu.

27Upepu dingeda, awisi nabidi, er nyapu tep upepu, “Ne keledai bisam bali deiki bukra bana tepnge, dopra deipnemumpa, adeiki bukra dirbenkune,” pepupa, dopra deipipa, er keledai bisam bali deiki bukra beu. 28Er bisi banmauane, Yehuda mutu kuramu nabi depmaua damai beudi, bisi embaramya neitamai saka dourbenmaudi, acapu kapmauai beudi epu. Tonda, Yehuda mutu kuramu nabi, er bukra banmau keledai bisam pe, acapu tekmaupa epu. Tonda, adamaipu pus kamo utopu keca, singa ila yunge peda, adamaipu tekmaupa, bena epu. Dinino, asingadi adepmau nabi pe, tonda er bukra banmau keledai bisam peda, men popmaudi, dopra men jepmaue. Tupa talipu meneng damai tekmau.

29Ukupmaupane, er awisi nabi, Betel mutu kuramu ngebodi, Yehuda mutu kuramu dinin, aca depmau nabi, er nong bena doprapudi, Yehuda mutu kuramu nabi doupra, benmau keledai bisam, er bali deiki deipudi, tamupra Betel mutupu duyau. Duyaupa, er adepmau nabi tep deiamidi, engeramiyane, Betel mutu neitamaipu peipi.

30Yehuda mutu kuramu nabi, depmau ngebo er nongda, Betel mutu kuramu wisi nabidi doprapudi, er tara nesala peiramiaipu, bena tu palipra peipu. Konum peipkopda, er awisi nabi cap, er nyapu cap sun yumadi, adepmau nabi tep engerami. Engenmai taruda, awisi nabidi uperamu. “Uo, kanda ne kabo sisi, ne weit bo utopu kuramum dinin, depmaumume,” pepra engeramu.

31Ukuramiyanen, amenda taruda, awisi nabidi, er pe nyapu tep upepu, “Ne depnyopda, Allah er pel dona nabi ngebo, aca peipmap ngebo, er peindampu yana peipkamnerume. Ada, anabi er nong cap, yo cap peipmaruma dana tara, ne nong cap, ne yo capda, acapu yana peipkamnerume,” pepu. 32Upepu dingeda, awisi nabidi, aupu ton dukdongopra pepu. “Angeda tali men pepsene. Sun kange moupso. Allah Yahwehdi, Yehuda tara kuramu nabi tep, ‘Betel mutu wenemna tep, ukupkamne,’ pepra, deipu upu, tek sisi apeiamutopu kupkamre ja. Ada, nun Betel mutu neitamai ketenepra deiami mesba cap, tonda Samaria mutu neitamai yumada, tali isok si eremna tep, doamyai capda, ‘Sun wenemna tep, uruptapnedi, gum kupra deipkamne,’ peiamu upu yumada, Allah erdi peiamutopu, tek sisi kupkamre ja,” pepu.

Yerobeamdi mali kuramu keca tamna gum di, tali lupra mali kuramunge tep, pepu upu

33Ange-ange yuma konum kupu dinin, ila nimi deiyo ngebo, Raja Yerobeamdi mali kuramu ngeda, men tapudi, angepu pio talepra kuramu. Ada, Allah er si eremna tep, ketenepra deiamuai pel dona tep nengeda, Yerobeamdi akati neitamai pel dona tep, imam neng yumada, Lewi yala nesala kankan di gum dinin, erdi tali yuk yala nesala ton wepra deriramupa, imam neng dorami pel peda, sun tali ton pel dorami. Tonda, ware ngebo do yuma, ‘Ne ton tali isok si eremna tep, isok karena tep dodiramyaida, ne ton pel doptene,’ tenerami nesala yumada, Raja Yerobeamdi, ‘Dyo, telepe, angebo peda imam pel dotue,’ teneramudi, ato neng wepra deriramupa, apel dorami.

34Akuramu ngeda, pio ila malinge kuramu cadi, ange menengada, Allahdi er Yerobeam cap, Yerobeamdi deipupa, deipdanen bei nesala cap, er yala nesala yumada, depbaramipa, ayala nesala yumada, konum deproidi, amutu neitamaida, gum kupropu. Sunda, amutu ton ila nimi deiyo kemna tep, Raja kepra, amutu kange di ton cap pio men talerami.