1Ki 14 | XteSC | STEP | Ataruda, Yerobeam, er mi Abia pu talepu.

1 Kings 14

Yerobeam er mi depu upu

1 Ataruda, Yerobeam, er mi Abia pu talepu. 2 Ukupupa, Yerobeamdi er ner tep pepu. “Ne nai boda Allah er si Yahweh, er upu lap pena ngebo er sida Ahia, er ati Silo mutu damai benkuruma tep, ketenepkurume. Ada, angebodi, ‘Israel nesala sun deiyo ngebo Yerobeam, er nerda adano,’ tenen, kan urasin kael gekerur cadi, yuk opkal kenekurume. Tonda kandi yuk neng peramengtopu upu yuk lelipra benpepkurume. Angebo Ahiada, men di upepneu. ‘Allahdi kan wepra deipkerepa, Israel nesala talepmemdi, sun Raja kunkamrume,’ pepneu ngebo kurure.” Yerobeamdi er ner tep pepu.

3 Upepudi aupu ton pepu. “Ukupmemdi benkomem taruda, er karena tep keca, roti kwaneng tokol di utara telepropa cap, tau telep jen roti er si kue yambulanun cap, mong mokon me yambulanun ton cap doupra, Allah er upu lap pena pel dore ngebo damai bememdi karepkurume. Ukupmempa, nun mi Ahia pu jenmar ngeda ‘Ware keca di do?’ tenen, asipetepkurume. Ukupmempa erdi, nun mi Ahia erpu jenmarpa amenda kupkamrenge tep, jenek pepkamaker ja,” Yerobeamdi er ner tep pepu. 4 Aupu yuma konum pepu pangeda, Yerobeamdi peputopu, er ner adipapu aupu gekepra ukupudi, Silo mutu Ahia damai beu. Uda, Ahia konum wisi cadi, nimi yuk neng ton pio betapra men epra kael men kepmanto kuramu.

5 Ahia ukuramu dinin, aner kapul men yau taruda, Allah er si Yahwehdi Ahia tep konum yan pepu. “Yerobeam er ner kan damai yaredi, er mi pu jenmarnge tep asipetepkamakere. Atep, kandi Yerobeam er ner tep nengeda, ‘Nedi ukupra, ukupra,’ pepkene upupu pepkamarume,” pepu. “Tonda, anerda kan damai yare dingeda, yuk neng upu di lelipra yana pepkamakere. Ada, ‘Ukupnepa yuk nengdi pepmenga, tenepkamner’ tenen, yakanmara tep pepkene.” Allah er si Yahwehdi Ahia tep pepu.

6 Ange konum lap pepka tep nengeda, Yerobeam er ner konum Ahia ati buplan damai beu dingeda, er konum yana lelim pepupa, Ahia gekepudi, “Telepe nati weko. Kanda Yerobeam er ner yanmaremada, ne konum kael kepkene. Atep nengeda, ‘Yuk ner penmanere teneptue,’ tenena gume. Yuk neng upu di lelipra ne damai yana pena gume. Neda, kan tep bamur upu pepkamakene. Atep gekepneo.” Ahiadi Yerobeam er ner tep pepu. 7 Upepudi aupu ton pepu.

Abamur upu pepkukene. Kandi Yerobeam tep aupu lap perbenkurume. Allah er si Yahwehdi sun Israel nesala pio kalekra melimrur Allahdi sun tep peipseu upuda adano. Ne mawa neng, Israel nesalada, ‘Sun deiyo ngebo kepredi talepkamre’ tenen, nedi kan tep Israel nesala neitamai di wepra deiamkesi.

8 Israel nesala sun pumun taru deiyo kurami neng, Raja Daud er yala nengda, Raja Daud er nyapsilip dipapu talepbaramipane, nedi sun tep yanipdongoprapsidi, kan tep karepkesi. Ada, ‘Israel neng sun deiyo ngebo kepkamre,’ tenepkesipane, Israel nesala cap, sun mutu cap kan tep karepkesi. Ne amutara kuramudi, ne pel doramu ngebo Dauddi, kange tenimtona gum dipapu, er dipru ne tep karepneudi, ne tep teka tenepneupa, nedi, ‘Angeda kunkamrume, angeda men kunkamrume,’ pepra peramsi upupu talepra, dukdongopra pel doramu. Ne kangeda, Dauddi pio dumsisi kupra pel doramneua utopu men kurume.

9 Dinin kanda, mali pio weik kurume. Sun men taru pel dopyakarami neng yumada, mali kun keca yambulpu kurami dinin, kanda pio weik ton cap tapakra mali weik kuramume. Ada, kan pedi kan pe tep, tali keca si eremna keca ketenepra deamume. Isok si eremna tep, gat keca besi di nimi urasin utopu keca ketekepra deipmumdi, akeca sipu eremrume. Ukuramuma deiki di, ne tulum weik kupnere. Sun amnyo tara konum kepmanerumdi, tapmaneruma cadi, sundi ne tep, ‘Allahda nun songe,’ tenerume.

10 Ukupmaneruma tep nengeda, ne tulum keca sun deiki deipnedi, sun wenemna tep kan cap, kandi deipmempa, dadeipdanen bankameng neng yuma cap popra gawal dakamne. Ukupnedi, Yerobeam kan nyapu yuma gum kupkamkere. Kan yala neng yuma, tali kange doupra kunge neng pe, kan-kan tali dakunge neng peda popra gawal dakamne. Israel nesala neitamaida kan yala neng ton men kunkamenge. Sun yumada, ‘Pio mali keca nimi nong deiki palepserur’ tenen, korokra tamameng utopu, tonda uku dongorameng utopu, kan yala neng yuma tapnedi, popra gawal dakamne.

11 Yerobeam kan yala neng ton kota mutu neitamai dadepmenge pangeda, kamdi jepkamenge. Tonda wai dam di depmenge pangeda, tali bura madi yana jepkamenge. Atep moupra tenepkurume. Ne sun nai bo Allah, ne si Yahwehdi konum pepsene. Allahdi upeipkere. Ahiadi Yerobeam er ner tep pepu. 12 Ahiadi Yerobeam er ner tep upepudi aupu ton dukdongopra pepu. “Ukutaru, kanda tamupra banmamemyanen kan ati buplan dam ‘Bena wekronkun’ tenen, kan yan yanipmem pangeda, kan mi adipapu depkamare.

13 Depre pangeda Israel nesala yumadi, mali pepra engepmengedi, tu palipkamenge. Ila neng peirameng utopu kupra, peipkamenge. Yerobeam yala neng yuk neng yumada, depkameng dinin, tu men palipkamenge. Kam cap, bura ma capdi jenkamenge. Angeda tali tep guma. Ada, Yerobeam erdi deipupa dadeipdanen barami nesala yuma gum dinin, ami puda, Allah er si Yahwehdi ami er kure keca dipetepupa, telep kupka cadi, er tep kange deipra dopropkamre. Allahdi, Israel nesala tep pio kalekra melimrure.

14 Israel neng pio melimrur Allah er si Yahwehdi, Israel nesala sun deiyo ngebodi ukupunge tep, wepra deipre pangeda, Yerobeamdi deipupa, dadeipgerekdanen bange neng yumada, gum kupra deipkamre. Apepmaken keca yuma kupkamre taru konum kupkere. Kandi, ‘Uo atumi dipapu do?’ pepnetumpa, nedi, ‘Tek sisi atumi akonuma adano,’ pepkene.” Ahiadi Yerobeam er ner tep pepu.

15 Upepudi, aupu ton pepu. “Allah er si Yahwehdi Israel nesala tep wenemna keca sun deiki deiprepa, mokon amutara kure keca yumada, longteng-longteng peramre utopu, Israel nesala peda ukupkamenge. Tonda Allahdi Israel nesala sun co puna neng tep, ‘Telep mutu talepkameng’ tenen, kareramu mutuda, tamupra dopropkamre. Konum dopropre dingeda, nimidi tali paramre keca kwenepra donongamengtopu, Israel nesala yuma dopra Efrat me goupra ortara dokotepkamre. Yuk mutu yu nengdi popbisipmengedi, dopra karen mutu ordubenkamenge. Ukupkamra deiyoda ake. Israel nesaladi isok si Asyera si eremna tep, lyom co ikrapidi, akeca si erememami. Asyera isok si pepra si eremaminge tep, Allah er si Yahwehdi tulum keca sun deiki deipkamre.

16 Tonda Yerobeamdi Allah si yaniramu utopu, Israel nesala yuma peda er kuramu keca epra kael kemamidi, sun peda utopu pio malipu kurami pangeda, Allahdi Israel nesalada konum tapkamre. Tapre pangeda, yuk mutu nengdi yana popbisipmengedi, Israel nesala dopra karen mutu neitamai dubenkamenge,” Ahiadi Yerobeam ner tep pepu.

17 Ahiadi aupu yuma konum pepra deipu pangeda, Yerobeam er ner Ahia damai tapra tamupra er mutu Tirsa mutu beu. Banmauanen, sun pe ati buplan dam bena yanirbau pangeda, sun mi Abia ataru dipapu depu. 18 Konum depu pangeda, Israel nesala yumadi ami tep engenmaiyanen, er nong dopra peipi. Ada, Allah er si Yahwehdi, er upu lap pena ngebo Ahia, Allah er amutara pel doramu ngebo tep, ‘Ukupkameng,’ peputopu ami depupa, sun amutu nengdi er nong peipi.

19 Yerobeam er taleamunge cap, tonda nimi poramunge cap yumada, pumun taru di buku neitamai sekra deipi. Ada Israel nesala sun talena deiyo neng pepra, abuku sida Raja-Raja pepra sekeipi. 20 Yerobeamda keteng tamun denge weik dua puluh dua tahun deiki kuramudi Israel nesala taleamu. Ukupbaramnganen, sirya taruda er co puna neng deramitopu er peda depu. Depu pangeda, er yo pununa tep er mi Nadabpu, nimi deiyo ngebo teku.

Yehuda mutu ngebo Raja Rehabeam tep, pepu upu

21 Uda, Israel tara taleamu ngebo Yerobeam er mi Nadab, itara mutu taleamu taruda, Salomo er mi Rehabeam, dutara Yehuda mutu neitamai yuma, nimi deiyo ngebo Raja tekudi, taleamu. Ukupra gonga keap, Yehuda tara taleamu taruda, er Rehabeamda keteng tamun, empat puluh satu (41) tahun kupu. Rehabeam erdi taleamu keteng tamun yumada, tujuh belas (17) tahun deiki di, Yerusalem mutu neitamai kuramudi, amutu taleamu. Ada, yuk Israel tara neitamaida, yuk yala Israel nesaladi, ila ati arum ton doramipa, akuramu dinin, Yerusalem mutupu ketenepra doramipa, Allah Yahwehdi, “Amutu neitamaipu ne kunkamne. Ne si eremna tep amutu neitamaipu, ne si eremna ati dopkamnenge. Amutuda, ne mawange tep wepra deipne,” peiamu. Uda, Rehabeam er ninda, Amon yala ner er sida, Naama kuramu.

22 Raja Rehabeamdi, Yehuda tara taleamu taru neitamaida, sun Israel yala nesalada, mali kun keca weik kupbarami. Ada, Allah Yahwehdi, ‘Angeda pio malinge,’ teneramu kecada, sun Yehuda tara, dutara kurami nesala yumadi, akecapu talepra kurami. Sun amutu nesaladi, ange kuramiya deiki di, Allah tep pio yu kemkarerami. Amali keca kurami nesalada, sun co puna nengdi, ton mali keca ton kurami dinin, angeda yambul malinge pua. Dinino, Rehabeamdi Yehuda tara taleamu taruda, erdi taleamu nesalada, pio malinge weik kupbaramipa, Allahdi sun tep yu kange douramu.

23 Sundi mali kurami ngeda weik dinin, ton ngeda, sun mutu dup, mutu dupaida, tali isok si eremna tep, mem ati dorami. Tonda, amutu dupaida, ‘Isok si eremkamep’ tenen, ila co tekamnga iriamu tara yumada, ila lyom co kwepra deipnaida, “Memai,” pepra, co ton ingamidi, isok si eremami. Ange utopunge ton, petenkemna tep keca, er sida tugu cap, patung-patung isok, er si Dewi ^{▼▼Dewi – Aupu deiyoda, ake. Dewi peramengada, isok ner, er si eremna keca tep penunge. Amutu nesala si eremami isok nerda, er si Asyera tepa.} Asyera tep, er si eremnai ton ketekepra deipnedi, si eremamya deiki di, pio mali weik kurami.

24 Angeda, mali weik kurami dinin, ton tapakra, ila mali weik kurami ngeda, ake. Ada, isok si eremna tep ketenepra deiamya damai yumada, sun Yehuda yala nerapu cap, nimi cap weika di doupra akati damai deiamipa, tali nyangdana pel dorami. Ada, ‘Isok sipu eremkamep’ tenen, amemai yakarami nesaladi, anerapu cap, animi cap, kikiman maramidi nyangdarami cadi, nimi pe, nerapu peda, aca pel dorami nesalada, tali nyangdana pel dona neng kurami. Adeiki di, Yehuda yala nesala yumada, pio mali tenena pelpu talepra dorami. Adorami pelda, Israel nesala Kanaan mutu kapul men wengyakarami taruda, men taru sun amutu talepra kurami nesaladi, apio mali keca weik talepra kurami. Atep, Israel nesala, amutu benkoi taru, Allahdi Kanaan mutu kurami nesala enepra donokamo. Deiyoda aneng, sundi apel dorami. Dinino, Rehabeamdi Raja kuramu taruda, apio mali ngepu, Israel nesala dinin, Yehuda mutu kurami nesala peda angepu kupbarami. Sundi Allah tep teka men tenerami nesala, sun Kanaan tara kurami nesalada akuramitopu, Rehabeamdi amutu taleamu taru neitamai di, sun Israel nesala dinin, Yehuda tara kurami nesaladi, ange utopu mali weik kurami.

25 Rehabeamda, keteng tamun pamubari deiki di, nimi deiyo ngebo kepra, Yehuda tara mutu yuma taleamu. Ukuamu taruda, keteng tamun pamubari konum kupkopda, Mesir mutu taleamu ngebo Raja Sisakdi, Mesir mutu di yana, ‘Yerusalem mutu nesala bisbisa kapkamne’ tenen, Yerusalem nesala tep, mar poryau. 26 Mesir mutu taleamu nimi deiyo ngebo, Raja Sisakdi, Yerusalem ati arum yuma poryanmaudi, bisbisa kapu dingeda, Allah Yahweh er si eremna ati neitamai deiami mambul kunumna weik keca, weika di dalupra dopropu. Ada, mambul-mambul bung keca cap, uang cap, Raja Rehabeamdi er ati pumbon deiamu telep keca cap, tonda men di Raja Salomodi, ‘Nimi podan taru, mar dopmengepa, popnenung’ tenen, taleami kalengna keca, er si perisai, emas deiki di dopra deiamunge yuma capda, Raja Mesir, er si Sisakdi yan dalupra doropu.

27 Raja Salomo emas di ketekeiamu kalengna keca, perisai yumada, Raja Sisakdi, dalupra dopropka tep, amenda taru nimi deiyo ngebo, Raja Rehabeamdi, ange yo pununa tep, gat keca telepnge, er si perunggu di, ukupu perisai ton ketekeipu. Ukupkopda, erdi ila nimi deiyo ngebo er ati dam bisi buplan damai kalengami jen talena neng gungda, sun deiyo keami neng tep, aperisai keca yumada, ‘Anengdipu kalengkameng’ tenen, karepu. 28 Nimi deiyo ngebo Raja Rehabeamda, Allah Yahweh er si eremna ati dampu, tupa-tupa baramu. Ukupne taruda, Raja ati buplan dam kalengna tep, jen talena neng, sun deiyo neng yumada, ‘Mar di popsenung’ tenen, aketenepra deipudi, kareamu nimi nong kalengna keca, perisai yumada doproami. Ukupmananen, akati tapra, er pe ati tamupra ben taruda, sundi akeca dopra, er derinaipu tamupra derirbarami.

29 Uda, Raja Rehabeamdi, Yehuda mutu yuma taleramu taru neitamai kuramunge cap, yuk pel doramunge yuma capda, yuk buku neitamai di sekami. Ada, Yehuda mutu nimi deiyo kepra talerami neng, sun Raja nengdi kuraminge yuma, sengdirami buku neitamaipu sekeiami. Abuku sida, ‘Sejara Raja-Raja Yehuda’ kurure. 30 Rehabeam erda, itara iknapi tara, (arah selatan), Yehuda mutu nimi deiyo ngebo Raja kepra kuramu taruda, pio tupa Rehabeam cap, itara mutu Israel tara yuma, nimi deiyo kepra taleamu ngebo Raja Yerobeam cap, podaramrei. Sun cap, sundi taleramrei nesala cap, podanapu kurami. 31 Ukuramreipane, Raja Rehabeam konum depu. Depu pangeda, er nong dopra, ‘Daud ati arum’ peramyai, ada Yerusalem ati arum neitamai dinin, nimi deiyo neng Raja-Raja depnepa, tu palirami mutupu, Rehabeam ton palipi. Rehabeam er mi Abiamdi, er nai bo Rehabeam yo punuprapudi, nimi deiyo ngebo Raja kepu. Er nin sida Naama, anerda Amon mutu ner kuramu.