1Ki 15 | XteSC | STEP | Yerobeamdi, itara Israel mutu yuma taleamnganen, delapan belas (18) keteng tamun konum kupkopda, dutara mutu yuma taleamu Raja Yerobeam depupa, erdi deiamu mi, er si Abiam, nimi deiyo ngebo Raja kepra, Yehuda tara kurami nesala taleamu. Atarupu Abiamda, nimi deiyo ngebo kepra, Yehuda yala nesala taleamu dinin, Yerobeamda itara mutu, Israel tara kurami nesala taleamu.

1 Kings 15

Yehuda yala nesala tep, Abiamdi Raja kepra taleamu upu

1 Yerobeamdi, itara ^{▼▼itara – Pumun taruda, Israel nesala yuma mali kange doudaramidi, anesala neitamai di bokra, ton tara nesalada, itara mutu kuramidi, atara tep, ‘Israel mutu’ perami. Ange utopu, ton tara nesalada, utara mutu bena kuramidi, amutu tep, ‘Yehuda mutu’ perami. Atep nengeda, itara mutuda sun Raja yuk wepra deiamipa, erdi sun tep taleamu. Tonda, utara mutu kurami nesala peda, sun yuk di, Raja ton wepra deiamipa, erdi amutupu taleamu. Sun yumada, Israel yala nesala dinin, dipru wilipdanamidi, bokrapidi, mutu yuk-yuk kepropa kurami.} Israel mutu yuma taleamnganen, delapan belas (18) keteng tamun konum kupkopda, dutara mutu yuma taleamu Raja Yerobeam depupa, erdi deiamu mi, er si Abiam, nimi deiyo ngebo Raja kepra, Yehuda tara kurami nesala taleamu. Atarupu Abiamda, nimi deiyo ngebo kepra, Yehuda yala nesala taleamu dinin, Yerobeamda itara mutu, Israel tara kurami nesala taleamu. 2 Abiamdi nimi deiyo ngebo kepra, Yerusalem mutu nesala taleamu keteng tamunda, tiga tahun kuramu. Abiam er nin, er sida, Maakha kuramu. Ada Raja Daud, erdi deiamu mi, Absalomdi ^{▼▼Absalom – Ton Alkitab buku neitamaida, angebo er si sengnada, ‘Abisalom’ seki. Ton buku neitamaida, er si tep ‘Absalom’ seki. Si butene sengami dinino, angebo er tenpua.} deiamu ner kuramu. 3 Abiam er nai bo Rehabeamdi, mali kuramutopu, er Abiam peda, mali weik kuramu. Tonda, Abiam er dipru kange yuma dopra, Allah Yahweh er deiki men deiamu. Er apu bo Raja Daud, er dipru kange yuma, Allah Yahweh er deiki deiamudi, pio teleppu kuramu utopu, men kuramu.

4 Abiamda, mali kuramu dinino, Abiam er apu bo Raja Dauddi, Allah Yahweh er si eremamudi, teleppu kuramunge tep, Allahdi, ‘Amali kunga deiyo nengda, wenepra poptapnedi, gum kupra deipkamne do? Ware kupkamne do?’ tenen, tenepetepudi, ‘Gume, Dauddi deipupa, dadeipdanen bankameng nengda, Israel nesala cap, sundi kunkameng mutu yuma cap, tupa talenkamenge,’ tenepu. Atep, Rehabeamdi deiamu mi, Abiamdi er nai bo yo punupra, Yerusalem mutu ati arum yumada, talenkamre. Er ton depyopda, erdi deipkamre midi, amutu talenkamre ja,’ tenepudi, angebo wepra deiamu. Tonda, ‘Abiam er mi ton deipkamre’ tenen, melipupa, Abiamdi mi ton deipu. 5 Allahdi Abiam wepra deiamu ngeda, tali tep gume. Ada, Raja Daud er telep kuramunge deiki di, Allah er kange pio telep kupra deiamnga tepa. Tonda, Allah Yahwehdi, “Angeda ukunkamrume, angeda men kunkamrume,” pepra deiamu upuda, Raja Dauddi aupu moupra taleamudi, apeiamutopu kuramua tepa. Dinino, Daud er tenpu mali kuamu ngeda, Het yala ngebo er si Uria, er tepapu mali ton kupu. Ada Dauddi, Uriah er ner dalupra dopropka deiki di, pio mali kupu.

6 Yerobeam cap, Abiam cap, gonga keap mar podaramrei ngeda, pio apodanapu kuramareiyane, Abiamdi Raja kepra Yehuda mutu talepu taru di dipra, Yehuda mutu taleamu taru neitamai yuma peda, Yerobeam cap, Abiam cap, mar poryakaramreitopu, tamna gum, tupa poryakanapu kuramrei. 7 Uda, Raja Abiamdi, Yehuda mutu yuma taleramu taru neitamai kuramunge cap, yuk pel doramunge yuma capda, yuk buku neitamai di sekami. Ada, Yehuda mutu nimi deiyo kepra talerami neng, sun Raja nengdi kuraminge yuma, sengdirami buku neitamaipu, konum sekra deiami. Abuku sida, ‘Sejara Raja-Raja Yehuda’ kurure. Yerobeam cap, Abiam cap, mar poryakaramreitopu, tamna gum di, tupa poryakanapu kuramrei. 8 Raja Abiam depu pangeda, er apu bo Daud, er pe mutupu bena peiami mutupu, Yerusalem ati arum neitamai, peipi. Abiam depu pangeda, er mi Asadi, Yehuda mutu nesala tep, deiyo kepra taleamu.

Asadi, Yehuda yala nesala tep, deiyo kepra taleamunge tep, pepu upu

9 Ataruda, Yerobeamdi Israel yala nesala dinin, itara kurami nesala imutu neitamaida, sun deiyo ngebo kepra kuramudi taleamu taru dinin, keteng tamunda, dua puluh (20) deiki, Asadi utara mutu Yehuda tara tep, nimi deiyo ngebo kepra, gonga kepudi, Yehuda mutu kurami nesala taleamu. 10 Asadi Yerusalem mutu kurami nesala tep, deiyo kepra taleamu keteng tamun yumada, empat puluh satu (41) tahun kuramu. Asa er nau nerda, er si Maakha kuramu. Erda Abisalomdi deiamu ner kuramu. 11 Asa er co puna ngebo Raja Dauddi Allah tep, kange deipra teleppu kuramutopu, Asa peda, Allah tep kange telep kudina pel doramu. Ada, Allah Yahwehdi, “Angeda ukunkamrume dinin, angeda pio men kunkamrume,” peiamu upu yuma gekepudi, angepu talepra kuramnga tep, Allahdi er tep, kange deriramu.

12 Asadi telep pel doramu ngeda ake. Ton ngeda, isok si eremna tep, ati dopra deiamidi, akati neitamai pel doramidi, tali-tali nyangdana tep, ketenepra deiami nerapu cap, nimi cap yumada, enepra donokamo. Tonda, tali keca tep, “Nun nai, nun nai,” pepra, si eremami keca, er si patung-patung yumada, gum kupra deiamu. Ada, men taru di, er apu yapu, sun talepyakarami Raja-Rajadi, amutu neitamai ketenepra deiamidi, isok si eremna tep, deiami keca yumada, gum kupra deiamu. 13 Ton ngeda, Asa er nau ner Maakhada, nimi deiyo ngebo er ner kuramupane, Asadi, “Gume, nimi deiyo Raja ner kuramrum dinin, kanda apel men donkureme,” pepra, er wenemna tep, amutara utopu dopra deipu. Ukupka deiyoda, isok si Asyera, er gispal dona tep nengeda, kamo telep lyom co touprapudi, ikra deiamu ngeda, si eremamiya deiki di mali kurami. Maakhadi, ‘Ange dopra deipkunerume,’ peipupa, dopra deipi. Tonda, Asadi asi eremami keca dakra tapudi, akeca doupra, Kidron mutu bongboia dubeudi, uku dongopu.

14 Asadi amutu neitamai isok si eremna tep, dopra deiami ngeda, yuma men dakra tapu. Men dakra tapu ngeda, amutu nesaladi, tupa si eremami dinino, Raja Asa er kuramu taruda, Allah er tepapu moupra taleamudi, Allah Yahweh er sipu eremamu. Tonda, Allah Yahwehdi, “Angeda ukunkamrume, angeda men kunkamrume,” pepra, deiamu upuda, Raja Asadi aupu moupra taleamudi, ange tamna pio gum dipapu, apeiamutopu angepu talepra kuramu. 15 Ataruda, Asa er nai bo cap, er pe capdi, emas cap, perak cap, Allah er gispal dona tep kareamrei ngeda, akeca yuma doupra, Allah er si eremna ati neitamai dubeu.

16 Asadi nimi deiyo ngebo kepra, utara Yehuda yala nesala taleamu taru yumada, itara mutu Israel yala nesala tep, deiyo kepra taleamu ngebo Raja Baesa cap, tupa podanapu kuramrei. 17 Raja Baesada, itara mutu Israel tara taleamu taru neitamai di, tara mutu Yehuda tara kurami nesala yan popu. Ukupudi, Rama mutuda yana, er jen talena neng ton, amutu deipudi, Rama mutu puto keipu. Ukupka deiyoda, ukupnya deiki di, Yehuda tara kurami nesaladi, ‘Asa er tara kepkup’ tenen, ‘Sun bena yana kemenge ngeda, sekdongopkamne’ tenen, kupu.

18 Ukupka tep nengeda, Israel tara mutu taleamu ngebo, Raja Asadi, emas cap, perak cap, Allah er si eremna ati tupa akamu ngeda, dopropu. Angetopu, Raja er pe ati deiamunge cap dopra, telepai deipu.

Ada, nimi si Heziondi deipu ngebo, er si Tabrimodi deiamu ngebo, Benhadad damai dokotepu. Angebo Benhadad, erdi Siria ^{▼▼Siria – Ton buku Alkitab neitamaida, asi, ‘Siria’ seki. Ton Alkitab neitamai di, ‘Damsyik’ seki dinin, amutu tenpua.} mutu nesala talepra kuramngai dubana tep, doroipupa dubei. Akeca doupra bei nengda, Raja er amutara pel deiyo kepra taleamidi, Raja er pel dorami neng deiki, deipupa, anengdi akunumna weik keca dubei. Anengdi akeca deipupa, dubenkoi taruda, Asadi upu ton pepra deipupa, aupu perbei.

19 Raja Asadi Benhadad tep peipu upuda ake. “Nunda, kange tenpu doupra, nun nai yapu sun podana gum di, telep kupra kikiman pel doramidi, kuramitopu kunkamneme. Atep, kanda dinkurume. Nedi kan tep, ‘Kange deipkamnerem’ tenen, kunumna weik keca emas cap, perak cap, adopra tali deipkene. Tonda, nedi kan tep pepkene. Israel tara kunge nesala talepra kure ngebo, Raja Baesa cap, kan cap, pedina upu deiki peiamrerumdi, pel tonpa dorerum ngeda, tapkurume. Ukupmempa, er jen talena nengdi, ne mutu yan arapra, kunenungaida, tapra benkamenge. Ne tara neng tep, men poryakankamsenunge,” pepra moropu.

20 Raja Asadi aupu pepra moropu pangeda, Raja Benhadaddi gekepu. Gekepudi, er jen talena neng yuk-yuk tep, deiyo kepra taleami neng peipupa, sun taleami jen neng cap, sun yumadi, Israel mutu kurami nesala tep mar ben popi. Porbeidi, popbisipi mutuda ake. Iyon ati arum cap, Dan ati arum cap, Abel-Bet-Maakha ati arum cap, tonda Galilea mokon dam tara Kinerot mutu cap, Naftali ati arum cap, ayala-ayala nesala sun mutu yuma capda bena popra tapidi, bum kupra deipi.

21 Ukupi pangeda, itara mutu Israel tara taleamu deiyo ngebo, Raja Baesadi, ange gekepu dingeda, ‘Rama mutu men bisbisa kaptenge’ tenen, puto kemna tep, puto kepra deiamudi, er jen talena nengdi amutu taleami ngeda, adipu tapu. Tapu dingeda, keana taru tep, amutu di gopra, Tirza mutu bena kunmau. Ataruda, er kware kupmaua cadi, mar podanada tapu. 22 Ange konum kupu pangeda, Raja Asadi, “Rama mutu berumudi, ukupkamrume,” peipupa, erdi taleamu nesala, Yehuda tara kurami nesala yumada, tenpu ngebo peda ton men tapu. Sun anesala yuma Rama mutu beidi, Israel tara Raja Baesadi, ‘Rama mutu puto keipkamne’ tenen, ati don keca yuma deiamu ngeda, Asa taleamu nesala, sundi akeca yuma bena dopropi. Ada, ‘Rama mutu men bisbisa kaptenge’ tenen, puto kepra derina tep, gel cap, co cap dopra, deiamunge yumada, dopropidi dubei. Adoupra bei keca yumada, Raja Asadi dopra, sun Benjamin yala nesala mutu, ada Mispa cap, Geba cap, ‘Amutu buteneda, nun podan nengdi men bisbisa kaptenge’ tenen, bena puto kepra deipu.

23 Raja Asa er yuk pel ton doramunge cap, pio puto di palepra pel doramunge cap, erdi domudi, nimi ati arum taleamunge yuma capda, Yehuda tara kurami nesala talepra kuramunge yuma capda, yuk buku neitamai di sekami. Ada, Yehuda mutu nimi deiyo kepra talerami neng, sun Raja nengdi kuraminge yuma, sengdirami buku neitamaipu, konum sekra deiami. Abuku sida, ‘Sejara Raja-Raja Yehuda’ kurure. 24 Asa konum wisi deipu taruda, depupa, er nong doprapidi, er apu yapu tu paliami mutupu, bena tu palipi. Ada, ‘Raja Daud, er pe mutupu nimi depnepa peramyaipu, Yerusalem ati arum damai tu palipi. Asa konum depu pangeda, erdi deiamu mi, er si Yosafatdi er yo punupudi, nimi deiyo kemna tep, gonga kepudi, Yehuda tara kurami nesala tep taleamu.

Israel nesalada, Nadabdi Raja kepra talepu upu

25 Asadi Yehuda yala nesala talepra kuramu taru neitamai di, keteng tamun butene konum kupkopda, atarupu itara Israel mutu kurami nesala tep nengeda, sun deiyo ngebo gonga kepra Raja teku. Angebo er sida, Nadab. Nadabda, Raja Yerobeam erdi deiamu mi kuramu. Nadabdi Raja keprapudi, Israel tara kurami nesala taleamu. 26 Dinino, Nadabdi Israel nesala deiyo kepra, talepu taru peda, telep men kuramu. Er nai bo Yerobeam mali kuramutopu, er peda, mali kecapu talepra kuramupa, Allahdi diramu. Akuramnga deiki di, er taleamu nesala, sun Israel nesala yumada, Yerobeamdi mali kuramutopu, angepu angetopu, mali kun kecapu talepra kurami.

27 Ataruda, nimi si, Ahia er mi Baesa, Isakar yala ngebodi, ‘Raja Nadab itara Israel mutu taleramre ngebo popkamne,’ teneamudi, ‘Ware kupra poptaptene do?’ tenen, tenenapu kuramu. Ukupra teneramnga cadi, go kwamu taru dipu Raja Nadab poptapu. Ataruda, Nadab cap, er jen talena neng cap, sun Israel tara neng cap, sunda Filistin tara nesala dinin, mutu si Gibeton mutu kurami nesala damai bena warekmai. 28 Baesadi Raja Nadab popu taruda, ada Raja Asadi nimi deiyo kepra, dutara mutu Yehuda tara taleamupa, keteng tamun weneri konum kupkopda, ataru deiki di, Baesadi Raja Nadab, itara Israel mutu taleamu ngebo popu. Atarupu itara Israel tara kurami nesala tep nengeda, Baesadi nimi deiyo kepra tekudi, itara Israel nesala tep taleamu.

29 Baesadi itara Israel tara kurami nesala tep, deiyo kepra talepu taruda, adipapu, Raja Yerobeamdi deipupa, dadeipdanen, yakarami nesala, er nyapsilip yuma portapnapu kuramu. Ukupka deiki di, Yerobeamdi deipgerekdanen, baramipa kurami neng yuma gum kupu. Nimi ton gam men kurami. Ukupya deiki di, Silo mutu ngebo, nabi Ahiadi, men taru er deiki Allah Yahwehdi peiamutopu, “Yerobeam er nyapsilip yumada, popra gawal dakamenge,” peiamutopu, Yerobeam er yala neng yuma popra gawal daku. Tenpu ngebo peda, ton gam men kupi.

30 Yerobeamdi deipupa, dadeipdanen yakarami neng yuma poptapunge deiyoda, ake. Ada, Yerobeam erdi mali weik kuramupa, Israel nesala yumada, er mali kuramutopu, pio mali-mali weik kurami. Ukuramipa, Israel nesala sun si eremami Allah, er si Yahwehdi, aRaja Yerobeam tep, yu teneramemeu. 31 Raja Nadabdi, er yuk pel ton doramunge cap, erdi domudi, nimi ati arum taleamunge yuma cap, Israel tara kurami nesala talepra kuramunge yuma capda, yuk buku neitamai di sekami. Ada, Israel tara nimi deiyo kepra talerami neng, sun Raja nengdi kuraminge yuma, sengdirami buku neitamaipu, konum sekra deiami. Abuku sida, ‘Sejara Raja-Raja Israel’ kurure.

Raja Baesadi Israel nesala deiyo kepra taleamu upu

32 Raja Baesadi, Israel tara nesala tep, deiyo kepra kuramu taru yumada, Yehuda tara deiyo kepra taleamu ngebo Asa cap, tamdana gum dipapu, tupa mar ponadapu kuramrei. 33 Nimi si Ahia, er mi Baesadi deiyo kepra, Israel tara kurami nesala taleamu. Raja Asadi nimi deiyo ngebo kepra, Yehuda tara kurami nesala talepra kuramnganen, keteng tamun weneringe deikida, atarupu Raja Baesadi, Israel tara kurami nesala tep, deiyo kepra Raja teku. Ada, dua puluh empat (24) tahun deiki di, Tirza mutu neitamai kuramudi, Israel tara kurami nesala yuma taleamu. 34 Dinino, Raja Baesadi nimi deiyo ngebo kepra, Israel tara kurami nesala taleamudi kuramu ngeda, men taru Raja Yerobeamdi Israel nesala taleamudi, pio mali weik kuramupa, Israel nesala diramidi, ‘Nun ton kupkupe’ tenen, er mali kuramungepu, talepra kurami. Ange utopu, Baesa peda, Yerobeamdi mali pel doramungepu, er peda ange talepra, mali weik kuramu. Adeiki di Raja Baesa peda, Allah Yahwehdi, ‘Angeda pio mali keca,’ peiamunge, apu pio talepra mali kuramu. Ukuramupa, sun Israel nesala peda, er mali kuramunge diramidi, sun peda mali kecapu talepra kurami.