1Ki 16 | XteSC | STEP | Tenpu taruda, Allah er si Yahwehdi, Hanani er mi nabi Jehu tep upu peipu. Yehu Allah er upu lap pena deiyo ngebo kuramu. Allahdi peipu upu ake. Ila nimi deiyo ngebo Baesa er wenemna tep perbenkurume.

1 Kings 16

Allahdi mali kuramu nimi deiyo ngebo, Baesa tep, pepu upu

1 Tenpu taruda, Allah er si Yahwehdi, Hanani er mi nabi Jehu tep upu peipu. Yehu Allah er upu lap pena deiyo ngebo kuramu. Allahdi peipu upu ake.

Ila nimi deiyo ngebo Baesa er wenemna tep perbenkurume. 2 Pumun taruda, kandi tali ngebo kuramum dinin, ‘Erda Israel nesala ila deiyo ngebo kunkamre’ tenen, erepra deiamkesipa, Israel nesala sun ila nimi deiyo ngebo Raja kurume. Akumem taru yumada Yerobeam erdi mali kuramutopu kan peda pumun di kupyakaramumanen, ukutaru peda tupa mali kurume. Ukuruma deiki, Israel nesaladi kan kumem keca dikengedi sun peda utopu mali kungepa, neda, ‘Uo warya tep do?’ tenen, dipru pu jenerepa sun tep yu tenenune.

3 Ange tep nengeda, tek sisi nedi tenepkenada kan cap, kan nyapsilip yuma capda, wenepra popnedi gawal dakamsene. Ada, pumun taru kuramu ngebo er si Nebatdi deiamu ngebo, ada ila deiyo ngebo Yerobeam mali kuramupa, er cap, er nyapsilip cap yuma popra gawal dakamsitopu, kan cap, kan nyapsilip cap popkamsene. 4 Ukupkamna tep, ware ngebo do yuma, Baesa er yala neng depkameng nengda, er kure mutu neitamai depmengopda, kamdi yana jenkamenge. Tonda, er yala neng bura tara depkameng nengda, tali lakra embarameng madi jenkamenge. Depmengopda, nimidi men peinkamenge.

5 Uda, ila nimi deiyo ngebo Raja Baesadi Israel nesala talepra kuramu taru neitamai kuramu keca yuma cap, pel doramunge yuma capda, Israel nesala sun buku neitamai sekra deipi. Abukuda sun ila nimi deiyo neng kurami keca yuma sekra deiami buku tep pepne. 6 Allahdi wenepra Baesa popupa, konum depu pangeda, er nong dopra Tirsa mutu bena peipi. Ada, er apu yapu deramipa peirami mutupu bena peipi. Ukupipa, er yo pununada, er mi Ela nimi deiyo ngebo kemna tep, erepra deipipa, Israel nesala talepra kuramu.

7 Uda, Hanani er mi nabi Yehu er kuramu taru Allah er si Yahwehdi Baesa cap, er nyapsilip cap tep, wenepra popkamu upu peipupa, Yehudi aupu perbeu. Allahdi Baesa tep wenepra popka deiyoda, sun yumadi Allah dinai mali kuramipa, popu. Mali kuramya tep, Allah er si Yahweh er dipru pu jepupa, pumun kuramu ngebo Yerobeam cap, er nyapsilip cap, mali kuramipa pomutopu, Baesa cap, er nyapsilip cap, sun ton utopu mali kuramipa popu.

Baesa er mi Eladi, Israel nesala sun ila nimi deiyo ngebo kuramu upu

8 Uda Yehuda tara kurami nesala sun ila nimi deiyo ngebo er si Asa, sun tep talepra kuramupane, keteng tamun dua puluh enam (26) konum kupu pangeda, Baesa er mi Eladi, Israel nesala sun ila nimi deiyo ngebo gonga kepra talepu. Mutu si Tirsa mutu kuramudi, Israel talepra keteng tamun butenepu kuramupane, tenpu ngebodi er popu. 9 Baesa popunge ake. Ada, tenpu taru Baesa er amutara pel doramnga deiyo ngebo er sida Simri kuramudi, sun jen neng weik taleamudi, kuda bisam gipra tu deiki embaramu keca tep deiyo ngebo kuramu. Simridi, ‘Baesa popra bisbisa kapkamap’ tenen, er kapu neng cap upu sisingmai. Tenpu taruda, Ela Tirsa mutu beudi, nimi si Arza er ati kunmaudi, kange yawaramne me jepupa, er kange yawarapu. Er kabo Arzada, Ela er ila nimi deiyo ngebo ati kalengna deiyo ngebo kuramu.

10 Elada er kange yawarapupa, Simridi akati wekrapudi, Ela poptapu. Poptapu dingeda, Ela er yo pununa tep Simri erpu ila nimi deiyo ngebo kuramu. Ela poptapu taruda, ada Yehuda yala nesala taleamu ngebo er si Asa, keteng tamun 27 deiki di taleamupa, aketeng tamun neitamaipu popu. 11 Simridi Ela yo punupu dingeda, adipapu Baesa cap, er nyapsilip cap, er tara neng cap yumada, ‘Ne cap men kunkamep’ tenen, poptapu. Aneng yuma poptapka cadi, tenpu ngebo peda ton men tapu. Ayala neng yuma popra gawal daku. 12 Akupu ngeda, Allah er si Yahwehdi nabi Yehu tep, ‘Baesa er nyapsilip yuma popkamne,’ pepra deiamutopu kupu.

13 Allahdi aneng wenepra popka deiyoda, ada Baesa cap, er mi Ela cap, sundi tali-tali keca si eremamreiya deiki di, Israel nesala mali kudiramreipa, sun peda mali kurami. Mali keca weik kuramya tep, Israel nesala sun si eremami Allah er si Yahwehdi, dipru pu jeramupa, aneng tep yu kupupa derepu.

14 Uda, ila nimi deiyo ngebo Raja Ela Israel nesala talepra kuramu taru neitamai kuramu keca yuma cap, pel doramunge yuma capda, Israel nesala sun buku neitamai sekra deipi. Abukuda sun ila nimi deiyo neng kurami keca yuma sekra deiami buku tep pepne.

Israel nesala, sun ila nimi deiyo ngebo, er si Simri tep upu

15 Yehuda yala ila nimi deiyo ngebo, er si Asa, Yehuda yala nesala taleamupane, keteng tamun 27 tahun konum kupu taruda, Simrida, Israel nesala talepra Tirsa mutu kunmaupane, yoneitam tumi kupu pangeda, ataru dipapu Israel nesala sun jen talen neng yuma mutu si Gibeton mutu damai kunmai. Gibeton mutuda, ada Filistin yala neng kurami mutu. 16 Yuk nengdi, ‘Baesa yala neng yuma Simridi peipmarpa popmange,’ pepipa, sun Israel jen talena nengdi gekepi. Gekepi dingeda atumi dipapu sun jen talen neng yumadi, yuk ngebo er si Omri, ada sun jen talena neng sun deiyo talepra kuramu ngebopu, ‘Nun Israel nesala talenkamsere’ tenen, ila deiyo ngebo kepra deipi.

17 Ukupra ereipi pangeda, Omri cap, Israel jen talen neng yuma capdi, Gibeton mutu taprapidi, ‘Simrida nun men talenkamsere’ tenen, Simri kunmauai, Tirsa mutu warengbei. 18 Warengbei pangeda, Simri epudi, ‘Uo, ne kune mutu yuma warekra poryanmasenge,’ tenepudi, kware kupupa, er ila nimi deiyo ngebo ati pumbon wekudi, ‘Akati yuma uku jepkur’ tenen, er pedipapu uku seku. Seku dingeda, akati pumbon dinin, yuk neng men wekmantoai weku. Ukupu taruda, akati yuma uku jenmaudi er nong cap, jepupa depu.

19 Simri er depka deiyoda ake. Ada, Allah dinai mali-mali weik kuramnga tepa. Tonda, pumun taruda pio mali kuramu ngebo Yerobeamdi mali weik kuramutopu, er Simri peda, mali weik kuramupa, adeiki di sun Israel nesala peda mali kurami. Atep nengeda, er peda depu. 20 Uda, ila nimi deiyo ngebo Raja Simri, Israel nesala talepra kuramu taru neitamai kuramu keca yuma cap, er kapul men tekamu taru nimi deiyo ngebo Ela popunge capda, Israel nesala sun buku neitamai sekra deipi. Abukuda, sun ila nimi deiyo neng kurami keca yuma sekra deiami buku tep pepne.

Omridi Israel nesala sun ila deiyo ngebo kuramu keca tep upu

21 Uda, ataru dipapu Israel nesala bokropi. Bokropidi, ton tara nengda, Ginat er mi Tibeni ‘Nun nimi deiyo ngebo Raja tekamsere,’ tenepi. Dinino, ton nengda, ‘Gume, nun nimi deiyo ngebo Omripu melipkamepe,’ tenepi. 22 Utenepi dinin, Omri tara kepi nesala puto weik kupudi, Tibeni tara nesala puto boun kupupa, Tibni depu. Konum depu pangeda, Omripu nimi deiyo ngebo Raja teku.

23 Yehuda yala ila nimi deiyo ngebo er si Asa, Yehuda yala nesala taleamupane, keteng tamun 31 konum kupu taruda, Omridi, ‘Israel nesala talepkun’ tenen, gonga kepra tekudi keteng tamun 12 deiki di taleamu. Aketeng tamun 12 neitamaida, keteng tamun 6 deiki di, Tirsa mutu neitamai kuramudi Israel nesala taleamu. 24 Ataruda, Omridi tenpu mutu buma kunupu. Amutu buma kunumnada kunumna weik keca er sida perak uang deiki di, er ikinda 70 kilo karepupa nimi si Semer dopropu. Amutu buma men di taleamu ngebo sida Semer. Omri amutu buma 70 kilo perak karepupa, Semer dopropu. Omridi amutu deiki ati weik dopudi, amutu si tep Samaria pepra si dopu. Ada, ‘Amutu taleamu ngebo er si tenenkamep’ tenen, Samaria pepra, si dopu.

25 Omri erda Allah dinai tumi-tumi yuma pio malipu kuramu. Er nimi deiyo ngebo kapul men teku taru kupyakaramya deiyo neng peda, yambul mali kurami dinin, er Omri puda, pio ila di mali weik kuramu. 26 Tonda, Nebat er mi Yerobeamdi mali weik kuramutopu, Omri peda mali kuramu. Erdi mali weik kuramnga deiki di, sun Israel nesala peda mali weik kuramidi, isok si erepra tali-talipu kurami. Ukuramya tep nengeda, Allah er si Yahweh diramudi yu weik kuramu.

27 Uda, ila nimi deiyo ngebo Raja Omri, Israel nesala talepra kuramu taru neitamai kuramu keca yuma cap, er pel doramunge yuma capda, Israel nesala sun buku neitamai sekra deipi. Abukuda, sun ila nimi deiyo neng kurami keca yuma sekra deiami buku tep pepne. 28 Amenda taru, Omri er apu yapu deramitopu, er peda depu. Depu pangeda, er nong dopra Samaria mutu neitamai peipi. Er depupa, er yo pununa tep, er mi Ahabpu nimi deiyo ngebo tekeipi.

Israel nesala sun ila nimi deiyo ngebo, er si Ahabdi isok si erepu upu

29 Uda, Yehuda tara yuma talepra ila nimi deiyo ngebo, Raja Asa kuramudi, Yehuda tara yuma keteng tamun denge weik taleramupane, keteng tamun 38 konum kupu pangeda, nimi si Omri er mi er sida Ahabdi, Israel tara nesala talena tep, ‘Ila nimi deiyo ngebo Raja kunkamre’ tenen, erepra tekeipi. Er Ahad kuramu mutuda, Samaria mutu dinin, Israel yala nesala taleamu taruda, keteng tamun 22 deiki di sun Raja ngebo kuramu. 30 Pumun taru kurami neng isok si eremamidi, mali kunada yambula dipu kurami dinin, Omri er mi Ahab puda, isok sipu eremamudi, mali kun kecada pio weika di mali kuramupa, Allah er si Yahwehdi, ‘Angeboda tek sisi pio mali weik ngebo. Pumun taru, yuk deiyo neng Yehuda tara taleamidi, mali kurami ngeda, yambula pua,’ teneramu.

31 Raja Ahabdi, Nebat er mi Yerobeam nimi deiyo ngebo kuramu taru, mali weika di kuramu utopu Yerobeam peda ukuramu dinin, ‘Amali kunun kecada, mambule gume. Angeda tali keca pua,’ teneramu. Ukuramu dinin, angepu gume. Tonda, ila mali keca tapakra kuramu ngeda, yuk mutu nimi deiyo ngebo er sida Etbal, angebo sun Sidon mutu nesala taleramu ngebo, er ner mi er sida Isebel, Ahab aner dopudi, aner isok si Bahal ^{▼▼Bahal sekmepu ngeda, yuk Alkitab neitamai Baal sengnunge. Bahal sekmupka deiyoda, ‘Baal’ pepmengepa, ‘Walwal di bal sisa tenepnung’ tenen, Bahal sekmupke. Si yuk sekmepu dinino, aisokda tenpua.} si eremamu ngeda, er pedi aisok sipu Bahal si eremamudi, er amutara kuramudi er pel doramu.

32 Ukuramnga cadi, Samaria mutu neitamai di, sun isok si Bahal eremna tep, isok si eremna ati dopudi, akati neitamaida, isok si eremna tep, ‘Gam keca popnedi, uku dongopkamep’ tenen, pala gel taplakra yakeipudi betapra dopu.

33 Ukupu dingeda, isok ner, er si Asyera, aisok si eremna tep, lyom co di betaprapudi, ikra deipu. Ukupupa, aisok ner er sida Asyera pepra er si eremami. Uda, sun pumun taru Israel nesala taleamidi, kurami nimi deiyo neng, Raja neng yumadi, Allah er si Yahweh tep, si yaniramipa, Allahdi yu kuramu ngeda, weik kuramu dinin, angebo Ahabda, mali-mali weik kuramupa, Allah er kangeda, ‘Angebo pio mali weik ngebo konuma, yuk nengda yambula pua,’ teneramudi yu weik kuramu. Raja Ahabda ukupka tep, Israel nesala pio kalekra meliamu Allahda, er Ahab tep tulum weik kuramu.

34 Uda, Omri er mi Ahabda, nimi deiyo kepra, Raja keamudi, Israel tara kurami nesala tep, talepra kuramu taruda, Betel mutu ngebo tenpu, er si Hiel kuramu. Hieldi Yeriko mutu ati arum kange di tamupra lepsisikra dopu. Ada, menop taruda, Yeriko mutu uruptapidi, gawal dakinge, tamupra lepsisikra dopu. Dinino, menop taru Allah Yahwehdi, nimi si Nun, er mi Yosua deiki di, “Ukupnepa, Yeriko mutu uruptapmengedi, gawal dakamenge.

Tonda, ange ukupkamre taru peda, Hiel er nyapu buteneda, ukupkamrenge,’ pepra dortaru kupkamunge tep, lap peiamutopu kupu. Aupu peiamutopu, Hiel er nyapu butene deprei. Hiel er mi menmena deipu ngebo, du ngeboda, er sida Abiram depu ada, ‘Yeriko mutu ati dopkamne’ tenen, ila gel beilya amutara diya kolongna gel fondasi deiamudi, yoptapu taru di depu. Tonda, Hiel er nyapuda, kale ngebo er si Sebub, amutu ati arum dana-dana tara ongopgenepra wiami gel beilya dinin, akati bisi wengbana tep, ila lyom buplan, er si pintu gerbang, ‘Dopnedi, depkamne’ tenen, apel doramnganen, konum kupbaudi, abuplan donmautopu depu.