1 Kings 17

Nabi Elia, Kerit mekin kuramu taruda, bura tara madi, jen keca dekaramipa dopra jepka tep upu

1Uda, Allah er upu lap pena deiyo ngebo, nabi tenpu ngebo er sida Elia kuramu. Erda Tisbe mutu ngebo kuramu. Erda Tisbe mutu kuramu dinin, er ila tara neitamai kuramngaida Gilead tara perami. Angebo, ataru nimi deiyo ngebo Raja Ahab damai yaudi pepu. “Allah er si Yahweh, erda tek sisa gampu kuredi, Israel nesala tep pio kalekra melimrure. Tonda, neda er amutara kunedi, er pelpu donune. Er Allah tek sisi kurura tep, er deiki di pepkene.

Ukutaru di dipra doryankamre taru neitamaida, keteng tamun wenerito deiki di, mo pio men cemkamre. Aketeng tamun deiki di dou pio mapredi mo cemna gum kupkamre. Nedi pepne tarupu mo cepkamre. Nedi men pepnyopda, mo puru tenpu pe ton men sakamre. Atep kanda moupkurume,” Eliadi Raja Ahab tep pepu.

2Eliadi upepra bendopupa, amenda taruda Allah er si Yahwehdi Elia tep upu yan pepu. 3“Ukutaruda kan amutu tapra keteng yakan tara bememdi, Kerit mekin damai, Yordan me goupra ortara keteng wengbaramre mutu, orbena inimberume. 4Ukupmemnyopda, amutuda me akapmaryopda jenkamrume. Nedi konum peipsa tep, kan jen kecada tali bura tara madi doupra kan damai kareryakankamkenge,” Allahdi Elia tep pepu.

5Upepupa, Eliadi Allah pepu upu gekepudi, Allah er si Yahweh peputopu kupu. Ada Yordan mekin ortara keteng wengbaramre mutu bena kupupa, Eliada Kerit me pirmanai keteng yakan tara bena kuramu. 6Abena kuramu taruda ipna pe, sintara pe yumada, madi kwaneng cap, tu keca cap doupra kareryakaramipa, jepnedi akwamu me cap jepra kuramu.

Elia cap, Sarfat mutu kuramu solu ner cap tep, pepu upu

7Eliada Kerit mekin damai dakuramupane, ue weikanun damapbanmau taru neitamai yumada, mo cemna gum cadi, amutu jerami me yuma cepra gelal sepropu. 8Ukupu pangeda, Allah er si Yahwehdi Elia tep yan pepu. 9“Ukutaruda kan adipapu Sidon tara neitamai dinin, mutu si Sarefat mutu bena kunkurume. Ada Sarefat mutu bemem pangeda, solu ner tenpu akunmara epkamarume. Nedi konum peipmana tep, asolu ner tenpu konum keteneipmara cadi, erdi jen keca karepkamakere.” Allahdi Elia tep pepu.

10Aupu konum pepkopda, Elia adipapu Sarfat mutu beu. Beu dingeda amutu ongopgenepra wiami gel beilya buplan damai bena tekmaudi dinmaupa, solu ner tenpu co kelkela bulupra derinmaupa epu. Epu dingeda, Eliadi asolu ner tep kongpepudi, upepu. “Ne ka nero, kan me yambulanun mau pumbon lung-lunga kapmarpa deipmarem ngeda, duyana karepneo,” pepu. 11Upepupa, asolu nerdi me karena tep dorbenkou taruda, Eliadi ton cap pepu. “Ka nero, kwaneng er sida roti ton metekanun kwapmarnge cap kareryaneo,” pepu.

12Aupu pepu pangeda, anerdi tamupra pepu. “Naio kandi er si eremrum Allah, er si Yahweh, erda pio gampu kurur ngebo, er si deiki di tek sisi upu pepkene. Tek sisa ne damaida roti kwaneng ton pio men kupmanere. Angeda gum tep, roti deiyo keca er si tepung paupropa metekanunpu metek mau pumbonai dakapmar nge cap, tonda jen tapakra gamne minyak me metekanunpu kwapmanere. Atep nengeda, ‘Akeca tapakra dapkaman’ tenen, ukutaruda co kelkela buluprap derinmane. Tonda ametek kupmasernge yumada, dapra deipnepa, ne mi cap ne capdi jepra gawal dakropnemnyopda ne mi cap, ne cap dena tepapu keteneipkuneme,” pepu.

13Upepu dinin, Eliadi tamupra aner tep pepu. “Ka nero, kanda ware keca deiyo tep kware kupmakerpa tenimtonapu kunmarem do? Kwar dangnada gume. Kandi pepmaremtopu bena kunkamarem dinin, menmena ngeda, nedi moropmakentopu kan kwapmaker kecada metekngepu dinin, daneitamai di doprapmemdi, roti meteknge dapra, ne damai denkurume. Ukupmemnyopda, amendada kan cap, kan mi cap tep, yuknge ton dapra jenkamrerume.

14Apepmaken upuda, tali tep men pepkene. Deiyoda ake, Israel nesala pio talepra melimrur Allah, er si Yahwehdi upepkeue. Roti dana deiyo keca, tepung mau pumbon metekapu kwapu ngeda pio men gum kupkamre. Tonda, minyak me mau pumbon lung-lunga akapmakernge peda, men gum kupkamkere. Tupa weika di akamkerepapu, amenda taru Allah er si Yahwehdi mo kareprepa, amutu yuma tu deiki cepredi telep kupkamre. Mo kapul men cemre taru neitamaida, atepung cap, aminyak me capda, men gum kupkamkere,” Eliadi asolu ner tep pepu.

15Upepu pangeda, aner gekepra beudi, Elia pepmautopu kupu. Ukuramu taruda, er cap er mi cap, sun damai kurami neng cap, Elia cap tep, sun jen keca men gum kupu. Ukupupa, pio tep deipra jerami. 16Allah er si Yahwehdi ‘Ukupkamre,’ peiputopu, asolu ner deiamu tepung cap, minyak me cap, men gum kupbaramu. Akapungepu kwamupa, dapra jerami.

17Ataru neitamaipu ukupra damapra dakunmaiyane, akati taleamu ner er mi ton pu talepudi, pio ila kange mun pu jenmauanen, sikmana gum dipapu depu. 18Ukupu pangeda, asolu nerdi Elia tep pepu, “Kanda Allah er pel dopra kurum ngebo cadi, kandi ne tep ware tenepmaneremdi, mali kweipmanerem do? Tonda kandi ne mali kune keca tep, ‘Ka di ton cap betapra teneptue,’ tenen, ne damai yanmarem do? Tonda, ne mi pona tep, yanmanerem do? Ware keca deiyo tep yanmarempa ne mi depmaner do?” pepra mali penmau.

19Upepra engenmau pangeda, Eliadi tamupra pepu. “Adepmare mi doprapmemdi ne karepneo,” pepu. Ami dopra karepu pangeda, Eliadi ami doprapudi, alau ati Elia er pe maramngai bena mapra deipu. 20Mapra deipu dingeda, Elia upu puto di Allah er si Yahweh tep moropudi upepu. “Uo, ne nai Allah, kanda Yahweh kurume. Kandi asolu ner tep tulum keca deipmaremdi er mi depmarpa, kange mun kupmar do? Anerdi ne jen karepmanerpapu, kandi er mi popmaremada ne mambul kupnere, naio,” pepra moropu.

21Upepu dingeda, Eliada atumipu u weneri deiki di ami mapra deipmauai deiki, iripra mapudi, upu ila di Allah er si Yahweh tep moropu. “Ne nai Allah, kanda Yahweh kurume. Kandi ami er sambala dopropmem dinin, ka di ton cap tamupra er nong pumbonpu dongopmempa, tamupra gam bukure,” pepra moropu.

22Eliadi Allah tep upepra moropupa Allah er si Yahweh gekepudi, ami er isin tamupra karepupa, adipapu ami tamupra gam buku. 23Ukupu pangeda, Elia ami alau ati di doupra, kwereryakau taru dipapu, er nin tep, ka tamupra karepu. Karepudi upepu, “Ka nero amida depmau dinin, ukutaruda ka tamupra gam bukre,” pepu.

24Upepupa, anerdi tamupra Elia tep pepu, “Ukutaruda nedi kael kepkendi, teka tenepkene. Ne nai kanda Allah er pel don ngebo tek sisa kurume. Allah er si Yahwehdi upu peipmakerpa, kandi upu peipmanerem utopu, tek sisa konum kupmara tep, kandi pemem upuda tek sisi upupu kurure,” pepu.