1Ki 18 | XteSC | STEP | Ila dou mamupa dakuramyane, keteng tamun weneringe konum kupu pangeda, Allah er si Yahwehdi Elia tep pepu. “Kan adipapu nimi deiyo ngebo, Raja Ahab damai perbenkurume. Pepmem pangeda, ne Allahdi pepnepa amutu neitamaida mo cepkamre,” pepu.

1 Kings 18

Elia cap, Obaja cap tep, pepu upu

1 Ila dou mamupa dakuramyane, keteng tamun weneringe konum kupu pangeda, Allah er si Yahwehdi Elia tep pepu. “Kan adipapu nimi deiyo ngebo, Raja Ahab damai perbenkurume. Pepmem pangeda, ne Allahdi pepnepa amutu neitamaida mo cepkamre,” pepu. 2 Upeipupa, Eliadi, ‘Amutu deiyo ngebo Ahab damai benkun’ tenen, adipapu beu.

Ataruda Samaria mutu neitamaida, ila di jen putaramupa, nimi yuma ila kange mun kange doupra kurami. 3 Ahab nimi deiyo ngebodi, Obadia upupupa er damai yau. Ukupu taruda Ahabdi, ‘Ne pio telep ati kalengna deiyo ngebo kuredi, akati cap, ne ati melimna neng cap, deiyo ngebo kunkamre’ tenen, men di Obadia konum wepra deiamu. Angebo Obdijada, Allah er si Yahweh tep, pio moupra teka teneamudi, Allah er upu moupra taleamu ngebo kuramu.

4 Ukuramnga cadi, Ahab er ner Isebelda, Allahdi upu peipnepa, lap peryakarami neng, sun nabi-nabi neng weik poramu taruda, Obadiadi seratus nabi neng ton doupra, gel imir pumbon butene inimbenamu. Ukupudi lima puluh neng ton yuk gel imir derirbenamu. Ton tamna lima puluh neng ton yuk gel imir derirbenamu. Ukuamudi erdi nimi doproipnedi upu peipnepa, sundi aneng sun jen cap, me cap, doupra karerbarami.

5 Tenpu tumi ton Ahabdi Obadia tep pepu. “Ukutaruda, me bungna damai cap, emban me damai cap yumada, ne cap epra embankamneme. Ada mutmuta telep kupra tengamya ton epnemnyopda, nun kuda bisam cap, bagal bisam cap, sun jen keca tep, acapu derinkamneme. Ukupnemepa, jepmengopda men depkameng dinin, jen men jepmengopda, ‘Nun peinup keca yuma popra jepropnup’ tenen, pepkene.” Ahabdi Obadia tep pepu. 6 Upepu dingeda, Ahabdi Obadia erbenkou tara yuk pepu. Ahab er pe ngebo erbenkou tarada, yuk tara embeu. Ange konum bokrei dingeda, adipapu yuk-yuk erberei.

7 Obadia er benkoua tep, bisi bau taruda, Elia yakaupa sun butene antaprei. Obadiadi betapra dipetepudi, Elia er dipapu epka tep nengeda, ‘E angeboda tek sisa Elia,’ tenen, kael kepudi, er gispal dona tep, bena genepdongopudi, “Ne nai Elia tek sisi kan konum antapdanem do? Yuk ngebo epkene do?” pepu. 8 Upepupa, Eliadi, “Teka neda Elia,” pepu. “Atep ukutaruda, kan adipapu tamupra kan deiyo ngebo Ahab damai perbenkurume. ‘Ukutaruda, Elia nun mutu neitamai ayarya,’ atep lap perberume,” pepu.

9 Upepupa, Obajadi tamupra Elia tep asipu. “Naio neda kan amutara pel don ngebo utopu kunun dinin, nedi kan damai ton ware mali keca kupsipa, kandi nimi deiyo ngebo Ahab damai doproipmanerempa, popkuner do? Angeda ware keca deiyo tep pepnerem do?” pepu. 10 “Tek sisi ne nai, kan si eremem Allah er si Yahwehda, pio gam kuna ngebo, er si deiki di pepkene. Nimi deiyo ngebo Ahabdi nimi weik wepra deipupa, kan tep ekenunge.

Ada, ‘Amutu-amutu yuma Elia tep erbenkurume,’ peipnepa, kan tep amutu neitamai yuma ekenunge. Tonda, Ahab talepu mutu yuma kunung neng tep, erdi upu karepudi, “Elia tep enkamrume,” peipupa, ekenunge. Atep, men epkengopda, ‘Nun kunup mutu neitamai ton Elia men epmepe,’ pepmengopda, Ahabdi, ‘Gume mambul keca si deiki di, ‘Elia nun mutu men kurure,’ pepnerumnya deiki dipapu, teka tenepkamsene,’ pepu. Uperura tep, aneng yumadi upenunge.

11 Angeda mambul weik cadi, nedi Ahab damai bena, ‘Elia er amutu akunmare,’ pepne pangeda, ikin kunerure. Kandi, ‘Ukupra perberume,’ pepnerema cadi, ne mambul kange doupne naie,” Obajadi pepu. 12 Upepudi aupu ton dukdongopra pepu. “Naio, ukupmanto ‘Nimi deiyo ngebo damai pepkun’ tenen, bisi tupa bane taru di, Allah er si Yahweh, er sambaladi doupra yuk mutu daderirbekerepapu, ‘Tupa atekmara’ tenen, nimi deiyo ngebo Ahab damai bena pepnepa, yaredi, yandipetepkamaker dinin, men epkeryopda, ‘Ahabdi, ‘Mok pepmanerema,’ pepra ne popnerur’ tenen, pepkene. Dinino ne naio, ne yambul taru di Allah er si Yahweh tep, er sipu erepyakaramsi taru peda tupa eremnune. Atep kael kepneo naio. Neda kan amutara utopu ngebo kune dinin, apenmanerem ngeda, ne kware.

13 Tonda naio, yuk nengdi men peamkeipa, kanda men kael kepnemum do? Allahdi upu peiprepa peryakange neng, sun nabi-nabi neng yumada, Ahab ner Isebeldi ponmau taruda, nedi nimi denge seratus neng ton doupra gel imir inimbenamsi. Ukupsi dingeda, lima puluh neng ton bokra, yuk gel imir ton deamsitopu, ton neng lima puluh neng ton yuk gel imir deamsi. Ukuamsidi, nedi yuk neng peipsipa, sun jen cap, me cap karerbarami. 14 Ange yuma ukuramsi dinino, naio, ware keca deiyo tep ukutaruda kandi ne tep, ‘Nimi deiyo ngebo Ahab damai bena, ‘Elia akunmare,’ pepra lap perbeo,’ pepnerem do? Ne kangeda, ukupnyopda, tek sisi Ahabdi ne popkamanere,” Obajadi Elia tep pepu.

15 Obajadi ange yuma konum pepu pangeda, Eliadi tamupra pepu. “Allah, er si Yahweh pio gam ngebo kurure. Tonda, erda akeca-keca deiki tara kuredi, akeca yuma talerure. Neda, er amutara kunedi er pelpu donuna cadi, er si deiki di pepkene. Atep, atumida tek sisi, ne tenepmantopu, nimi deiyo ngebo Ahab damai benyopda, er cap antapkamaneme, pepkene,” Eliadi Obaja tep pepu.

Elia Karmel mutu deiki welepudi kupu keca tep upu

16 Obadia adipapu nimi deiyo ngebo Ahab damai bena, ‘Elia akunmare,’ pepupa, Ahab gekepudi, ‘Elia cap antapkuneme’ tenen, adipapu Elia kunmauai beudi Elia epu. 17 Ahabdi Elia bena tekmaua epu dingeda, “Tek sisi kanda Israel nesala damai mali kudirum ngeboda, kan atekmarem do? Yuk ngebo do?” pepu.

18 Upepupane, Eliadi tamupra Ahab tep, “Gume, nedi Israel nesala tep mali men kudiramsi. Dinino, Ahab kan cap, kan bung cap, sun dipapu mali kurumupa, Israel nesala kange mun weik kununge. Ada, kan cap, kan bung capdi, isok er si Bahal ^{▼▼Bahal perami isokda ake. Pumun taruda, amutu neitamai kurami nesala yala-yala weik kuramidi, isok si eremami. Aisok-isok eremami ngeda, isok si tep Bahal perami dinin, isokda weike. Ton nengda, ton si perami dinin, yuk yala nengdi, yuk isok si perami dinin, aisok yumada, Bahal yala isok pua. Sun anesala-anesala yuk-yuk kuramya tep, sundi isok si eremna tep, pel dorami ngeda, yuk-yuk kurami. Tonda, yuk Alkitab neitamaida, er si tep, Baal seki dinin, nunda Bahal sekmepu.} tep, er si eremrumnya deiki di, Israel nesala tep pio mali kudirume. Tonda, Allah er si Yahwehdi, ‘Angeda kunkamrume, angeda men kunkamrume,’ peramu ngeda tapra, pio mali kecapu kurume.

19 Atep nengeda, kan talepmum neng Israel nesala yuma pepmempa, ukutaru sun adipapu ne kunkamanaipu Karmel mutu deiki yankununge. Yangopda, ne cap sun cap Karmel mutu deikipu antapkamape. Tonda isok si Bahal, er upu gekepra lap perameng neng, nimi denge empat ratus lima puluh (450) neng cap duyankamarume. Tonda, isok ner, er si dewi Asyera, er upu gekepra lap perameng neng ton, denge weik empat ratus neng (400) duyankamarume. Aneng yumada, kan ner Isebeldi, aneng tep jen karerepa aneng cap kikiman jen jenunga tep pepkene. Aneng yumada ne damaipu yankamanunge,” Eliadi pepu.

20 Eliadi aupu pepka tep nengeda, Ahab gekepudi, upu peipupa, Israel nesala kuramyai, mutu-mutu yumada, isok Bahal si eremami neng, mok nabi-nabi cap, isok ner dewi ^{▼▼dewi – Aupu deiyoda, ake. Dewi peramengada, isok ner, er si eremna keca tep penunge. Amutu nesala si eremami isok nerda, er si Asyera tepa.} Asyera si eremne nabi-nabi cap, sun anesala yuma cap, Israel nesala weik cap bena pepipa, gekepidi bupra Karmel mutu deikipu welepi.

21 Sun anesala yuma bupra, Elia damai bena wekipa aupu pepu. “Ware kupra taru tupa kumumdi, ‘Ange kupkup do? Ange kupkup do?’ tenen, kange boktopkamser do? Atep nengeda, ‘Allah er si Yahweh, erda Allah tenpu kurura tep, er sipu erepkup,’ tenepmum dingeda, er sipu eremumdi er upupu gekepra dombankamrume. Dinino, ‘Gume, Bahal erda Allah tenpu kurura tep, er sipu erepkup,’ tenepmumnyopda, er sipu eremumdi er upupu gekepra dombankamrume. Sun dipu tenepetepmumdi wepso,” pepu. Upepra asipu dinin, sun abulupmai neng yumadi, ataruda sundi ton upu men pepidi dimpepnapu kupi.

22 Dimpepnapu kupipa, Elia dipapu ton cap tamupra pepu. “Allah upu peiprepa lap pena neng ton weik akurami dinin, ukutaruda, er upu lap pena ngebo nabida, ne tenpu kunune. Dinino, Bahal er upu gekepra lap pena deiyo neng, isok si eremna nabi-nabi sun dengeda, empat ratus lima puluh neng akurume,” Eliadi pepu. 23 Upepudi abupra wekmai nesala tep aupu dukdongopra pepu. “Adipapu sun jem sapi butene ton doupra yankurume. Sun Bahal isok si ererum nabi-nabi nengdi tenpu sapi bisam weprumudi, popra sekrumudi galepra pala gel taplakra yakeipmaiyapu, akeca dopra uku dongopmarum co deiki deipkurum dinin, ukuda men sekurume. Ange utopu, ne peda, jem sapi popra seknedi, galepra pala gel taplakra yakeipmainge deiki, uku dongon co keteneipnedi, asapi bisam tu deipkune. Ne peda uku men sekune.

24 Ange yuma konum keteneipmepe dingeda, sun si eremrum keca isok si Bahal tep, ‘Uku karepseo,’ pepra moropkamarume. Autopu ne peda ne si eremnun Allah, er si Yahweh tep, ‘Uku karepneo,’ pepra moropkamane. Ukupmepepa, ‘Sun nai bodi uku karepkamaser do, ne nai bodi uku karepkamaner do,’ tenen, moronmapepane, uku karepsere ngeboda, ‘Ada tek sisi Allah, er tenpua,’ tenepkamape.” Eliadi upepupa, sun awekmai nesala yumadi, “Telepe apepseremngepu kupkupe,” pepi.

25 Eliadi nabi-nabi Bahal si eremna neng tep, “Ukutaruda apepmasentopu, sunda nimi weik cadi, jem sapi tenpu ton duyamumdi, menmena popra sekmumdi, pala gel taplakra yakeipmarumai, uku dongon co deipra asapi galemna deipra, keteneipkurume. Ukupmum dingeda, sun si eremrum ngebo Bahal tep, ‘Uku karepseo,’ pepra moropkurum dinin, sun pedipapu uku sengna gume,” pepu.

26 Upepupa, apepu upu gekepra, er pepmautopu kupra keteneipi. Keteneipi dingeda, “Nun nai Bahal, nun upu gekepsememdi, uku ton karepseo,” pepra, pio tep ngolokra ipna di amoronmaipane, konum keteng dukduk kepu. Tupa moronmaipane, Bahaldi er upu tamupra men penmaupane, pio men gekepmanto kupu pangeda, mut cap semaidi, ‘Gam keca popra nun nai karepkup’ tenen, pala gel taplakra yakeipmaiyaipu ongopdongopra wekmaidi mut pepra semaidi, tupa moronmai dinino, Bahaldi uku ton men karepmaudi, upu tenpunge peda ton men pepmanto kupu.

27 Upenmaipane, sintara konum kepu pangeda, Eliadi sun aneng tep, “Sun nai bo damai ngedi-ngedi ngolokra upunapu kunkamarume. Sundi, ‘Nun nai boda tek sisi Allah utopu kurure,’ teneruma cadi, gekepkamaser ja. Sun nai boda ila mambul keca tenenmar di men gekenmaser do? Tonda, yuk pel donmardi, sun upu men gekenmaser do? Agum dingeda, yuk karen mutu benmardi, sun upu men gekepmaser do? Tonda, mapmar di do? Sundi er tep bukeipkurume. Bukeipmum pangeda sun upu gekenkamaser ja. Ware keca deiyo tep, sun upu pio men gekepmaser do, nun walwal cadi, moronapu kunkamarume,” pepra, Eliadi nyek-nyek penmau.

28 Upenmaua tep nengeda, Bahal isok si eremna nengda, pio ila di upunapu kunmai. Tonda sun isok si Bahal nabi-nabi nengdi, ila upu di ngolokra moronmaidi, amutu neng ukuramitopu, sun nong bolpu, ya di kwepra podanmaidi, dila dodidanmaidi kunmaipa, sun nong bolda yapipu belenmau. 29 Mali pepra ngolongmaidi tupa moronmaipane, Bahalda upu pio men pepu. Tonda, sun upu men gekepu. Ipna di moronmaipane, konum keteng dukduk kepmauanen, konum sintara sisi kepu. Ada sun Israel nengdi, Allah er gispal dona tep, si eremna keteng, gam keca popra karerami keteng kupu. Idona taru konum kupu dinino, er lelim peda ton men yan pepu. Bahal Isokdi upu tenpunge peda men pepu. Tonda uku peda men karepu.

30 Ukupu pangeda, Eliadi sun awekmai nesala tep, “Sun yuma bupra ne damai yan wekmumdi, dineso,” pepupa, yaidi, bupra yan weki pangeda, Elia adipapu Allah Yahweh er si eremna tep karyakaramidi, betamidi pala gel taplakra yakeiaminge dinin, dadakra sakamunge betapra deipu. 31 Betapra deipu taruda, Eliadi gelda amol dam di utamna gel ton bupra yaudi, yana yakeipu. Akupunge deiyoda, sun apu bo Yakubdi dua belas nyapu deiamupa, anengdi ton nyapu weik deipipa dadeipdanen barami nengda, dua belas (12) yala neng kurami.

Atep, ayala-ayala yuma 12 dinin, yuk-yuk tenepra, agelda amol dam di utamna gel dopra, pala gel taplakra yakrapudi deipu. Sun apu bo Yakubda, pumun taru Allah er si Yahwehdi angebo tep, yan pepu. “Ukutaruda kan si Yakub pekenung dinin, amenda taruda, kan si tep, Israel penkamkenge,” peipu. Angebo Yakub tep pepmepe.

32 Eliadi, agel 12 doprapudi, pala gel taplakra yakra deipka deiki di, Allah Yahweh, er gispal dona tep, gam keca popra akaren keca uku dongomnai betapra deipu. Angeda deiamipa dadakra samua tep, agel 12 dopra yaudi, “Allah Yahweh, er si deiki di apel dopne,” peprapudi, agel yan betapra keteneipu. Konum betapra depudi, aketeneipunge dan-danada, ila di me matap pumbon gopdongopu. Amata pumbonda, lima belas liter me dikdongopmanto kupu.

33 Pala gel taplakra yakeipuaida, co dongopudi, agem sapi ton nge popra sekudi, galepra aco deiki deipu. Ukupu dingeda, “Sundi ila me mau dumbari di, me gwepra yamumdi, auku sekunai cap, asapi galepra deipmanai cap, akeca keteneipnyai yuma yan me dinkurume,” pepu. Upepupa, er peputopu, kupi.

34 Eliadi, “Akuprumtopu ue tenpu ton cap kupkurume,” pepupa, sun anengdi apeputopu kange di ton cap yan kupi. Ukupi pangeda, Eliadi, “Akuprumtopu, ue tenpu ton cap, weneringe tep ukupkurume,” pepupa, sun anengdi apeputopu kange di ton cap, me gweprapidi, yana me dikdongopi. 35 Ayan me dingmaipane, ‘Uku sekaman’ tenen, pala gel taplakra yakeipmaudi, ketenepra deipmauaida, me weik akapmaua cadi, me dipapu embeudi, tu palipra me matap sekmauai yumada, me di mokon deiprapudi dinipu.

36 Elia Allah er upu lap pena ngebo, ange yuma konum kupra sengpepkopda, sun Israel nengdi, Allah er gispal dona tep, si eremna keteng, gam keca popra karerami keteng konum kupu. Atep Eliadi pala gel taplakra yakeipmaua damai tengbeu dingeda, Allah tep moropu. Ukupra Eliadi pepu. “Nun nai bo Allah kan si Yahweh tep moropkene. Kanda, nun co puna neng Abraham cap, Isak cap, Yakub cap tep pio kalekra meliamumpane, sundi kan si erepyakaramkei. Ne nai Allah kan tep moropkene. Atumida, ‘Akunmap keca dinmang nesala yumadi kael kepkameng’ tenen, moropkene. Ada, ukupmapnge yumada, kandi peipnemum utopu kupmane. Israel nesala damai kurum Allahda, kan tenpua. Tonda, neda kan amutara kunedi, kan pel don ngebo kunune. ‘Atumida ange yuma kael kepkameng’ tenen, moropkene.

37 Ne nai Allah, ne moropnenge ngeda, amoropkentopu kandi kupmem pangeda, Israel neng yuma kael kepkamenge. Ada, ‘Kan nyapu Israel nesaladi, ‘Gume Allah er si Yahwehda, tek sisi Allah kurure. Erda Allah tenpua,’ tenepmengedi, kael kepkunge’ tenen, moropkene. Tonda ‘Tek sisi nun nai bo Allah akuseredi, nun dipru tamupserepa, kan sipu eremkamepe, tenepmengedi kael kepkameng’ tenen, moropkene naio. Ukupra isok si eremenge ngeda tapra, tamupra kan sipu erepkamkenge,” pepra moropu.

38 Eliadi upepra moropu pangeda, Allah er si Yahweh, er im deiki di uku dokotepupa, sapi galemna adeipmaunge cap, co cap, yakipmau gel cap, atu cap, akeca-keca yuma cap, tonda ame adiktapmaunge peda, yan uku jepra gawal dakropupa gum kupu. 39 Ukupu pangeda, awekmai nesala yuma ange epidi, tu deikipu genepra mapmaidi, “Uo nun nai bo Allah, kan si Yahweh, tek sisi Allahda, kan tenpua. Yahweh, tek sisi Allahda kan tenpu akurume,” pepra Allah er si erepi.

40 Allahdi ange yuma konum ukupupa epiya tep nengeda, Eliadi sun awekmai nesala yuma tep pepu. “Bahal isok si eremnung neng, er upu lap pena deiyo neng, sun nabi-nabi neng yumada, tomopkurume. Aneng yuma tomopso, tenpu ngebo peda tapmumpa bana gume,” pepupa adipapu aneng yuma tomopi. Tomopidi, aneng yuma Elia er koripu duyaipa, sun aneng doupra, sun yumadi Kison mekin beipa, Eliadi peipupa, anengdi, sun mali nabi neng yuma popra gawal daki.

Dou maramupane, mo karepu upu

41 Ange yuma konum kupi pangeda, Eliadi Ahab tep pepu, “Ne deiyo ngebo, ataruda kan menmena jen bena jepkurume. Ada mo sik men kupkure. Konum ila di cepkura tep, mo yakanmarepa lelim gekepne. Ada peten-peten kemarpa, gekepna tep pepkene,” pepu. 42 Upepupa, Ahab adipapu gekepra, Karmel mutu tapra, ‘Jen cap, me cap jerbenkun’ tenen, er ati tamupra beudi jen bena jepu. Dinino, ataruda Elia Karmel mutu deiki welepu. Ukupudi, Elia er giso geipra gutam deiki deipudi, tuai epu.

43 Ukupudi, Elia er melimne ngebo tep pepu. “Kanda adipapu amutu welepmemdi ila laut mokon dam tara dipetepo,” pepupa, er pel don ngeboda iwelepudi, dipetepu dinin, akeca yuma dina gum tep, “Naio, mambul keca tenpunge peda ton akwapmarpa, men epne,” pepu. Ange utopu, Eliadi, angebo tep, ue ngantan bari deiki ‘Dirberume,’ pepra dokotepupa, dirbeu dinin, tenpu keca peda ton pio men epu. Talipu bena yana kepu.

44 Ange utopu ue yoneitamnge benapkanen, tamupra yau dingeda, “Naio, teka dua bum tenpu mokon dam tara di, topdoua yakarepa epne. Aduada, nimi buru utopu kupmardi welenmarpa epne,” pepu. Upepka tep nengeda, Eliadi, er melimne ngebo tep upepu. “Kan adipapu nimi deiyo ngebo Ahab damai perbenkurume. ‘Ada mo men yanapre taru di, kan kuda bisamdi gipra tu deiki embaramre keca, kereta kuda perameng keca deiki bukra amutu deiki kwerepra benkurume.’ Ada, ‘Mo yare pangeda, men benmanto kuprur’ tenen, pepne. Atep benpepmempa, benkurure.” Eliadi er pel don ngebo tep peipupa perbeu.

45 Angebo badongomu taru dipu, adipapu imeda mo yankou atep, sukupu. Tonda mo cepkurya tep, embaramre kume embaudi, mo cap kumanya puna cap kupu. Ukupu taruda, Ahab adipapu er kereta deiki bukra menmena er ati Yisreel mutu beu. 46 Er beu taruda, Eliada Allah er si Yahwehdi puto weik Elia deiki deipupa, lyom opkal kepmau ngeda, gikra nong deikipu deipdongopra adipapu sepdaro beu. Ataruda Ahab menmena mepra banmaupane, Elia adipapu er kabo Ahabda antaprapudi menmena kirikra Yisreel mutu bena kunmau.