1Ki 19 | XteSC | STEP | Uda, nimi deiyo ngebo Ahabdi er ner Isebel gekenmauai bena pepu. “Isok si eremamidi isok upu lap pedirami neng, sun mali nabi-nabi neng yumada, Eliadi peipmaupa, nimidi ya dopra poptapi.” Tonda Karmel mutu deiki Eliadi kupmau keca yuma peda, lap pepu.

1 Kings 19

Nabi Elia, ‘Isebeldi popnerur’ tenen, Horeb mutu sepdara beu upu

1 Uda, nimi deiyo ngebo Ahabdi er ner Isebel gekenmauai bena pepu. “Isok si eremamidi isok upu lap pedirami neng, sun mali nabi-nabi neng yumada, Eliadi peipmaupa, nimidi ya dopra poptapi.” Tonda Karmel mutu deiki Eliadi kupmau keca yuma peda, lap pepu. 2 Konum aupu gekepu dingeda, Elia damai perbenkoi neng wepra deipudi, Elia tep pepkoi upu yumada, sun damai upu peipu. “Elia, kandi isok Bahal ^{▼▼Bahal sekmepu ngeda, yuk Alkitab neitamai Baal sengnunge. Bahal sekmupkada, ‘Baal pepmengepa, walwal di bal sisa tenepnung’ tenen, Bahal sekmupke. Si yuk sekmepu dinino er tenpua.} er si eremai nabi-nabi neng popmuma tep nengeda, ange kupmamumtopu, nedi kan peda popkamakene. Ada, akunman keteng utopu dinin, ambutumi aketeng utopu konum kupyopda, popkamakene. Ange men kupnyopda, ne putapmanere ngeda, ne si eremnun isok-isokdi ne tep wenepra kange mun keca karepnetenge. Atep Elia, kanda, ‘Tek sisi popnenung,’ tenen, kwar kunkamkere, pepkene,” pepra upu doproipupa, Elia damai lap perbei.

3 Upu peipmai nengdi Elia damai bena pepipa, gekepudi pio kware kupupa, ‘Ne popnerur’ tenen, adipapu Elia cap, er melimne ngebo cap, sun butene kurapra Yudea tara neitamai dinin, Bersyeba mutu berei. Bersyeba mutu berei dingeda, Elia er pel dona ngebo amutupu bena tapupa, akunmau.

4 Dinino, Eliada tenpu lukunda bisi maprapudi, tenpu tumi ton banmauanen, me gum mutu, pio katawai mutu neitamai beu. Konum beu dingeda, ila co tenpu tekamnga amutara bena bukmaudi, dabal weik kupupa, Allah tep moronmau. ‘Neda dabal weik kunerura tep, konum deptene. Ne co puna neng deramitopu, ne peda tali ngebo kununa cadi, adipapu deptene. Ne ikin weik kuneretopu, tupa men kutene. Atep, telep ngeda, Allah erdi dapopnetupa deptene,’ tenenmaudi, Allah tep moronmau.

5 Upepra moronmau dinin, Eliada ue pio weik kupupa, abukmauaipu mapu. Ukupu taruda, dato-dato di Allah er im deiki pel don ngebo malaikat tenpu yaudi, Elia talepudi Elia tep pepu. “Kan adipapu bukrapmemdi, jen jepo,” pepupa, ken lunlun gekepu. 6 Gekepudi, adipapu Elia dupdup pea bukroudi dinmaupa, er giso deipmauaida, roti kwaneng ukudi dapmaipa konum popmaunge telepropa cap, me gwepmau mau cap, ayan kapmaupa epu. Epu dingeda, adipapu dopra jepudi, ka di tamupra mapu.

7 Ukupra amapupane, Allah er si Yahweh, er im deiki pel don ngebo, malaikat ton cap ue butenenge tamupra, Elia mapmauaipu yau. Ayau dingeda, tuptopu ken lunlun di Elia gekeupa, “Kan bukrapmemdi jen jepkurume. Ada jepmempa boupkera deiki, ila karen mutu benkamarema cadi puto kupra deipkamkere,” pepupa ken lunlun di gekepu.

8 Gekepudi adipapu Elia lukdana bukrou. Ukupu dingeda, roti kwaneng cap me cap ayan kapmaunge dopra jepu. Konum jepupa, boupka deiki di, ka di ton puto kupkopda, karen mutu bana tep bisida, lukunda komuni empat puluh tumi deiki di bisi mapbaramnganen, Horeb mutu beu. Horeb mutuda, Allah er men di yana peramngaipu beu. 9 Elia konum Horeb mutu beu dingeda, gel imir bena mapu.

Allah er si Yahwehdi, Elia damai yana, pepu upu

Horeb mutu kunmau taruda, Allah er si Yahweh adipapu yaudi, Elia tep aupu pepu. “Kanda ware keca deiyo tep amutu yan kunmarem do?” pepra asipu. 10 Asipupa, Eliadi tamupra Allah tep pepu. “Ne nai Allah kan si Yahweh kurume. Kanda ila puto ngebo kuruma cadi, akeca-keca yuma deiki tara kurume. Neda, tumi-tumi yuma kan peipmum upupu talepra kunedi, pio pe deipra kan pel tep puto dipapu donune. Dinino, kan nyapu Israel nesalapuda, kandi, ‘Ange kunkamrume, ukupmumnyopda, nedi kalekra melimkamsene,’ pepra deiamsemum upu konum yaniptapmengedi, mali kun kecapu kununge.

Tonda, sundi kan gispal dona tep, gam keca popra, telepe pepra, karyakangedi, pala gel taplakra yakra deipdanen weleamyaida, konum dakra tami. Tonda kan upu peipmempa lap penung neng, nabi-nabi yumada, ya di dopra konum popra gawal dakropi. Ukupyakaramyanen, ukutaruda ne tenpu kunune. Dinino, sundi ne tepapu ‘Popkamep’ tenen, kalengnenunge,” pepu.

11 Upepupa, Allah er si Yahwehdi Elia tep tamupra pepu. “Kan gel imir akupmaremai di gopra, ne yana tekuna damai, amutu dupai aca yayo. Neda Allah, ne si Yahweh, nedi kan damai yanapnedi, bisipra benkuna tepa,” pepu. Upepupa, Allah kunmaua damaida, ila puto weik mungna embaramreto kupra embeupa, amutu ban-ban yuma co pamngaida, ila di long-long pepu. Tonda, amutu ila gel yuma capda, yamum-yamum pepudi, enge binipu dinin, ataruda Allah Yahweh er nonge ton akum neitamaida men kupupa, Elia men epu. Ila mungna embendopu pangeda, ila mutu longna ton embeu. Ukupu taru peda, Allah er si Yahweh, er nonge ton jenek men kupka cadi, Elia men epu.

12 Mutu longna konum kupropu pangeda, ila uku bu ton belepu. Uku belepu dinin, auku belepkai di, Allah jenek yan tekupa men epu. Ila uku bu konum kupudi dimbulung pepu taruda, Elia gekeupane, yambula di upu mur-mur peramengtopu upu pepupa, Elia gekepu. 13 Elia apepu upu konum gekepu dingeda, er kemamu lyom opkal kwiripra, aso deiki kepdongopu. Konum kepdongopu dingeda, agel imir kunmauai di gupra, agel dupai bena teku pangeda, nimi upu utopu upu di pepupa gekepu. Ada, “Elia kanda ware keca deiyo tep, amutu yanmarem do?” pepu.

14 Upepupa, Eliadi tamupra pepu, “Ne nai Allah kan si Yahweh kurume. Kanda ila puto ngebo kuruma cadi, akeca-keca yuma deiki tara kurume. Neda, tumi-tumi yuma kan peipmum upupu talepra kunedi, pio pe deipra, kan pel tep puto dipapu donunue. Dinino, kan nyapu Israel nesalapuda, kandi, ‘Ange ukunkamrume, ange ukupmumnyopda, nedi kalekra melimkamsene,’ pepra pedina upu peiamsemum ngeda konum yaniptapmengedi, mali kun kecapu kununge.

Tonda, sundi kan gispal dona tep, gam keca popra, kan karena keca kareryakanai tep pala gel taplakra yakra deiamyaida, konum dadakra tapi. Tonda, kan upu peipmempa lap penung neng, nabi-nabi neng yumada, konum popra gawal dakropi. Ukupyakaramyanen, ukutaruda ne tenpu kunune. Dinino, sundi ne tepapu, ‘Popkamep’ tenen, kalengnenunge,” pepu.

15 Upepupa, Allah er si Yahwehdi Elia tep pepu. “Ukutaruda, kan yanmaumum bisipu tamupra benkamarume. Kan adipapu tamupra me gum mutu, ila katuai mutu, er sida Damsyik mutu benkurume. Ormutu bemem dingeda, Siria ^{▼▼Siria – Ton nengda Aram mutu perameng, dinin yuk neng dingeda, Siria mutu perameng. Amutu tenpua dinin, si butene peramenge.} mutu nimi deiyo ngebo kemna tep, nimi si Hazael wepra deipmemdi, peten kemna tep, telel kudina me er giso deiki dikipkurume,” Allahdi peipu. 16 Upepudi aupu ton pepu, “Ange utopu, nimi si Nimsi er mi Yehu tep nengeda, Israel nesala sun deiyo ngebo kemna tep angebo weipkurume. Er peda peten kemna tep, telel kudina me er giso deiki dikipkurume.

Tonda ataru dipapu, Habel-Mehola mutu ngebo, er si Safat, er mi Elisada, ne upu peipnepa, lap perbana ngebo, ‘Nabi kunkamre’ tenen, wepra deipkurume. Ada kan yo pununa tep pepkene,” pepu. 17 “Ukupmempa, sun adeiyo nengdi nimi mali kupmenge neng ponkamenge. Ada Hazaeldi men poprepa bura saka benge nengda, Yehudi ponkamre. Autopu, Yehudi men poprepa bura saka benge nengda, Elisadi ponkamre. Atep sun aneng wepra deipkurume,” pepu.

18 “Mali kunge neng weika di ponkameng dinin, ne Allahdi Israel nesala dengeda tujuh ribu neng, ne mawa neng tep, moupra deipkamne. Anengda tek sisi men popkamenge. Anengda tali neng gume pepne. Anesalada ne peipsi upu gekepra bouna di kungedi, isok si Bahal tep er si men eremnunge. Tonda Bahal er gispal dona tep, gutam tu dipdongopra men bungnunge. Sundi er urasin utopu keca ketekepra deiami kecada, sun ton men muturami. Ange tep nengeda, nedi sun tep lyepropkamne. Sunda Bahal isok si men eremnung nesala tep pepne,” Allahdi pepu.

Allahdi Elias tep, wepra deipu upu

19 Allahdi Elia tep, “Nimi deiyo kepkameng neng tep wepra derirbenkurume,” pepupa, Eliadi, adipapu beu. Beupa, nimi si Safat, er mi Elisa epu. Ataruda, angebo er si Elisa, er sapi bisam dua puluh empat yuma, dinin butene-butene kepra, wa pen damai bena deipmaudi, ikin takke co sapi dan-dana tekreipa, adeiki gerekdokotepmaupa, gelipdara banmaidi, co takke gerekmaunge di tu palipbanmau. Ukunmaudi yawa ponmaipa wa penmaudi, Elisada sirik tara tekmau. Ukunmau taruda, Elia er damai yaudi epu. Epu dingeda, er kemamu lyom opkalda kwiripdouapka di, Elisa er nong deiki bena taplakdongopra adipapu beu.

20 Ukupupa, Elisa wa penmauanen, sapi yuma atapra, Elia damai amenda sepdaro dombeudi pepu. “Uo ne nai, ne moropken ngeda, nanin cap, ne nai cap, sun damai bena, mutupnedi ‘Dakuso,’ pepra yanedi, kan melipkamkene,” pepra moropu. Upepupa, Eliadi “Jo, tamupra kan mutu berume. Ne ware kupmakena tep, kan peprem ngeda men kuptum do? Mali gume. Apeprem ngeda telepe pua,” pepu.

21 Upepka tep nengeda, Elisa tamupra wa penmauai yaudi, sapi bisam butene yan popu. Sapi bisamdi gipra banmai co takkeda, tu palina keca yuma, er sida pajak sapi, adipapu aco toupra uku dongopudi, sapi popra kalepu. Konum kalepmaua popu pangeda, galepra er tamna nesala cap, er nin cap, er nai cap, sun yuma bukra ton pu jepi. Ange jepi dingeda, Elisa adipapu amutu tapra, tamupra Elisa er melimne ngebo tep bena pepu.