1Ki 2 | XteSC | STEP | Raja Daud dena damai konum kupka tep, er mi Salomo tep aupu pepra deipu.

1 Kings 2

Daud kapul men depmau taru di, er mi Salomo tep upu sirya pepu upu

1 Raja Daud dena damai konum kupka tep, er mi Salomo tep aupu pepra deipu.

2 Ne konum wisi deipsi. Atep nengeda, tuai neng yuma deramengtopu ne peda depkamne ja. Atep nengeda, kan moupra tenepmemdi, puto dipapu kunkamrume. Puto neng kuramengtopu, kan peda kunkamrume. 3 Nun nai Allah, er si Yahwehdi, “Ukunkamrume, angeda ton men kunkamrume,” pepra deiamseu upu moupra talepmemdi kunkamrume. Allahdi Musa damai pepra deiamupa, Musadi aupu yuma sekra kareramseunge utopu, aupu peseretopu angepu kunkamrume. Ukupra moupra epmemdi, teka tenepra ukupmemnyopda, kan kupkamrem keca yumada, telep nongpu kunkamkere. Ange utopu kan benkamremai yumada teleppu kunkamkere.

4 Ange yuma kupmemnyopda, amenda taru Allah er si Yahwehdi ‘Ukupkamkene,’ pepra pedina upu peamneutopu kupkamre. Ada Allahdi upepneu. “Kandi deipmempa, dadeipdanen bankameng nesalada, sun kunkameng keca pio moupra dipetepmengedi, mali kuna gum dipapu ne tep men tapnengedi, sun kange dipru cap, sun nonge cap, ne deikipu deipmengopda, nedi pio kalekra dinkamsene.

Ada, kan yala neng kan-kan di, nimi ton dopropnedi, Israel nesala sun ila nimi deiyo ngebo Raja kemna tep, wepra deipnepa, Israel nesala pio talenkamenge. Ne Allahdi peiamsitopu kupmengopda, kan deipgerekdani neng neitamai di, Raja pio men gum kupkamre.” Allahdi Daud tep peramutopu, Raja Dauddi er mi Salomo tep lap pepu.

5 Upepudi, aupu ton pepu. “Zeruya er mi Yoabdi ne tep mali kupneu ngeda, kan Salomo konum kael keamume. Ada angebodi, Israel sun jen talena deiyo neng butene, nimi si Nera er mi Abner cap, tonda Yeter er mi Amasa tep kupu ngeda kan kaele. Ada nimi podana taru gume. Tali kange doupra kuramepu taru neitamai dinin, nimi podan taru utopu Yoabdi, abutene neng poptapu. Poptapupa sun yapi embeuada, er deiyoteng deiki bapu. Tonda sun yapi er sandal deiki saka bapu.

6 Ange tep nengeda, kan ila kaele ngebo cadi, tenipetepmemdi, ‘Telepnge ace,’ tenepmemnyopda, er Yoab tep wenemna keca karepkamreme. Dinino, er Yoabda, ‘Wisi deiprepa, er kul potong konum papre pangeda, amenda taru er kange deipra talipu depkamre ja,’ tenena gume. Ange gum dinin, angebo er mali kupu ngeda, kan men lupronkamrema cadi, wenepra poptapkamrume,” Raja Dauddi er mi Salomo tep pepu.

7 Upepudi aupu ton pepu. “Dinino, Gilead mutu kuramu ngebo er si Barzila, erdi deiamu nyapuda, telep kupra melimkamrume. Ada, kan ati pumbon meja dam bukmumdi kan cap tonpa jen jerumu nesala cap, aneng cap jen kikiman jenkamenge. Deiyoda, kan du bo Absalomdi, ‘Ne nai bo popkamne,’ teneramneu taru, bura saka sepdaro benamsi taruda, Barzila er nyapudi meliamneiya tep, kandi aneng ton melimkamrume, pepkene.

8 Tonda, Gera er mi Sime ton kan damai akurure. Angeboda, Benyamin yala ngebo dinin, erda mutu si Bahurim mutu kuramu. Pumun taru nedi Mahanaim mutu bana tep, bisi neitamai baramsipa, angebo Simedi mali upu weik ne deiki pepneu. Ada, ‘Allahdi Daud tep, mali kupra deipkamre’ tenen, wipdongopneudi, mali upu ne deiki pepneu. Neda, ‘Yordan me goupra ortara benkun’ tenen, Yordan me damai besi taruda, angebo Sime ton yaupa, nedi er tep upepsi. ‘Allah Yahweh, er si deiki di pepkene. Ne parang ya di men poptapkamkene,’ pepsi.

9 Upepsi dinin, kan Salomoda angebo Sime tep, ‘Dakwapye, erda mali men kupu,’ tenena gume. Er kul potong konum papu dinin, ‘Er tali kange doupra depkamar ja’ tenena gume. Er mali kupneua tep nengeda, er wenemna tep popmempa er yapi emberyopda depkamre. Salomo kanda ila kael ngebo kuruma cadi, kandi tenepkamremtopu kupkamreme,” Raja Dauddi er mi Salomo tep pepu. 10 Raja Dauddi aupu konum pepudi, dakuramnyanen, amenda taru depupa, Daud er taleamu mutu, Yerusalem mutupu dubena, tu paliprapidi, er nong peipi.

11 Raja Daudda, Israel neng taleamu keteng tamun dengeda, empat puluh keteng tamun deiki taleamu. Ada, Hebron mutuda yoneitam bari keteng tamun deiki di taleamu. Tonda, Yerusalem mutuda denge weneri keteng tamun 33 deiki di Israel nesala taleamu. 12 Salomoda, er nai bo Daud nimi deiyo ngebo Raja kuramudi, ila ngebo bungna keca deiki bukra kuramutopu, er Salomodi amutu yuma puto di taleamupa amutu neng yuma er amutarapu kurami.

Adonia depu upu

13 Tenpu tumi Adoniada, Salomo er nin Batsyeba damai beu. Beu pangeda, Batsyebadi Adonia tep asipetepu. “Kan ayaremada, kange telep deiki di yarem do? Agum dingeda, ‘Popdankamep’ tenen, yarem do, gum do?” pepra asipetepu. Asipetepupa, Adoniadi tamupra pepu. “Gume, tek sisi telep kange dipapu yanmane,” pepu. 14 Upepudi, ton cap tapakra peipu. “Nedi moron keca ton tenpu putapmanera tep, angeda lap pepketene do? Neda ange putanmanerpa yanmane nino,” pepu. Upepupa, Batsyebadi, “Angeda ware keca do?” pepra asipetepu. 15 Upepupa Adonia erdi tamupra pepu, “Nino, kanda konum men taru di kael keamume. Tek sisi nimi deiyo ngebo Raja kemna tep nengeda, ne ca. ‘Ne tepapu ereipkamnenge,’ teneamupu. Angeda, sun Israel mutu neitamai kunung nesala yumadi, “Konum erpu kupkamre,’ teneami. Dinino tek sisi angeda konum tamupmare. Ukutaruda, ne weit bo Salomopu nimi deiyo ngebo Raja tekamre. Ange deiyoda, er Allah Yahwehdi konum teneputopu kupu.

16 Atep ukutaruda, nedi tenpungepu ton moropkukene. Amoropkun ngeda, na nin kandi ton ‘Gume,’ men pepkunerume,” pepu. Upepupa, “Adonia kandi, ware keca moropkurem do?” pepra, Batsyebadi asipu. 17 Asipetepupa, Adoniadi tamupra pepu. “Nino ne moropne ngeda, nimi deiyo ngebo Raja Salomodi, kan upu gekepkeryopda, kan tep, ‘Gume,’ men pepketu. Atep, kandi er tep moroptumpa, erdi, ‘Telepe,’ tenepnetupa, Abisag doupra karepnetupa, aner ne dopkamne. Ada, Sunem mutu kaber ner atepa. Nedi tenepne ngeda, na nin kandi Salomo tep bena moropmem pangeda, ‘Gume,’ men pepkamakere,” pepu. 18 Adoniadi aupu pepupa, Batsyebadi, “Yo, telepe. Ange tep nengeda, nedi Adonia kan melimna tep, kan tenenmarem ngeda, Raja Salomo er damai pepterepkamane,” pepu.

19 Upepu dingeda, Batsyeba adipapu ange tenepudi, Raja damai Adonia erdi pepmaunge tep beu. Beu pangeda, Raja Salomo adipapu tekrapudi, gutam tu dipra, er nin yakanmaupa, gispal dopu. Ukupu dingeda, Salomo adipapu er bungna tep keca, er si tahkta deiki bungbeu. Ukupu dingeda, Salomodi pepupa, er pel melimna nengdi, er nin bungna tep keca, er si tahkta dopra, er dumsisi tara deriryaipa, acapu buku. 20 Er nin Batsyeba konum buku dingeda, upepu, “Ne kan nindi, ‘Yambul upu ton kan cap pepnemedi, moropkamakene’ tenen, putanmanera tep, yanmane pepu. Ne kan nindi tenepmanada, kandi ne pepne upu tep, ‘Gume,’ penada, pio meme tenepmane,” pepu. “Atep nino, ware tenepmarem do?” pepra, Salomodi asipetepu. “Nedi gume, men pepkamankene,” pepu. 21 Upepupa, er nin Batsyebadi tamupra pepu, “Kandi kan dubo Adonia tep ‘Telepe,’ pepmempa, Adoniadi, Sunem mutu ner, er si Abisak dopkamare,” pepu.

22 Upepupa, Salomodi, “Nanino, warya tep kandi aupuda ne damai yana moropnerem do?” pepra, Salomodi asipetepu. “Na nino, angeda tek sisi kandi ne ila bungne keca tahkta keRajaan cap, ne talenun keca yuma capda moropra, Adonia dopra karena tep, yana moropmanerem utopu pepmanereme,” pepu. Adoniada, tek sisi ne dubo men kurur do? Gume, ne dubo kurura cadi, aner moropmanerem deiki di, ne talenun mutu yuma utopu ngeda, konum moropmanereme. Tonda, imam Abyatar cap, Zeruya er mi Yoab cap, sun anengda, Adonia er tamna keprei neng konum kurerunge. Sun melimna tepapu konum moropmanerem adano,” pepu.

23 Aupu yuma konum pepra seng pepkopda, Salomodi upepu. “Tek sisi Allah Yahweh er si deiki di pepne. Ada, ne pepkun upu tek sisi men kupnyopda, Allahdi ne pepkuken utopu ikin kecada, ne giso deikipu dadeipkamnere. Ada, Adoniadi ne tep moropmaner ngeda, tamupra er deiki ikin keca deipra, wenepra popnepa, depyopda, Allah Yahwehdi telep dawipkamnera tepa. 24 Allah Yahweh tek sisi pio akuretopu, ne Salomodi aupu tek sisi pepkene. Allah Yahwehdi konum ne tep, ‘Israel nesala yuma talena tep, Salomo er nai bo Daud er bungamu bungna keca, er si tahkta deiki bukamre’ tenen, keteneipneue. Tonda, Allahdi ne tep, ‘Erdi ange kupkamre. Erdi deiprepa, dadeipdanen bankameng nesalada, weik kuprepa, puto kunkamenge,’ peiamrei ngeda, apeamreia utopu, ataru ukurure. Atep nengeda, nimi deiyo kepra talena tep nengeda, ne deiki cap, nedi deipnepa, dadeipdanen bankameng neng deiki cap tep, konum karepseue. Atep nengeda, Allah er si deiki di, ne Salomodi pepne. “Adoniada, atumi dipapu wenepra popnepa, depkure,” Salomodi pepu. 25 Ukupra pepka tep nengeda, Raja Salomodi Benaya tep, “Angeda ukupkurume,” pepra deipupa, Benayadi Adonia bena porbeupa, depu.

Imam Abyatar er pel dona tapinge cap, Yoab depunge cap tep, seki upu

26 Ange yuma konum kupu dingeda, nimi deiyo ngebo Raja Salomodi imam Abyatar tep upepu. “Abyatar kan deiamkei mutu Anatotpu, tamupra benkurume. Atumida, kan peda popketenge tumi dinin, tapkena tep, pepkene. Deiyoda, kan cap, ne nai bo cap, sun kikiman tupa kururume. Ukuramrurumdi, ne nai ikin keca yanpa kange mun kange doupra, ikin kuramu taruda, kan peda kange mun kuramkeu. Tonda, Allah erdi pepra deiamu upu, sekra deiami co bekin, er sida Peti Perjanjian ^{▼▼Peti Perjanjian – Pumun taruda, Allahdi Musa tep peiputopu, sun Israel nengdi, co lase dopra, co peti ketenepi. Aco deiki yumada, emas dopra palepra deipi. Aco peti pumbon neitamaida, ila mambul keca weneri deipi. Ada, Allahdi, “Angeda ukunkamrume, angeda pio men kunkamrume,” pepra, mem upu peiamudi, gel pala deiki seku mem upu cap, Harundi taleamu maca cap, Allahdi Israel nesala tep kareamu im deiki kwaning, er si mana metekanun cap dopra, apeti pumbon dongopi. Sun Israel nesalada, ‘APeti Perjanjian damaida, Allah Yahweh, er Sambala cap, er puto cap, er dirine cap, er pio telep kurenge yuma capda, aPeti Perjanjian deiki tara pio akunkamsere,’ tenerami. Akeca tep, ‘Pedina Upu Kina Bekin’ peptepe. Akeca kael kemna tep, Keluaran 25:11 dinkurume.} pum, amambul keca kalengna deiyo ngebo kuramum atepa,” pepu. 27 Raja Salomodi Abyatar er imam pel doramu ngeda, “Kange di ton cap apel pio men donkamrume,” pepra, apel donada upu seku. Ada, men taru Allah Yahweh, erdi, ‘Imam Elidi deipupa, dadeipdanen bankameng neng, Siloh mutu kunkameng nengda, sun imam pel donada, gum kupra deipkamne,’ peamutopu, Salomodi apel dopu deiki di, Allah apeiamu ngeda, nong keprapudi, katawai kepu.

28 Raja Salomodi, ange kupu pangeda, yuk neng lap perbeipa, Yoabdi akupunge yuma konum gekepu. Gekepudi, ‘Uo, Salomodi ne ton popkuner’ tenen, Yoab er kware pio weik kupu. Deiyoda, Yoabdi, ‘Erda Adonia, Raja kepsetue,’ tenepudi, er tara ngebo kepka cadi, kware pio weik kupu. Pumun taruda, Adonia tara ngebo kuramu dinin, Yoab erda Absalomdi er nai bo tep, ‘Bisbisa kepetepkune,’ tenepu tarada, Yoabdi Absalom tara ngebo men kuramu. Dinin, Adonia er tara ngebo kupka tep, Yoab sepdara beudi, Allah Yahweh er si eremna ati damai, Allah karena tep uku dongoramyai keca, ange deiki tara sapi bisam giso deiki takke utopunge deiami keca, akeca bena talerbeu. Ada, ‘Ne mali kupsinge, kaukepnetudi, adipapu men poptapkamaner’ tenen, bena talerbeu.

29 Akupunge yumada, nimi deiyo ngebo Raja Salomo, er damai konum lap pepipa gekepu. ‘Yoabda, Allah karena tep uku dongonungai, er si mesba deiki, takke utopunge talerbenmaue,’ pepra lap pepipa, Salomo aupu konum gekepu dingeda, Raja Salomodi Benaya tep pepu. “Yoab kunmaraida, bememdi, wenepra porbenkurume,” pepu. 30 Upepupa, Benaya adipapu Allah Yahweh er si eremna ati dam beudi, Yoab tep pepu, “Nimi deiyo ngebo Raja Salomodi, ‘Kanda acei di gopra yankurume,’ pepmakere,” pepu. Upepupa, Yoabdi, “Gume, neda aceipu depkamane,” pepu. Upepupa, Benaya gekepudi, adipapu tamupra Raja Salomo damai, Yoabdi kupunge cap, pepunge cap, lap perbeu.

31 Aupu lap pepupa, Salomo ange yuma konum gekepu dingeda upepu. “Yo, ange tep nengeda, tamupra bememdi, kan damai, ‘Ukupkamarume,’ peipmakertopu kupkurume. Ada, kan adipapu Yoab dakunmaraipu popmemdi, er nong doupra peipkurume. Ukupmemnya deiki di, ne cap, ne naidi deipseu neng, ne kayapu neng cap, nundi derinkamep nesala yuma cap, nun deiki di ikin keca yaserepa, men doropkamepe. Ada, talinge tep men pepne. Deiyoda, menop taru, angebo Yoabdi, mali kuna gum ngebo poamnga tep, angebo er yapi deiki di ikin keca nun doropnup’ tenena tep, pepne.” Raja Salomodi, Benaya tep pepu.

32 Upepudi aupu ton dukdongopra pepu. “Kanda Yoab popkumemnya deiki di, Allah Yahwehdi, Yoab mali kupu ngeda, kwangdana tep, ange dopra Yoab er giso deikipu tamupra deipkamre. Allah Yahwehdi, Yoab er yuk wenepkamre ada, ne nai bo Daud, er men kael kepmaupapu, nimi butene neng, mali men kupmareipapu, Yoabdi aneng butene poamnga tepa. Ada, Abnar Israel mutu jen talena neng, sun gung kuramya deiyo keamu ngebo cap, tonda Yehuda mutu kurami jen talena neng, sun gung yuma tep, deiyo keamu ngebo Amza cap, Yoabdi poamnga tepa. Sun abutene nengda, mali kuna gum dipapu poamu. Dinin, Yoab er puda mali weik kuramu dipapu, sun mali men kuramreidi, teleppu kuramrei neng poamu.

33 Yoabdi jen talena tep, ila deiyo neng, butene pomu atep, amalinge kwangdana tep menengada, ne tara neng nong deiki ikin keca yakankamsetue. Dinin, ukutaruda, kandi angebo Yoab tep popmemnyopda, Yoab cap erdi deiprepa, deipdanen bankameng neng cap, sun deikipu ikin keca yarepa pio doronkamenge. Dinino, Yoab popmepyopda, ne nai bo Daud erdi deipseupa, deipdanen bankamep nengdi, nimi deiyo kepra talenkamep nesala cap, mutu capda, Allahdi teleppu kupra derinkamsere. Ukupserepa, nun kunkamep keca yumada, weik kupbankamsere. Tonda, nun podana tep, yu nengdi nun damai men yakankamsenge.” Raja Salomodi, Benaya tep pepu.

34 Upepka tep nengeda, Benayada, Allah Yahweh er si eremna tep, dodina ati damai beudi, Yoab tep bena poptapu. Popkopda, Yoab er nong doropra, bura tara dubeudi, amutu neitamai, Yoabdi menop taru ati arum doramyaipu, bura tara bena tu palipu. 35 Ange konum kupu pangeda, nimi deiyo ngebo Raja Salomodi, Yoab er yo pununa tep, Yoyadadi deiamu ngebo, er si Benayada, ‘Israel nesala sun jen talena neng, sun ila deiyo ngebo kunkamre’ tenen, Benaya erepra deipu. Tonda, imam pel doramu ngebo Abyatar, er yo pununa tep nengeda, imam Zadok wepra deipu.

Simei depu upu

36 Ange konum kupyopda, nimi deiyo ngebo Raja Salomodi, nimi er si Simei tep “Yankurume,” pepra kong pepupa, yauopda upepu. “Simei kan atida, Yerusalem ati arum neitamaipu dopmemdi, amutupu kunkamrume. Amutu neitamai di tapra, yuk mutu ton, men embankamrume. 37 Angeda, tali men pepkene. Kange moupra tenenkamrume. Nge di kan pe kange dipapu tenepmemdi, ‘Gume dabenkune’ tenen, kika deipra, Kidron me yambulnge kwakra embeua goupra bememnyopda, kan adipapu popkamkenge. Tonda, angeda kan pedipapu kupkamrem atep, kan yapi deiyoda, kan giso deikipu kupkamkere. Ada, ikinda kan pe deikipu yankamkere. 38 Upepu pangeda, Simeidi nimi deiyo ngebo Raja tep upepu. “Yo, ne deiyo ngebo, ila eremna ngebo, tek sisi apepmanerem utopu kupkamne. Kandi ange peipmanerem ngeda, ‘Angeda mali,’ men peptene. Walito pepmanereme,” pepu. Upepu dingeda, Simeida, ue ware kuprap taru yuma ton, Yerusalem amutu neitamaipu maramu.

39 Ukupra dakuramupanen, keteng tamun weneri konum mapunge tep ake. Ada, Simeidi, ‘Ne ati pel melipra donkamneng,’ tenen, co bo deiki di kunupu neng buteneda, aneng butene ton, sepdaro Gat mutu berei. Ada nimi si Maakha, er mi nimi deiyo ngebo Raja Akhis, er damai berei. Akupreinge tep, Simei damai lap pepipa, aupu konum gekepu dingeda, ‘E, aneng dorbenkune,’ tenepu. 40 Utenepu dingeda, Simei adipu keledai bisam bali deiki bukra embana keca, er si pelana keteneipu dingeda, akeledai bisam bali deiki deipudi, ange deiki bukrapudi, nimi deiyo ngebo Raja Akhis, Gat mutu kuramngai beu. Ada, er melimna neng butene tep, ‘Aneng epnedi, tamupra doupra yankamne’ tenen, beu. Ukupudi, aneng konum epkopda, tamupra doupra yau.

41 Ataruda, Simei er kupmaunge yumada, yuk nimidi lap pepipa, Salomodi konum gekepu. 42 Gekepu dingeda, Salomodi, Simei kong pepupa, er damai yau pangeda, aupu pepu. “Men taruda, nedi kan tep, ‘Allah er si deiki di konum pepnerume. Ada, ‘Kanda Yerusalem mutu neitamai di tapra, yuk mutu men benkamrume,’ pemkesi. Tonda, nedi kan moupra tenena tep konum pemkesi. ‘Ukupmanto, Yerusalem mutu kandi tapra bememnyopda, kan adipapu konum depkamreme,’ pemkesi. Ada ange tep, kandi, ‘Allah si deiki di, tek sisi apepmaneremtopu, angeda kupkamne,’ peamnemume. Tonda, ‘Tek sisi nedi angeda men tapkamne. Walito angeda pepmanerema tep, ange melipkamne,’ peamnemumnge dano?

43 Dinin, ware keca deiyo tep, kandi, ‘Allah Yahweh si deiki di pepne. Angeda tek sisi kupkamne. Tonda, kan Raja ngebodi, peipmanerem upuda, angepu kupkamne,’ pepra, pedina upu deiki di, peiamnemum dinin, ukutaru aupuda yanipra tapmarem do? 44 Kan tek sisi konum kael kepmume. Ne nai bo er deiki mali kuamumnge yumada, kan dipru neitamai tupa tenerume. Ange tep, Allah Yahwehdi kan mali kuamumnge doprapkeredi, tamupra kan damai ikin keca deipkamkere.

45 Dinino, Allah er pining kecada, ne Raja Salomo damai karepnerepa, ne pio teleppu kunkamnere. Ukupneredi, ne nai erdi taleamu mutu cap, er taleamu nesala capda, Allah er ila puto deiki di, melipra taleprepa, pio teleppu kunkamrure. Allah Yahweh er damaipu pio akupepa, er dipapu pio kalengkamsere. 46 Aupu yuma konum pepu dingeda, nimi deiyo ngebo Raja Salomodi Benaya tep, “Angeda ukupkurume,” pepupa, Yoyada er mi Benaya adipapu beudi, Simei popupa depu. Ataru neitamai yumada, Salomo erdi amutu neitamai yuma talepra teleppu kuramu.