1Ki 20 | XteSC | STEP | Uda, Elisa adipapu amutu tapra, tamupra Elia er melimne ngebo tep, kikiman bereidi, apelpu dorbeu. Ataru neitamai dipu, Siria mutu talepra kuramu ngebo, Raja Benhadad erdi, er jen talena neng cap, tonda yuk mutu deiyo-deiyo neng cap, ada denge weik, tiga puluh dua (32) mutu Raja kepra taleami neng, sun yuma tapakrapidi, sun nimi porban taru bukra bana tep keca, er si kereta kuda cap, tonda akeca gipra bana tep, kuda bisam cap, ange yuma ketenepra deipidi, sun tonpa kikiman tenpai bulupra deipupa weki. Sun abulupra weki nengda, Benhadad erdi gonga kepupa, Israel tara ila deiyoi kota si, Samaria mutu kurami nesala tep, warekra popkoi atep, ketenepra deipi. Ataru dipu, kota Samaria tep, damai bena gonga kepra, mar bena popdanmai.

1 Kings 20

Siria mutu nesala porbei upu

1 Uda, Elisa adipapu amutu tapra, tamupra Elia er melimne ngebo tep, kikiman bereidi, apelpu dorbeu. Ataru neitamai dipu, Siria mutu talepra kuramu ngebo, Raja Benhadad erdi, er jen talena neng cap, tonda yuk mutu deiyo-deiyo neng cap, ada denge weik, tiga puluh dua (32) mutu Raja kepra taleami neng, sun yuma tapakrapidi, sun nimi porban taru bukra bana tep keca, er si kereta kuda cap, tonda akeca gipra bana tep, kuda bisam cap, ange yuma ketenepra deipidi, sun tonpa kikiman tenpai bulupra deipupa weki. Sun abulupra weki nengda, Benhadad erdi gonga kepupa, Israel tara ila deiyoi kota si, Samaria mutu kurami nesala tep, warekra popkoi atep, ketenepra deipi. Ataru dipu, kota Samaria tep, damai bena gonga kepra, mar bena popdanmai. 2 Ukupra kunmai taruda, Israel tara kurami nesala taleamu ngebo, Raja Ahabda, akati arum ila kota Samaria neitamai kunmau. Akunmaua cadi, Raja Benhadaddi, er nyapu ton wepra deipudi, ‘Ange perberume,’ pepra upu deipupa, anengdi aupu doupra, Israel tara taleamu ngebo Raja Ahab, er damai perbei. Sundi aperbei upuda ake.

3 “Raja Benhadaddi, kanda Raja Ahab tep, upepkere. Kandi talepra kumem keca yumada, nedipu dalupra dopropkamne. Ada, kandi talemem kunumna weik gat keca, perak cap, emas cap, tonda kan dopmum nerapu yuma cap, kandi deiamum nyapu, pio telep kunge nyapu yuma capda, nedi dalupra dopropkamne. Tenpunge peda, men tapkamarume. Ange yuma karepnememyapua. Nun deiyo ngebo Raja Benhadad, erdi apepker ngeda, akonuma,” pepra, er damai lap perbei.

4 Upepra perbei pangeda, Raja Ahabdi tamupra, aupu doupra perbenmai neng, sun tep upepra deipu, “Dyo, telepe. Sun deiyo ngebo Raja Benhadab tep, pepkurume. ‘Ukutaruda, kanda ne deiyo ngebo utopu kupmanerema tep, kan pepmarem keca yuma, nedi talepra kune kecada, karepkamakene.’ Upeipkere, perbenkurume,” peipupa, anengdi aupu doupra, tamupra perbei. 5 Aupu peipmaupa, peryanmai nengda, dakunmaiyanen, amenda taru kange di ton cap tamupra, Raja Ahab er damai yai. Ada, Raja Benhadad erdi yuk upu ton pepra deipupa, peryai. Ada, ake.

“Nun deiyo ngebo Raja Benhadad, erdi kan tep aupu ton pepkere. ‘Nedi kan tep, ‘Kandi talemem kunumna weik gat keca, perak cap, emas cap, tonda kan dopmum nerapu yuma cap, kandi deiamum nyapu, pio telep kunge nyapu yuma capda, nedi dalupra dopropkamna cadi, ange yumada, adipapu karepkunerume. Dinin, angepu gume.

6 Ambutumi dinin, aketeng utopu konum kupyopda, nedi ne amutara kunge deiyo-deiyo neng ton doroipnepa, kan damai Samaria mutu neitamai yangedi, kan kurem ati dam cap, kan talemem nesala yuma, sun kunung ati yuma capda, yan urupra tapmengedi, ‘Nun mambul keca ake,’ tenerum keca yumada, ne tara deiyo nengdi dalupra dopropkamenge. Ada, ambutumi nun ayana penmakep keteng utopu, keteng deikipu yankamape,’ pepra, deipmakere,” pepi. 7 Aupu pepipa, Raja Ahabdi konum gekepkopda, Israel tara kurami nesala tep, talepra kurami nimi deiyo neng yuma tep, upupupa yai pangeda, aupu pepu.

“Sunda, gekepso. Raja Benhadad, erdi nun Israel tara kunup nesala yuma tep, ‘Mali kupra deipkamane,’ tenepmaser ngeda, sundi kael kepkurume. Ada, ange bo erdi ne tep, ‘Angeda men tapkamanerume. Karepnapu kupkamnerume,’ pepra moropmaneu ngeda ake. ‘Kan talemem kunumna weik gat keca, perak cap, emas cap, tonda kan dopmum nerapu yuma cap, kandi deiamum nyapu telepnge yuma capda, karepnapu kupkamnerume,’ pepra moropneu ngeda men taptene. Nedi tamupra, ‘Dyo, ange yuma karepkamakene,’ pepmasi.” Raja Ahabdi er amutara nimi deiyo neng yuma tep pepu.

8 Upepupa, sun nimi deiyo neng yumadi tamupra upepi. “Nun deiyo ngebo Raja kandi, ‘Dyo, angeda karepkamakene,’ pepmaum ngepu, konum pepmamum dinin, ange bo erdi ton cap, ‘Ange ton tapakra karepnetue’ tenen, putaprepa pepkamaker upuda, ton cap gekena gume. Adipu gekeptapra kaukepkurume,” pepi. 9 Upepya tep nengeda, Raja Ahabdi, Raja Benhadad erdi doproipmaupa yanmai neng tep, upepu. “Sun tamupra bemumdi, ne deiyo ngebo utopunge, sun Raja ngebo tep, perbenkurume. Men taruda kandi upu pepra deipnemumpa, anengdi ne damai yan pepmaneng taruda, nedi kan tep karepkamkene. Angeda, ‘Dyo karepkamkene,’ peiamkesi. Dinino ataru di, ‘Ange karepkonerume. Sun ati-ati yuma wekmepedi, sun mambul keca cap, kunumna weik keca cap yumada, dalupra dopropkamepe,’ pepra, moropmanerem ngeda, ange men karepketenye. Upepmakere, perbenkurume,” peipupa, sun ayanmai neng yumada, tamupra bei. Benmanyane, anengpu kange di tamupra sun Raja ngebo Benhadad damai yaidi upepi.

10 Anengdi, Raja Benhadad damai bena, lap pepi pangeda, erdi tamupra pepu. “Nedi peipnepa, ne jen talena neng pio weik doroipnepa, Ahab kan talepra kumem mutu, Samaria mutu neitamai ati arum donge nge yumada, urupra sikke buktapkamange. Ukupmengepa, auruptapmenge ati arum yuma gum kupra deipmengepa, akati arum walangai di, sikke bute welepre ngeda, sun ajen talena neng buru deiki yarepa, meteka dipu doupra benkamenge. Ange pepmanada, pio tek sisi kupkamne ja. Ange men kupnyopda, ‘Ne si eremnun isok wenepra popnetenge’ tenen, sun tep pepne. ‘Sun isok-isok yumada, ne kupkamne keca moupra dinerempa, ‘Ukupkamne,’ peipne upu, tek sisi men kupnyopda, sundi adipapu poptapkamnerume,’ pepra moropsene,” Raja Benhadaddi pepu. Upepupa, er upu dopra perbana tep neng, gekepidi, Raja Ahab damai bena lap pepi.

11 Aupu lap pepipa, Israel tara taleamu ngebo, Raja Ahabdi tamupra sun aneng tep pepu. “Sun tamupra bemumdi, sun nai bo Raja Benhadad tep, bena pepkurume. Ada, ‘Telep ngeda, jen talen nengda, kapul mar podana tep, men benamenge taruda, ‘Nunda ange ton, ange ton konum kupmape,’ pepra, sal nong-nong kupra, tali upu penada gume. Ange walwal neng peramengtopu cadi, tek sisi telep ngeda, jen talena nengdi, konum mar popbangepa, yuk mutu neng tep, tek sisi konum bisbisa kapmengopda, ataru dipu, ‘Nunda ange-ange konum kupmape,’ peptenge,” pepu.

12 Raja Ahabdi pepmau upuda, anengdi lap perbenmang pangeda, Benhadad cap, er kayapu neng, sun yuk mutu Raja-Raja neng cap, sun tonpu tenda bol dodina ati wekmaidi, kange yawaramre yu me jenmayai taru di gekepi. Upu perban nengdi, aupu lap pepipa, gekepi dingeda, Raja Benhadad gekepudi, yu weik kupupa, erdi sun abulupra wekmai jen talena neng, sun gung yuk-yuk tep, deiyo kepra kurami neng tep upepu. “Akonuma, sun adipapu Samaria mutu warengbana tep, ketenepso! Adipapu, mar porbenkupe,” pepupa, sun aneng yuma adipapu ketenepi.

Raja Ahabdi, Raja Benhadab tep, popbisipka tep upu

13 Benhadad er jen talena neng ketenemai taruda, amenda kupkamu keca tep, Allah er upu peiprepa lap pena ngebo, nabi tenpu ataru dipu, Raja Ahab damai beudi upepu. “Allah Yahwehdi kan tep upepra deipkere.”

“Kandi dipetepo. Kan pona tep jen talen neng weik konum ketenepra deipmange ngeda epmarem do? ‘Angebo popkamepe’ tenen, keteneipmang dinino, atumida ne Allahdi, kan deiki puto karepkenepa, ajen talen neng yuma popra gawal dakureme. Aneng yuma doupra, kan amutara deipnedi, puto weik karepkenepa, kandi sun yuma popmemdi, bisbisa kapmemnyopda, adeiki di kandi ne Allah Yahweh, ne tep moupra kael kepkunereme.” Nabi ngebodi Ahab tep pepu.

14 Upepupa, Ahabdi tamupra asipetepu. “Allahdi ware kupkamarepa, nundi ajen talen neng yuma popbisiptepe do? Tonda, nimi porbana tep nengeda, ware ngebodi menmena mepra porbenkamar do? Nun tara nengdi do, sundi do?” pepra, Ahabdi anabi ngebo tep asipetepu. Asipetepupa, nabidi tamupra upepu. “Allah erdi peipmakerada, ‘Menmena bana tep nengeda, kan amutara, yuk-yuk mutu talengedi, sun jen talena deiyo neng cap, sun amutara tali jen neng capdi, mepra mar porbenkununge,’ peipmakere,” pepu.

Upepupa, Ahabdi ton cap tamupra asipetepu. Amar podarbanai banada, ware nengdi gonga kepmengedi, mar porbenkunung do? Nundipu menmena porbenkup do?” pepra asipetepu. Asipupa, anabidi tamupra upepu, ‘Ne deiyo ngebo Raja kan pedipapu deiyo kepmemdi, gonga keap, menmena taru, kan podan neng tep porbenkamrume,” pepu.

15 Aupu pepupa, Ahabdi gekepu dingeda, Raja Ahabdi er amutara, yuk-yuk mutu jen talena deiyo neng tep, “Adipapu melipkuneruma tep, keteneipkurume,” pepupa, sunda er amutara kuramidi, amutu neitamai dinin, mutu-mutu yuk-yuk taleami jen talena neng denge weika di, dua ratus tiga puluh dua (232) deiyo neng keteneipi. Upepupa ketenepi taru dipu, er Ahabdi, er pe Israel tara jen talena neng ton, denge weik tujuh ribu (7,000) ketenepra deipu.

16 Uda, atumi dipu dinin, keteng komuni neitama di, Raja Benhadad cap, er cap kange tenpu doupra, kikiman bulupra er tara wekmai neng, sun yuk-yuk mutu Raja-Raja neng tiga puluh dua (32) neng cap, sun yumada, sun opkal bol dodina tenda ati pumbon di, kange yawaramre yu me tupa jenmaiya deiki di kange yawarapmaupa, moupra tenena pio gum di, tali kange doupra kunmai. 17 Ataru dipu, Raja Ahab cap, er jen talena neng cap, er amutara yuk-yuk mutu jen talena neng cap, kota Samaria mutu tara di tapra, nimi gung yuk-yuk bokrapidi, tong gung mepra banmaiyanen, ton gungda, sun amnyo tara amenda banmaiyanen, sun podan neng tara banmai. Menmena mepra banmai gungda, banmaipanen, Raja Benhadad erdi, er tara jen talena kaber-baber neng tep, “Sunda nimi doktalepkamrume,” peipmaupa, er tenda ati bura tara kalekmai. Akalekmai nengdi, sun podan neng, Samaria tara di, poryakanmaipa, bisi neitamai epidi, sun anengdi sun deiyo ngebo, Raja Benhadad damai beidi, “Nun kunmap tamnada, ila gung tenpu ton, Samaria mutu di aca poryakanmange,” pepi.

18 Aupu gekepudi, Benhadad erdi upepu, “Nun podan jen talena neng yakanmangada, adipapu potamna gume. Ajen talena neng damai berumdi, potamna gum di, puto di tomopkurume. Nun pona tep, yakanmanga peda, telep ngeda, nun cap, sun cap, antapra upu sisikmepepa, ‘Telep kupra kikiman kunkamep’ tenen, yakanmang do? ‘Adipapu popdankupe’ tenen, yanmang do? ‘Ange do? Ange do?’ tenen, upu kikiman sisikmepya deiki di, kael kepkupe. Atep, adipapu anengda, pona gum di, gam kepmanpu tomopkurume,” pepu. 19 Upepu dinino, Raja Ahabdi wepra deipmau kaber neng, jen talena nengda, ila ati arum, kota Samaria mutu di banmai. Banmaipa, sun amenda tarada, Israel jen talena neng melipra banmai. Sun ajen talen neng yumadi, ‘Raja Benhadad cap, er tara neng yuma capda, adipapu puto di poptapkupe’ tenen, puto kange doupra banmai.

20 Ange tep nengeda, sun Israel tara jen talena neng banmai tara, sun podan jen nengda, Raja Benhadab tara neng, ortara di yakanmai ngeda, adipu puto di talepra poptapbanmai. Ukunmaipa, sun Siria ^{▼▼Siria - Siria tara sekmepu dinin, yuk Alkitab sengne nengdi amutu si tep, ‘Amari mutu’ seki. Dinino, amutu tenpua.} tara jen talena neng yumada, ange epidi, ‘Uo nun yuma poptapsengedi, gawal dakamseng’ tenen, kware weik kupupa, bura saka sepdaro banmai. Ukunmaipa, Israel jen talena neng amenda dombanmaidi, popbanapu kunmai. Ukunmai dinin, Siria mutu talena ila nimi deiyo ngebo, Raja Benhadad, erda men popi. Erda, adipu kurapra bendopu. Ada, er adipu kuda bisam bali deiki bukra beupa, er tara jen talen neng cap, yambula di sun kuda bisam bali deiki bukra bendopi. Raja Benhadad cap, melipidi, kuda bisam deiki bukra, sepdaro benmai nengda, nimi porbana tep, kereta kuda talena deiyo neng kurami. 21 Benhadad cap, er melimna neng yambula di ton cap, saka bendopi dinin, ataru Raja Ahab peda, mar podanmayai damaipu benmaudi, er cap melipra banmai jen talen nengdi, sun Siria tara mar podarbana tep, doupra ban keca, kereta perang cap, kuda bisam cap yumada, adipu poptapra gawal daki. Tonda, atumi dipu Siria mutu jen talena neng, pio weika di poprapidi, gawal daki.

22 Ataruda, ukupi dinin amendada, Allah upu peiprepa, lap pena ngebo, nabi adipu Raja Ahab damai yaudi upepu. “Telep ngeda, ukutaru kan aca di tapra, bememdi tamupra puto kemna cap, tonda nimi porbana tep keca yumada, keteneipkurume. Tonda, kan cap, kan tara neng capdi, ‘Ukupkamepe, ukupkamepe’ tenen, bena upu sisikrumudi, ketenepkamrume. Deiyoda, kandi, ‘E, Siria tara nengda, konum popbisipmana,’ tenena gume. Siria mutu taleamu nimi deiyo ngebodi, tamupra poryankamaker ja. Er cap, kan podan neng cap, kange di tamupra poryankamkenga tep, ketenepkamrume pepkene,” pepu.

Siria mutu taleamu ngebodi tamupra poryau upu

23 Menmena taru, Raja Ahab cap, er jen talen neng capdi, Raja Benhadad cap, er jen neng cap tep, konum popbisipipa, dakuramiyanen, amenda taruda, Benhadad er jen talena neng, gung yuk-yuk tep deiyo kepra taleami neng yaidi, upepi. “Naio, nun kangeda, ake. Israel tara nesalada, sundi si eremnung kecada, mutu dam tara kununge. Mutu dupai kwapu keca, si eremnunga cadi, sunda mutu deiki tara di yanmangudi, sun si eremnung keca puto deiki di, nunda yan popbisipmasenga dinin, ‘Ban mutu tara di podantepe teptoda, nundi kanam dipapu, sun yuma tep, popra sengpepropkamtepe,’ tenepmepe. 24 Dinino, amenda taru Israel tara nesala porbenkamep taruda, nun deiyo ngebo Raja, kandi tiga puluh dua (32) Raja yumada tapmemdi, kan jen neng gung yuk-yuk tep, deiyo neng kepra deipmum deiyo nengpu, wepra deipkuserume. Ada, ‘Sun Raja-Raja neng, sun yo punupra, jen talena deiyo nengpu, wepra deipkuserume’ tenen, moropkepe.

25 Ukupmemnyopda, nun nai Raja, kandi men taru kan nyapu weika di wepra deipmumtopu, kange di ton cap ukupkamserume. Tonda, kuda bisam cap, tu deiki bana tep, kudadi gipra bana keca, kereta perang cap, jen talena neng cap, uda, animi porbana tep keca yumada, weika di ketenepra deiamumpa, sun aneng banmaipa, Israel tara nengdi popbisiami neng, gung weik akwamutopu, kange di ton cap angetopu kupra weipmemdi keteneipkuserume. Ukupmemnya deiki di, ataru nunda ban tara di kepra bepidi, sun Israel nesala yumada, tek sisi bena popdapedi, bisbisa keipkamepe,” pepi. Upepipa, sun deiyo ngebo Raja Benhadad erdi, apepneng ngeda, ‘Telepe,’ tenepudi, er jen neng gung yuk-yuk tep, deiyo kepra kurami nengdi pepitopu kupu.

26 Dabena ukuramiyanen, keteng tamun tenpu ton gum kupkopda, nimi podana taru kepu pangeda, Raja Benhadad, erdi er jen talena neng dopra deipupa, ‘Israel tara nesala porbenkup’ tenen, Israel nesala Afek mutu ati arum dopra kuramyai, warengbana tep bei. 27 Ukupi taruda, Israel tara kurami nesala, sun jen talena neng peda, ‘Popdankup’ tenen, buluprapidi, ketenepi. Tonda, sun podan taru putapkamu keca cap, akeca doupra dekankameng neng cap, sun jenkamenge yuma capda, keteneipi. Konum keteneipi dingeda, Israel tara nesala, sun jen talena neng yumada, ‘Raja Benhadad cap, er tara neng cap tep porbenkup’ tenen, bisi banmai. Ataru dipu, sun Siria mutu jen talena neng yakanmaidi, ‘Acapu podankupe,’ tenepi ban mutu beidi, sun dodina tenda ati ben dopi.

Tonda, sun Israel tara nengda, bisi banmaiyanen, Siria tara neng bulupra wekmaiyai dam yai dingeda, dipetepi. Ataruda utenepi, ‘Uo, sun Siria mutu nesala, sun jen talena nengda, men nukmanto pio weik bulupmaiya cadi, sun dipapu amutu ban yumada, dinipmange. Dinino, nun Israel nesalada, nun gungda, yambulapu bulupra yakanmapa cadi, nunda kambing bisam gung butenepu yakaramre utopu kupra, keteneipmepe. Atep uo, nunda ware kuptepe do?’ tenepidi, mambul kange doupra, kware weik kunmai.

28 Ukupra tenenmai taruda, Allah er upu peiprepa, lap pena ngebo, nabi tenpu Raja Ahab damai yaudi yana upepu. “Allah Yahwehdi kan tep, peipmaker upuda ake. ‘Sun Siria mutu nesala dingeda, ne Allah tep nengeda, ‘Dakwapye, Israel nesala si eremnung Allahda, mutu dam tarapu talepka. Ban tarada, men talepu. Atep, er puto deiki di, sundi men bisbisa kapsetenge,’ pepi. Upepmanenga tep, sun Siria mutu jen talena nengda, pio weik ayana wekmang dinin, Israel nesala sun deiki, ne ila puto karepsenepa, sun amutu jen neng yuma poprap sengpepkamrume. Ukupmumdi, Ahab kan cap, kan talepmum nesala cap, sun yumadi, ne Allah Yahweh puto pio weik kunere ngeda, kael kepkamanerume,” pepu.

29 Uda, upepmaupa, sunda yoneitam bari tumi yumada, Israel jen neng cap, Siria mutu jen neng cap yumada, sun yuk-yuk dodina tenda ati dopra kuramya neitamaipu kuramidi, didanapu kuramidi, kalengdanapu kurami. Ukurami dinin, ue yoneitam tumida, mar podana gonga kepi. Agonga keap, podanmaiyanen, tenpu tumi neitamaida, Israel jen talena nengdi, Siria mutu jen nengda, pio weik seratus ribu (100,000) neng popi. 30 Ukupi dinin, ton tapi jen talena nengda, adipu sepdaro Afek mutu ati, arum domipa kwamngaida, ‘Akati neitamai wengbepedi inipkamep’ tenen, ortara sepra benmai. Dinino, amutu neitamai ati arum dopra kuramidi, akati dana-dana yuma, ila lyom gel beilya wipra ongopdongomi ngeda, dato-dato di dakra sakudi, Raja Benhadad, er jen neng dua puluh tujuh ribu (27,000) neng ton darapupa depi. Ukupu dinin, sun deiyo ngebo Raja Benhadadda, aca di taprapudi, tenpu ati pumbon neitamai sisa, bena wekra inipu.

31 Raja Benhadad cap, er jen talena neng, sun gung yuk-yuk tep, deiyo kepra kurami neng, yambulanun tupa gam kunmaidi, sun Raja tep upepi. “Yuk mutu neng dingeda upepsei. ‘Sun Israel mutu deiyo kepra talenung neng yuma tep nengeda, nimi yuk neng tep, bicau tenenung neng kemnunga pepseipa, gekepmupke. Atep nengeda, nun deiyo ngebo kandi, ‘Telepe,’ pepsetum pangeda, nun adipu mali kain karong kenekraptepedi, bisam turya utopu tapu ton, nun giso deiki gerekdongopra kepmepe dingeda, Israel tara nesala sun deiyo ngebo damai betepepa, erdi utenepkamsere. Ada, ‘Yo, sun aneng mali opkal kenekra peten kepmangdi, ne damai yanmangada, ne amutara kungepa, talepkamna tepa,’ tenepsetue. Tonda, “Ukuptepeya deiki di, nun deiyo ngebo, kan peda men popketu, gum daca,” pepra, bena moropi.

32 Upepra moropipa, sun deiyo ngebodi, “Dyo, angeda telepe,” pepu pangeda, sun aneng yuma, ‘Ukuptepe,’ pepmaitopu, mali kain sarong opkal cap, tapu giso deiki koudongomna cap keprapidi, Raja Ahab damai beidi bena upepi. “Nun Raja Benhadadda, nun deiyo ngebo kan amutara kuredi, kan pemem upu gekenkamkere. Atep nengeda, kandi er pona gume,” pepra moropi. Upepra moropipa, Raja Ahabdi tamupra pepu, “Ne kaboda tupa gam kunmar do?” pepra asipetepu.

33 Upepra asipetepupa, Benhadad er jen neng gung yuk-yuk tep deiyo kepra kurami nengdi aupu gekepidi utenepi, ‘Gume, Ahabdi telep upu pepkamsera tep, angeda asipmaserada petenkemna utopu kupsere. Erda telep tenepkamsere,’ tenepi. Anengda acapu wekmaidi, Ahab er upu pepkamaunge tep, gekenapu kunmai. Ukunmaipane, Ahabdi sun ayan wekmai neng tep, “Benhadad erda ne kabo gam kunmar do?” pepra asipupa, sun anengdi tamupra upepi. “Teka, erda kan kabo kurure,” pepi. Upepipa, Ahabdi tamupra pepu. “Atep, ne kabo Benhadadda, ne damai doupra yasyo,” pepu. Upepupa, adipu doupra er damai duyai pangeda, Ahabdi Raja Benhadab tep pepu. “Kanda ne kereta perang deiki welepra buko,” pepra napropu.

34 Upepu pangeda, Benhadaddi upepu, “Kao, ne nai bodi, kan nai bo talepra kuramu ati arumda, dalupra doroamunge yumada, nedi tamupra kan tepapu karepkamkene. Tonda, kandi nun tara neitamaida, ila ati arum er si kota Damasyik mutuda, kan kunumna deiyo keca duyamemdi, deipmemnyopda, ne tara nesaladi kunupkamenge. Angetopu, nun bung kecada, kan tara nesaladi, yana kunupmengedi, tamupra sun pe mutu dubankamenge. Ada, pumun taruda, ne nai bodi Samaria mutu kunumna deiyoi keamutopu kupkamreme,” pepu.

Upepupa Ahabdi tamupra pepu, “Kandi aupu pepnerema deiki di, konum pedina upu pepkunerema cadi, nedi kan men popkukene. Ange gum dinin, adipu kaukepkenepa, kanda tali lupra bankureme.” Upeprapudi, Raja Ahabdi, “Ukupkamrume, ange ton men kupkamrume. Nun buteneda, ukupkamneme,” pepra, pedina upu deiki di, aupu pepra deipupa, Raja Benhadad ton, ange utopu pedina upu pepra, peipka deiki di, upepkopda, Ahabdi Benhadad men popudi, adipu tapupa, er ati tamupra beu.

Allahdi peipnepa, er upu lap pena ngebo nabidi Ahab tep, “Kanda mali kupmareme,” pepu upu

35 Uda, sun yuma ukupra dakuramipanen, amenda taruda, sun nabi nengpu, aneitamai di tenpu ngebodi, er kabo yuk nabi ngebo tep, “Popra dila dopra deipkurume,” peipu. Upepupane, er kabo tenpu nabi ngebodi, “Gume, ne men popkukene,” pepu. 36 Upepupa menmena di, ‘Popkunerume,’ pepra upu peipu nabidi, er upu men gekepu nabi tep nengeda, “Kanda mali kupmareme. Allahdi pepra deipmar upuda, men gekepremdi, taprema cadi, kan aca di tamupra benkurem taruda, bisi neitamai di, pus kamo utopu keca, er si singa, ilangedi popkukere, men tapkukere,” pepu. Upepupa, angebo bisi banmau taruda, tek sisi anabi tep, er kabodi, “Singa pusdi popkukere,” pepra deiaputo, er tamupra bisi neitamai banmau taruda, adipu singadi popra tapu. 37 Ukupkopda, anabi-nabi neng epi dingeda, dakunmaiyanen, aupu pepmau nabida, adipapu yuk ngebo damai beudi, “Kandi ne popneo,” pepupa, adipapu popu. Er angeboda, puto di popupa, anabi ngebo er nong deikida, susu dilapu kupu.

38 Ange konum kupkopda, asusu dila kupmau nabi, er asuru deikida, kain sarong di koupdongopudi, nimi weik embarami bisi damai buku. Er asuru deiki, kain di koupdongopmaunge deiyoda, ‘Yuk nengdi ne asuru men eptengedi, men kael kepkamaneng’ tenen, kupu. Ukupu dingeda, ange bo adipu, Israel tara kurami nesala, sun deiyo ngebo Raja Ahab embenkamau bisi damaipu, bena bukmaudi dinmau. 39 Ukupra abukmaupane, Raja Ahab embau pangeda, anabidi Ahab er tep, upu puto di upepu.

“Ne deiyo ngebo Raja, neda mar podandam benmanupa, podanmapupanen, aneitamai di tenpu jen talena ngebo, erdi nun podan ngebo tenpu tomopra, ne damai duyana deipudi, ‘Kanda, ‘Angebo sepdaro berur’ tenen, moupra kalengkamarume. Moupra men kalekmamempa, angebo benmaryopda, kanda men tapkamne, popkamakene. Agum dingeda, kan wenemna tep, kunumna weik keca er si perak uangpu, er ikineda, tiga puluh empat (34) kilogram karepkamanerume,’ pepmaneu.”

40 “Upepmaneupa, nedi angebo kalekmanu dinin, yuk pel dadonudi mankau kange douapnu taru di, ne kalekmanu ngebo adipapu bura saka sepdaro benmaue,” pepu. Bisi damai bukmau nabidi, aupu pepu pangeda, Raja Ahabdi tamupra angebo tep upepu, “Kan pe ngebodi ikin keca kan pe nong deiki deipdanmamume. Atep nengeda, kan deikipu ikin yakerepa, doropkamarume. Deiyoda, kan deikipu kupkere,” pepu. 41 Upepu pangeda, anabida, kain sarong dopropudi, er asuru deiki koupdongopmau ngeda, lopra tapu upupupa, Raja Ahabdi, ‘Gume, angeboda, nabidi penmaneua’ tenen, pio moupra kael kepu.

42 Kael kepudi, ataruda, anabidi Raja Ahab tep upepu, “Allah Yahwehdi peipmaker ngeda ake. ‘Nedi kan tep angebo Raja Benhadadda, popkamarume,’ peipmakenu ngeboda, men popmamumdi, tapmamumpa, talipu lopra benmaue. Akupmamuma tep, angebo er yo pununa tep nengeda, kanpu depkamareme. Tonda, kan podan nesala, sun deiyo ngebo Raja pona gum di, tapmamumpa, benmaua deiki di, kan tara nengda, dadepkameng ja. Ada, Raja Benhadad er tara nesala popmatumpa, depmatenge dinin, kandi ne peipkesi upu yaniptapmumdi, Siria mutu taleamnga deiyo ngebo men popmuma cadi, ukutaruda, angebo er tara nesala pununa tep, kan tara nesala dadepkameng ja,” pepra, nabi ngebodi Raja Ahab tep pepu.

43 Upepkuopda, aRaja ngebo, Israel tara kurami nesala taleamu ngeboda, yu kupupa, dipru tulum deiki dipapu tamupra, er ila ati arum doramya deiyoi, ila pala mutuda, kota Samaria mutu tamupra beu.