1Ki 21 | XteSC | STEP | Samaria tara nimi deiyo ngebo Raja Ahab, er ila telep ati damai, yuk ngebo er si Nabot anggur wa peramu. Nabotda Yisreel mutu ngebo cadi, er anggur wa peda Yisreel mutu kuamu. Awada Raja Ahab er ila ati damai kuamu.

1 Kings 21

Ahabdi Nabot er anggur wa upula dopropu upu

1 Samaria tara nimi deiyo ngebo Raja Ahab, er ila telep ati damai, yuk ngebo er si Nabot anggur wa peramu. Nabotda Yisreel mutu ngebo cadi, er anggur wa peda Yisreel mutu kuamu. Awada Raja Ahab er ila ati damai kuamu. 2 Ukuamupa, nimi deiyo ngebo Ahabdi Nabot tep, “Kan anggur wada, ne nimi deiyo ngebo ati damai pepnemuma cadi, ne tenepmanada, kandi ‘Telepe,’ pepnetumtoda, nedi apepmum tuaida ne doropnedi, ‘Malilya wa pepkamne,’ tenenune. Ukupnedi kan wa tu pununa tep nengeda, ne anggur wa pepsipa, telep kupra bongorenge karepkamakene. Agum dingeda, atu kunumna kuretopu, co bopu kan moropmemtopu weika di karepkamakene,” pepra moropterepu.

3 Upepupane, Nabotdi tamupra nimi deiyo ngebo Ahab tep pepu. “Ne anggur wa pepsi mutuda, ne co puna nengdi taleami mutu tuai cadi, ne deiyo ngebo kan moropnerem ngeda, telepe men pepkukene. Nun nai Allah er si Yahweh, er kange peda, ‘Ange mali,’ tenerure,” pepu. 4 Ahabdi Nabot pepu upu konum gekepudi, ‘Ware keca deiyo tep angebo men jo pepner do?’ tenen, pio yu kupupa, adipapu tamupra er ati beu. Abeu taruda, pio tulum kange doupudi, pio jen jena gum di, Yisreel mutu ngebo Nabotdi pepmameunge tepapu tupa tenenmau. Ada, ‘Ne co puna neng taleami tu men kunupkurume, pepmanerenge tepa’ tenen, angepu pio tenepra, er mapmauaipu nakina bol doupra bukmau.

5 Ukunmaupa, adipapu er ner Isebel er nenge Ahab damai beudi, “Kanda ware keca tep nakina bol doupra, jen men jenmarem do?” pepra asipetepu. 6 Asipupa, er nenge Ahabdi, “Gume neda Nabotdi mali upu pepmanerpa kupmana,” pepu. “Ada nedi er tep upepsi. “Kan anggur wa nati damai pepmumnge tep, ne kunupkamne do? Agum dingeda, awa tu doropnedi, awa pununa tep, anggur wa pepsipa telep kupra bongorenge karepkamaken do?” pepra asipmanpane, erdi ton, ‘Gume ne wa men doproptume,’ pepra, telepe men pepmanera deiki di, ne mali kange doupmane,” pepu.

7 Upepu pangeda, er nerdi, “Kanda Israel nesala sun ila nimi deiyo ngebo Raja kuruma cadi, ukuna gume. Ware keca deiyo tep, mali kange doupra tali kunmarem do? Adipapu telep kupra kange doupmemdi, bukra jen jepo. Ada, ukupmempa, kan tupa tenenmarem ngeda, nedi kan putapmakertopu kupra deipkukene. Yisreel mutu ngebo Nabot, er anggur wa pepu ngeda, tek sisi nedi dopra kan karepkamakene,” pepu.

8 Upepu dingeda, Isebel adipapu er nenge Ahab, er si deiki di surat sekrapudi, nimi deiyo nengdi sekmanga tenena tep, peten kemne keca surat sekua deiki peten kepra, Nabot kuramu mutu dokotepu. Dokotepudi, apel-apel deiyo yuk-yuk talepra kurami neng cap, wisi neng cap, amutu nesala, “Ange kupkupa,” pepra, upu perami neng cap yuma tep, sun damai sekra karepu.

9 Asurat sekudi pepu upuda ake. “Sundi pepkurume. Amutu neitamaida, nun yuma, jen jena gum, bulungpu marapmepedi, ila tumi kepkamara tep, tenpuai bulupra wekurume. Upeprumupa, sun amutu nesala bulupmangedi, bukra dinkamangai pio jenekaipu, Nabotda dopra deipkamarume. Ada ila neng bungamengaipu bukamre.

10 Ukuprumupa, er bukmarya urasin tarada, mali neng butene ton melipra er damai deipmumpa bukamarenge. Amali neng butene di, ‘Nabot poptenge’ tenen, mok upu deiki, “Nabot, kandi Allah si deiki cap, amutu nimi deiyo ngebo Ahab si deiki cap, minina upu pepmumpa, gekepmupka tep nengeda, kanda popkamakepe,” pepra, mok upu penkamarenge.

Ukunmamumyanen, Nabotda sun deiya dinmamumyai di doupra, bura tara dubemum dingeda, gel bupdoupmarumu ngedi, bena dopra popmumpa, Nabotda depkamare,” pepra Isebeldi sekeipu. Asurat sekra dokotepupa, Nabot kuramu mutu deiyo neng yuma epi.

11 Isebel surat sekeipmautopu, Nabot kuramu mutu yuk-yuk talepra pel doramya deiyo neng cap, yuk ila deiyo neng capdi, “Ukupkupe,” pepra, upu perami neng cap yumadi, Isebel peipmau utopu kupi. 12 Ada, sun aneng yumadi, Yisreel mutu nesala tep, “Jen jena gum, jen bulungpu kunkamarume,” pepmaipa, jen jena gum, talipu kunmaidi, tenpuaipu bupra wekmai. Acapu Nabotda dopra anesala dinmaiyaipu, ila neng bungamyai yana deipmai.

13 Nabot yan deipmaiyaida, mali kuna neng butene ton dopra, er bukmauai urasin tara yan deipmai. Mok upu pena tep deipmai nengdi, “Nabotda, er pedi Allah si deiki cap, nun mutu ila nimi deiyo ngebo Raja si deiki cap tep, mali upu pepra wipdongopmarpa gekepmupke. Atep popkamape,” penmarei. Upenmareiyane, taprei pangeda, Nabot adeipmaiyai di dopra, bura tara dubeidi, gel doupmaiya di er nong deiki bena dopra popipa depu. 14 Nabot konum popi dingeda, Isebel tep, “Angebo Nabotda, gel doupmapua di, bena dopra popmepupa konum depmare,” pepra upu pedirbei.

15 Aupu Isebel konum gekepu dingeda, er nenge Ahab tep, “Nabotda konum depmare,” pepu. “Atep nengeda, ukutaru kan adipapu bukra bememdi, Yisreel mutu ngebo Nabot, er anggur wa kan ati damai peramu ngeda, kan tep ‘Co bo men kunupkunereme,’ peramkeu ngeda, bememdi kunumna gum talipu doropo. Angebo Nabotda, konum popmangpa depmare,” pepu. 16 Upepupa gekepudi, adipapu Ahab beudi, Nabot anggur wa peramu ngeda, ‘Dopropnedi ne pengepu kepkun’ tenen, Yisreel mutu beu.

17 Ukupua tep nengeda, Allah er si Yahwehdi er upu lap pena ngebo Elia, Tisbe mutu ngebo tep peipu. 18 Allah er si Yahwehdi Elia tep pepu upu ake.

Ukutaruda, kan adipapu Samaria mutu kuredi, Israel nesala taleramre ngebo Ahabda, er damai bena antapkamrerume. Ahabdi, ‘Nabot anggur wa peramu ngeda doropkaman’ tenen, Nabot wai dam yan kunmara cadi, er damai benkurume. 19 Konum bemem dingeda, Ahab tep upepkurume. “Allah er si Yahwehdi kan tep upepmakere. Ahab kan tep nengeda, Nabot popmamum dipapu, er anggur wa peramu ngeda, doropkuremada, mali kunmarempa, men epmaken do?” Kan Eliadi, Ahab tep ange pepkurume.

Upepmem dingeda, aupu ton pepkurume. “Ahabda, Allah er si Yahwehdi upepmakere. Sundi Nabot popmangupa, er yapi embenmauada, tali kamdi yana jepmangue. Aca dipapu, Ahab kan peda popkengepa, tali kam yangedi kan yapi peda jepropkamakenge. Allahdi upeipmakere. Upepra bena lap pepkurume.” Ada Allah er si Yahwehdi Elia tep, upepra aupu peipupa, doupra Ahab damai perbeu.

20 Elia adipapu Ahab kunmauai Nabot wai dam baupane, Ahab menmena di epmemeudi, upepu. “Kanda ne podan ngebo utopu tenekenune. Kanda ne songe. Dinino, ne tep enmanerem ngeda, konum epnereme,” pepu. Upepupane, Elia dingeda, “Tek sisi epyakandenkap konum epkene. Kandi apio mali keca kupmamumpa, Allah er si Yahwehdi, ‘Angeda ne songe, angeda pio mali,’ tenenmakere. Amali keca kupmaremnge tep, Allah er si Yahwehdi, ‘Ahab damai bememdi, nedi er wenemna tep kupkamne ngeda, lap perbenkurume,’ peipmanera tep, peryakene,” pepu.

21 Upepudi aupu ton dukdongopra pepu. “Allah er si Yahwehdi kan Ahab tep upeipmakere. Pio mali keca kupmarema tep, nedi ila kange mun kun keca kan deiki deipkamakene. Ada kandi deipmumpa dadeipdanen yakaramidi, akunge neng yuma, kan yala neng dinin, Israel tara neitamai kunge neng yumada popra gawal dakamne. Ada, sun pe kange dipu telep pel donung neng pe popra gawal dakamne. Tonda, yuk nengdi co bo deiki kunupmengedi, ikin pel dipmengepa, tali pelpu donung neng peda popra gawal dakamne. Aneng-aneng yuma, poptapnedi, pio gum kupra deipkamne. Ada, kandi deipmumpa, dadeipdanen yakaramidi, akunge neng peda, kan pe tara neng yumada, popra gawal dakamne,” pepu.

22 “Tonda Ahab, kan bung yumada, pumun taru Nebat er mi, Yerobeam, Israel nimi deiyo ngebo mali weik kuramupa, wenepra poamsitopu ^{▼▼Aupu dina tep 1 Raja-Raja pasal 14:10-11 dinkurume.} kupkamkene. Ange utopu, tonda pumun taru Ahia er mi Baesadi Israel taleramu taru pio mali kuramupa, er cap, er bung cap wenepra poamsitopu ^{▼▼Aupu dina tep, 1 Raja-Raja pasal 16:3-4 dinkurume.} kupkamkene. Autopu kan Ahab peda ukupkamkene. Ukupkamkena deiyoda, tali gume. Ahab kandi mali weik kumemya deiki di, ne nyapu Israel nesala, sunda kandi pio mali kuramum ngeda diramya tep, sun pedi angetopu mali kurami. Deiyoda kan tepa. Atep, ne ila yu kunerepa, wenepra popkamkene. Allahdi upepra deipmakerpa peryakene,” Eliadi Ahab tep pepu.

23 Upepudi aupu ton pepu. “Tonda kan ner Isebel tep nengeda, Allah er si Yahweh dingeda, ‘Isebelda Yisreel mutu ila lyom gel beilya wiamya damai di, aner popmengepa, er nongda, Yisreel mutu neitamai kunung kamdi jepkamenge,’ peipmamere. 24 Ange yuma tep nengeda, ware nesala do yuma, Ahab kan tamna nesala yumada, nimi ati arum, kota mutu neitamai depmenge ngeda, kamdi sun nong jepkamenge. Tonda yuk bura tara bena depmenge nengda, tali bura tara madi sun nong jepropkamenge. Nimidi telep kupra, tu palipra men peipkamenge. Allah er si Yahwehdi upeipmakere,” Eliadi Ahab tep pepu.

25 Uda, pumun taru di dipdongopra, neitamai taru cap, ukutaru cap yuma, mali pio weik kuramu ngeboda Ahab kuramu. Dinin yuk nengda yambul mali kurami. Allahdi, ‘Angebo kuramu ngeda ne pio songe,’ tenerur keca dinin, akecapu Ahabdi kuramnga tep upepmepe. Tonda, Ahab er ner Isebeldi, ‘Ukupkurume, ange kupkurume,’ peramnga deiki di, er upu gekeramudi, pio mali weik kuramu. 26 Ahabda mali pio weik kuramudi, isok si eremamu ngeda, sun Amori yala nesala isok si eremamitopu kuramu. Sun Amori yala nesalada, Allah er si Yahwehdi, Israel nesala Mesir mutu di doupra, Kanaan tara duyakaramu taruda, sun Amori yala nesala tep bena enepdokotepu.

27 Uda, Eliadi, Raja Ahab tep, Allahdi peipmau upu lap penmau taruda, ange yuma gekenmaupa, Eliadi konum peipu pangeda, Ahab gekepudi er opkal kepmaunge kwiripra tapudi, pio mali opkal dopra, er nong deiki kepdongopu. Ukupka deiyoda, ‘Ne konum mali kupsi,’ tenen, mambul kange doupra peten kepu. Ukupudi, mali kange doupra, jen jena gum di, jen bulungnapu kunmapu. Tonda atumi di gonga kepra, bisi embanmau taru peda, mali opkal dipapu kepdongopra, ‘Neda tek sisi pio mali kuramsi ngebo,’ tenen, kwar kunmaupapu, dipru boun kupra kunmau.

28 Pio ukupra kunmaupane, amenda taruda, Allah er si Yahweh epudi, Tisbe mutu ngebo, er upu lap pena ngebo nabi Elia damai yana upeipu. 29 “Elia kanda Ahab kunmare ngeda, konum epmarem do? Ne damai tep nengeda, Ahabdi ‘Neda pio mali kuramsi ngebo’ tenen, dipru eremna gum di, mambul kange doupra ne amutara kunmardi, dipru bounpu kunmare. Ukunmara cadi, neda er tep ‘Wenepra ila ikin keca deipkamane,’ tenepmasi ngeda, adipapu men karepkamemene. Ada er gam tupa kuramre taru gum dinin, erdi deipkamre midi Israel nesala talepkamre taru neitamaipuda, Ahab mali weik kuramunge tep, ila ikin keca er mi cap, er yala nengdi deipkameng nesala yuma cap, sun nong deiki di, ikin keca weik derinkamne,” Allahdi Elia tep pepu.