1Ki 22 | XteSC | STEP | Keteng tamun weneri neitamai yuma kurami taruda, Siria mutu nesala cap, Israel mutu nesala cap, sunda mar podana gum, talipu dimpepra kurami.

1 Kings 22

Allah er upu lap pena ngebo, nabi Mikadi Raja Ahab tep wenepu upu

1 Keteng tamun weneri neitamai yuma kurami taruda, Siria mutu nesala cap, Israel mutu nesala cap, sunda mar podana gum, talipu dimpepra kurami. 2 Dinino, keteng tamun weneringe mapi dingeda, Yehuda tara taleamu deiyo ngebo, er si Yosafatdi, ‘Israel tara neng sun deiyo ngebo Raja Ahab, er cap antapnemedi, upu talepkamnem’ tenen, er damai beu.

3 Yosafat kapul men benmau taru di, Israel tara neng sun deiyo ngebo Ahabdi, er amutara pel dorami neng tep pepu. “Sunda keal keprum do? Ramot Geleat mutuda, nun mutu cadi, Siria mutu talerur ila ngebodi Ramot Geleat mutu men di dalupra dopropseu ngeda, ware keca deiyo tep, ‘Dakwapye,’ tenen, talipu tapmepu do? Telep ngeda, nun pe nengpu amutu tamupra doropkamepe,” pepra upu peipu.

4 Uda, ange konum peipmaua cadi, Yehuda tara ila ngebo Yosafat adipapu Ahab damai beu pangeda, Israel tara ila ngebo Ahabdi asipu. “Yosafat, kanda ne Ahab cap nun tonpa Ramot Geleat mutu nesala porbenkunem do? ‘Ukupra porbenkun’ tenena tep, ne damai yarem do?” pepra asipetepu. Asipupa, Yosafatdi, Israel tara ila ngebo Ahab tep pepu. “Ae, tek pepreme. Nun butene cap, ne jen neng cap, kan jen neng cap, ne kuda bisam cap, kanye cap, ne tara neng cap, kan tara neng cap, nun yumada tenpu nesala utopu tenenuna cadi, kikiman benkupa tep yanmane,” pepu. 5 Upepu dinin, Yosafatdi aupu ton Ahab tep pepu. “Telep ngeda, menmena nun nai bo Allah er si Yahweh ton asipetepneme ja. Yahwehdi, ‘Telepe,’ pepsetuopda, telepe pua,” pepu.

6 Upepu pangeda, Israel mutu taleamu ngebo Ahabdi, Allah er upu pediramupa lap perami neng, sun nabi-nabi neng dengeda empat ratus neng yuma, ‘Bulupso,’ peipupa, bupra yai pangeda, asipetepu. “Telep pepkunerum do, gum do? Nedi Ramot Geleat mutu kunge nesala porbenkun do, gum do? Ange tep asipsene. Sundi pepneso,” pepu. Upepra asipupa, sun nabi neng yumadi, “Telepe porbenkurume. Ada nun nai bo Allah, akeca-keca yuma taleredi, er ila puto deiki melipkerya deiki di, sun aneng kunung mutuda, kandi popbisipra doropkamareme,” pepi.

7 Upepipane, Yosafatdi ton cap tamupra pepu. “Allahdi peserur upu lap pena deiyo neng, tenpu ngebo ton adamai akurepa, asipeteptepe do? Erdi ‘Telepe,’ peptuopda, telepe pua. Yuk neng ton akunmanga peda, nabi ngebo tenpu di ton, ‘Telepe,’ pepsetuopda, betepe,” pepra Ahab tep pepu.

8 Upepupa, Israel tara ila ngebo Ahabdi tamupra pepu. “Tenpu ngebo ton akunmare. Erdi nun nai bo Yahweh tep asipetepsetudi pepsetu ngebo akunmare. Dinino, erdi ne damaida tek sisi telep kupkamrenge ton, men penerure. Erda mali upupu pedinerure. Atep, angebo tep ngeda yu kunerure. Anabi er sida Mika akunmare. Angeboda ne songe. Ada Yimladi deipu ngebo akurure,” pepu. Aupu pepka tep, Yosafat gekepudi, “Uo ne kabo, ange utopu upu pena gume,” pepu. 9 Ange gekepudi, Ahab er amutara pel dorami neng tenpu ngebo tep, “Kan adipapu Yimladi deipu ngebo, nabi Mika pepmempa, sun tonpa yankurerume,” pepra deipupa, kai perbeu.

10 Angebodi Mika bena pepupa, yau taruda, sun nimi deiyo neng butene Ahab cap, Yosafat cap, nimi deiyo neng kemameng opkal, pio telepnge keprapreidi, sun ila neng bungameng keca deiki yuk-yuk bukmarei. Sun bukmareiaida, gandum wa perameng keca, er du wena cap, dorona cap tep lanmaiyai, ada Samaria mutu bana tep, bisi buplan damai bena bukmarei. Bukmareipa, Allah er upu lap pena neng weik yakanmaidi, sun deiyo neng bukmareiai, amenda kupkamu keca tep, upu perdiryakanmai.

11 Ataruda, Allahdi upu peiprepa lap pena neng, nabi-nabi akunmai dinin, tenpu nabi Kenana er mi Sedekiadi sapi bisam giso takke dan-dana belepmaunge urasin utopu, gatnge di betapra Ahab bukmaua damai doupra yaudi pepu. “Gume ne deiyo ngebo, kanda agat keca utopunge di doupra bememdi, Siria mutu nesala popra gawal dakmemdi, sun kunung mutu arapkamareme. Ada nun nai bo Allah er si Yahwehdi upepra deipmarpa konum pepkene. Angeda tali men pepkene. Nun nai bo Allah er si Yahwehdi peipmartopu pepkene,” pepu.

12 Uda, Sedekiadi upepupa, sun awekmai neng, Allah er upu lap pena neng, nabi-nabi neng yumadi, “Angeda tek pepmakere. Nun nai bo, kandi Ramot Geleat mutu kunung nesala yuma porbememdi, bisbisa kapkamreme. Sun kunung mutu peda arapkamareme. Ada tali gume, Allah er si Yahwehdi puto karepkerya deiki di kupkamareme,” penmai.

13 Upenmai ngeda, sun akati wekmai nesala yumadi gekenmai. Ataruda, Allah er upu lap pena ngebo Mika tep, diman perbenmau ngebodi, ton cap Mika tep pepu. “Naio, kan kayapu sun yuk nabi neng yumada, utotopu penmange. Sun yumadi, ‘Ahab tek sisi Ramot Geleat mutu nesala popbisipkamreme,’ penmanga cadi, kandi ton atelep upu utopu bena pepkamarume. Yuk upu pena gume. Kandi angepu pepmempa, sun ila deiyo neng sun kange telep kupkamare. Upu kandi ton bena pepkurema tep pepkene,” pepu.

14 Upepra deipu dinin, sun butene kapul men yarei taruda, Mikadi er upu kai doupra benmau ngebo tep pepu. “Neda yuknge ton men pepkune. Allah er si Yahwehda, pio gam kuna deiyo ngebo tek sisi kurure. Atep, Yahweh erdi peipkuner upupu, tek sisi angepu, bena pepkuna,” pepu.

15 Nabi Mika konum pepupa, sun butene tamupra Ahab bukmaua damai berei pangeda, Israel nesala sun deiyo ngebodi, asipu. “Mikaho, wareto do? Ne cap, Yosafat cap, nun butene di Ramot Geleat mutu porbenkamanem ngeda, telep pepsemempa, porbenkunem do, gum pepmempa, tapkamnem do?” pepu. Upepupane, Mikadi tamupra pepu. “Porbana pua, ne deiyo ngebo kan tep Allahdi ‘Telepe dakupkamare,’ tenepmakera tep nengeda, kandi Ramot Geleat mutu neng popmemdi, sun kunung mutu peda doropkamareme. Allah er si Yahwehdi melipkerya deiki sun aneng popbisipkamreme,” pepu.

16 Upepupane, Ahab Israel nesala sun deiyo ngebodi tamupra Mika tep pepu. “Tek sisi Allah Yahweh, er si deiki dingeda, pio tek sisingepu penkamnerume. Ware kuprap taru yumada, nedi kan tep, ‘Tek upupu penkamnerume,’ pepra ange konum pepkesi do? Tali ngeda men penkamnerume,” pepu. 17 Upepka tep, nabi Mikadi tamupra pepu. “Ne dinmasipa Israel nesala, sun jen nengda, domba bisam pein ngebo gum tep, kungedi, tali-tali mutu yuk-yuk embarameng utopu kunmaipa, epsi. Ada nun nai bo Allah er si Yahwehdi upepneu. ‘Ukutaruda, Israel nesala sun ila deiyo ngebo gum kupmara cadi, sun tali kange doupra, sun pe mutu tamupra yuk-yuk benkamenge.’ Yahwehdi upeipneu,” Mikadi pepu.

18 Ahab aupu konum gekepu dingeda, Yosafat tep pepu. “Adano, ne konum pepmakeneu. Mika dingeda, pio ataru-ataru yuma, erdi ne damaida telep upu ton men penerure. Mali upupu penerura cadi, ataru peda mali upupu pepnere,” pepu. 19 Aupu pepupa, Mikadi tamupra pepu. “Tek sisi pepmakene. Atep nengeda, Allah er si Yahwehdi peipkere upu gekeprume. Akeca-keca yuma talerur ngebo Yahweh, er bungnai bukmaupa, er pel don neng jen talen malaikat wekra er tebalal tara cap, er dumsisi tara cap tekmanguai, bukmaupa, epsi,” pepu.

20 Ange epsipa, Yahwehdi aupu pepu. “Ware ngebodi upu peipmamer pangeda, Ahabdi, ‘Ramot Geleat mutu nesala porbenkaman’ tenen, banmarepa, anengdi er tep popkamang do?” pepu. Upepupa, abulupmai jen talen malaikatdi, bon ton, bon ton yuk, ‘Ange kupkup do? Ange kupkup do?’ pepra, upu yuk-yuk penmai.

21 Upenmai pangeda, malaikat tenpu ngebodi jenek kupra, Allah er si Yahweh damai yan tekudi pepu. “Nedi Ahab er dipru tamuna tep, ‘Ukupkamarume,’ perbenkamne. Ukupnyopda, ne pepkamantopu kupkamare,” pepu. 22 Upepupa, Yahwehdi amalaikat tep asipu. “Ware kupkamarema deiki di, er dipru tamopkamre do?” pepu. Upepupa, amalaikatdi pepu. “Angeda, nedi Ahab damai upu pedinkamang neng nabi-nabi tep, sun dipru neitamai mok upu bena pepnepa, gekepmengedi, amok upupu Ahab tep bena pedinkamenge,” pepu.

Amalaikatdi upepupa, Allah er si Yahwehdi tamupra, aisok tep upepu. “Ange bena peipmempa, anabi nengdi Ahab tep amok upu pepmenge pangeda, tek sisi gekepra Ahab dipru tamupkamre. Atep, adipapu ukupkamreme,” pepra Allahdi aisok tep pepu. Mikadi pepu. Uda, ange epunge yumada, Mikadi Ahab tep pepu.

23 Eliadi aupu pepu dingeda, aupu ton dukdongopra pepu. “Aupu penmainge yuma gekepsa tep, sun nabi-nabi neng yumadi, yan penmakeng upuda, mok upu dipu pekenunge. Ada tali tep gume. Allahdi peipupa, er malaikatdi, mok upu doupra sun nabi-nabi neng damai peipupa, sun anengdi kan damai yana mok upu penmange. Ada Allahdi tenepmaretopu kunmange. Atep nengeda, ne deiyo ngebo, kanda tek sisi ila kange mun keca doropkamreme. Yahwehdi konum tenepmakertopu kupkamkere,” Mikadi Ahab tep pepu.

24 Mikadi aupu pepu pangeda, Kenanadi deipu ngebo, nabi Sedekiadi aupu gekepudi adipapu tekra, nabi Mika katum yan bongopu. Ukuprapudi, “Allah er si Yahwehdi dokotepu malaikatda, ne damai yan peipneudi, ne deiki di gopra, kan damai bana tep, dan bisi benmaudi peipkeu do?” pepra asipetepu. 25 Ukupupa, Mikadi Sedekia tep pepu. “Kanda ‘Malaikatdi tek sisi upu peipmaneue,’ tenepmarem dinin, mok upu pena malaikatdi yan peipmakeue. Atep, kan peipmamem ngeda kunupkamaker do? Angeda ortaru kupkamarnge dipapu kael kepkamareme. Ortaruda, kan kware kupkerepa, bulung ati neitamai inipkamrem tumi dipu kael kepkamrem ja,” Mikadi pepu.

26 Upepupa, ange ila nimi deiyo ngebo Ahab gekepudi, er nyapu tep, “Adipapu Mika tomopra nimi si Amon damai dubenkurume. Ada akati arum yuma talepra upu bongna deiyo ngebo Amon cap, tonda neda amutu ila deiyo ngebo ne mi Yoas cap, sun damai dubenkurume,” pepupa tomopi. 27 Aupu pepudi, aupu ton dukdongopra pepu. “Sun aneng damai dubemumpa, wenemna ati konum deiprengopda, telep jen keca yala-yala yuma men karenkamenge. Er tep nengeda, tali roti cap, me cap, angepu karenkamenge.

Yambul-yambulpu kareramrengepane, neda Ramot Geleat mutu bena amutu neng tep popnedi, telep dipapu tamupra yanyopda, angebo tapkamne. Atep nengeda, ne Raja Ahabdi konum pepra deipne. Atep sundi, Amon cap, Yoas cap sun damai perbenkamarume,” pepra deipupa, ‘Mika dubena perbenkup’ tenen, keteneipi.

28 Nabi Mika tomopi taruda, upu tenpu ton Ahab tep pepu. “Ne deiyo ngebo kan men popkengedi tapungepa telep dipapu tamupra yamemnyopda, sun yumadi kael kepkamrume. Ada ‘Allah er si Yahwehdi Mika damai peamemeua gume,’ tenepkamnerume. Dinino, men tamupra yamemnyopda, ‘Uo, tek sisi Allah dipapu peiamemeua’ tenen, kael kepkamnerume. Atep, aupu pepman ngeda, sun agekenmarum nesala yuma moupra tenepmumdi dinapu kunkamrume. Ne pepman upuda tek kupkamre ja,” Mikadi pepu.

Raja Ahabda Ramot Geleat mutu popi upu

29 Ahab Israel tara neng sun deiyo ngebo cap, Yosafat Yehuda tara nesala sun deiyo ngebo cap, adipapu sun butene Ramot Geleat mutu kurami nesala porberei. 30 Porbankurei dingeda, Ahabdi Yosafat tep pepu. “Gume neda jen talena neng sisi utopu kupra, nimi porbenkune cadi, nimi deiyo neng kemamenge pio telep opkalda men kepkune. Dinino, kan tep ngeda Yosafat, kanda nimi deiyo neng kemamenge telep opkal kepkurume,” pepu. Konum upepka tep, Israel nesala sun deiyo ngebo Raja Ahabda ‘Yuk nengdi, men kael kepkamneng’ tenen, jen neng sisa kemameng opkalpu kepra, nimi porbeu.

31 Ukupu taruda, Siria tara nesala taleamnga deiyo ngebodi, er jen deiyo kepra jen neng yuma taleami neng sun dengeda, tiga puluh dua neng kurami. Tonda, sun anengda nimi porbenkun taru tep, kuda bisam gipra tu deiki embaramu keca, er si kereta kuda yuma ketenepra taleamidi barami. Ukuamya tep, sun ila nimi deiyo ngebodi sun tep, mambul upu pepra deipu. Ada, sun porbankurumu taruda, ila neng pe, mambul gum neng peda, yuk-yuk neng tep men tenenkamrume. Sunda, ‘Israel tara nesala talerura deiyo ngebo, Raja Ahabpu dombena popkurume,’ pepra deipu.

32 Upepra konum deipu pangeda, sun jen deiyo neng cap, sun nyapu jen neng cap, sun tonpa adipapu bei. Ukupidi Yosafat epidi, er tep nengeda, ‘E adano. Ila neng kemameng opkal, pio telep opkal kenekmare ngeboda, Israel nesala sun ila deiyo ngebo akunmare,’ tenepi. Ukupra tenepya cadi, ‘Erpu popkup’ tenen, er kunmauai dombeidi, bena wareki. Ukupipa, Yosafatdi, “Neda Israel nesala sun ila deiyo ngebo guma,” pepra ngoloku. 33 Ngoloku ngeda, sun abena warekmai jen talen neng peda, ajen neng sun ila deiyo neng peda, adipapu kael kepidi, ada ‘Teka erda Israel nesala sun deiyo ngebo guma cadi, men porbenkupe,’ tenen, yapropidi er tep men dombanmai.

34 Yosafat tapi dinin, Siria mutu jen ngebo tenpu di, ‘Israel tara neng, sun deiyo ngebo Ahab ake,’ tenena gum dipapu, tali mangkau kange doupra, ‘Ahabda abanmare,’ tenena gum dipapu, mar tali doptapupa, adipapu Ahab banmauaipu dourbeudi, Ahabda podankunge taru kemameng gat opkal kepmaudi bamaupane, go kapmauai bena maraipu. Ada yambul go kupmauai neitamai maraipu. Ukupupa, er keledai gipra tu deiki embanmau keca bukmauai di, er melimna ngebo tep upepu. “Uo, ne konum marapnenge. Atep nengeda, amutu podanmanga cadi amutu tapra, yuk tali tara benkuneme,” pepu.

35 Upepupane, men bura saka beretenge. Pio mar podanmaiya damai benmarei atep, atumi neitamai yuma tupa Siria tara neng kunmaiyai apu kunmarei. Acapu kunmareipane, pio mar di marapmaipa, dila dopmauai di yapi embanmau. Embanmaudi keledai bisam gipra tu deiki barameng keca deiki bukmaua cadi, yapi mokon deipmau. Ukupmaua cadi, er nongda adipapu atumi idona taru depu. 36 Israel tara neng, sun deiyo ngebo konum depu pangeda, asintara dipapu er nyapu Israel jen neng yuma tep nengeda upepdai. “Adipapu bura saka, nun pe mutu ati kunupaipu yuk-yuk bendopkamepe. Nun pe mutupu tamupra yuk-yuk bendopkamepe,” pepra upu karepdai.

37 Ange tep nengeda, sun deiyo ngebo Ahabda konum popmaipa depka tep, ‘Er nongda Samaria mutu peipkamape,’ tenepidi, nimidi er nong dopra, Samaria mutu tamupra dubena peipi. 38 Ahab popmaipa, bukmau kuda bisam kereta deiki, er yapi sakmaudi palepmau ngeda, Samaria mutu yambul mokon damai di me kupi. Er yapi me kunmai mokonda, co bo karepnedi tali-tali nyangami nerapu me gengamyai di me kupi. Tonda kereta keledai deiki palepmau yapida, me kupmaipa, tu deiki embanmau ngeda, tali kamdi ton lulakra jepi. Angeda, Allah er si Yahwehdi peramutopu kupi.

39 Ahabdi Israel nesala taleamu taru neitamai kuramu keca yumada, yuk nengdi sun Israel nesala ila nimi deiyo neng tep, nungna buku deiki konum seki. Ada er pel doramunge cap, er ila deiyo ngebo ati dopunge cap, akati neitamai ila bisam er si gaja, er beleramre si dopra petuprapidi, akati dela deiki deipinge cap, tonda ‘Yu nengdi yan popkusenge taru nun ati dam men wekamsenge’ tenen, ila lyom beilya ati arum yuma ongopgenepra wiamunge cap, ange-ange yuma abuku neitamai konum seki. 40 Ahab konum depupa, er apu yapu peiamyaipu peipi. Ukupipa, er pununa tep nengeda, er mi Ahasiadi Israel nesala sun deiyo ngebo kepu.

Yehuda tara nesala, sun ila deiyo ngebo er si Yosafat tep upu

41 Israel nesala sun ila nimi deiyo ngebo Ahabdi, sun tara taleamupa, keteng tamun dumbari konum kupu taruda, Asa er mi Yosafatdi, Yehuda tara nesala sun deiyo ngebo gonga kepra talepu. 42 Yosafat er kupbaramu taruda, tiga puluh lima tahun konum kupu pangeda, gonga kepra Yehuda tara talepudi, er kuramu mutuda, Yerusalem mutu kuramu. Yerusalem mutu kuramudi, Yehuda tara nesala sun ila deiyo ngebo keamudi, keteng tamun dua puluh lima tahun deiki di anesala talepra kuramu. Yosafat, er nin sida, Asoba. Anerda, er nai bo sida Sili kuramu.

43 Yosafat kuramu taru yumada, er peda er nai bo Asa kuramutopu kuramu. Ada er nai bodi kuramutopu, Allah er si Yahwehdi, ‘Ange telepe,’ teneramudi peiamu ngeda, angepu talepra kuramu. Malinge pio men kuramu. Dinino, sun Yehuda tara nesaladi, mutu deiki bena gam keca popra, ^{▼▼Gam keca popi – Sun Israel nesaladi mutu deiki benamidi, Allah er gispal dona tep, gam keca popra karerami ngeda, mali kurami. Deiyoda ake. Ton ngeda, sun pumun taru Kanaan tara kurami nesala, Allah teka tenena gum nesaladi isok si eremna tep, amutu-amutu deiki welerbaramidi, isok si eremami. Atep, Allahdi, sun Israel nesala tep, ‘Yuk nesaladi isok si eremamengaida, ne si eremna cap, ne tep karena capda, acada pio meme. Ne si deipkamne atipu, akati bena ne si erepra, gam keca popra karenkamnerume,’ pepra deipu. Atep nengeda, yuk mutu neng, teka tenena gum nengdi, isok si eremamyaida, Israel nesaladi amutu deiki weleramidi, Allah tep karerami ngeda, mali weik kurami.} Allah tep karerbaramyai yumada, tupa akamo. Angeda, Yosafatdi, men uruptapu cadi, anesala tupa mutu deiki bena gam keca popra karerbaramidi, Allah er gispal dona tep, nintong telep keca uku dongoramidi mororami. 44 Yosafatdi, Yehuda tara taleamu taru neitamaida, Israel nesala cap, sun deiyo ngebo Ahab capda, men podaramrei. Sun upu tonpa sisingdoramya cadi, ataruda Yehuda tara neng cap, Israel tara neng cap, tali kange doupra, telep kupra kikiman kurami.

45 Yosafatdi Yudea tara taleramu taru neitamai kuramu keca yumada, mambul buku neitamai konum sekra deiami. Ada, sun Yudea tara nimi deiyo neng, Raja neng kepra talepyakaraminge yuma tep, mambul nungna buku neitamai sekra deiamya utopu, Yosafatdi kuramunge cap, er jen talena neng cap, er cap, yuk mutu neng tep mar porbaraminge cap, tonda Yosafatdi yuk ila pel doramunge cap, ange-ange yumada, Yehuda tara ila nimi deiyo nengdi kurami keca, mambul buku neitamaipu sengaminge, akupmare.

46 Yosafatdi kuramunge ton akupmare. Ada, er nai bo Asadi telep kupra kuramu dinin, tenpu mali keca ton men uruptamnga cadi, Yosafatdi er nai bo tep punupu taruda, amali keca tupa kuramu. Ada, ton nengda isok si eremamya cadi, isok si eremna ati pumbon kurami mali neng ton, Asa men popra gawal daku. Anengda, nimi dinin, yuk nimi dipu co bo kareramidi tali-tali nyangdarami. Akurami ngeda pio mali weik kurami dinin, Yosafat er nai bodi Raja Asa kuramu taru ange men gum kupra deiamu.

Atep, Yosafatdi er nai bo yo punupu taruda, sun amali kupra nyangdarami neng yuma gum kupra deiamu. Ukuamupa, Yehuda tara neitamai ton mali men kurami. 47 Ataruda Edom mutu kurami nesala neitamaida, sun nimi deiyo ngebo ton men taleamu. Ukuamupa, nimi deiyo ngebo er amutara pel dona ngebo utopu ngebodi, ke taru tep sun upu bongdina deiyo ngebo keprapudi, Edom mutu taleamu dinin, tek sisi angeboda Raja men kuramu.

48 Tonda, Yosafatdi peiamupa, er pel don nengdi ila laut mokon deiki embaramu keca, er si kapal laut ton ketenepra dorami. Akapal weik doramidi, bung keca kipra Ofir mutu bengedi, ‘Ila kunumna weik keca, gat keca er si emas, dopropkameng’ tenen, ketenepra dopra deiami dinin, tek sisi Ofir mutu men benami. Deiyoda, Yosafatdi mali kupka cadi, Allahdi peipu pangeda, mutu si Esion Geber mutuda, nimidi akapal laut yuma uruptapi. Atep, akapal yumada, laut mokon deiki tek sisi men benami.

49 Ataruda Ahab er mi Ahasiadi Yosafat tep pepu. “Kandi, ‘Telepe,’ pepnemempa, ne nyapu doproipnepa, kan nyapu cap tonpa kan mokon deiki umpena kapal laut dipapu kikiman benkamenge,” pepra moropu. Ukupupane, Yosafatdi ‘Ne songe,’ tenepudi, “Yo,” men pepupa, kikiman men embarami. 50 Uda, sun dakuramyane, Yosafat depu. Depupa, er co puna neng peiramyaipu, tonda er apu bo pumun taru nimi deiyo ngebo, Raja Daud domudi kuramu mutu neitamaipu, Yosafat peda amutupu bena peipi. Yosafat konum depu pangeda, er pununa tep nengeda, er mi Yoramdi Yehuda mutu nesala sun deiyo ngebo kemna tep, Raja Yehuda tara kepu.

Ahasiadi, Israel nesala ila nimi deiyo ngebo Raja kupka tep upu

51 Yosafatdi Yehuda tara nesala taleamnganen, keteng tamun tujuh belas tahun konum kupu pangeda, atahun neitamaida, Ahab er mi Ahasiadi atarupu Israel yala nesala kurami tara talepra, nimi deiyo ngebo kemna tep Raja Israel kepu. Ukupudi, Samaria mutu kuramudi Israel tara taleamu. Ahasiadi, keteng tamun butene deiki dipu Israel nesala taleamu.

52 Ahasiadi, Israel tara taleamu dinin, Allah er si Yahwehdi, ‘Ukunkamrume,’ pepra deiamu ngeda, men taleamudi, Allahdi, ‘Angeda mali,’ teneramungepu, pio weika di kuramu. Ada, Ahasia er nai bo cap, er nin cap, tonda Nebat er mi Yerobeam cap, pio mali kuramingepu, Ahasia peda amali pelpu talepra doramudi mali weik kuramu. Angebo Yerobeamdi mali weik kuramutopu, aneng yumadi, mali weik kuramipane, Israel nesaladi ange yuma epra kael keamidi, sun peda mali weik kurami.

53 Ahasiadi isok si, Bahal sipu talepra eremamudi, akeca tepapu gudiramu. Angeda er nai bo Ahab peda ukuramnga deiki di, Israel nesala yuma ila mali kurami. Ange utopu Ahasia peda kuramu. Ange tep nengeda, Israel nesala kalekra meliamu Allah, er si Yahwehdi, Ahab tep yu weik teneramutopu, Ahasia peda mali weik kuramu pangeda, Allah er si Yahwehdi, er tep yu weik teneramu.