1Ki 3 | XteSC | STEP | Israel nesala sun ila deiyo ngebo, Raja Salomodi Mesir nesala sun deiyo ngebo Firaun tep upu pepu. Ada, Nun mutu neng cap, kan mutu neng cap, ‘Podana gum dipapu, kikiman telep kupra kunkamepe’ tenen, upu sisikrei. Tonda, ‘Kange deipra telep kunkamep’ tenen, Salomodi, Firaun er ner mi dopu. Doupudi er nai Raja Daud taleamu mutu, Yerusalem mutu duyau. Sunda amutu kuramreiyanen, er Salomodi peipupa, er amutara nesala, er ila nimi deiyo ngebo ati cap, Allah Yahweh er si eremna ati cap, tonda Yerusalem mutu dana-dana tara ila lyom gel beilya wipdongopinge cap yumada, pel dopbaramyanen gawal daki.

1 Kings 3

‘Ila kael kemna deiyo keca karepnetum’ tenen, Salomodi Allah tep moropu upu

1 Israel nesala sun ila deiyo ngebo, Raja Salomodi Mesir nesala sun deiyo ngebo Firaun tep upu pepu.

Ada, Nun mutu neng cap, kan mutu neng cap, ‘Podana gum dipapu, kikiman telep kupra kunkamepe’ tenen, upu sisikrei. Tonda, ‘Kange deipra telep kunkamep’ tenen, Salomodi, Firaun er ner mi dopu. Doupudi er nai Raja Daud taleamu mutu, Yerusalem mutu duyau. Sunda amutu kuramreiyanen, er Salomodi peipupa, er amutara nesala, er ila nimi deiyo ngebo ati cap, Allah Yahweh er si eremna ati cap, tonda Yerusalem mutu dana-dana tara ila lyom gel beilya wipdongopinge cap yumada, pel dopbaramyanen gawal daki.

2 Uda, Allah Yahweh, er si eremna ati donmai dinin, kapul men gawal daki taruda, Israel nesala yumadi, Allah er si eremna tep, mutu buma deiki domi ati welerbaramidi, gam keca popra uku dongorbaramidi, akeca karerami. Ada, Allah er si eremna ati kapul men dopya tep, tali mutu deiki welerbaramidi ukurami. ^{▼▼mutu buma deiki welepi Anengda, ‘Allah er si eremna tep, gam keca popmepedi, er tep karenkamepe’ tenen, mutu gon deiki akati domidi welepra Allah tep karerbarami dinin, pumun taruda, Allahdi, “Ukuna meme. Angeda men kunkamrume. Nedi, ‘Ace pua,’ pepsene mutupu, ne si deipkamne mutupu bena ne gispal dona tep, karen keca karenkamnerumdi, ne si eremkamnerume. Yukai pio meme,” konum peiamu. Atep nengeda, sundi akati-akati tupa welepra embarami ngeda, mali weik kurami.} 3 Salomoda er nai bo Daud damai Allah er si Yahwehdi ‘Ukunkamrume,’ peamupa Dauddi kuramutopu, er mi Salomo peda ukuramudi, aupu talepra dombaramu dinin, tenpu keca ton kuramu. Ada, er peda Allah er si eremna tep, mutu deiki welerbaramudi, yapi keca karerbaramu. Tonda, acapuda Allah gispal dona tep, nintong telep keca uku dongorbaramu. Ada yuk-yuk taliyaida welerbena kareramu.

4 Ataruda amutu kurami nengdi, ‘Allah tep karenkamepaida, pio mambul cadi, Gibeon mutu deikipu bena karenkamepe,’ tenerami. Atep nengeda, Raja Salomo peda, ‘Allah gispal dona tep, yapi keca karerbenkun’ tenen, Gibeon mutupu welerbaramu. Gibeon mutu deiki, pala gel taplakra yakeipya deiki di, yapi keca yumada, er nong denge weika di seribu popra uku dongoramudi, Allah tep karerbaramu. 5 Ukuramnga tep, tenpu lukunda neitamaida, Salomo ken mapupa Allah er si Yahwehdi, Gibeon mutu deiki jenek kepupa, Salomo epu. Ataruda, Allahdi, “Kan tenememnge pepmempa, tek sisi karepkamkene,” pepu.

6 Upepupa, Salomodi, “Ne nai Allah, kandi ne nai bo Raja Daud tep bicau teneramumdi, telep kupra meliamumpa, kan amutara kuramu. Ne nai tep meliamuma deiyoda, Dauddi er damai peramum upupu talepra pel doramu. Tenpunge peda men tamamu. Tonda er dipruaida, dumsisipu kuramudi, kandi, ‘Ange telepe,’ teneramum ngeda, er dipapu kuramu. Men di ne nai Daud telep kupra meliamuma utopu, ukutaru peda, ne er mi tep tupa melimnerume. Kan meliamuma deiki di, ne nai bo Raja bungna keca deiki bungamutopu, ne peda akeca deiki bungnedi, Israel nesala yuma talenune. Ne nai bo doramu pelpu talepra donune,” pepu.

7 Upepudi aupu ton dukdongopra pepu. “Ne nai Allah, kan si Yahweh kurume. Kandi meliamsemuma deiki di, ne nai bo Israel nesala taleamu utopu, ne peda Israel neng talepra sun Raja kunune. Dinino, naio, kandi melipneo. Neda kaber dipapu sun deiyo ngebo kepsi. Atep nengeda, ‘Ware kupra pel doptene do?’ tenen, pio walwal kupnere. Ange tep nengeda, kandi melipnerume.

8 Neda kan amutara pel don ngebo kunune. Tonda kandi wepra deiamum nesala, men nukmanto pio weike kununga kan-kan talenune. 9 Atep naio, kandi kael kemna deiyo keca karepnemempa, ne dipruai weknetuopda, kan weamum nesala tep, ‘Sun kurumu ngeda, mali ngeda ake, telep ngeda ake,’ tenepra, peptenya. Apepmaken ngeda, tali tep men pepne. Ware ngebodi, telep kupra kan weamum nesala taleptudi deiyo ngebo kuptu do? Ne pedipapu men kuptene,” Salomodi Allah tep pepu.

10 Salomodi upepra amoropunge tep, Allahda, akeca-keca yuma talepra, ila puto weik kure ngebodi, ‘Pio telep pepmare,’ tenepu. 11 Utenepu dingeda, Allahdi Salomo tep pepu. “Kandi ne tep, tali keca men moropmanereme. Ukupmantoda, ‘Naio kandi melipnemempa, gam pio kutene. Tonda, akeca-keca weika di karepnetumpa, ila isomka ngebo kutene. Tonda, kandi melipnetumpa, ne podan neng yuma deptenge,’ pepra men moropmanereme. Ange gum dinin, kandi, ‘Kange tenena dumsisingepu karepnetumpa, nedi kan weamum nesala tep, telep kupra sun upu bokeiptenedi, sun Raja telep ngebo kunkamne’ tenen, moropmanereme.

12 Atep nengeda, kan moropmarem utopu karepkamkene. Nedi ila kael kemna deiyo keca cap, tonda ‘Telepnge ace, malinge ace,’ tenena deiyo keca cap karepkamkene. Ukupkenepa kan pel donkamrem ngeda, pio telep kupkamre. Amenda taru kunkameng nengda, kan pel donkamrema utopu men dopkamenge. Tonda, pumun taru kurami neng peda, kan utopu men kurami. Kanda pio telep kupra pel donkamrema tepa.

13 Tonda, angepu gum dinin, kandi men moropmanerem ngeda, ange peda karenkamkene. Ada, akeca-keca kunumna weik keca karenkamkene. Tonda, nimi yumadi, kan tep gispal donkamkenge. Ukupnyopda, kan gam kunkamrem taru neitamaida, yuk Raja neng ton kunkameng dinin, kan utopu telep nengda pio men kunkamenge. Pio tek sisi telep ngeboda, kan pua,” Allahdi Salomo tep pepu.

14 Upepudi aupu ton pepu. “Kan nai bo Daud kuramutopu kan peda kunkamrume. Ada, nedi, ‘Angeda kunkamrume, angeda ton men kunkamrume,’ pepra deiamsi upupu talepra pel dopyakaramutopu, kan peda ukunkamrume. Kan peda apelpu domem pangeda, nedi melipkenepa, kan gam kuna tep go weika di ton cap karepkamkene,” Allahdi Salomo tep pepu.

15 Upepupa, ataru dipu Salomo bukroudi, ‘E ange yumada, ken mapmanua deiki di epmanue,’ tenepudi kael kepu. Kael kepudi, ka tamupra Yerusalem mutu beu. Beuopda, Allahda, ^{▼▼Allah – Akayat neitamaida, Ibrani upu deiki di, Allah er si tep, ‘Adonay’ pepra seki. Aupu deiyoda ake. ‘Allahda akeca-keca yuma taleredi, ila puto weik ngebo kurure!’ tenena tep pepi.} akeca-keca yuma taleredi, er ila puto weik deiki di, ‘Ukunkamrume, angeda men kunkamrume,’ peiamupa, sekidi dopra dongorami co bekin, er sida Peti Perjanjian damai tengbeudi, Allah tep gispal dopu. Ada, ‘Allah cap, ne cap, telep kupra kikiman kunkamnem’ tenen, telep keca dopra Allah tep karepu. Tonda, Allah er si eremna tep, gam keca poprapudi, uku dongopu. Ange yuma konum kupra sengpepkopda, er amutara pel dorami neng tep, ila kailya kalepra karepu.

Nerapu butene Salomo damai asimyareipa, ila kael kemna deiki di pepu upu

16 Amenda taruda, nimidi tali nyangtamami nerapu butene Salomo damai yareidi, er urasin tara tekrei. 17 Anerapu Salomo dam yareidi, tenpu nerdi yan pepu. “Naio, nunda tenpu ati kunum nerapu dinin, ne ka nerda akwapupapu, neda sal mi deipmanue. 18 Ne mi deipmanu taruda, ue butene tumi ton konum kupu pangeda, ne ka ner er sal mi ton deipu. Ami deipu taruda, akatida nimi cap, yuk nerapu cap, ton men kunmapu. Nun pe yukpu kunmanemu.

19 Ukunmanemu dinin, tenpu tumi ton anyapu yuk-yuk iripra mapmanemuai di, aner mangkau di er mi er nong deiki mapmaupa, aner er mi ton depmau. 20 Ukupmau pangeda, lukunda dipapu ami depmau. Ne mida tupa mapmanumu taruda, anerdi adepmau mida ne moum damai deipmaneudi, ne mi gam kunmanu mida, upula doropmaudi, er moum damaipu deipmau. 21 Ukupmaneupa ne lukunda bukra ne mi ‘Moum karepkun’ tenen, dindenkapneudi, ‘Uo ne mi konum depmanere,’ tenepmanue. Utenepmanu dinino, adepmau mida ne mi kamo utopu mi gume. Berekudi, dirin kupu taruda betapra dipetepsidi, ‘Amida ne mi sisa guma,’ tenen, kael kepsi,” pepra, tenpu nerdi yan pepu.

22 Upepupa, er ka nerdi pepu. “Gume, tupa gam kunmar mida, ne mi pua. Konum depmau mida kandi deipmum mi adano,” pepu. Upepupnen, menmena yan pepmau nerdi pepu, “Gume, konum depmau mida, kan deipmaum mi dinin, gam tupa kunmar mida, ada ne mi sisa pua,” pepu. Upepdareidi, Raja Salomo, sun upu bongdina ila deiyo ngebo damai tep, sun butene yu upu deiki di yalyala pedanmarei. Yalyala pepdareidi, kwemdamarei.

23 Upedanmreipa, sun ila deiyo ngebo Salomodi upepu. Ton nerdi, “Gume, tupa gam kunmar mida, ne mi sisa pua. Konum depmau mida, ne ka ner mi deipmau adano,” pepmaue. Upepmaupane, er ka nerdi, “Gume, konum depmau mida, kandi deipmaum mi, dinin, gam tupa kunmar mida, ada ne mi sisa pua,” pedanmarei. 24 Atep nengeda, Raja Salomodi er pel don neng tep, “Nimi pon ya doupra yankurume,” pepupa duyai. 25 Upepupa doupra yai pangeda, erdi pepu. “Agam tupa kunmar mi dopra, ami popmumdi, er nong neitamai di tekra deipkurume. Ukupmemdi, ton ner dana tara karepkurume. Ton ner ton dana tara karepkurume,” pepu.

26 Upepupa gekeprei dingeda, gam tupa kunmau mi, er nin sisa di ami tep, bicau tenepudi, Raja Salomo tep pepu. “Uo, naio ami pona gume. Kaukepsemempa, ne ka ner dipu dakipkamsere. Er tep karepkurume,” pepu. Upepu dinino, ton ner dingeda, “Gume dapoptapo! Nun butene nerapu cadi, tenpu nerpu men douptue. Atep ami tekromempa, dapopmenge,” pepu. 27 Upepka tep nengeda, Raja Salomodi tamupra pepu. “Ukuda konum katuai kupsere. Upepmara tep nengeda, ami pona gume. Menmena upu pepmaneu nerda ami er nin sisa cadi, ami dopra anerpu karepso. Er ninda tek sisi penmara adano,” pepu.

28 Ange ukupunge tep, nimidi penmaipane, Israel nesala gekepidi utenepi. ‘Uo, nun Raja Salomo kupmar ngeda, er dipapu men tenepu. Nun nai Allahdi ila kael kemna deiyo keca karepupa, adeiki Salomodi, ‘Tek sisi telep kunada ake, dumsisi ngeda ake,’ konum tenepudi, anerapu butene tep, upu telep kupra bokeipmare,’ tenen, kael kepi. Ukupra teneramidi, ‘Uo nun Raja Salomoda pio mambul ngebo,’ teneramidi kwar kuramu.