1 Kings 4

Israel nesala talena tep, Salomodi nimi deiyo neng kepra deiamunge tep, pepu upu

1Salomoda, Israel mutu neitamai kurami nesala yuma tep, ila nimi deiyo ngebo Raja konum kepudi, amutu cap, anesala cap taleamu. 2Israel mutu taleamu taruda, Raja Salomodi er amutara kuramidi, pel yala yuk-yuk, er cap melipnedi, nimi deiyo kepra talena tep, wepra deiamu neng, sun sida ake. Allah karena tep pel don neng, sun deiyo ngeboda, nimi si Zadokdi deipu mi, er si Azarya erepra deipupa, apel talepra kuramu. 3Amutu neitamai si sengna pel dona tep deiyo nengda, tenpu ngebo er si Sisiadi deiamu neng ada, Elihoref cap, Ahia cap, wepra deipupa, apel talepra kuramrei. Tonda, amutu neitamai co bo derinai nungna cap, kalengna cap tep, deiyo keipu ngeboda, Ahilut er mi Yosafat erepra deipupa, apel talepra kuramu. 4Tonda, amutu neitamai jen talena neng, sun ila deiyo ngeboda, nimi si Benaya, er mi Yoyada erepra deipupa, apel talepra kuramu. Tonda, Allah karena tep pel doramrei nengda, sun butene Zadok cap, Abiatar cap, erepra deipupa, apel talepra kuramrei.

5Tonda, amutu neitamai nimi deiyo kepra, nesala weik tep, sun upu bongdina ngeboda, Natan er mi Azarya erepra deipupa, apel talepra kuramu. Tonda, nimi deiyo ngebo Raja tep, ‘Telepe kuptepe ngeda, dan nge do?’ tenen, upu sisingna deiyo ngeboda, Natan er mi Zabud erepra deipu. Tonda, angebopu imam pel ton talepra pel doramu. 6Utopu amutu neitamai nimi deiyo ngebo Raja, er kuramu ati cap, er bung keca yuma tep kalengna deiyo ngeboda, Ahisar erepra deipupa, apel talepra kuramu. Tonda, ‘Sun anengda, nun ikin pel tali donkamseng’ tenen, kunumami neng, apel dona deiyo kepra, nimi pel dimne ngeboda, Abda er mi Adoniram, erepra deipupa, apel talepra kuramu.

7Raja Salomodi, Israel mutu neitamai yuk-yuk dinin, nimi deiyo kemne neng, Bupati-Bupati utopu deiyo nengda, dua belas (12) neng wepra deipupa, apel talepra kurami. Sun aneng pel donada, amutu neitamai yuma di, jen keca yala-yala yuma bulupra, ila nimi deiyo ngebo Raja cap, tonda er kuramu ati neitamai pel dopra kurami nesala cap, er nyapsilip sisa cap, sun jepra kuna tep ketenemdina neng wepra deipu. Awepra deipu Bupati-Bupati utopu neng yumada, keteng tamun neitamai war 12 akuretopu, aketeng tamun yuma neitamaida, tenpu war tenpu ngeda, tenpu bupatidi, “Jen keca bulupra duyakankamnerume,” pemutopu, sun yuk-yuk, awar-awar yuma, ton ngebo duyanmana, ton warda ton ngebo duyanmana kemami.

8Sun adua belas (12) Bupati wepra deipu neng, ayuma deiyo kepra talepupa, anengda, er amutara kunkamya tep nengeda, nimi deiyo neng kuna tep, Bupati utopunge wepra deipu. Sun adua belas Bupati neng, sun si cap, sundi taleami mutu si capda ake. Nimi si Ben-Hurda, Efraim mutu dam tarada taleamu. 9Ton ngebo er si Ben-Dekerda, Makas mutu cap, Saalbim mutu cap, Bet-Semes mutu cap, Elon-Bet-Hanan mutu cap, aweneri mutu taleamu.

10Ton ngebo er si Ben-Hesetda, ati dumda Arubot cap, Sokho mutu cap, Hefer mutu cap, taleamu. 11Ton ngebo er si Ben-Aminadabda, mutu si Dor mutu taleamu. Angeboda, Salomo er ner mi Tafat domu. Angebodi Dor mutu yuma taleamu. 12Tonda, nimi si Ahilud er mi Baanada, erdi Taanakh mutu cap, Megido mutu cap, Bet-Sean mutu cap yumada, taleamu. Beth-Sean mutuda, Sartan mutu damai dinin, Yizreel mutu di dipra, selatan tara cap, adi dipra mutu si Abel-Mehola cap, amutu di dipra, ortara mutu ati arum cap, Yokmeam mutu ati arum cap, domyai bena dipdongomu mutu taleamu. 13Tonda, mutu si Ben-Geber ada, Gilead mutu tamna dinin, Ramot mutu ati arum cap taleamu. Angebodi, nimi si Manasye yala deiyo ngebo, er mi Yairdi doramu ati arum ton taleamu. Akati arum yumada, Gilead tara kuramu. Tonda, angebopu Argob mutu tamna dinin, Basan mutu neitamai yumada, ila ati arumda, enam puluh (60) kota dorami. Aneitamai doramidi, dana-dana tara ongopgenepra domi ila lyom gel beilyada wirami. Abeilya bisi buplan wengbanaida, perunggu cap dipapu, kepdongopra puto kepra deipnedi dorami.

14Nimi si Ido er mi Aminadabda, Mahanaim mutu tara taleamu. 15Nimi si Ahimaas er domu nerda, ada Salomo er ner mi Basemat domu. Er angebodi, Naftali yala nesala sun mutu taleamu. 16Nimi si Husai er mi Baanada, Asyer yala nesala sun mutu cap, tonda Bealot mutu di, ati arum dorami nesala taleamu. 17Tonda, Peruah er mi Yosafatdi, Isakar yala nesala sun mutu taleamu. 18Nimi si Ela er mi Simeada, Benyamin yala nesala sun mutu taleamu. 19Nimi si ton Uri, er mi Geberda, Gilead yala nesala sun mutu taleamu. Amutu men taruda, Amori nesala tep taleamu deiyo ngebo Raja Sihondi, Amori mutu taleamu. Utopu, amutu neitamai peda, Basan mutu nesala taleamu deiyo ngebo Raja Ogdi taleamu mutu, Geberdi ange yuma taleamu.

Salomo er pel donai weike kepu upu

20Ataruda Yehuda yala neng cap, Israel nesala cap dengeda, pio weike me alamne kuramre gel wenenga utopu kurami. Sun yuma jen keca cap me cap jeramidi telep kangepu doupra kurami. 21Ukupu dingeda, Salomodi Efrat me duman di dipdongopra, Filistin neng mutu cap, yuma talepra benamkamnga Mesir neng mutu wilimdonai peda bena tapu. Ukupu pangeda, sundi maton don keca karerameng utopu ukupidi “Kan dipapu talepkamsereme,” pepi.

22Salomo er gam kuramu taru, Yehuda mutu neitamai kurami nesala cap, Israel mutu neitamai di dipdongopra Bersyeba mutu neitamai kurami nesala yumadi, er jen keca putapne pangeda, tenpu tumida denge pio weik tiga puluh (30) kwaneng dapkamana tep dongopra pingin keca, er sida tepung pio telepnge cap, utopu keca kwaneng gapkamre taru, yangderin keca pumbon donopra pingirameng keca, er si tepung, enam puluh (60) doupra duyakarami.

23Ange utopu, domba bisam meta telepngepu sepuluh (10) cap, tonda nimidi peirameng keca dua puluh (20) cap, seratus (100) domba bisam cap yumada, sun anesala yumadi doupra, Salomo er damaipu doupra yakarami. Dinin, nimidi bukra embanung keca kijang cap, rusa bisam cap, gel uang, logam pio moupra peiraminge yuma, Salomo er damai doupra yakarami ngeda, men nuki. 24Ange tep nengeda, Efrat me atara mutu yumada, Tifsa mutu di dipdongopra, Gasa mutu cap atara Efrat me neitamai kunge nesala yumada, er dipapu amutu yuma er dipapu talepkamoa tep, karertamna keca er deiki deiptapu.

25Ton ngeda, Yehuda yala nesala cap Israel nesala cap amutu neitamai dimpepra kuramidi, Salomo tupa kuramu taruda, Dan yala neng cap, Bersyeba mutu yumada, anggur tapu cap, Arah co cap, amutara yuk-yuk kurami. 26Ataru neitamaida, Salomo er jen talen nengda, denge weik dua belas ribu kurami. Tonda, jen talen neng, sun kuda deiki bukrap embana tep beilya, dengeda pio weike empat puluh ribu (40.000) beilya wiami.

27Tumi-tumi yuma ila nimi deiyo ngebo Raja Salomo, er jen keca tep war tenpu deiki yumada nimi deiyo kepra kuna neng bupati capdi, er jen doupra kareryakarami. Ada nimi deiyo ngebo Raja Salomo, er jen dapra deipnepa, bukra jeramu co lase deiki kikiman wekra jerami neng sun jen tep doupkareryakarami. Ukupra kareryakarami taru yumada, yuk yala keca yuma pio men sungtalerami.

28Salomo er amutara neng sun Bupati yumadi gandum cap, gandum sekra deriramipa koluramunge capda, ‘Salomodi peiramu keca, bisam jenkamre’ tenen, doupra duyakarami. Ada Salomo er bukra emban kuda bisam cap, mar podan taru bukra emban kuda bisam, sun jen tep doupra kareryakarami. Sundi doupra kareryakaramipa, akeca peina tep, yuk-yuk talepra aperamnetopu, karerbarami. 29Ataru neitamai yuma, Allahdi Salomo tep, kael kemna deiyo keca cap, ‘Angeda ace,’ tenepbana deiyo keca cap, puto di kael kepbana capda, pio weika di karepupa, kael kepbaramu.

30Salomoda keteng yakan tara kurami neng cap, Mesir mutu kurami neng cap, sun kael keamitopu gume. Erda kael kemna deiyo kecada, ila di kael keamu. 31Salomo erda tek sisi ila kael ngebo kuramu dinin, Maol er nyapu Etan, Ezrahi mutu kuramu ngebo cap, Heman, Kalkol, Darda sun ayumada, Salomo utopu gume, dinin Salomo ila kael kepka deiki, sun amutu nesala yumadi, Salomo sipu kael keami. 32Raja Salomodi ukupmanto upu dengeda, seribu (1.000) upu peramu utopu, tonda seribu lima (1.005) mut ton peramu.

33Ukupu dingeda, koun keca cap, co cap tep, ada Libanon mutu neramre wapum co cap, beilya gel neitamai di paramre mutmuta er sida hisop cap, tonda, ma cap, bisam cap, tonda mekin kunge keca cap, douai kure keca yuma cap tep, pepu. 34Ange tep ngeda mutu-mutu yuma kunge nesaladi, “Salomoda kael kemna deiyo kecada, ila di nimi men kael kepmantonge kael kemrure,” pepipa, ban-ban yuma dakurami nimi deiyo Raja neng gekepidi, sundi nimi doproipipa, Salomo kundam gekeryai.