1Ki 5 | XteSC | STEP | Uda Tirus mutu taleamu ngebo Raja Hiramda tupa-tupa Raja Daud cap kange deipdanamreiya tep, yuk nengdi, “Raja Daud er yo pununada er mi Salomopu tekmare,” pepipa gekepudi, Raja Hiramdi er melimna neng dopra deipupa, Salomo damai perbei. Beidi, “Nun nai Hiramdi, kanda Raja kepkamarema tep nengeda, ‘Telepe,’ peipkere,” pepra perbei.

1 Kings 5

Allah er si eremna ati dona tep, Raja Salomodi akeca-keca yuma keteneipu upu

1 Uda Tirus mutu taleamu ngebo Raja Hiramda tupa-tupa Raja Daud cap kange deipdanamreiya tep, yuk nengdi, “Raja Daud er yo pununada er mi Salomopu tekmare,” pepipa gekepudi, Raja Hiramdi er melimna neng dopra deipupa, Salomo damai perbei. Beidi, “Nun nai Hiramdi, kanda Raja kepkamarema tep nengeda, ‘Telepe,’ peipkere,” pepra perbei. 2 Ka tamupra Salomo damai yai pangeda Salomodi er kabo Hiram tep tamupra upu peipu.

3 “Kandi kael kepmume. Ne nai bo Daud nimi deiyo ngebo Raja kuramu taruda, ‘Allah Yahweh, er si eremna tep ati doptene,’ teneramu dinin, men dopmanto kuramu. Deiyoda, dana-dana tara nesaladi, ‘Israel nesala popbisipkamepe,’ teneramidi, Daud damai poryakanapu kuramya tep, ne nai akati men doamu. ‘Amenda taru, Allah er si Yahweh, er melipnerya deiki di, ne podan neng yuma tep, nedi popbisipnepa, ne amutara konum kupmengopda, akati dopkamne ja,’ teneramu.

4 Uteneramu dinino, ukutaruda ne Salomodi pepkene, er si eremnun Allah, er si Yahwehdi meliamneua deiki di, konuma. Mutu-mutu yuma kunge nesaladi, nun ton men poryakasenunge. Ukutaruda, nun cap podaramepu neng men kununge. Ukutaruda, ikin weik keca cap, yuk kange mun keca cap ton men kupmasere. Tali kange deipra kunupe.

5 Ange tep nengeda, Allahdi ne nai bo Daud tep konum pepra deiamutopu kupkamne. Allah er si Yahwehdi Raja Daud tep peramu. “Kan mi tenpu ngeboda, kan pununa tep, wepra deipnedi Raja tekeipkamne. Kan mi tekredi Israel nesala talenkamre taru neitamaida, acapu ne si eremna ati dopkamnere pemu.” Allahdi ne nai bo Daud tep upepka cadi, ukutaru nedi tenepmanada, ne nai Allah Yahweh, er si eremna ati dopkamne.

6 Ange tep ngeda ne kabo Hiram, kandi peipmempa, kan mutu nengdi, ila lyom gat co er sida aras co, Libanon mutu neitamai di kwepmengedi doupra yana, apel donkamenge. Ataruda, ne mutu neng cap, kan mutu neng cap kikiman pel donkamenge. Pel donkamenge nge tep, sun menenga keca karenkamne. Kandi, ‘Ukupra karena telepe,’ pepmemnyapu karenkamne. Ne kabo kan kaele, kan mutu neng sun Sidonia tara nengda, co kwemna ila kael neng kununge. Ne mutu neng yambula dipu kael keami dinin, Sidon nengpuda, ila kael neng kununge. Atep, ‘Anengdi melipkamneng’ tenen, moropkene.” Raja Salomodi upepra, asurat sekra Raja Hiram damai dokotepu.

7 Dokotepupa, Raja Hiram asurat epu dingeda, kange deipudi upepu, “Allah er si Yahweh, men di kuramu ngebo Raja Daud tep, ila kael mi konum karepupa, amutu-amutu yuma cap, Israel nesala yuma cap, telep kupra talenkamre. Ila kael kepredi kunkamre. Atep nengeda, nun nai Allah tep, ‘Telepe’ penkamepe,” pepu. 8 Upepra kange deipka cadi, Hiramdi surat sekra Raja Salomo damai dokotepu. Asurat deiki pepu upuda ake.

“Ne kabo Raja Salomo, kandi dokotepmanerem upuda konum epra kael kepmane. Kandi moropnemumtopu melipkamkene. Ada, gat co lyomnge, er sida sanobar co cap, tonda lyom co er sida aras co cap, kwepra keteneipkamkepe.

9 Nedi peipnepa, ne nyapudi Libanon mutu welepmengedi aco kwepra doupmengedi, kwereryakankamenge. Kwerepmengedi ila laut mokon pirman tara duyakankamenge. Ukupmengepa, aco kikiman deipmepedi, tapu di koupdongopmepyopda, laut mokon deiki deipmepepa, amokon deiki dubana tep, kandi pepkamseremaipu aco gipra derirbenkamepe. Derirbepe dingeda, tapu loptapmepedi, aco yuk-yuk lelepra deipmepyopda, kan tara nengdi aco dopra dubenkamenge. Tonda, nedi moropkuken kecada, gekepra melimkamnereme. Ada, ne Raja deiyo ngebo kununa cadi, nati kunge nesala yuma tep, sun jen keca ketenepra karenkamserume. Akonum pepkene,” pepu. Upepudi, surat sekra Raja Salomo damai dokotepu.

10 Uda, Raja Hiram apel doramnga deiki di, Salomo putaramutopu, ila lyom gat co, aras co cap, sanobar co cap, weika di toupra kareramu. 11 Kareamupane, Salomodi er kabo Hiram tep, jen keca er si gandum pio weika di kareramu. Ada, Hiram er ati kunge nesala sun jen keca tep, empat ribu empat ratus kilo (4.400 kilo) en keca er sida gandum kipra kareramu. Tonda, yuk keca ton tapakra kareramu. Ada, zaitun co du taikra purupipa, minyak mokon keteneipu ngeda 440 liter kareramu. Tonda, Raja Salomodi akeca-keca kareramutopu, aketeng tamun, aketeng tamun yuma, Hiram tep pio tupa karerbaramu. Ada Allah er si eremna ati dorami taru neitamai di dukdongopra tupa kareramu.

12 Uda, ataru neitamaida, Allah er si Yahwehdi, ‘Angeda ukunkamkene,’ peramutopu, Raja Salomo tep ila kael kemna deiyo keca kareramu. Tonda, ataru neitamai yuma, Raja Salomo cap, Hiram cap kange deipdareidi, telep kupra kikiman pel doramrei. Sun mutu nengda pio men podarami. Ukuramreiya tep, sun buteneda, ‘Podana gum dipapu, telep kange doupra kikiman kunkamepe’ tenen, pedina upu pepdareidi sekra deipdarei.

13 Raja Salomodi, ‘Ne pel donkamneng’ tenen, upu peipupa, Israel nesala neng pel dopmanto denge weik 30 ribu neng bulupi. 14 Bulupi pangeda, ‘Anengda Libanon mutu pel dorbenkameng’ tenen, agung weik bokra deipudi, gung yuk-yuk 10 ribu neng kepra keteneipu. Ukupu dingeda, awarda 10 ribu neng ton pel dorbei taruda, 10 ribu neng ton pel dorbei. Angepu, tupa-tupa, awar-awar yuma utopu dokoteramupa, 10 ribu neng pel dorbarami. Ukuramya tep, Libanon mutuda tenpu war deiki di pel dopbaramyane, ka tamupra sun pe mutu yaidi, war butene deiki yana mapmaiyanen, ka tamupra sun pe mutu tapra, Libanon mutu tamupra bena, tenpu war deiki ton pel dopra kurami. Tupa-tupa kupbarami. Tenpu ngebo er sida Adoniram, apel don neng sun deiyo ngebo kuramu.

15 Tonda akati dona tep nengeda, Raja Salomodi pel dona kael neng ton, yuk wepra deriramu. Ikin keca dopra dosemna neng tep nengeda, nimi gung weik 70 ribu neng weprapudi dopra deipu. Ton nengda, ‘Urasin telep gel sekra keteneipkamneng’ tenen, nimi gung weik 80 ribu neng ton wepra deipu. Anengda mutu deiki pel dorbarami. 16 Uda, apel dona nengda pio weike cadi, aneng sun pel deiyo kemna neng tep nengeda, Raja Salomodi yuk neng ton wepra deriramu. Ada tiga ribu, tiga ratus (3.300) neng wepra deipupa, anengdi sun yuk tali pel don neng tep, ‘Ukupkamrum, ukupkamrum,’ pepra, upu bongdiramidi kalengami.

17 Raja Salomodi, ‘Ukupkamrume,’ pepra deiputopu, er pel dona neng, sun urasin telep gel sengna nengdi, ila mutu yangne gel bukamngai di, telep gel gat ngeda bongopra deipipa, yuk nengdi agel dopra urasin telep kupra keteneipipa, yuk nengdi aurasin telep gel dopra akati doramyai dekarami. Agelda, ada ‘Allah er si eremna ati, ayumnya utopu deipmepedi, agel deiki di, akati dopkamepe,’ teneramidi apel dorami.

18 Atep nengeda, Raja Salomodi wepra deriramu neng, ila kael neng cap, Hiram wepra deriramu neng cap kikiman pel dorami. Tonda, sun Gebal mutu nengdi ton, co cap, gel cap ketenepra deriramipa, Allah er si eremna ati dona tep, yuk nengdi akeca dopra dubaramipa, yuk nengdi akeca dopra akati damai yakaramipa, akati dorami.