1Ki 6 | XteSC | STEP | Uda pumun taruda, Israel nesala Mesir mutu neitamai kuramyane, Mesir mutu tapra yuk katuai mutu neitamai embaramidi, Kanaan tara wengbei. Mesir mutu tapi taru di nukra adine, keteng tamun denge weik, empat ratus delapan puluh (480) tahun deiki di yukai kurami. Yanami taru neitamaida, Raja Salomodi Israel nesala taleprapudi sun ila nimi deiyo ngebo, Raja ngebo kuramnganen, keteng tamun dumbari konum kupu pangeda, Allah Yahweh, er si eremna ati gonga kepudi dopbaramu. Akati dona tep gonga kemna war sida, sun upu perami ngeda war Zif deiki di gonga kepu.

1 Kings 6

Salomodi Allah er si eremna ati dopu upu

1 Uda pumun taruda, Israel nesala Mesir mutu neitamai kuramyane, Mesir mutu tapra yuk katuai mutu neitamai embaramidi, Kanaan tara wengbei. Mesir mutu tapi taru di nukra adine, keteng tamun denge weik, empat ratus delapan puluh (480) tahun deiki di yukai kurami. Yanami taru neitamaida, Raja Salomodi Israel nesala taleprapudi sun ila nimi deiyo ngebo, Raja ngebo kuramnganen, keteng tamun dumbari konum kupu pangeda, Allah Yahweh, er si eremna ati gonga kepudi dopbaramu. Akati dona tep gonga kemna war sida, sun upu perami ngeda war Zif ^{▼▼Zif – Awar Zif perami ngeda, nun peramep war sida, April atau Mei peramepe.} deiki di gonga kepu.

2 Salomodi Allah Yahweh, er si eremna ati dona tep meter kunupu ada, ati lyomda dua puluh tujuh (27) meter kupu. Tonda ordine kunumna lyomda sembilan (9) meter kupu. Tuai tara di im dup tara kunumnada tiga belas (13) meter cap, ton neitamainge cap (13.5) kupu. 3 Allah er si eremna ati urasin tara, atolong utopu ati, ila go ati er lyom kunumnada sembilan (9) meterpu kunupu. Ada adine ortara kunumna kupmantopu kupu. Tonda ila ati urasin tara, dela dam dinin, ordine atara akati katuai tara palada empat setengah meter (4.5) kunupu.

4 Tonda, akati dela deiki tarada, yambul jendela ton potokeipu. 5 Tonda ila ati neitamaida Pio Telep Lengna Ati kwamu dinin, aila ati bura tara yuma, dela dam dinin, bura tara yuma dukdongopra ati ongopgenepra konum dopu dingeda, aneitamai dela wiliprapudi, yambul ati weik ton cap tapakra dopu. 6 Akati ila ati bura tara dela damda, ason ton dopu. Menmena ngeda ati ason kunupetepu ngeda er palada, dua koma tiga (2.3) meter kepu. Ton adeiki ason butene ngeda, er palada, dua koma tujuh (2.7) meter kepu. Adeiki tara, alau ati weneri asonda, er palada, tiga koma satu meter (3.1) kepu. Tonda ila ati dela bura tarada, ‘Ati dela dam, yuk keca dukdongopra dopkameng taru, aila ati dela neitamai bon men potokameng’ tenen, yambul go ati utopunge ton dopbaramudi ongomgenem pepra dopu.

7 Akati ila ati nong dona tep nengeda, gonga kepra doramu taruda weik gel dipu deipra dopbaramu. Dinino, aurasin telep gel yumada, bura tara gel dororamyaipu urasin telep kupra petuprapnedi, akati doramidi duyakarami. Deiyoda, ‘Palu cap, betel cap yuk ati don keca perkakas do, akeca dopra pel dopmengepa, ayuma di nun mambul atida, lelim ton peserure’ tenen, akati damda, gat keca di pel men doramya tep, besi keca lelim ton men gekerami. Yukai di gel buluprapidi, petupra ketenepi dipapu, amenda taru akati doramya dekaramipa dopbarami.

8 Tonda atapakdongopra dopu ati tingkatda weneri kupu. Ange yumada ila ati bura tara dinin, dela damnge ton dopu. Atep, tuai ati dine, neitamai ati ton kwamupa, adine weneri im dup ati ton kupu. Tuai ati wengbana tep nengeda, utamna di ati buplan potoki. Akati di, neitam ati welena tep, apio dopra moropra welepi. Ange utopu, neitamai ati dine, alau ati welena tep nengeda, apio deipra dopi. Ada nimi tuai udi iwelerbana tep apio deipra dopbei.

9 Konum akati dopu dingeda, Salomodi, akati arum, alau tara kemdongona tep nengeda, co si aras co deiki puluamenge di kepdongopipa akati arum dopu. 10 Akati dela bura tarada, yambul ati ton ongomgenem pepra, dopra sengpepu. Ayambul ati yuma tingkat lyom yumada udi iwepra dopu ngeda dua koma tiga meter (2.3) kunupu. Ayambul ati dine, ila ati dela dam dungdongona tep deipu ngeda, co er sida aras co dipapu deipra doramnganen sirya inipdongopu.

11 Akati konum dopu pangeda, Allah er si Yahwehdi, Raja Salomo kundam yaudi pepu upuda ake. 12 “Kandi akati dopmemdi kunkamrem ngeda, pepkukene. Ada kan akupbankamrem taru yumada, nedi peiamkesi upupu bouna di gekepra kunkamrume. Ada nedi, ‘Angeda kunkamrume, angeda ton men kunkamrume,’ pepra deiamsi upu talepra dombankamrume. Ukupmemyopda, nedi kan nai bo Daud tep, ‘Ukupkamkene,’ pediramsitopu, aupu yumada kan deikipu nong keipkamsene. 13 Ada, men di peiamsitopu, Israel nesala tamna gum dipapu, sun kan-kan neitamai pio melipra kunkamsene. Nedi anesala tep men tapkamne,” Allah er si Yahwehdi, Raja Salomo tep pepu.

14 Uda Salomodi Allah er si eremna ati yuma doramnganen, konum gawal dakra sengpepu. 15 Ukupu dingeda, dana-dana gel dela akati bura tara dominge yumada, nintong telep co, cemara co dopra gel orlelimna tep lelipra dela pepi. Ada asonai di deipra amnya bo amutara deipra dopi. Ukupi dingeda, ason tarada urasin telep co, co si sanobar dopra ason toki.

16 Ukupu dingeda akati neitamaida, go akamopane, akati pumbon dinin amnyo tarada, dela wilipra dona tep, er lyomda 9 meter kunupidi, ati dela wilipra dopi. Ada cemara co konum ketenepra deiamya di, tuai tara di dipdongopra amnyo bo amutara deipra dopi. Akati si tep, Pio Telep Lengna Ati perami. 17 Pio Telep Lengna Ati dam, ordine atarada, akati er lyomda 18 meter kunupra dopi.

18 Tonda akati pumbon neitamai yumada, nintong telep co, cemara co leliprapidi ati dela pepi. Ukupu dingeda, ‘Urasin telep kunkamre’ tenen, buk mau urasin utopu gambar kepra petupra deiami. Tonda, bunga kait popra laramretopu gambar kepra petupra derirami. Ukupi pangeda akati dela urasin pio telep kupu. Akati neitamaida cemara co katuai kupu dinin, gelpuda katuai ton kupupa men epi.

19 Akati neitamai yuma konum keteneipu dingeda, Allah er si Yahweh er Pio Telep Lengna Ati pumbon neitamaida, Allahdi, ‘Angeda ukunkamrume, angeda men kunkamrume,’ pepra karepupa, co lase di domi co bekin, er sida Peti Perjanjian ^{▼▼Peti Perjanjian – Peti Perjanjian kael kemna tep, Keluaran 25:11 dinkurume.} dongopi ngeda, akati pumbon deipkamya tep keteneipi. Ada mem upu derinai tep keteneipi. 20 Alyom ati neitamai Pio Telep Lengna Ati keteneipu atida, er lyom cap, pala capda, 9 meter kunupra dopi. Ukupu dingeda emas keca urasin telep ngeda, adela deiki palepra deipi. Ange utopu cemara co lase domidi, Allah er karena tep gam keca popnedi, yapi likra deriramyai deikida emas ton palepra deipi.

21 Uda, Salomodi peipupa, ange konum kupi dingeda, akati pumbon yuma emas dopra dela deiki palepra deipi. Tonda akati wengban bisi buplan damai, kunumna weik keca er si emas dopra, gat rantai tapu ketenepra deipidi, gerekdongopra deipi. 22 Ukupya tep nengeda, adopi ati dela taram yumada, emas doprapidi palepra deipi. Tonda, Pio Telep Lengna Ati pumbon neitamaida, cemara co lase di domi bekinda, abekin peda emas dopra adeiki palepra deipi.

23 Ukupi dingeda, adipapu Pio Telep Lengna Ati pumbon neitamai, malaikat urasin utopu keca, sun si Kerub gambar utopu petuprapidi, tekra deipi. AKerub lyomda, 4 setengah meter (4.5) kupu. 24 Tonda amalaikat utopu keca, er si Kerub, er pol dana pol pe, dana tara pol pe 2 setengah meter utopu kupu. Ton tara pol di, ortara pol dimbanada 4 setengah meterto kupu. 25 AKerub buteneda sun nong cap, sun lyom cap, sun pol dana-dana capda, kikimanpu petupra deipi. 26 Atara Kerub cap, ortara Kerub capda, sun lyom udi itara tengdinada 9 meter kupu. Tonge peda utopu kupu.

27 Salomodi, aKerub butene dopra, Pio Telep Lengna Ati pumbon neitamai deipu. Akati neitamai deipupa, atara Kerub er polda ortara dela bena bepu. Atara Kerub er polda, atara dela yana bepu. Akati neitamaida sun neitamai polda dukdongopdarei. Atara Kerub pe, ortara Kerub peda, sun pol perektapra lelepra tekrei. 28 Abutene Kerub petupra deipu ngeda, emas dopra sun nong deiki yuma palepra deipu.

29 Allah er si eremna ati pumbon tara dela taram yumada, Kerub gambar petuprapidi kweirya kepra deipi. Tonda korma co cap, bunga urasin telep keca cap, akeca urasin utopunge petuprapidi. Akati adela taram deiki di petupra deipi. 30 Tonda, Salomodi, Allah er si eremna ati pumbon ason lana cap yumada, emas keca dipapu deipdongopra palepra deipu. Ada Pio Telep Lengna Ati pumbon cap, akati bura tara dinin, lyom Pio Telep Lengna Ati capda, asonai yumada emas palepra deipu.

31 Allah er si eremna ati pumbon dinin, Pio Telep Lengna Ati buplan butene tep nengeda, parep tara palepra taplakra dongopra doramengaida, pamu bari co lase di palepra deiya domi. Aco laseda Zaitun co di dopra domi. 32 Akati buplan butene deikida ‘Urasin telep kupkamre’ tenen, Kerub gambar cap, korma co gambar cap, bunga kait laramrenge gambar capda petupra deipi. Agambar deiki yumada emas keca doprapidi palepra deipipa, urasin pio telep kupu. 33 Ange utopu ila lyom ati, Pio Telep Lengna Ati buplan butene ton dopi. Abuplanda Zaitun co di dopu. Akati buplan butene tep nengeda, parep tara palepra taplakra doramengaida, dumbari co lase di palepra deiya domi.

34 Tonda abuplanaipu dinin, abuplan bura tarada, sanobar co dopra buplan butene tonda utopunge domi. Abutene buplanda, buplan gumgumai utara pe, itara pe co bon potokdongopra domi. Ukupra domya cadi, abuplan buteneda, gong-gong pepra duembandaramrei. 35 Abuplan butene deiki peda ‘Urasin telep kupkamre’ tenen, Kerub gambar cap, korma co gambar cap, bunga kait laramrenge gambar capda petupra deipi. Agambar yuma deikida emas keca doprapidi palepra deipi. Urasin pio telep kupu.

36 Ukupu dingeda, Allah er si eremna ati damai dinin, yambul bura tara yumada, urasin telep gel pala lelepra yangdeirami. Agel lelepra derirami ngeda, weneri deiami. Agel pirimanaida, ‘Urasin telep kupkamar’ tenen, cemara co lelepra deiami.

37 Allah Yahweh, er si eremna ati dona tep, ayumnya co gonga kepra iki taruda, sun upu deiki perami war sida Zif perami. Keteng tamun nungami ngeda, keteng tamun dumbari deiki di gonga kepi. 38 Tonda sun upu deiki war si perami ngeda, war si Bul war neitamaida, akati tep dorami pelda gawal daki. Tonda sun keteng tamun nungamitopu, ada keteng tamun kum di dutara, (11) sebelas deiki di, aketeng tamunda Salomo cap, er pel don neng capdi, Allah er si eremna ati dopra gawal daki. Ada Allahdi, “Ukupkamrume, ukupkamrume,” pemutopu, sundi doramyane, gawal daki. Salomo cap, er pel don neng capdi, keteng tamun yoneitam bari deiki di doramyanen gawal daki.