1Ki 7 | XteSC | STEP | Israel nesala, sun ila nimi deiyo ngebo Raja Salomodi, er pe ati sisa yuk ton doramu. Er ati doramu taruda, keteng tamun dengeda, tiga belas (13) tahun deiki di dopra gawal daku.

1 Kings 7

Salomo er ati dopka tep, pepu upu

1 Israel nesala, sun ila nimi deiyo ngebo Raja Salomodi, er pe ati sisa yuk ton doramu. Er ati doramu taruda, keteng tamun dengeda, tiga belas (13) tahun deiki di dopra gawal daku. 2 Raja Salomo er ati tenpu dopu ngeda, akati er sida, Balai Hutan Libanon perami. Akati nong yuma tep, kunupetepu ngeda, er lyomda 46 meter kepu. Er palada 23 meter kepu. Tonda, er tengdina ngeda 13,5 meter kepu. Alyom ati er nepra tekeipu ngeda, nemna weneri ada, Libanon mutu co, er si cemara co deiki di dopu. 3 Tonda, weneri nemna tep nengeda, cemara co dipapu ayomnyada, nukra nemna yuk-yuk tep, lima belas (15) di iku. Tonda, ayumnya co ikua deikida, co barimna tep, Libanon mutu cemara co deiki di baripra deipu. Akati alau tara, er arumnge peda, cemara co 45 deiki dipapu deipra dopu. Tonda, alau tara barimdongona tep nengeda, cemara co di deipra kepdongopu.

4 Akati pari dana-dana tebalal tara pe, dumsisi tara pe yumada, jendela bon yuk-yuk potokra deipu. Nepra tengna weneri baris jendelada, tebalal tara urasin deipra weneri tekra deipudi dopu utopu, wenerida urasin dumsisi tara ton utopu deipra dopu. 5 Akati buplan cap, buplan dana-dana tara yumada, dumbari deipu. Adumbari co er si bingkai capda, kumun-dumbari kepra deipudi yopra dopu. Er buplan yumada, er baris ngeda, weneri deipra dopu. Ada, tebalal tara urasin deipra tekra deipudi dopu utopu, urasin dumsisi tara peda, utopu deipra dopu.

6 Tonda, akati neitamaipu dinin, Salomodi gat ayumnya utopunge, lyom tiang ton ikra dopudi, alyom tiang deipkai er sida, “Balai Pilar,” pepra dopu. Adopu ati er lyomda, 22 meter, er palada 13,5 meter deiki di dopu. Akati dam urasin dam tara, er atolong ton dopudi, atolong welena tep nengeda, gat co moromna deiki di deipra dopu. 7 Go weik ati ton cap dopudi, ketenepra deipu. Akati wilipra deipkaida, er si tep nengeda, “Balai Tahta,” pepu. Ada, er Rajadi, pio telep ila bungnai deiki bungamngai, akati akupka tep, uperami. Tonda, akatipu dinin, akati neitamai konum yana buku dingeda, upu dingeda, “Nimi Upu Lepsisikra Upu Bongdina Ati,” pepu. Akatida, ason tara di dipra, alau tara yumada, Libanon mutu cemara co di, pelepra deipudi dopu. Mali kupman nesalada, akati neitamai yanpa, Salomodi upu lepsikra deriramu.

8 Nimi deiyo ngebo Raja Salomo er kuna cap, mana cap tep atida, ‘Upu Bongdina Ati’ amnyo tara dopu. Akati, er pe kuna atida, ila lyoma di dorami ati utopu kupra dopu. Adopu ati cap, mali kupman nesala upu bongdina ati cap, dopra deipka amnyo tarada, Salomo er domu ner tep, er pe ati ton dopu. Anerda, Mesir mutu nimi deiyo kepra kuramu ngebo, Firaun, er ner mi kuramu. Salomodi, aner domnga cadi, aner tep, er mana ati tep dopra keteneipu. Akati peda, itara ati domnga urasin utopu kupra, Libanon cemara co di dopu. 9 Akati yuma dona cap, ila lyom ati dona capda, ayumnya di dipra benamnganen, amnya bo tara yumada, urasin pio telep-telep gel deiki dipapu deipra domu. Agel yuma betamnai di, betapra ketenepra deiami. Aketenepra deiami gel yumada, ‘Agel di ayumnya tarada, ukupra dopkamepe. Tonda, akati neitamai tarada, ukupra dopkamepe’ tenen, gat keca sengna keca gergaji di, sekra konum kunupetepra ketepra deiami. 10 Akati yuma ayumnya co ingami dinin, ayumnya barimna tep, er fondasi gel ngeda, kunumna weik urasin pio telep gel, ila-ilange dipapu, ketenepra deiami. Aketenepra deiami gelda, ton ngeda er lyomda, tiga setengah (3,5) meter kwamu. Ton ngeda, er lyomda, empat (4) meter ton ketenepra deiami.

11 Akati alau tara dona tep nengeda, yuk yala urasin telep gel ton, pio telep-telepnge, co bo kunumna weik gel ton kunupetepra betamidi, ketenepra deiami. Ukupidi, adeiki tara singina tep nengeda, Libanon mutu cemara co di, singipdongopra derina tep, ketenepra deiami. 12 Nimi deiyo ngebo Raja er ati cap, Allah cap, nimi cap, antamdana tep, er si eremna ati neitamai dopunge cap, tonda ila lyom ati, Allah er si eremna ati urasin dam tara dopunge cap yuma tep, akati-akati dela dona tep nengeda, ila lyom gel di betapra deipu. Ada, gel dela tep, ila gel di lapis weneri deiamngaida, daneitamai ton Libanon cemara co tenpunge di, palepra deipu di dopu. Ange utopu, akati weneri yuma peda, yuk-yuk dinin, ange urasin utopu gel lapis weneri deipudi, cemara co tenpunge palepra deipudi, betaipudi dopu.

Nimi tenpu er si Huram erda, Allah Yahweh er si eremna ati pel dona deiyo ngebo kuramu upu

13 – 14 Tirus mutu neitamaida, nimi tenpu ngebo, er si Huram kuramu. Huram erda, pio tek sisi gat kunumna weik keca, er si perunggu dopra, betamna keca, urasin yala-yala yuk-yuknge yuma betamnaida, ila kael keamudi, er angeboda apelpu talepra doramu. Huram er nai bo Tirus mutu ngebo peda, perunggu di betamna pel doramudi, ila di kael keamu ngebo kuramnganen, konum deamu. Huram er ninda, Naftali yala ner kuramu. Huramda, ila kael ngebo kuramnga cadi, Raja Salomodi yuk neng tep, “Sun adipapu Huram damai bemumdi, bena pepmumpa yaredi, gat keca er si perunggu dopra, betamnung urasin telep keca pel dona deiyo ngebo kepra kunkamre.” Atep, er damaida, “Raja Salomo damai yankurume,” perbei. Bena pepi pangeda, Huram adipapu Raja upu gekepra yau. Yau dingeda, Raja Salomodi pemu pel yuma, yana doramu.

Gat keca er si perunggu deiki di, ila ayumnya butene ketekepra deipu upu

15 Huram erdi ila ayumnya gat keca perunggu di ketekepra deipu. Ada, tuai adi dipra itara er lyom yuk-yukda 8 meter kupu. Akeca ongomgenemna tep nengeda, 3,5 meter kupu. Tonda, perunggu di dopunge er bukam ngeda, (er bol tebal ngeda) 7,4 sentimeter kupu. Aila tiang betaipu ngeda, er neitamai yumada, gopu kupu. Ange utopu Huramdi ila ayumnya tiang, butene nge ton betaprapudi deipu. 16 Ayumnya deiki tara derina tep nengeda, Huram erdi atiang gisonge tep, perunggu deiki di, butene ton ketekepra deipu. Akeca tengna er lyomda, dutara di dipra, itarada 2,2 meter kupu. 17 Atiang butene, nong bol deiki di, urasin telep kupra keteneipu. Ada, Huramdi perunggu rantai tapu urasin utopunge, wiprapudi, atiang ayumnya ikamnga yuma, bol deiki urup tara deipu. Tenpu perunggu ayumnya ikamoa deikida, rantai tapu wirameng urasin utopu ngeda, yoneitam bari wipra deipu. Awipu rantai deikida, bum-buma di ton kwanepra deipu.

18 Alyom tiang deiki tara derina tep betaipu ngeda, nong bol deikida, urasin telep kuna tep, perunggu di delima co du mouramre utopu kupra, nemna butene kepra deipu. 19 Tonda, alyom tiang deiki tara deipu ngeda, er urasinda, bunga Bakung er kait urasin utopu kupra deipu. Ange er tengdina lyomda 1,8 meter kepu. 20 Ange perunggu di betaipu akayumnya tiang ikya, bol deiki yumada, delima co du mouramretopu kupra, deipya er dengeda, dua ratus (200) betaipudi deipu. Angeda, baris butene kepra deipu.

21 Gat keca perunggu di betaipu ayumnya butene cap, urup tara bunga bakung kait laramra utopu kupra deipmauai yuma cap, bum-buma di kwanepra betaipunge yuma capda, adeiki deipu. Akayumnya co yumada, Allah er si eremna ati, buplan wengbana damai ikra deipu ada, ton ngeda bukra selatan tara deipudi, atiang er si tep nengeda, ‘Yakhin’ pepu. Ton tiang ngeda, utara ikra deipudi, er si tep ‘Boas’ pepu. 22 Uda, arup pepmaptopu, alyom perunggu di betaipu tiang deiki tara deipu ngeda, er urasinda, bunga Bakung er kait kamo utopu kupra deipu. Huramdi, akati ayumnya tep, perunggu di tiang betapra, ingna tep ngeda ukupra pel dopudi, gawal daku.

Perunggu deiki di me derin keca dopu upu

23 Uda, Huramdi ila buk me mau bumnge ton, perunggu deiki di betapra deipu. Abetapra deipu me mau kunumpetenada ake. Er neitamai tep ngeda 2,2 meter kepu. Tebalal tara di dipra, ordumsisi tara, er kunumpetenada, 4,4 meter kepu. Er nong yuma tep ongopgenepra kunumpetenada 13,2 meter kepu. 24 Ame mau er bol deiki pirmanai yumada, labu du mouramra utonun, baris butene kepra, petupra deipu. Apetupra deipu ngeda, ame mau dona tep, donmau taru di aketenepra deipmau labu utopunge peda, tenpu meter kunupeteprapudi, labu urasin utopunge palepra deipudi, adi dipra, ortara ton tenpu meter ton kunupetepudi, labu du urasin utopunge ton cap, palepra deipudi darapdongopu. Ange utopu kupra ame mau dana-dana tara yuma ongopgenepra deipu. Ame mau nong cap, amau deiki labu du utopunge capda, tenpu taru dipu dopra deipu.

25 Adopra deipu gwen buk me mauda, er sida, “Laut,” pepu. Ame mau dopra, perunggu deiki di betapra deiamu sapi bisam 12 ngeda, ange deiki bena dopra deipu. Asapi bisam 12 akwamu dinin, asapi bisam weneri ngeda, sun urasinda, iknapi tara ton kepra deipu. Ton wenerida, keteng darbana tara urasin ketenepra deiamu. Ton ngeda, utarada dapu tara ton urasin kepra deiamu. Tonda weneri ngeda, keteng yakan tamna urasin ketenepra deiamu. Adua belas sapi bisam urasin utopunge deiki tarada, aila me mau, buk mauda dopra, sun bali deiki deipu. 26 Abuk me mau er bol bukamda, 75 milimeter kupu. Abuk me mau pirman tarada, yambul me mau er si cangkir, er talena tep betapra derirameng utopu kupra deipudi, bunga keca er sida Bakung, kait laramre utopu keca dopra betaipu. Adopra deipu me mau, buk me mau neitamai me derinada, ukupmanto empat puluh ribu (40,000) liter utopu tep ketenepra deipu.

Perunggu di ila me mau derina tep, tu deiki embana keca, er si kereta ton dopra deipu upu

27 Huram peda, adipapu perunggu deiki di, ila me mau dubana tep, sepuluh kereta ketekepra deipu. Akereta er lyom yuk-yukda 1,8 meter. Er nong palada utopu 1,8 meter, Er tengna lyomda 1,3 meter. 28 Ame mau dubana tep kereta yuk-yukda, co lase gopropa yuk-yuk Huramdi aco lase gum-gum tara, dana-dana urasinda, pio telep kupra deipudi, ongopdongopu. 29 Aco lase deikida, singa pus utopu keca cap, sapi bisam utopu keca cap, malaikat utopu keca, er si Kerub cap, gambar kepra deipudi, pio telep-telep kupra deipu. Aco lase deiyo tara pe, urup tara pe, sapi bisam cap, pus utopu keca singa cap, petupra deipu. Ukupudi, bunga kait laramre utopu kupra deripkotepu.

30 Aila me mau dubana tep kereta betaiyamuada, sun yanda, yuk-yuk roda dumbari-dumbaripu perunggu di betapra keteneiamu. Tonda, akereta er yan tara roda, neitamai dungdongon keca peda, perunggu deiki dipapu, betapra deiamu. Tonda, kereta betapra deipua, er sirik tara kumun dumbari yumada, kereta talepra deipnepa, gatamna tep perunggu dipapu, me yangdin keca, er si baskom ton, er barimna keca ton betapra deiamu. Ukupudi, akeca er bol deiki bura tara yumada, urasin telep kuna tep, bunga kait telep keca di palepra deiamu.

31 Baripra derina tep, ayumnya dumbari ikamnga itarada, ila co pala bon kepra deipu di, adeikida, ila me mau, yangdin keca deiamu. Ayangdin keca barimna tep, ikamu ayumnya dumbari deiki di, ila pala co lase papan deiamunge, er tengdina co yuk-yuk kunumna tep, petenkemna lyomda, 44 sentimeter keamu. Utamna tep nengeda, yuk-yuk kunumpetenada, 22 sentimeter kuamu. Adeiamu papan co lase kupkupai yumada, urasin telep kuna tep, petupra empat segi peramengtopu deiamu. 32 Aco lase iriamu tarada, ame mau dubana tep kereta, er roda yane, er lyom yumada, 66 sentimeter deiki di kunupetepra domu. Adomu ngeda, papan co lase amutara deiamu. Akereta er roda yan embanange cap, aroda tep daneitamai dukdongopra talena keca, er si poros roda cap, akereta nong capda, tenpu nongpu kepra deiamu.

33 Aroda yan urasin yumada, kereta perang urasin utopupu kupra, dopra deiamu. Roda yane kwanepra bum kepra deiamunge pe, sirik-sirik belemunge pe, roda yan barimna tep doprange pe, tonda, roda neitamai embaramre keca dopra deiamunge yumada, perunggu dipapu dopra deiamu. Akeca-keca yumada, perunggu deiyo keca, uku deiki deipipa, uku bu di bupu weik kupudi, boun kupupa, aboun perunggu deiyo keca dopra, akeca urasin utopu petupra deiami keca pumbon dongopipa, er urasin cap, nong cap tenpu kupudi, konum telep kupupa, dopra deipu. 34 Ame mau dubana tep kereta domu ngeda, er talena tep, ayumnya co urasin utopu keca ton, dumbari yuma, amutara kumun-kumun yumada, baripra talena tep domu. Akayumnya co yumada, akereta er nong cap, tenpu keipudi, dopra deiamu. Nong yuk-yuk dopra, men deiamu.

35 Akereta itara sirik parepai pirman yuma, kunumpetena tep nengeda, 22 sentimeter deiki di kunupetepra domu. Tonda, baripra talena tep, ayumnya co urasin utopunge cap, pala co lase utopunge cap yumada, akereta cap, nong tenpu keipudi, dopra deiamu. Akeca yuma nong yuk-yuk dopra, derina gume. Nong tenpupu kupu. 36 Barimna cap, talena cap tep, ikami ayumnya co urasin utopunge yuma cap, tonda papan co lase utopu keca cap, ange yuma deiki cap yumada, urasin telep kuna tep, gambar keca petupra deipu. Ada, Kerub urasin utopunge cap, singa pus urasin utopu keca cap, tonda daun palem cap, tapakra palepra deipudi domu. Ada, go ton kwamngai yumada, akecapu palepra deiya domu. Adopra deipkai sirik-sirikda, bunga kait urasin utopunge di deipra ongopdongamu.

37 Aila me mau dubana tep kereta yuma dodina tep nengeda, autopu kupudi, dukdongopra nong tenpu deipu. Ange kereta morokyo di dutara (10) yumada, sun urasin cap, kunumpetena cap yumada, urasin tenpu deiki dipapu, dopra deipu. 38 Ange kupmau utopu, Huramdi ila me mau yangdina utopunge, er si baskom sepuluh (10) di ton dopra deipu. Tenpu yangdin kecada, tenpu me mau dubana kereta tep, dopra deipu. Ayakra derin keca, baskom yumada, er neitamai wilimna tep ngeda 1,8 meter keteneipu. Tonda, er me kina ikinda, 800 liter kinange keteneipu. 39 Huramdi ila me mau dubana tep kereta pamubarida, Allah Yahweh er si eremna ati tep, dutamnapu, selatan tamna dopra deipu. Utopu, pamubari ton dopra, itarapu, utara tamna dopra deipu. Ila me mau, buk mau perunggu deiki di dopu ngeda, adopunge dopra, keteng yakan tara wilimdonai cap, iknapi tara utara wilimna cap, aca neitamaipu dopra deipu.

Allah Yahweh er si eremna ati neitamai kun keca yuma tep, si sekra deipi upu

40 – 41 – 42 – 43 – 44 – 45 Huram dipapu yangadin gamna keca kuali cap, tu palin keca sikop cap, me jen mau yambulnge mangkok yuma cap, ton dopra deipu. Ange yumada, Huramdi, Allah si eremna ati tep nengeda, Raja Salomo er si deiki di, ange yuma konum pel dopra gawal daku. Akati neitamai kuna tep, dopra deipu keca yuma tep ngeda ake.

Ila ayumnya co butene dopra deipu. Akayumnya co butene ikinge deiyo itara dupaida, pio urasin telep kupra dopu akayumnya co, udup tarada, mangkok me mau urasin utopu keca di, dopra kepdongopu. Tonda, akayumnya deiki yumada, rantai tapu di wipra deipu. Tonda, empat ratus co du, er si delima, urasin utopunge, perunggu di ton doprapudi, nemna butene kepra deipudi, rantai tapu di wipra, ayumnya co urup tara deipmauaipu bena, dopra deipu ngeda, morokyo dam utara ton (10) dopra deipu. Tonda, ila me mau dubana tep, morokyo di utara kereta dopudi, adeiki di, yangdin keca ton morokyo di utara (10) dopra deipu. Ila buk mau perunggu deiki di ton dopra deipu. Abuk mau talena tep, sapi bisamda, dua belas (12) ton perunggu deiki di dopra deipu. Kuali-kuali cap, yambul sikop-sikop cap, tonda yambul me mau mangkok-mangkok cap, ange ton dopudi, keteneipu. Allah Yahweh er si eremna ati neitamai, Allah si eremna pel dona tep keca yumada, Raja Salomodi, “Ukupra doipkamnerume,” peiamu yumada, Huramdi konum dopra keteneipu. Ada, perunggu deiki di, cakra dopudi, urasin telep kuna tep, alam-alam pepra, deipupa leng-leng pepu.

46 Raja Salomodi, “Akeca yumada, ukupra-ukupra betaipkamnerume,” peiamupa, logam deiki di donmau mutuda, Sartan mutu cap, Sukot mutu cap di dopra deriramu. Ada, Yordan me bongbai di bena, doramu. 47 Raja Salomodi perunggu deiki pel dopi keca yuma, ‘Er ikinda wareto do?’ tenen, “Nukra dipetepkurume,” penada, men pepupa, men nukra kael kepi. Ada, akeca yuma pio weik men nukmanto tep kupi. Atep nengeda, akeca sun ikin yumada, men nukra kael kepi. 48 – 49 – 50 Raja Salomo di Huram tep, Allah er si eremna ati neitamai pel dona cap, kuna cap tep keca, yala yuk ngeda, gat kecada emas deiki di, doramenge nge ton, “Dopkamrume,” pepra, pel dipupa doramu. Akati neitamai ton derina tep, “Angeda, ukupra dopkamrume,” peiamupa, dopu keca sida ake. Allah tep karena keca deriryakanai ada, mesba cap, roti kwaneng deriryakana tep, meja cap, ton dopra deipu. Abuteneda, emas deiki di dopra deipu. Tonda, upna lana deiyo keca, morokyo di utara ton (10) dopra deipu.

Akecada dopra, Allah Yahweh er Pio Lengna Ati, mem ati neitamaipu deipu. Ada, pamubari ton bokra itara, iknapi tara ton deipu. Ton pamubarida, bokra, utara dapu tamna ton deipu. Bunga kait di ton dopra, yambul-yambul upna deipnepa, jena tep nge ton dopra, keteneipi ton dopu ngeda, me bupu jen mau cap, pelita uku dinipmangepa, jenmarenge tep, tamna keca ton dopu. Me bupu jenmau cap, me gwepra jen mau yala-yala cap, yakra lungdin kecada, siltong telep pen ngeda, dupa deiki derinai tep, ton dopu. Uku kalum arekra dopra derina tep, piring ton dopu. Allah er mem ati, Pio Telep Lengna Ati neitamai, buplan don ensel cap, bura tara buplan don nge cap, ton dopu. 51 Raja Salomodi, Allah Yahweh si eremna ati konum dopu dingeda, emas cap, perak cap, tonda yuk-yuk bung keca yumada, akeca derin ati neitamai dopra deipu. Ada, Salomo er nai bo Raja Dauddi, Allah si eremna tep kareamu keca yumada, doprapudi akati pumbon neitamaida, abung keca derina tep, ati neitamai deipu.