1Ki 8 | XteSC | STEP | Raja Salomodi Allah er si eremna ati konum dopudi sengpepkopda, upu doproipupa, Israel nesala sun deiyo neng, wisi neng yuma cap, Israel yala deiyo neng cap tep perbei. Ada, “Yerusalem acapu bupra yankurume. Yamumdi, pumun taru Raja Daud kuramngai, akati arum sida, Sion mutu neitamai di, ila mambul keca dopropmepedi, Yerusalem mutu duyana deipkamepe. Ada, Allah er si Yahwehdi, ‘Ukunkamrume, tonda ange pepsentopu kupmumnyopda, nedi sun tep ukupra makunkamsene,’ pepra deiamupa, nimidi aupu gekepra sekidi, co lase di dopi co bekin, er sida Peti Perjanjian pumbon deipi. Abekin dopra, Yerusalem mutu neitamai duyana deipkamepe. Aco lase di dopi bekinda, pumun taru Raja Daud kuramngai, akati arum sida, Sion mutu. Meneng damai mutu neitamai di abekin dopropmepedi, duyana Yerusalem mutu neitamai dinin, Allah er si eremna ati pumbon deipkamepe.” Salomodi, Israel sun deiyo neng, wisi neng tep pepu.

1 Kings 8

Allahdi peramupa, upu sekamidi deiami co pum dopra, Allah er si eremna ati dubei upu

1 Raja Salomodi Allah er si eremna ati konum dopudi sengpepkopda, upu doproipupa, Israel nesala sun deiyo neng, wisi neng yuma cap, Israel yala deiyo neng cap tep perbei. Ada, “Yerusalem acapu bupra yankurume. Yamumdi, pumun taru Raja Daud kuramngai, akati arum sida, Sion ^{▼▼Sion – Pumun taruda, ati arum weik domipa, sun ila nimi deiyo ngebo er si Raja Daud amutu neitamai kuramu. Amutu sida, Sion perami. Ukutaruda, amutupu dinin, amutu sida, kota Yerusalem, angepu penupe.} mutu neitamai di, ila mambul keca dopropmepedi, Yerusalem mutu duyana deipkamepe. Ada, Allah er si Yahwehdi, ‘Ukunkamrume, tonda ange pepsentopu kupmumnyopda, nedi sun tep ukupra makunkamsene,’ pepra deiamupa, nimidi aupu gekepra sekidi, co lase di dopi co bekin, er sida Peti Perjanjian pumbon deipi. Abekin dopra, Yerusalem mutu neitamai duyana deipkamepe. Aco lase di dopi bekinda, pumun taru Raja Daud kuramngai, akati arum sida, Sion mutu. Meneng damai mutu neitamai di abekin dopropmepedi, duyana Yerusalem mutu neitamai dinin, Allah er si eremna ati pumbon deipkamepe.” Salomodi, Israel sun deiyo neng, wisi neng tep pepu.

2 Upepra pepbaramipa, Israel deiyo neng yumadi gekepi. Gekepi dingeda, yoneitam war deiki di bupra ya. Awar si perami ngeda, Etanim ^{▼▼Etanim – Pumun taruda, sun Ibrani upu deiki di war si Etanim perami ngeda, ukutaruda nun war si September utonun, Oktober utonun angepu penupe.} war deiki di bupra yai. (Sun upu deiki Etanim war perami ngeda, nun war si Septemberto, Oktober utopu penupe). Awarda, ila kailya ton kalemami taru konum kupu pangeda, Israel deiyo neng yuma Salomo koripu bulupra yai.

3 Ataruda Israel nesala deiyo neng, sun wisi neng yuma konum yai pangeda, Allah er ati pumbon pel dona deiyo neng, sun imam nengdi, Allah er si Yahwehdi pepra sekeipu upu, co lase di dopi co bekin, er sida Peti Perjanjian pumbon, Musadi agel dopra dongopu ngeda, akeca dopra erepropi. 4 Aco bekin, er sida Peti Perjanjian konum doprapidi, akeca derirami dodin opkal tenda ati ton uruprapidi dubei. Akatida, ‘Allah cap, nun nimi cap, kikiman upu sisikmepedi antapkamepe’ tenen, domidi, deipembaraminge tep pepmepe. Keana taru tep, alyom opkal bol di domi dodin tenda atida, ‘Allah cap, nimi cap, antamdina ati ake,’ perami. Tonda, akati pumbon derirami keca, Allah er si eremna tep, akati pel don keca yuma peda dopra bei. Akeca-keca yuma dopra dubei nengda, Allah er si eremna ati pumbon pel dona deiyo neng, sun imam neng cap, tonda imam neng, sun pel melimna neng, Lewi yala neng capdi, akeca-keca yuma doupra, Yerusalem mutu dubei.

5 Akeca-keca dubenmai taruda, Raja Salomo cap, er nyapu Israel nesala yuma cap, bupra wekmaiya di banmai. Allah er si Yahwehdi pepra sekeipu upuda, co lase di dopi co bekin, er sida Peti Perjanjian pumbon, Musadi agel dopra aco lase di dopi bekin dongopu ngeda, sun imam nengdi erepra bai taruda, Salomo cap, Israel neng cap, menmena banmaipane, sun imam nengdi amenda tara banmai. Banmaiyane, abekin konum deipi pangeda, Raja Salomo cap, sun Israel nesala yuma capdi, gam kun keca men nukmanto poprapidi, Allah gispal dona tep karenmaiya cadi, men nukmanto kupi. Ukunmai taruda, Allah tep gudinmaidi, sapi bisam cap, domba bisam cap, pio weika di Allah tep karenmai.

6 Allah er si Yahwehdi pepra sekeipu upu, co lase di dopi co bekin, er sida Peti Perjanjian pumbon, Musadi agel dopra akeca pumbon dongopu ngeda, sun imam nengdi, aco lase dopi bekin doprapidi, Allah er si eremna ati pumbon, Pio Lekai perami ati pumbon deipi. Akatida, Pio Lekai, tali neng cap, tali keca cap, pio men wekmantoai perami. Tonda, aco lase dopi bekinda, Allah er si Yahwehdi, ‘Ukunkamrume, ange kupmumnyopda, nedi sun tep ukupra makunkamsene,’ pepra deiamupa, nimidi gekepra sekeiami upu akwapu. Aco lase di dopi bekin deipmaiyada, akati Pio Lekai pumbon dinin, im deiki pel don neng, malaikat urasin utopu kupra petupra deiamyai, amalaikat butene, sun pol amutarapu abekin bena deipi.

7 Ukupipa amalaikat kamo utopu keca, dana-dana tarange, sun pol butene di aco lase di dopi co bekin, er sida Peti Perjanjian cap, abekin dubana tep lyom co cap singipdongoprei. 8 Aco lase di dopi bekin dubana tep, lyom co buteneda, pio lyom weik kupu. Aco lase di dopi bekin deipi ati sida, Pio Telep Lengna Ati perami. Akati dine, yambul atara domi ati sida, Telep Lengna Ati perami. Abekin dubana tep dungdongon lyom coda, Telep Lengna Ati pumbon tekmemnyopda, alyom co urupai eptum dinin, Telep Lengna Ati bura tara di, dipeteptum dinin, alyom co urupaida men eptume. Alyom co buteneda akati tupa akapmare.

9 Aco lase dopi Peti Perjanjian pumbon menop taru Musadi dongopu kecada lape pepkune. Tenpu kecapu dongopu. Ada, Allahdi ‘Angeda ukunkamrume, angeda men kunkamrume,’ pepra deipudi, gel pala butene deiki sekrapudi, Musa tep karepupa, Musadi agel dopra, aco lase dopi bekin pumbon deipu. Yuk keca ton aco pumbon men deipu, agel butenepu. Tonda, Musadi agel pala dopra abekin pumbon dongopu mutu sida, Horeb mutu kuramu taru deipu. Ataruda, Allahdi sun Israel nesala Mesir mutu neitamai ikin kange doupra kurami taru, lyepropudi debeu. Ataruda, Allah er si Yahwehdi sun Israel nesala tep upepu. “Sundi angeda ukunkamrume, angeda men kunkamrume. Ne pepsenetopu kupmumnyopda, nedi pio kalekra disenedi, melimkamsene,” pepu.

10 Uda, sun imam nengdi, aco lase dopi bekin doupra akati bena Pio Telep Lengna Ati konum bendeipi dingeda, akati tapra, tonda Telep Lengna Ati tapra, ka tamupra bura tara bei. Akati bena deipra bura tara bei taruda, dato-dato di ila dua bum kwerepudi, Allah Yahweh, er si eremna ati pumbon yan kepdongopu. Aila duada, Allah er si Yahweh dipapu karepupa, akati pumbon wekudi dekdongopu. 11 Tonda, Allah er si Yahwehdi, adua karepupa, konum akati pumbon weku pangeda, Allah er ati pum pel dona deiyo neng, sun imam neng yumada, Allah er si eremna tep pel dorami ngeda, men pel dopmanto kupi. Deiyoda, Allah er si Yahweh, er dirine weik cadi, er si eremna ati pumbon wekua tep, anengdi men pel dopmanto kupi.

12 Ukupka tep, Raja Salomodi upepu. “Nun nai Allah er si Yahwehda, pumun di konum peamseu. ‘Neda ila kurur dua kankan, kunungrura neitamai kunkamne,’ pepseu. 13 Dinino ne nai Allah, ukutaruda nedi kan tep, pio telep ati konum ketenepra dopmakene. Akati dopsa deiyoda, ‘Kandi akati wekmemdi acapu pio kunkamrem’ tenen, dopkesi,” Raja Salomodi pepu. 14 Uda, sun Israel nesala yuma ameneng damai tupa tekmai taruda, Salomodi ‘Israel neng telep kunkameng’ tenen, telep upu pepra deipu.

15 Salomodi pepu upu ake.

Nun nai Allah, kan si Yahweh tep, ‘Kanda pio telepe,’ pepkepe. Kan dipapu nun Israel nesala tep pio kalekra meliamsememtopu, tupa melimserume. Kanda nun nai Allah tenpu kurume. Ne nai bo Daud tep, kan Allahdi, ‘Ukunkamkene,’ pepra deipmume. Kan pe sipyal di peipmum upuda, ukutaru kan pe buru dipapu konum kupmareme. Nong konum kupmasere. Nun nai Allah, kandi peamsemum upuda ake.

16 “Ne nyapu Israel nesala, Mesir mutu neitamai kuramipane, nedi lyepropsidi aneng dubesi. Anesala dubesi taru di dipra, aneitam taru yumada, yuk mutu si ton men wepsi. Ada, ‘Ne si eremna ati dopkamengaida, ton ace, ace,’ pio men peramsi. Israel yala nesala, sun yala cap, sun ati arum si capda, weik akapmar dinin, ange yuma ton men wepsi.

Deiyoda, ne nyapu Israel nesala tep, ‘Sun ila deiyo ngebo kupredi, ne mawa teneramsi nesala talenkamre,’ tenemsi ngeboda, Raja Daud er pua. Atep nengeda, yuk mutu neitamai ton, ‘Ne si eremna ati dopmengepa, akati pumbon ne si dongopkamne’ tenen, pio men wepra deipsi. Yerusalem mutupu wepra deipsi. Allahdi pepu. Atep, er si eremna atida amutupu kunkamre,” Salomodi pepu.

17 Upepudi aupu ton cap dukdongopra pepu. “Ne nai Raja Daudda, er dipru neitamai uteneramu. ‘Uo, nun nai Allah, nun Israel nesala tep, pio kalekra melimserure. Allah Yahweh tep, er si eremna ati doptene’ tenen, pio putaramupa teneramu. 18 Uteneramu dinin, Allah er si Yahwehdi ne nai bo Daud tep upepu. ‘Kan dipru neitamaida, uo, ne nai Allah, er si eremna ati doptene,’ teneramume. Ange teneramum ngeda, telep kuramume.

19 Dinino, ne si eremna ati dopkamner ngeboda, kan gume. Kandi akati men dopkamnerum dinin, kandi deipkamrem mi, erdi akati dopkamnere. Ada, kan pedi deipkamrem mi, kan nong cap, kan yapi cap utopu mi, er dipapu akati dopkamnere. Akati dopyopda, akati pumbonda nimi weik ne si eremkamnenge. Allahdi ne nai bo Daud tep pemu,” Salomodi pepu.

20 Upepudi aupu ton pepu. “Atep nengeda, nedi pepsene. Nun nai Allah er si Yahwehdi, ne nai bo Daud tep, ‘Ukunkamne,’ peramu upu tek sisi nong konum kupre. Allah er si Yahwehdi ‘Ukupkamne,’ pepra pedina upu peramutopu, ne nai bo Daud er yo konum punupsidi, Israel nesala yuma talena tep, sun ila deiyo ngebo, Raja konum kunune. Tonda, Allahdi peramutopu, nedi Allah Yahweh, er si eremna ati konum dopsi. Akati pumbonda, nimi weika di Allah si eremkamenge. Nun nai Allah, er dipapu er nyapu Israel nesala tep, tupa kalekra melimserure.

21 Tonda, nun nai Allah er si Yahwehdi, nun apu yapu tep lyeprapudi, Mesir mutu neitamai di dubeu taruda, nun apu yapu tep upepu, ‘Angeda ukunkamrume, angeda men kunkamrume. Ukupmumnyopda, nedi kalekra melimkamsene,’ pepra pedina upu pepra deipu. Aupuda, Allahdi Musa tep, aupu peprapudi, gel pala deiki sekra karepupa, Musadi agel butene dopra, co lase di domi co bekin, er sida Peti Perjanjian pumbon dongopu. Aco lase di dopi bekin derin atida, nedi konum ketenepra dopsi, pepsene,” Raja Salomodi sun Israel nesala yuma tep pepu.

Salomodi Allah moropu upu

22 Raja Salomodi aupu yuma konum pepra sengpepkopda, ange ton kupu. Israel nesala yuma bulupra tekmaiyai urasin tara teku. Tonda, Allah er si Yahweh tep, gam keca popra, er gispal dona tep, karenmaiyai di, pala gel taplakra yakeipmaiya damai tekudi, Salomo er buru butene erepra im deiki deiprapudi, aupu dukdongopra pepudi, Allah moropu.

23 “Ne nai Allah, kan si Yahweh tep, kan si erepkene. Naio, Israel nesala tep pio kalekra melimserume. Nun deiyo ngebo kan tenpu kurume. Im deiki peda, tuai mutu peda, kan utopu ngebo ton pio men kurure. Kanda Allah tenpua. Kan tep pio tupa teka tenenung nengdi, yuk tali keca putana gum dipapu, kan perum upu moupra talepmengedi dombanung neng tep nengeda, kandi pio bicau teneserume. Kan amutara kunge neng tep, ‘Ukunkamsene,’ peamsemum upuda, tek sisi tupa kuserume. Atep tuai mutu pe, im deiki mutu peda, kan utopu ngebo ton pio men kurure.

24 Ange utopu, kan dipapu ne nai bo Daud tep, ‘Ukunkamkene,’ pepra, deiamum upuda, konum kupmasereme. Kan pe sipyal di peipmum upuda, ukutaru kan pe buru dipapu konum kupmasereme. Nong konum kupmaserpa, atumi di epmape.”

25 “Ukutaruda, ne nai Allah, kan si Yahweh kurume. Naio, Israel nesala tep pio kalekra melimserume. Ne nai bo Daudda kan amutara kuramudi, kan pelpu doramu. Atep kandi er tep pedina upu peramum ngeda, ‘Tek sisi pio tupa kunkamserum’ tenen, moropkene. Daud tep peramum upuda ake. ‘Daud, kandi ne peramsi upu yuma moupra taleamumdi, dombaramumtopu, kandi deipmempa dadeipdanen, bankameng nesala peda, ne upu moupra gekepmengedi, angepu kupmengopda, ne damai pio kunkamenge. Ada, kandi Israel nesala ila deiyo ngebo Raja kuramrumtopu, amenda yankamre taru neitamai peda, kan nyapu Raja neng pio kunkamenge. Ne damai ton pio men gum kupkamenge,’ pepmume.

26 Atep nengeda, ne nai Allah, kan si Yahweh kumemdi, Israel nesala tep pio kalekra melimserume. Ne nai bo Daudda kan amutara kuramudi, kan pelpu doramu. Atep kandi er tep pedina upu peramum ngeda, ‘Tek sisi tupa kunkamserum’ tenen, moropkene,” Salomodi upepra Allah tep moropu.

27 Moropudi aupu ton pepu. “Dinino, tek sisi Allah kanda atuai mutu neitamaipu kutum do? Gume, im deiki peda ila mutue. Tonda im deiki pio deiki tara peda ila pala weik akurur dinin, Allah kanda amutu peda men suktaleptue. Kanda ila mambul ngebo tep pepkene. Ange tep nengeda, ange utopu, ne dopsi atida, pio yambul ati dopsa tep, akati pumbon peda men kutume. Kanda tenpuaipu men kuruma tep pepne. 28 Dinino naio, kan amutara kununa cadi, ‘Ne moropkuken upu gekepnetum’ tenen, moropkukene. Neda mali ngebo cadi, adipapu wenepra poptapnetum dinin, ‘Kan kange dipapu bicau tenepnememdi makunkamnerum’ tenen, moropkene. Naio, kan si Yahweh tep eremkenune. Kanda ne si eremnun Allah pua. Atep, atumi di, ne engepra moropmaken upuda, ‘Gekepkunerem’ tenen, moropkene.”

29 “Moropken ngeda, Allah kandi, ‘Akatida, aca dopmempa, ne si aca deipkamne,’ peamnemuma cadi, keteng komuni pe, lukunda peda, kan asuru lapra akati pio dimemdi, gekenkamserume. Ada, ‘Ukupmemdi, kan amutara kure ngebo, nedi moronkamken upu gekenkamnerum’ tenen, moropkene. 30 Tonda, ne cap, kan nyapu Israel nesala yuma cap, akati damai men yanmanto kunkamep dinin, kan si eremna ati tupa tenipmepedi, kan tep tenepra moropkepe pangeda, ‘Gekenkamserum’ tenen, moropkene. Ada, ‘Kan kunai im deiki di gekepsememdi, nun mali kupe keca tep, kaukemsememdi, lyemdonkamserum’ tenen, moropkene.”

31 “Ukupmanto, bon tenpu di, er kabo tep, mali kupyopda, deiyo nengdi, ‘Ange lepsisikra dona tep, pedina upu pepkamrume,’ pepra deipmengepa, angebo akati dam yaredi, kan karena tep pala gel taplakra yakeipmepyai, mesba urasin tara tekredi, pedina upu penkamre taruda, ‘Kandi gekepkamrem’ tenen, moropkene. 32 Aneng utopu neng, kan ati damai yangedi moropmengopda, kan im deiki di gekenkamserume. Gekepsememdi, upu bokeipkamserum tenena tep pepkene. Allah im deiki di gekepsememdi, kael kepra, ‘Angeboda tek sisi mali kupmare. Angeboda, mali men kupmare,’ tenepsemem dingeda, amali kupmare ngeboda, er mali kupmaretopu wenemna keca karenkamrume. Tonda mali men kupmare ngeboda, tali tamkamrume. Ukupmemyopda, nundi, ‘Telepnge ace, malinge ace’ tenen, kael keptepe,” Raja Salomo pepra moropu.

33 Tonda, aupu pepra moropu. “Ukupmantonge ton, Allah kan nyapu Israel nengdi kan damai mali kupmenge pangeda, kandi wenemna keca karepsemempa, nun podan nengdi popbisipsengepa, mambul kange doupmepedi, kan damai akati ton tamupra yapedi, ‘Uo naio, nun mali kunup keca tapmepe. Kanda nun nai Allah tenpu kuruma cadi, kan dipapu lyepseo,’ pepra moropkepyopda, ‘Kandi gekenkamserum’ tenen, moropkene.

34 Yana moropkepe pangeda, kan im deiki di, ange gekepsememdi, Israel neng sun mali keca adipapu kaukepsememdi, lyemdonkamserume. Tonda, ukupmemdi nun co puna neng tep kareramum mutupu, yuk mutu nengdi nun tep popbisipsengedi, yuk mutu dubesengopda, ‘Amenda taru kandi nun Israel nesala lyepsememdi, kange di tamupra duyasememdi, amutu tamupra karenkamserum’ tenen, moropkene.”

35 “Ukupmantonge ton, Israel nesala mali kupmengepa, sun wenemna tep nengeda, mo men cepredi doupu mapre pangeda, sun mali kuramenge keca loptapra akati dam men yanmanto kunkameng dinin, kan si eremna ati tupa tenipmengedi, kan tepapu tenepra morokengedi, ‘Uo naio, kanda nun nai Allah tenpu kurume. Kandi wenepmaserema tep, nun mali kupe keca konum tapmepe. Kan sipu eremkamkepe,’ pepmengopda, kandi gekenkamserume, naio.

36 Ukupmenge pangeda, kan im deiki di gekepmemdi, ‘Israel neng sun mali keca yuma tep kaukepsememdi, lyemdonkamreme’ tenen, moropkene. Ukupmemdi, kan dipapu sun tep nengeda, ‘Telep bisipu ace, telep kunkamrum ngeda ace,’ pepmempa, sun abisipu dukdongopra bankamenge. Ukupmengepa, kandi nun tep, ‘Amutu talepra kunkameng’ tenen, kareramsemum mutu, amutu deiki di, ‘Mo karepsemempa, pio cepkamre’ tenen, moropkene.”

37 “Tonda ukupmanto ngeda, amutu jen putana cap, ila mambul pu jerepa nimi dena cap, tonda sun koun keca koupmengepa luramrenge cap, tonda koun keca koluna cap, tonda ila po weika di yangedi nun kouramep keca yuma jepropsenge taru cap, tonda sun podan nengdi yan poryakasenge taru cap, uda ware kange mun keca yankamre taru do yuma, Israel nengdi kan tep moropmengopda, ‘Kandi gekenkamserum’ tenen, moropkene. 38 Kange mun keca kupre pangeda, sun Israel nesala yuma dinin, yuk-yuk di, ‘Uo ne dipru mali kune keca ake,’ tenepmengedi, moronkamenge. Ukupmengedi, akati damai men yanmanto kupkameng dinin, kan si eremna ati tenipmengedi, kan tepapu tenepra, buru erepra kan tep, ‘Nun nai makupseo,’ pepra, moronkamkeng taruda, ‘Kandi gekenkamserum’ tenen, moropkene.”

39 “Moropmenge pangeda, kan adipapu im deiki mutu kumemdi gekenkamrume. Gekepmemdi, nun mali kun keca tep kaukepsememdi, lyemdonkamserume. Naio, kandi tuai kunge nesala yuma, sun dipruai kure keca kan kale cadi, telep do, mali do, nimidi sun yuk-yuk kuramengetopu, kandi upu bokeipkamserume. Kan dipapu nimi tuai neng sun dipru neitamai kure keca dimemdi kael kemrume, yuk nengdi ton men kuptenge.

40 Nimi dipru epmemdi, upu bokeipsemem pangeda, Israel nesala yumadi kan tep ‘Uo, Allahda tek sisi mambul weik ngebo’ tenen, kwar weik kunkamenge. Ukupmengepa, kandi sun tep gam kuna tep go ton cap karepmempa, tupa kunkameng taruda, kan tep si eremkamkenge. Tonda, kandi nun co puna neng tep kareramum mutu akunkamenge. Ukupkamserum tenen, moropkene.”

41 “Tonda tengyakan neng, kan nyapu Israel neng guma dinin, Allah kan si eremna tep sun yuk karen mutu di amutu yakankameng neng tep pepkune. 42 Anengda, karen mutu kunge dinin, yuk nengdi pengepa, kan si ton gekenkamenge. Ton ngeda, Allah kan puto cap, kan ila mambul si cap, kan puto buru di mutu ban-ban yuma neitamai, ila mambul pel donkamremnge cap, gekepmengedi kael kepkamenge. Gekepmengopda, kan morona tep, akati damai yangedi kan tepapu si eremkamkenge.”

43 “Sun yuk mutu neng, tali tengyakan nengdi, kan tep akati damai moropkenge pangeda, kan adipapu im deiki kan kumemnyai di, sun moropmenge ngeda gekepmemdi, makunkamrume. Ukumemdi sun moropmakengetopu melipmem pangeda, amutu tali tengyakan neng peda ukupmemya deiki di, epmengedi yuk karen mutu bena pepmengopda, nimi ban-ban yuma, kan sipu kael kepkamenge.

Ukupmengedi, kan tep, ‘Uo Allahda ila mambule’ tenen, kware kunkamenge. Ukupmengedi kan tep sun peda kwar kuprepa, kan nyapu Israel nengdi kan si eremkengeya utopu, yuk karen mutu neng peda ukupkamkenge. Tonda, kan si eremna tep, dopkesi atida, ‘E Raja Salomodi akatida dopka deiyoda, tali tep gume. Ada tek sisi Allah er si eremna tep dopke,’ tenenkamenge. Ukupkameng tenena tep moropkene.” Salomodi upepra moropu.

44 Moropudi aupu ton pepra moropu. “Tonda ukupmanto, kan nyapu Israel tep dan mutu do yuma, aneng dokotepkamrumai yuma, anengdi sun podan neng damai benkunge taruda, kan tep moronkamkenge. Ada, kanda Allah kan si Yahweh tep si erepmengedi moronkamkenge. Tonda, kandi wepmum ati arum Yerusalem si ton tenepkamenge. Tonda, kan si eremna ati dopsi ngeda, ange ton tenepmengedi, kan tep moronkamkenge. Ukupmengopda, ‘Kandi gekenkamserum’ tenen, moropkene.

45 Kan nyapu Israel nengdi sun podan neng damai benkunge taru, kan tep moropmenge pangeda, kan adipapu im deiki di, gekenkamrume. Gekepmemdi, sun moropkamengenge cap, sundi porbankamenge nge cap tep, makunkamrume. ‘Sun moropkamkengtopu kupkamrem’ tenen, moropkene.” 46 “Dinino, kan nyapu Israel nesala, amenda taru mali kun keca kan damai kupkamenge. Ada, nimi tenpu ngebo peda ton, telep ngebo ton men kunupe. Atep mali kupmenge pangeda, kandi aneng dopra sun podan neng deiki deipmempa, ayu nengdi kan nyapu tomopmengedi wenemna ati karenai do, damai do, derirbankamenge.

47 Ukupmengepa, kan nyapu Israel nengdi, ‘Uo, nun tek sisi mali kupmupka deiki di Allah wenepmaserpa awenemna ati bukmape,’ tenen, sun pedi tenepmengedi, dipru neitamai di kael kepmengedi wenemnai bena deiamengai dipapu, ‘Uo nun tek sisi mali kupmepu. Nun nai Allah tep yanipmepu. Pio mali-mali kupmepu ngeda tapmepe. Nun nai Allah lyepseo,’ pepra moropmengopda, kandi gekenkamrum tenen, moropkene.”

48 “Ada tali sipyal dipu pertamna gum dinin, sun Israel nengdi, sun podan neng popbisipmengedi, wenemna ati dubena deipmengopda, amutu neitamai di, ‘Tek sisi sun dipru neitamai, mali kupinge tapmengedi, kan tep sun dipru cap, kange cap, nong cap yuma kan deiki deipkengopda, ange ton gekenkamrum’ tenen, moropkene naio. Ukupmengedi kan cap, sun apu yapu kareramum mutu cap, kandi wepmum ati arum Yerusalem cap, kan si eremna ati dopsinge cap, ange-ange yuma kange di ton cap tenepmengedi, kan tep moropkengopda, kandi gekenkamrume naio.

49 Tek sisi kan tep moropmenge pangeda, kan adipapu im deiki di, gekenkamrume. Gekepmemdi, sun moronkamenge nge cap, sun kange mun kunkamrenge cap tep, makunkamrume. ‘Sun moropkamkengtopu kupkamrem’ tenen, moropkene.” Salomodi Allah tep upepra moropu.

50 Ange moropu dingeda, ange ton moropu. “Atep nengeda, Israel nesala kan damai mali kunkamenge ngeda, lyemdonkamrume. Kandi sun tep, ‘Ukunkamrume,’ peamsemum upu yaniptapra mali kuramenge nge tep, kaukepra gum kupra deipkamrume naio. Tonda, sun podan nengdi popbisipmenge taru, aneng tep, kandi bicau tenena deiyo keca karepmempa, anengdi, ‘Pio ikin keca Israel nesala nong deiki men derinkameng’ tenen, moropkene.

51 Ange ukunkamrum ngeda, tali tep gume. Deiyoda, Israel nesalada, kan pe nyapu sisa utopu kununge. Kandi, ‘Israel neng, ne mawa nesala kunkamenge. Ukungepa kikimanpu kunkamepe,’ teneramumdi anesala wepra deiamsemuma tep pepne. Tonda, Mesir mutu neitamai di mambul pel dimamipa, pio kange mun kange doupra kuramya neitamai di lyepra duyanamume. Ange tep, ‘Israel nesala makunkamrume’ tenen, moropkene naio.”

52 “Ange tep nengeda, kandi moupra epsememdi, bicau tenepsetumtoda, nedi kan moropken nge cap, dan taru do yuma, kan nyapu Israel nesaladi moronkamkenge cap yumada, ‘Gekepmemdi makunkamserum’ tenen, moropkene. 53 Angeda tali tep men moropkene. Deiyoda, tuai mutu ban-ban yuma mutu neitamaida, nimi pio weik akuramipane, kan pedi, ‘Aneng sun Israel nengda, ne mawa nesala kunkamenge. Kikimanpu kunkamepe,’ teneramumdi, anesala wepra deiamsemume. Kanda Allah Yahweh, akeca-keca yuma talememdi, ila puto deiki di, ‘Ne nyapu kunkamneng’ tenen, weamsemumdi, Musa damai pepra deiamumpa, erdi peamseu utopu, ‘Israel nesala ne mawa nesala kunkamenge,’ pepra, peamsemume.

Aupu pepsemum taruda, nun co puna neng Mesir mutu di doupra yanamum taru di peipsemume. Uo ne nai Allah, kan si Yahweh kurume. Kanda akeca-keca deiki tara talepra kumemdi ila puto ngebo kumemdi, kan teneramumtopu kurume. Atep nengeda, nedi moropkene.” Salomodi upepra moropu.

Salomodi sirya gawal dakra, Allah tep moropu upu

54 Salomodi Allah er si Yahweh tep, morona upu yuma konum pepbanmauanen, sengpepkopda, ka di ton tekrou. Ada, Allah er si Yahweh, er karena tep pala gel taplakra yakeipmaiya urasin tara, gutam tu dipra genepdongopmaua di, tekrou. Allah tep moronmau taruda er buru butene im deiki tara erepra moronmau. Ukupu taruda sirya gawal dakra Allah tep moropu. 55 Konum moropu dingeda, tekroudi, sun Israel nesala bulupmaiya urasin tara tekudi ila upu deiki di upepu. Ada, ‘Nun nai Allahdi Israel nesala telep kupra deipkamre’ tenen, pepu. Erdi pepu upu ake.

56 “Nun nai Allah, er si Yahweh tep, pio telepe pepkepe. Naio, teka kandi Musa tep pepra deipmum utopu, kandi nun Israel nesala tep talepra lyemdoserume. Ukupmumpa, ukutaruda, nun tali kange doupra kunmape. Kange mun keca ton pio men kwapmasera cadi, teleppu kunupe. Kandi kan amutara pel doramu ngebo Musa deiki di, peipsemum upu, pio telep pedina upu yumada, konum kupmaserume. Apedina upu yumada nong konum kupre. Tenpu upu peda men gum kupseu, ange yuma gawal konum dakserume.

57 Atep nun nai bo Allah, kanda Yahweh kurume. Kan dipapu nun co puna neng peda melipyakaramuma utopu, ‘Kandi nun peda tupa melimkamserume’ tenen, moropkepe. Tonda, ‘Kandi kaukepsememdi, men tapkamserum’ tenen, moropkepe.” 58 “Ukusememnya deiki di, kandi melipsemempa, nun dipru kange cap, nonge cap dopra, kan deiki deipkamkepe. Ukupmepedi, kandi, ‘Angeda kunkamrume, angeda ton men kunkamrume,’ pepra deiamsemum upu yuma moupra gekepmepedi, pio dombankamepe. Ada nun co puna neng tep peramumtopu, ‘Dukdongopra kupedi, pio men tapkamep’ tenen, moropkepe.”

59 “Nedi Allah kan si Yahweh tep moropmana utopu, ‘Kan damai pio kukerepa, pio tenenkamnerum’ tenen, moropkene. Ada, keteng komuni pe, lukunda peda yuma, nedi moropmaken upu tupa tenenkamrume naio. Ange deiyoda, nun nai Allah, neda kan amutara pel don ngebo cap, kandi wepmum nesala Israel nesala cap, ‘Tumi-tumi yuma, nun putapseretopu epsememdi makunkamserem,’ tenena tep pekene nai. 60 Ukupra melipsemem pangeda, nimi ban-ban yuma disengedi, kael kepmenge dingeda, ‘Uo, Allah er si Yahweh, erda ila mambule. Yuk ton men kurure, er tenpua,’ tenepra er sipu eremkamkenge. Utenena tep moropkepe nai.” Raja Salomodi Israel nesala tep pepu.

61 Upepudi aupu ton dukdongopra pepu. “Atep ngeda sun adipapu Allah er si Yahweh tep, teka tenepmumdi sun kange dipru cap, nong cap, tupa Allah karenkamrume. Ukupmumnya deiki di, erdi, ‘Angeda kunkamrume, angeda ton men kunkamrume,’ pesere upu moupra gekepmumdi, talepra kunkamrume. Ada, ‘Atumi kunmaruma utopu pio kunkamrume’ tenen, pepsene.” Raja Salomodi sun Israel nesala yuma tep pepu.

Raja Salomo cap, Israel neng capdi, ‘Allah er si eremna ati mambul kange doupra, sah kupra deipkup’ tenen, kupi keca tep upu

62 Raja Salomo cap, Israel neng capdi, ‘Allah er si eremna atida, konum dopmupka cadi, nun nai Allah er si Yahweh tep, gispal dopra akati karepkupe’ tenen, gam keca poprapidi weika di karepi. 63 Ukupi taruda, Raja Salomodi Allah er si Yahweh tep nimidi peirami keca sapi bisam, dua puluh dua ribu (22.000) cap, domba bisam cap, kambing bisam cap tapakrap dua puluh dua ribu (20.000) ton popra karepu. Ada, ‘Ne nai Allah, er si Yahweh cap, nun Israel nesala cap telep kupra kikiman kunkamep’ tenen, akeca karepu. Er cap, sun Israel nesala capdi, ukupmaiya deiki di, Allah Yahweh, er si eremna atida, sah kemna peramengtopu, akatida ange tenena tep kupi.

64 Tonda atumi dipapu, Allah Yahweh, er si eremna ati urasin tarada, ila go ton akapu ngeda, Salomodi sah kepra, telep kupra deipu. Ukuna tep nengeda, ago neitamai Salomodi akeca-keca weika di Allah tep popra karepu. Erdi karepu ngeda, ‘Allah gispal dopkup’ tenen, gam keca poprapudi, uku dongopu. Tonda, nimidi kouramenge keca gandum cap, akeca utopu dinin, yuk keca cap karepu.

Tonda, ‘Allah cap nimi cap telep kupra kikiman kunkamep’ tenen, gam keca karepmaunge di, meta tupa akapmau ngeda, weika di ton karepudi uku dongopu.

Uda, Salomodi, akeca-keca yuma, Allah er si eremna ati bura tara ila go neitamai dipu karepka deiyoda ake. Ada, Allah karena tep ila pala gel doupra, pala gel taplakra yakeipi ngeda, yambulai cadi, atumi di ayala-ayala yuma karepi ngeda, pio weike tep, agel pala keteneiami deiki di, akeca yuma men deipmanto kupu. Agel deikida yambul go kupka cadi, tali lupra yukaipu karepu.

65 Atep nengeda, Raja Salomo cap, sun Israel nesala yuma cap, nimi men nukmanto, pio weika di buluprapidi, ila kailya kalepra Allah tep gispal donmaidi, Allah er si eremna ati sah kepra deipi. ‘Ukunkamep’ tenen, yai nengda pio weike. Ada Hamat mutu bana tep gonga kepra baramyai di, adine dukdongopra dortara yuma, Mesir mutu ila me embaramngai damai kurami nengdi bulupra yai. Amutu-amutu neng yumadi, ue empat belas (14) tumi deiki di, kailya kalemaidi, Allah er si Yahweh tep gispal donmai. Mapmaiya berekopda, ue banbari tumi deiki neitamai di, Salomodi anesala yuma tep, “Telepe, sun pe mutu tamupra benkurume. Sun dabeso!” pepupa, bei.

66 Ukunmaiyanen, konum sengpepyopda, banbari tumi konum kupupa, Salomodi peipupa, ayala-ayala neng yuma sun pe mutu tamupra bendopi. Sun benkoi taruda, Raja Salomo tep telep upu peipi. Ada, ‘Allahdi Raja Salomo tep telep kweipkamre’ tenen, telep upu pepra, er deiki deipidi bendopi. Sun mutu tamupra benmai taruda, sun kange deipra pingpinga di bei. Ada, ‘Uo Allah er si Yahwehdi, er amutara pel doramu ngebo Raja Daud cap, Allah erdi wepra deamu neng, Israel nesala cap tep, pio telep-telep kupra melimamu,’ tenenmaidi banmaiyane, sun pe mutu bei.