1Ki 9 | XteSC | STEP | Salomodi Allah Yahweh, er si eremna ati cap, tonda Israel nesala sun deiyo ngebo kun ati cap, tonda yuk tenemunge cap, konum dopu dingeda, er teneramu keca yuma konum kupka tep yaprou.

1 Kings 9

Allah er si Yahwehdi, Salomo damai ue butene taru yaupa epu upu

1 Salomodi Allah Yahweh, er si eremna ati cap, tonda Israel nesala sun deiyo ngebo kun ati cap, tonda yuk tenemunge cap, konum dopu dingeda, er teneramu keca yuma konum kupka tep yaprou. 2 Ukupu pangeda, Allah er si Yahweh, menop taru Gibeon mutu neitamai yana Salomo tep jenek keamu utopu, ukutaru ue butene ngeda, Salomo damai Yerusalem mutu neitamai yana jenek kupra deipudi, Salomo tep pepu.

3 “Salomo kandi ne tep mororamnemum ngeda, konum gekepsidi, melimkamkene. Atep kandi ne si eremna ati dopnemum ngeda, ‘Pio telepai kunkamre’ tenen, nedi konum telep kupra deipmakene. Ada, akati boda, ne si konum dongopsa tep, ne si acapu tupa pio akapkamnere. Tonda akati cap, akati kunkameng nesala cap tep, pio dinkamne. Tonda, ne dipru neitamaida, akati tep pio tenenkamne. Angeda pio men tamkamne. 4 Salomo kan peda, kan nai bo Daud, inimna pio gun dipapu, dipru pio dumsisipu kuramudi, ne pepne upupu gekepra kuramu utopu ukunkamrume. Tonda, nedi, ‘Angeda kunkamrume, angeda ton men kunkamrume,’ pepsi ngeda, angepu moupra talepmemdi, kunkamrume.

5 Ukumem pangeda, nedi melimkenepane, kandi Israel nesala talepmemdi, sun ila nimi deiyo ngebo, sun Raja pio kunkamrume. Kan depmemnyopda, kan yala neng dipu Israel nesala talepra ila nimi deiyo neng, Raja neng kunkamenge. Ada, kan nai bo Daud tep, ‘Kan yala neng dipu Israel nesala talenkamenge. Ada, kandi deipmempa, dadeipdanen bankameng neng, Israel nesala sun deiyo neng pio kepbankamenge,’ peiamsitopu kunkamsene. Ada, nedi ‘Ukunkamrume,’ peramsi upu kupmemnyopda, ange kupkamkene,” Allahdi Salomo tep pepu.

6 Upepudi aupu ton dukdongopra pepu.

Dinino, kan cap, kandi deipmempa dadeipdanen bankameng nesala yuma capda, ne tep tapnengedi, isok sipu erepbamumdi ne si yanipnerumnyopda, wenepkamsene. Ange utopu nedi, ‘Angeda kunkamrume, angeda men kunkamrume,’ peramsi ngeda yanipnemumdi, tapnerumnyopda, nedi wenemkamsene.

7 Sun wenemna tep kunkamne ngeda ake. Ada, nedi ne nyapu Israel nesala tep, ‘Amutu kunkamrume,’ peramsidi kareramsisi mutuda, ka tamupra dopropkamsene. Tonda kandi dopnemum ati, ‘Ne mambul ati kunkamre. Akati pumbonda ne si eremkamnenge’ tenen, ne si akati deiki konum deipman dinin, sundi ne tapnemumnyopda, ne pe akati di gopra bendopkamne. Ukupnepa, nimi yuk mutu neng yumadi Israel nesala tep, mali-mali pepmengedi, nyek-nyek pepra autunkamenge. Tonda Israel nesala tep, ‘Sunda tali neng pua,’ penkamenge.

8 Ukutaruda, kandi dopnemum atida, urasin pio telep ati kurure. Akati utopunge ton men kurure. Dinino, sun Israel nesaladi mali-mali kupmengedi, ne tapnengyopda, nedi akati tapnepane, pio mali kupbankamre. Ukuprepa, uruptapkamenge. Ukupre pangeda, akati dam embange neng epmengedi, ‘Uo, ada warya tep kupu do?’ tenen, dupdup pepmengedi, upepkamenge. “Ware keca deiyo tep, Allah er si Yahwehdi, akati cap, amutu cap, anesala cap tep, pio mali kupra deipu do?” penkamenge.

9 Upepmengepane, yuk nengdi upenkamenge. “Gume, sun nai bo Allah, er si Yahwehdi sun co puna neng Mesir mutu di doupra, duyanamu ngebo, er si yanipidi isok sipu erepidi, isok amutara kurami pangeda, ‘Allah er si Yahwehdi anesala sun wenemna tep kupka,’ tenenkamenge. Ada, er tulum keca aneng sun nong deiki deipupa, pio kange mun keca weika di kareramupane, ‘Sun ikin weik kununge,’ penkamenge,” Allahdi Raja Salomo tep pepu.

Raja Salomo cap, Raja Hiram capdi, “Nun pel tonpa donkamneme,” peprei upu

10 Salomodi Allah cap, nimi cap antamdana tep, er si eremna ati cap, ila nimi deiyo ngebo Raja Salomo, er pe kuna ati cap tep, doramu keteng tamunda, dua puluh (20) tahun deiki di doramnganen, gawal daku. 11 Akati dona tep nengeda, Salomodi, ‘Libanon mutu cemara co cap, tali cemara co cap, tonda kunumna weik keca, er si emas cap deiki di, akati dopkamne,’ tenemu cadi, ‘Adopkamne,’ tenemunge tep, Tirus mutu talepra kuramu ngebo, Raja Hiramdi, akati dona tep keca, weika di dopropudi, dorodiramu. Ukuramupa, Raja Salomodi akati doramnganen, konum dopkupda, Raja Hiramdi kareramu keca yuma tep, kunumnada, Raja Salomodi, Galilea mutu neitamai dorami mutuda, dua puluh (20) mutu ati arum ton bokra karepu.

12 Karepu pangeda, Raja Hiramdi amutu 20 dina tep, Tirus mutu di, Galilea mutu neitamai bena dipetepu dinin, kange men deipu. Ada, Salomodi Hiram tep karepmau mutu yuma tep nengeda, ‘Dopropkune’ tenen, kange telep men kupu. Akati-akati tep nengeda, ‘Ne songe,’ tenepu. 13 Kange telep men kupu atep, Raja Hiramdi Raja Salomo tep upepu, “Ne kabo, kandi ne tep karepmanerem mutuda, wareto mutu akarepmanemum do? Amutuda, telep mutu guma,” pepra mawa di asipetepu. Ukupka tep, amutu-amutu yuma tep nengeda, si sipepkada, ‘Kabul mutu’ pepra deipu. Sun Ibrani upu deiki di, aupu deiyoda, ‘Pio mali mutu,’ tenen, peramitopu tupa penunge. Hiramdi asi pepra deipka cadi, ukutaru peda, atara nesaladi amutu tenepmengedi, ‘Amutuda mali mutu,’ tenepmengedi, amutu si tep, ‘Kabul mutu,’ pepra, tupa penunge. 14 Raja Hiramdi amutu tep, ‘Ne songe,’ teneramu dinin, Raja Salomo damai dopra deiamu kunumna weik keca emas, er ikinda empat ribu (4,000) kilo dubena karepu.

Salomodi yuk-yuk pel yuma domunge tep, pepu upu

15 Allah er si eremna ati dona cap, Raja Salomo er pe kuna ati dona cap, akati-akati atolong dona cap, ila ati arum ongopgenepra lyom gel beilya wina cap, tonda ila ati arum weneri, akota sida Hazor mutu cap, Megido mutu cap, Gezer mutu cap dona tep nengeda, Raja Salomodi, pio kankan neng kunupudi, pio ikin pel dimamupa, sun anengdi akeca-keca yuma pel pio weika di dorami. 16 Ukupu taru neitamaida, Raja Salomodi mutu si, Gezer mutu ati arum tamupra domu. Men taru Gezer mutu dorami ati arumda, Mesir mutu ila nimi deiyo ngebo, Piraundi amutu kurami nesala yumada, yan popbisiamudi, amutu kurami nesala yuma popra gawal dakudi, sun ati-ati yumada, uku dongopra gawal dakamo. Ukuamu mutuda Mesir mutu ila nimi deiyo ngebo Piraun er ner mida, Salomo dopkou atep, buru dipra deipu tumi di, Gezer mutu peda dopra er ner mi tep, tali karepu.

17 Men taruda, Mesir mutu deiyo ngebodi, Gezer mutu ati arum yuma uku dongopra gawal daku atep, amenda taruda, Raja Salomodi, ila ikin pel dimamupa, er pel don nengdi, akati arum kange di tamupra lepsisikra domi. Ange utopu, mutu si, Bet-Horon dutarange ton peda, lepsisikra domipa, telep kupu. 18 Ange utopu ton, mutu si Bahalat mutu cap, Tamar mutu cap, neitamai kwamu ati-ati arum yumada, mali kupka cadi, ange yuma kange di tamupra lepsisikra domupa, telep kupu. Ada, Yehuda tara neitamai dinin, amutu katuai tara kwamu mutu peda, Raja Salomodi ila ikin pelpu dimamupa, er tali pel dona nengdi, akati-akati yumada, ka di tamupra dorami.

19 Akota-kota yumada, ‘Akeca-keca yuma putapsere taru, adopkamne mutu di doproptepe’ tenen, tonda, ‘Amutu yuma ketenepra deipkamne, tonda ne jen talena nengdi mar porbenkameng taru, sun tu deiki embana keca, er si kereta kuda cap, akeca gipra bana tep, kuda bisam cap, amutu neitamai keana tep dadeiamnepane, mar porban taruda, akati arum neitamai di dopra, mar porbenkamepe,’ teneramudi, akota-akota yuma tep keteneiamu.

Utenepra keteneiamu mutu sida ake. Ada, mutu si Bahalat mutu cap, Tamar mutu cap doramudi, amutu neitamaida, er putapkamu keca dopra deiamu. Ange utopu, Raja Salomodi taleamu mutu yuma neitamaida, ‘Ange dopkamne, ange ton dopkamne,’ teneramu keca yumada, tali lupra doramudi, telep kupra deipu. Ada, Yerusalem mutu pe, Libanon mutu pe, amutu neitamai yumada, Salomodi, ‘Ukupkamne,’ teneamutopu, keteneipudi pel doramu.

20 Uda, ataru neitamaida, Salomo er pel dona tep ila ikin pel dimamupa, akati-akati dorami taruda, aila mutu neitamai tupa kurami nesala, Israel yala gum nesalada, sun si ake. Ada, sun Amori yala nesala cap, Het yala nesala cap, Feris yala nesala cap, Hewi yala nesala cap, Yebus yala nesala cap, amutu neitamai tupa tali dakurami. 21 Sun ayala-ayala nesala yumada, menop taru sun Israel nesaladi Kanaan mutu wekoi taruda, Allahdi, ‘Ayala-ayala nesala yumada, poprumudi, gawal dangkamrume,’ pepra deipu dinin, sun Israel nesaladi, ayala nesala yuma popra men gawal daki.

Ton ngeda, ‘Dakuapkamenge,’ tenepidi tamamipa, gam tupa kurami. Gam kuramidi, ayala nesala yumadi deiamipa, dadeipdanen yakarami nesala weik ton cap tapakra amutu neitamaipu kurami. Ange tep nengeda, anesala yuma tupa gam kuramya tep, Raja Salomodi, ‘Ne pel talipu donkamnenung’ tenen, erdi ila ikin pel dimamupa akati-akati arum yuma lepsisikra dorami. Tonda, angetopu, sun anesala peda, ataru pe Israel nesala sun pel melipra dona nengpu kununge.

22 Dinino, Raja Salomodi, Israel yala nesala sisada, ikin pel ton dipnepa, ati dona tep pel men dorami. Ange gum dinin, sun Israel yala nesala sisa tep nengeda, jen talena neng kemna cap, jen talena neng gung yuk-yuk tep deiyo kemna cap, sun ajen talena neng yuma ila nimi deiyo ngebo kemna cap, tonda mar porbana tep, perang kemne taru kereta kuda talena deiyo neng cap, kereta kuda talena neng, sun ila deiyo neng cap tep, tonda, Raja Salomo taleamu mutu yuma, dina cap, kalengna cap, ‘Ukupkamrume,’ pena deiyo neng cap pel dona tep nengeda, Israel yala nesala sisa wepra deriramupa, apelpu talepra dorami. Sun tep nengeda, ikin pel men dimamu.

23 Dinino, Raja Salomodi, akati-akati arum lepsisikra dona tep nengeda, apel epmengedi, ‘Ukupkamrume, ange ton ukupkamrume,’ pena deiyo neng tep, Israel yala nesala sisa ton, wepra deiamupa, apel talepra dorami. Salomo er pel yala-yala yuma, dona tep wepra deiamupa, deiyo neng kepra pel doromi nengda, denge weik lima ratus lima puluh (550) wepra deiamupa, apel tep kalengami. Sunda, deiyo kepra kuramidi, ikin pel dimamu nesala, yuk mutu nesala tep, “Ukunkamrume,” pepra, pel dorami.

24 Raja Salomodi Mesir mutu nimi deiyo ngebo Piraun, er ner mi dopra domudi, dakuramnganen, amenda taruda, ‘Yuk mutu bena kunkamre’ tenen, peipupa beu. Ada, Salomo er nai bo Daud kuramu ati arum neitamai dakuramnganen, gopra Salomodi aner tep ukupu dopu ati bena kuramu. Ukupupa, Allah er si eremna ati dam, itara iknapi tara, selatan tara kwamu tuda, Salomodi doropudi, telep kweipu. Tonda, ati arum er sida Milo mutu ton domu.

25 Salomodi Allah Yahweh er si eremna ati konum dopra keteneipu. Ukupkopda, tenpu keteng tamun neitamaida, ‘Nun mali kun keca daepra, telep kudinkamser,’ tenena tep, ue weneri deiki di, yapi keca popra mesba damai duyakaramudi, imam neng tep kareramupa, sundi ange dopra yana uku dongomami. Tonda, tenpu keteng tamun neitamaida, ue weneri deiki di, ‘Allah cap, nimi cap, antamepedi, telep kupra kikiman kutepe’ tenena tep, yuk gam keca ton popra yana kareramupa, imam nengdi uku dongomami. Utopu tonda, Allah gispal dona tep, nintong telep keca yana kareramupa, imam nengdi uku dongomami. Ange-ange yuma Salomodi konum kupbaramnganen, siryada, Allah er si eremna atida, konum gawal dakra dopudi, ange kuramu.

26 Uda yuk pelda, Raja Salomodi er laut mokon deiki embana tep, kapal laut perameng umpenada, domudi ketenepra deiamu. Ada, mutu si Ezion-Geber mutu di domu. Amutuda, ila laut mokon er si, Laut Teberau ^{▼▼Teberau – Ton Alkitab neitamaida, Laut Teberau sengami. Ton Alkitabda, Teluk Akaba sekami dinin, amutu tenpua.} pirman kwamu ati arumda ake. Ada, Edom yala nesala kurami mutu neitamai dinin, mutu si ton Elot mutu perami. 27 Salomo er laut mokon deiki embana tep umpena, er si kapal laut, konum keteneipu pangeda, er kabo Raja Hiramdi er tara neng, ada mokon deiki umpena doupra embana ila kael neng ton wepra doproiyamupa, Raja Salomo er tara neng cap, sun tonpa di akapal doupra embarami. 28 Sun anengdi, akapal deiki embenmaiyanen, Ofir mutu benapidi, gat keca emas, er ikineda, empat belas ribu (14,000) kilo gram doupra, Ofir mutu di tamupra, Raja Salomo er damai duyanami.