1Pe 1 | XteSC | STEP | Ne Peterusdi asurat sekeipsene. Yesus Kristusdi, ‘Ne upu dopra peterep embenkamre’ tenen, wepra deipneupa, Rasul ngebo kunune. Yu nengdi, ila kange mun keca sun deiki deriramipa, sun mutu sisa tapra, yuk-yuk bokra, dana-dana taru mutu sepdaro benamume. Ukutaruda, sun mutu sida, Pontus cap, Galatia cap, Kapadokia cap, Asia tara cap, Bitinia cap bokra, yuk-yuk kurum nesala tep, asurat sekeipsene. Allahdi, ‘Ne nyapu kunkameng’ tenen, teneamseutopu, sundi Yesus tep, konum teka teneruma cadi, tuai mutuda ke tarupu kurume. Allah er nyapu kuruma cadi, tuai mutu neitamaida, nimi bo neng utopu kurume. Nun mutu sisada im deiki pua.

1 Peter 1

Yesus wepra deipu ngebo Peterusdi, ‘Telepe’ pena tep, pepu upu

1 Ne Peterusdi asurat sekeipsene. Yesus Kristusdi, ‘Ne upu dopra peterep embenkamre’ tenen, wepra deipneupa, Rasul ngebo kunune. Yu nengdi, ila kange mun keca sun deiki deriramipa, sun mutu sisa tapra, yuk-yuk bokra, dana-dana taru mutu sepdaro benamume. Ukutaruda, sun mutu sida, Pontus cap, Galatia cap, Kapadokia cap, Asia tara cap, Bitinia cap bokra, yuk-yuk kurum nesala tep, asurat sekeipsene. Allahdi, ‘Ne nyapu kunkameng’ tenen, teneamseutopu, sundi Yesus tep, konum teka teneruma cadi, tuai mutuda ke tarupu kurume. Allah er nyapu kuruma cadi, tuai mutu neitamaida, nimi bo neng utopu kurume. Nun mutu sisada im deiki pua.

2 Nun nai Allahdi menop taru konum weamseudi teneamseutopu, Allah er Lek Sambaladi sun dipru neitamai mali keca daepseudi, telep kudisere deiki Allahdi wepra deipseue. ‘Ukunkamenge’ tenen, Allahdi wepra deiamseua deiyoda pepkusene. Ada, ‘Yesus Kristus er yapi embeua deiki di, sun mali keca daepseredi, gum kupra deipserepa, er upupu talepra dombankameng’ tenen, wepra deipseue. Allahdi bicau teneseredi, nun putasere keca tali kareserenge cap, Allah cap dipru dukdongopra kumumdi, yuk nesala cap kange deipra telep kupra kikiman kunkamrumnge cap, ‘Ange yuma weik kupbankamser’ tenen, Allah morosenune.

Nun nai Allah tep, er si erepra, “Pio telepe,” penkamepa tep, pepu upu

3 Nun Deiyo Ngebo Yesus Kristus, er nai bo Allah kurure. Nundi, er si eremnup Allah tep, “Telepe,” pepra, er si pio eremkamepe. ‘Walito’ tenen, nun mali kunup keca tep, adipapu wenepra popsetu dinin, bicau tenepseudi, nun mali kunange konum kaukepseudi, daepseue. Ukupseudi, ukupu derinung nyapu uotopu nesala konum kweipseudi, pio gam kuna deiyo keca konum karepseue. Ukupu nesala kupra deipseuada, Yesus Kristus depupa, gam bukra deipka deiki di, er nyapu sisa kemdiserure. Ukuserepa, nun kange dipru yuma, Allah er deikipu deipmepepdi, amenda depmepyopda, tek sisi im deiki tupa gam pio kunkamepe. Ukunkamepnge tep, kange tenimtona gum dipapu, ‘Angeda, pio tek sisi kunkamepe’ tenen, kange deipra kupedi, ‘Dan taru doryankamser do?’ tenen, dinapu kunupe.

4 Tonda Allahdi, ‘Ne nyapu kununga’ tenen, mengne keca karenkamsere ngeda, lyuna cap, gum kupbana cap, mali kupbana cap, pio men kuptue. Pio telep keca karenkamserada, im deiki di ketenepra mawa deipseua cadi, tupa akunkamsere. Ange men gum kupkamsere. Sun ton akeca doronkamrume.

5 Sunda, Allah tep teka teneruma tep, Allahdi, ‘Ne nyapu mali kupnung’ tenen, er puto deiki di pio kalekra lelimdongoserure. Ukutaru di dipra, adinen doryankamre taru yumada, er puto di kalekra lelimserepa, sirya gawal dangne taru konum kupyopda, Allahdi lyemna keca konum keteneiamseua tep, Yesus amenda taru tamupra tuai mutu yaryopda, sirya gawal dangna tep, lyepkamsere. Sirya taruda pio tep nimi lyemna keca konum keteneiamseunge yumada, jenek kupra katuai keipserepa, nun yumadi ange dinkamepe. 6 Yesusdi tamupra yaredi, lyepropkamserenge yuma katuai lap pepra deipkamsera tep nengeda, teka teneprumudi, pio telep kange deipra kurume. Ukurum dinino, ukutaru cap, yambulanun oryankamre taru cap, dipru kurpeten keca yala-yala weik tupa kuserepa, kange mun kange doupra ikin kunkamsere. Ikin kunkamsera peda, pio telep kange deipra kurume.

7 Dipru kurpeten keca kuserenge deiyoda pepkusene. Ada sun teka tenepra, Yesus talepra kumum keca yumada, kurpeteserepa, dipru wisipseredi, ‘Tek sisi pio gatpu, sun teka tenenungada, pio tek sisingepu kunkamser’ tenen, ikin keca sun damai yakaserure. Ukupmantoda, ake. Kunumna weike keca er si emasda, ‘Mali keca tupa akapunge, gum kuptue’ tenen, uku dongopmengepa, uku di amali keca jeproprepa, emas pio telepngepu dopra derinung dinin, tek sisi telep emas peda gum kuptue. Emasda, kunumna weik keca kurur dinin, ange peda, yambul mambul kecapu kurure. Dinino, sundi teka tenepra Yesuspu talepra kumum keca yumada, ila kunumna weik keca utopu, ila mambul weik kurure. Ikin kuserur keca di, sun teka tenemum keca kurpeteserepa, konum telep kupyopda, Allahdi peiprepa, Yesus Kristus tamupra, tuai mutu katuai yankamre taruda, Allahdi telepe pena cap, gispal dona cap, ila dirine cap, ila si cap karepseredi ereipseryopda, nimi yumadi, nun tep gispal dopra gudinkamsere.

8 Yesus Kristusda, pumun taru di dipra, ataru neitama yumada, men diramrum dinin, er tep dipru karepra, sun kange dipru er deiki derirume. Ukutaru peda, er nong men dirum dinin, er tep teka tenepra, erpu talepra kumumpa, erdi sun dipru neitamai, kange deipra pingping kemdiserure. Kange deipra pingping kemdiserur kecada, tali nimi upu deiki di, nun men lap peptepe. 9 Kange pingping kudisere ngeda, mesum tep men kuserure. Deiyoda, Allahdi, ‘Ukunkameng’ tenen, Allah teka tenerum kecada, konum dororuma cadi, ila di kange derirume. Ada, sun kange cap, dipru cap, sambala cap yumada, lyepseredi telep kudisere ngeda, konum dororuma tep pepsene.

10 Allah er upu lap perami neng, nabi ^{▼▼Nabi, Allah er upu lap pena neng – Allah er upu lap pena nengda, Allahdi, ‘Nimi gekepkameng’ tenen, erdi wepra deiamu neng tep, er tek sisi upu cap, amenda kupkamre keca upu cap, lap peramu pangeda, anengdi, yuk nesala yuma tep lap perbarami. Anengda ‘nabi neng’ penupe. Nabi neng, sun lap pena upuda, nomor 25 dirume.} nengda, Allah bicau teneseredi, er kange dipapu melipra karesere keca cap, lyemserenge cap, yankamseua tep, sun nabi nengdi, sun upu lap perami taru yumada, ‘Apenmap upuda, yambulanun walwal tupa kuserura cadi, aupu deiyo neitamai ngeda moupra kael keptepe’ tenen, pio moupra lelepra dirpeterami dinin, Allahdi nun lyemserur keca deiyo ngeda, ataru moupra men tenepra kael keami. 11 Ada Kristus er Sambaladi, nabi neng sun dipru neitamai upu lap peramupa, peteremaminge ‘Deiyo ake’ tenen, moupra men kael keami. Lap peramu upu ada, Kristus ikin kupkamunge cap, popkaminge cap, ikin kupkaunge cap, amenda sirya taru, Allahdi Yesus gam bukra deipkamudi, ila mambul keca, pio telep kupra kupkamunge cap tep, upu lap peramu. Kristus er Sambaladi, aupu lap peramupa, sun pumun taru kurami nabi-nabi nengdi, ‘Uo ayankamre keca cap, yankamre taru cap, ayankamre taru neitamai di kupkamre kecada, moupra kael keptepe,’ teneramidi, pio pirirtererami. Pirirtererami dinin, ange yuma deiyoda, moupra men kael kepmanto kurami.

12 Ataruda, Allahdi er upu lap perami neng, sun nabi neng tep, sun dipru neitamai di katuai lap pepu. “Gume, ne Lek Sambaladi sun dipruai peipserepa, amenda taru kupkamre keca tep, upu lap perum ngeda, ada sun ukutaru kunmarum nesala tep gume. Akeca yumada, amenda dorkunkamre taru kunkameng nesala tep kupkamre,” Allahdi sun nabi neng tep lap peiamu. Allahdi apio telep kunkamser keca yumada, Allah er im deiki pel don neng, sun malaikat peda, ‘Uo, Allahdi apel dore ngeda, pio telep kurura cadi, nun ton ange kael keptepe’ tenen, kange deipra moupra dinunge.

“Pio telep kupra dumsisipu kunkamrume,” pepu upu

13 Ange tep nengeda, dumsisipu kuna tep, sun kange moupmumdi, ‘Allah er pelpu puto di donkamep’ tenen, ketenepra dinapu kunkamrume. Tonda, ‘Mali kupnup’ tenen, kange moupra kalengdamumdi, teleppu kunkamrume. Ange pio tupa kunkamrume. Allahdi Yesus katuai keiprepa, Yesus Kristus tamupra yankamre taruda, bicau tenepserdi er kange dipapu melipra karenkamser keca tep, ‘Tek sisi ukupkamsere’ tenen, teka tenepra, sun kange dipru yuma, Allah deikipu derinkamrume.

14 Yesus kapul men teka teneamrum taru neitamaida, walwal nesala kuramrumdi, mali kecapu putaramseupa, mali kupra kuramrume. Menop taruda, walwalpu kuramrum dinin, ukutaruda ange utopu men kunkamrume. Ange gum dinin, ukupmantoda, telep nyapudi sun nai yapudi penge upu moupra gekepmengedi, dombaramengtopu, sun peda Allah er upu gekepmumdi er telep bisipu dombankamrume. 15 ‘Ne nyapu sisa kunkameng’ tenen, sun upupseu ngebo, Allahda mali kuna ngeda, tenpunge peda men kuredi, er dumsisi kuretopu, sun peda sun mali keca yuma tapra, sun kunkamrum keca yumada, dumsisipu kunkamrume. 16 Ukunkamruma deiyoda, Allah upu neitam sekra deiamseu upuda ake.
‘Allahdi pepu, “Ne dumsisi kunetopu, sun peda dumsisipu kunkamrume,” pepseu.’ (Imamat 20:7)

17 Sun Allah mororum taru di, ‘Nun Nai Allah,’ perum ngebo Allahda, nimi tuai nesala yuma, sun kunge keca dipeteseredi, sun kunge keca kuramre utopu, upu bokeipseredi, wenemserure. Nimi yuk-yuk kuramengtopu, ange diseredi, akeca akwamretopu kupra, upu bokra wenemserure. Ton neng tep, ‘Telep kunung’ tenen, kange derirure. Allahdi nimi kamo dipetepredi, ‘Angeboda ne kap cadi, er mali kure kecada dakwapye,’ tenena gum dipapu, nun kurameptopu, upu yuk-yuk bokra wenemserure. Atep nengeda, sun tuai mutu keana kunkamrum taru yumada, ‘Allah erda ila mambule. Mali kupmepyopda, tek sisi wenepkamsere,’ tenen, kware kuprepa pio beipra dumsisipu kunkamrume.

18 Ukunkamrumada, mesum tep gume. Deiyoda sun kaele, Yesus kunupseudi, lyepseu kecada, tali keca, gum kupkamre keca perak cap, emas cap, utopu keca deiki di men kunupseu. Sun co puna nengdi, “Ukunkamrume,” pepra, tali-tali peteremamseipa, kuramrum keca taleamseua neitamai di, Yesusdi men gum kupmanto keca deiki di kunupseudi, loptapra lyepseue. 19 Tali gum kure keca deiki di men kunupseu dinin, Yesus Kristusda, domba yo kwanena cap, nong bol mali kuna cap, men kwamrenge utopu, pio teleppu kuramudi, pio telep mambul keca deiki di, ada er pe yapi deiki di kunupra lyepseue.

20 Allahdi akeca-keca yuma kapul men ketekeiamu taruda, ‘Yesusdi nimi lyepkamre’ tenen, konum wepra deiamu dinin, ukuda sirya tarupuda, sun lyemna tep konum katuai di karepseupa, kael kemnupe. 21 Yesus pel dopseudi, melimserya deiki di, Allah teka tenerume. Yesus depupa, Allahdi gam bukra deipudi, ila dirine cap, mambul kuna cap deiki di, gam bukra ereipka tep, sundi Allah tep, teka konum teneprume. Teka teneprumudi, ‘Allahdi ukupkamsere’ tenen, ketenepra dinapu kurumnge cap, ‘Allah er dipu melipra lyepropseredi, pio telep kweipkamsere,’ tenena cap, tep nengeda, sun kange dipru yumada, Allah er deikipu derirume.

22 Uda, Allah er tek sisi upu talepra dombaramrumnya deiki di, sun mali kuramrum keca yuma konum tapruma cadi, yuk teka tenena nesala tep, tek sisi dipru karepra makudanapu kurume. Ange tep nengeda, pio tek sisi sun dipru cap, kange cap, karepdamumdi, bicau tenedamumdi, ila di makudanapu kunkamrume.

23 Ukunkamruma deiyoda ake. Ada, ukupmantoda, nerapudi ukupu nyapu deriramengtopu, Allah lyepseudi, sun kange dipru ukupunge utopu kupra karepseua cadi, ukupu nesala utopu kurume. Telep kweipseudi, ukupu nesala utopu keipseuada, tali gum kure keca deiki di men kupu. Ange gum dinin, Allah er gam kudisere upu, men gum kuptupa, pio akunkamre upu deiki di, ukupu nesala utopu kupra deipseue. 24 “Allah er upu pio kunkamre,” pepsen upu tep nengeda, aupu dipterepso. Yesayadi sekeiamseu upuda ake.
‘Nimi tuai nesala yumada, mutmuta utopu kununge. Sun urasin telep kununga cap, sundi ketkemnung keca telep keca yuma cap, mutmuta deiki kait popmaryanen, koluprepa kamsangamretopu kununge.’
25 ‘Nesala yumada gum kupkameng dinino Allah er upuda, tenpu ton men gum kupkamre. Pio atep, akapkamre.’ (Yesaya 40:6-8)

Yesayadi sekeiamupa peteremamseipa, gekeramrum upuda, ne Paulusdi apepsene.