1Pe 2 | XteSC | STEP | Allah er pio tep, kapkamre upu peteremamseiya tep, mali kun keca yumada, yamdongonkamrume. Ada, yuk neng tep, tulum kuna cap, mawa di tali pertamna cap, ‘Yuk neng keca ne ton doproptene’ tenen, dipru neitamai putaprepa engena cap, mali kun keca akapmarepapu, nong bol deikipu telep kuna cap, yuk neng tep kip upu pepra, luludina pena cap, amali kun keca yala-yala yumada, tapra yamdongonkamrume.

1 Peter 2

“Mali kun keca yuma tapra, Allah er upupu talepra kunkamrume,” pepu upu

1 Allah er pio tep, kapkamre upu peteremamseiya tep, mali kun keca yumada, yamdongonkamrume. Ada, yuk neng tep, tulum kuna cap, mawa di tali pertamna cap, ‘Yuk neng keca ne ton doproptene’ tenen, dipru neitamai putaprepa engena cap, mali kun keca akapmarepapu, nong bol deikipu telep kuna cap, yuk neng tep kip upu pepra, luludina pena cap, amali kun keca yala-yala yumada, tapra yamdongonkamrume. 2 Ukupu deipmenge nyapudi, sun nin yapu moum teyung pio putaramretopu, Allah er pio telep upu, dipruai wisiprap telep kudisere upu tep, pio putankamsere. Ukupra putapserepa, gekepra doronapu kuprumyopda, Allahdi lyepseupa, er cap dipru dukdongopra kurumnyada, pio wisipbaramreanen, teleppu kunkamsere. 3 Yesus cap dipru dukdongopra kurumnyada, ‘Telep kurure’ tenen, konum kael kepmaruma tep, apio kunkamrume.

“Allahdi wepra deipseua tep, dumsisipu kunkamrume,” pepu upu

4 Uda, ukupmanto upu pepkusene. Ada, Yesusda ati don gel utopu kurur dinin, erda pio Gam Gel utopu kurure. Nesala ban-ban yumadi, ‘Agel tali gel’ tenen, tamami dinin, Allahdi Yesus tep, ‘Agelda, ila mambule,’ tenepra wepra deiamu. 5 Sun peda, gam gel utopu kuruma cadi, Yesus cap dipru dukdongopra kurum taru yumada, er dopropseredi, ati dona utopu kupra, tenpu nongto neng keipseredi, telep kweipkamsere. Tonda, ‘Allah cap, mali kun nesala cap, antapra kikiman kuptepe’ tenen, antamdina deiyo neng tep, Allah karena deiyo neng utopu kemdiserure. Ukusere pangeda, Yesus Kristus cap dipru dukdongopra dumsisi kumumnya deiki di, Allah tep telep keca karenkamrume. Ada asuru dinup keca gum dinin, tonda nong kepman talinge tep men karenkamrum dinin, Allahdi, ‘Ange telep,’ tenere ngepu, sun kange dipru neitamai di, Yesus Kristus tep, teka tenenkamrume.

6 Ukunkamruma tep nengeda, Yesayadi Allah er upu neitamai upepra sekeipseue. Er domon upu di pepu upuda ake.
‘Allahdi upepu. “Sun dipetepso, pio mambul gel tenpu, Sion mutu neitamai wepra deiamsisi.
Ware neng do yuma, er tep teka tenepra agel deiki kange derinung nengda, tek sisi ali men kunkamenge. Tonda, nedi anesala tep pio men tapkamne,” Allahdi pepu.’ (Yesaya 28:16)

7 Ukutaru, sundi Yesus tep teka tenerum nesala peda, agel utopu ngebo, Yesus tep nengeda, ‘Erda pio telep, ila mambule kurure,’ tenerume. Dinino, sun teka men tenenge nesala tep nengeda, Allah upu buku Mazmur neitamai di aupu peipu.
‘Sun ati dona deiyo nengdi, ‘Agelda mali gel’ tenen, tapinge puda, gel ati dana-dana tara, dela dungdongonai, agel deipmanga cadi, ukutaru ila mambul gel konum kupsere.’ (Mazmur 118:22)

8 Tonda aupu dipetepso. Yesayadi aupu sekeipseue.
‘Agelda, nimi embandenkapmengedi, yan giso dungrepa, kwemdanunge.
Tonda agel di, yan giso dungrepa, sangnunge.’ (Yesaya 8:14)

Sun teka tenena gum nengdi, Yesus er upu men gekengedi, talepra men dombanunga cadi, nimidi yan giso dungrepa sangamengtopu, ‘Yesus tep teka men tenenkamepe,’ tenengedi, pio malipu kununge. Ada mesum tep gume. Menop taruda, Allahdi anesala tep, ‘Ukunkamenge,’ konum teneamutopu, ukutaru angepu kununge.

9 Teka tenena gum nengdi, ukunung dinino, sun teka tenerum nesalapuda, Allahdi, ‘Ne nyapu kepmengedi, dumsisipu kunkameng’ tenen, konum wepra deiamseue. Tonda, ‘Ne pelpu dongedi, nesala cap, Allah cap antamdina deiyo neng kunkameng’ tenen, wepra deiamseue. Sunda kunungna neitamai utopu, mali kuramrumnya neitamai kuramrumpane, Allah upupseudi, sun dopra telep dirinai utopu derirbeseue. Ukupseua deiyoda, ‘Allah er si erepra, er tep telepe pepra, pio kunkameng’ tenen, dirinai derirbeseue.
10 Pumunda, pio mambul nesala men kuramrum dinin, ukutaruda Allahdi er mawa tep, er nyapu konum keipseue.
Ange utopu, menmena wenemna gum di, kaukepseredi, tali melipra lyemsere keca, pumun taru men dororamrum dinin, ukutaruda, akeca konum dororume.

11 Ne kayapu, bicau tenesenune. Sun mutu sisada, im deiki kurura cadi, tuai mutu neitamai, nimi bo nesala utopu kupra keana kurum taru yumada, mali kun keca putaserenge yumada, yapra lumdongonkamrume. Yesus teka kapul men teneramrum taruda, mali kun keca putaramseua deiki di, sun kange dipru cap, sambala cap, popbisipra mali kudiserure. Atep, ukutaruda, amali kun keca yumada, yamdongonapu kunkamrume.

12 Yesus tep, teka men tenenge nesala kan-kan kurum taruda, anengdi sun tep, “Anengda mali nesala,” pepra lulupra derinkamseng dinin, sun cap, aneng cap kikiman kurumu taruda, pio tek sisi dumsisipu kurum pangeda, sun telep kurum keca epsengedi, Allah doryankamser taruda, anengdi loipsengedi, “Uo, Allahdi anesla lyepupa, teleppu kunungada, pio mambule,” pepra, Allah er si ereipkamenge.

“Nimi deiyo neng, sun amngai kupra, bouna di kunkamrume,” pepu upu

13 – 14 Nun Deiyo Ngebo Yesus tep, ‘Mali upu pepsenung’ tenen, ila nimi deiyo-deiyo neng yala-yala yumada, sun amngai bukra bouna di kunkamrume. Ada, akeca-keca yuma deiki tara talepra kure ngebo Raja pe, tonda erdi dokotemre ngebo peda, sundi penge upu moupra gekenkamrume. Raja ngebodi, er amngai kure ngebo Gubenur tep, ‘Angebodi, sun mali neng wepra wenepkamre dinin, erdi, sun telep kunge neng tep, melimkamre’ tenen, dokotemre ngebo, Gubernur yala neng peda, sun amngai bukra bouna dipu kunkamrume. Sundi penge upu moupra gekenkamrume.

15 Ukunkamruma deiyoda ake. Ada, sun walwal nengdi, tali upu pepra luludikamseng dinin, sun teka tenerum nesaladi, pio telep, dumsisipu kurumnya deiki di, ‘Anengdi, mali upu pesenungada, upu sengdongonkamrum’ tenen, Allahdi konum teneamseue. 16 Sunda, mali kun keca neitamai, Allahdi lyepra loptapseu neng, dumsisi kun neng utopu kunkamrume. Ukupra kunkamrum dinino, ‘Nunda Allahdi konum lyepra loptapseua cadi, nun tenepmepe kecapu, tali lupra kunkamepe,’ tenena meme. Mali kun keca inipra men kunkamrume. Allah er upu gekepra, er pelpu dopra, dumsisi kunge neng kuramengtopu, sun peda utopu dumsisipu kunkamrume.

17 Ware nesala do yuma, ‘Telepe’ pepra, gispal dopra kunkamrume. Sun Allah teka tenerumnya utopu, yuk teka tenenge neng tep, bicau tenepra makudanapu kunkamrume. ‘Allah tep mali kupnup’ tenen, mali kunange yumada, beipra kunkamrume. Nimi talena ila Deiyo neng, Raja yala neng yuma tep, gispal dopra kunkamrume.

18 Isomka nengdi, sun yuk neng tep, ‘Nun pel tali donkamseng’ tenen, co bo deiki di kunupseidi, ikin pel dimengepa, pel melipra dorumu nengda, ^{▼▼pel melipra dorumu nengda – Pumun taru co bo deiki kunumami nesalada, isomka nengdi, pio kankan kurami nesala tep, co bo deiki di kunuamipa, akankan kurami nesaladi, sun isomka nesala tep, sun pel talipu pel dorami. Ada sun pel dona tep, kunumna keca dorona gum dipapu, mesum tep apel dorami. Tonda, lap pena upuda, nomor 36 dirume.} sun deiyo neng tep, bouna di sun upu gekepra, sun amngai kunkamrume. Ada, nun putasere keca tenepra, nun tep telep kunge deiyo neng tepapu gume. Tonda yuk deiyo nengdi, sun tep yu pepra, ikin pel dimsenung dinin, sun aneng peda, sun tepapu, sun amngai bukra bouna di kunkamrume.

19 Ukunkamrumada, mesum tep gume. Ada, mali men kurum dinin, sun deiyo nengdi, ikin keca weik sun nong deiki deipsengepa, ikin weik kuprepa, kurum neng peda, ‘Allahdi kange deipkamser’ tenen, sundi mali upu tamupra men penkamrume. Tali dimpepra, sun deiyo neng amngai bouna dipu kunkamrume. Ukunkamruma tep nengeda, Allahdi sun tep kange derinkamserure. 20 Dinino, sun mali kuprumupa, sun deiyo nengdi, sun nong deiki ikin keca deipsengedi, bongopra popsenge pangeda, sundi bouna di kaukepra kuramrumnya peda, Allahdi kange men deipkamsere. Ada mali konum kupruma tep, ikin keca sun nong deiki derisengedi posenunga tepa. Ukuprumyopda, Allahdi kange men derinkamsere. Ada mali kupmaruma tepa.

Dinino, sun telep-teleppu kurumudi, deiyo men kwapmarepane, sun deiyo nengdi sun nong deiki ikin keca deipsengedi, popsengepa, bouna di kaukepra kuramrum pangeda, Allahdi kange derinkamsere. Ada telep kupmaruma tepa.

21 Sundi, teleppu kuprumupa, deiyo men kwapmarepapu, yu nengdi, sun nong deiki ikin keca derisenungada, Allahdi ange konum teneamseudi, ‘Sunda kaukepra bouna di kunkameng’ tenen, Allahdi upupseue. ‘Ukunkameng’ tenen, upupseua deiyoda pepkusene. Ada, Yesus Kristusdi sun lyepkamseua tep, er nong deiki ikin keca weik deipipa, kange mun kange doupra pu tep dounmauada, Allahdi, ‘Sun peda ukunkamruma’ tenen, ukupmanto neng tep peten keipseue. Ada, ‘Yesus ikin weik kupu dinin, bouna di kaukepra kuputopu, sun peda utopu kunkamrum’ tenen, wepseudi, petenkemna neng utopu keipseue. 22 Yesaya sekeipu upu neitamai di aupu pepu.
‘Yesusda, mali kun keca tenpu peda, men kuramu.
Tonda, mawa di tali pertamna upuda, pio men peramu.’ (Yesaya 53:9)

23 Sun mali nengdi, Yesus tep mali-mali upu pepra, er nong deiki ikin keca deipmemei dinin, erdi sun tep, upu tamupra men pepu. Ikin kupupa dounmau taruda, aneng tep kwang dangna upu ton men pepu. Kwang dangna upu pena gum dipapu, er pedi er pe nongpu Allah tep karepu. Allahda, tek sisi telep kuprap dumsisipu upu bongdirur ngebo kurura tepa. 24 Allahdi nun mali kunup keca tep, ito dalupra poptapsetu dinin, Yesus Kristusdi, nun popsetu keca yuma dopra, er nong deiki deipdapudi, sengdin co deiki derirbeseudi depu. Nun mali kun keca daemna tep depseu ngeda, tali tep gume.

Ada, sun konum depmange nesalada, mali kun keca men teneptengedi, men putaptu utopu, nun peda mali keca putana cap, mali kuna cap, pio gum di, ‘Dumsisipu kunkameng’ tenen, Yesusdi nun tep punupseudi, er depka deiki di lyepseue. Sun yu nengdi Yesus tep popmemeipa, er depka deiki di, nun tep konum telep kweipseue.

25 Ukupmantoda, domba bisam telep bisi tapmengedi, nira bisi gwekdanen embaramengtopu, sun peda pumun taruda, sun yuma mali bisipu embaramrume. Dinino, domba bisam amenda taru, sun peiramu ngebo, er damai tamupra yakaramengtopu, sunda ukutaruda, sun domba bisam Peiramua Deiyo Ngebo damaipu tamupra yakanmarume. Ton nengda konum yanmarume. Ada, sun kange dipru cap, sambala cap melimseredi, ‘Mali kupnung’ tenen, dirtereserya Deiyo Ngebo damai konum yana kuruma tep pepsene.