1 Peter 3

Nimi cap, er ner cap, sun dipru dukdongopra kuna tep, pepu upu

1Sun nimi don nerapuda aupu gekepso. ‘Nimi deiyo neng utopu neng tep, bouna di sun amngai kunkamrume,’ peipmasentopu, sun nerapu peda, sun nenge yapu amngai kurumudi, sun upu gekepmumdi, dipru kikiman dukdongopra kunkamrume.

Ukunkamruma deiyoda, sun nenge yapu kankan, teka tenena gum neng akuramtenge teptoda, sun nerapudi telep kumum keca epmenga deiki di, moupra kael kepmengedi, teka tenenkamenge. Sundi sun neng yapu tep, “Kan peda teka tenepkurume,” weika di men pedankamrum dinin, sun nerapu telep kunkamru keca epmengopda, sun neng yapu pedipapu teka tenenkamenge.

2Ada mali kuna pio gum di, dumsisipu kurumunge cap, ‘Allah erpuda pio mambule’ tenen, er upu gekepra dombarumnge cap, sun neng yapudi ange epmengopda, moupra kael kepmengedi teka tenenkamenge. 3‘Urasin pio telep nerapu,’ tenenkamseng kecada, nong bol deiki kenengna keca cap, kwerya keca cap teppu gume. Atep, potong kouna cap, kwerya keca kemna cap, pio urasin telep opkal kenengna cap, ukurumnya deiki di, ‘Urasin telep nerapu tenenkamseng,’ tenena gume.

4Angeda gum dinin, sun kange dipru neitamai, telep-telep kupra kuramrumnya deiki di, tek sisi telep nerapu kunkamrume. Sun bouna di dimpepra kurum nge cap, upu weika di pena gum, dipru dukdongopra bouna di kuna capda, dipru neitam kuserur keca cadi, nong bol deiki kusere keca, wisi deipmepepa, sungamsertopu gume. Atelep kun kecada, dipru neitam pio kuserepa, Allah er kangeda, ‘Angeda pio mambule,’ teneredi, kange deriserure. Atep, nong bol deiki kenengna kecada, mambul tenena gume. Ila mambul ngeda, sun kange dipru neitamai kuserur keca pua. Angepu tenenkamrume.

5Angeda mesum tep men pepsene. Deiyoda, menop taru dumsisipu kurami nerapudi, Allah deiki kange deipra kuramidi, sun dipru neitam telep kuramia deiki dipu, urasin telep nerapu kupra deridarami. Atep, sun kuramitopu, sun ukutaru kurumu nerapu peda, utopu kunkamrume. Sun menop taru dumsisi kurami nerapuda, sun neng yapu amngai pio bouna di kurami. 6Sun ukuramitopu, menop taru kuramu ner, er sida Sara peda, er nenge Abraham tep, “Kanda ne deiyo ngebo,” pepra, er amngai kuramudi, er upu gekepra bouna di kuramu. Ange tep nengeda, sun ukutaru kurum nerapu peda, sundi akeca-keca yuma tep, kwar dangna gum di, dumsisipu kuramtum teptoda, Sara er ner nyapu utopu kunkamrume.

7Ange utopu, sun neng yapu peda, sun nerapu cap, dipru dukdongopra tonpa kunkamrum taru yumada, sun nerapu sun putare keca moupra tenepmumdi, makunkamrume. Tonda, ‘Nun nerapuda, sun puto yambulpu kurure,’ tenepmumdi, Allahdi bol koptapra, gam pio kuna deiyo keca, er kange dipapu, melipra kareseryada, ‘Nun cap, nun nerapu cap, akeca kikiman doronkamepe,’ tenenkamrume. Ukupra kunkamruma deiyoda ake. Apepmasentopu tek sisi kuramum pangeda, sun Allah tep mororum taru yumada, akeca-keca yumadi, sun mororum ngeda, men sekdongopsetue.

“Telep kupra kumum dinin, yu nengdi, ikin keca derisenunge,” pepu upu

8Apenmasen upu gawal dangnenge tep pepkusene. Sun yumada tenpu kange doupra, dipru dukdongopra telep-teleppu kupra kikiman kunkamrume. Sun weitapsilip tenpu kange tenepra, dipru karedangedi, kikiman kuramengtopu, sundi yuk neng putare keca tep, bicau tenepra makunkamrume. Sundi, yuk neng sun ikin kusere keca tep, ‘Uo angeda mambule,’ tenepra bicau tenedankamrume. Tonda yuk neng sun amutara kumumdi, bouna di kikiman kunkamrume. 9Yuk nengdi sun tep mali kupsengopda, tamupra kwangdana gume. Tonda, yuk nengdi sun tep, yu doupra mali upu pepsengopda, tamupra sun tep, mali upu men pedankamrum dinin, “Allahdi, ‘Telep kudinkamsere’ tenen, Allah moronkamsene,” pepra, telep upupu tamupra penkamrume. Sundi yuk neng tep, ‘Telep upu pedinkameng’ tenen, Allahdi wepra upupseua cadi, ukuramum pangeda, Allahdi telep kudinkamsere.

10Apepsen upu deiyoda, Mazmur upu neitamai seki ngeda ake.
‘Ware nesala do yuma, ‘Telep-telep kupra pio kunkamepe’ tenen, putapre nesalada, sun pedipapu moupra kalengdangedi, mawa di tali upu pena cap, mali upu pena cap, pio men kunkamenge.
11Sun adipapu, ‘Mali kun keca yuma tapra, dumsisi telep kun kecapu kungedi, nimi yuma antapra, telep kupra kikiman kunkamep’ tenen, pe deipra pel donkamenge.’
12‘Ukunkamenga deiyo tep ngeda ake. Ada, Allah er upu gekepra dumsisipu kunge nesalada, Allahdi pio melipra diserure. Tonda, sundi er tep moronung keca yumada, pio moupra gekerure.
Dinino, sun mali-mali kunge nesala tep nengeda, Allahdi sun upu sekredi, tamdongorure.’ (Mazmur 34:12-16)

13Telep kun kecapu putaserepa, apu kumum pangeda, ware nesaladi, ikin keca sun nong deiki deipsengedi, mali kweipkamseng do? 14Dinino, sun teleppu kupra kumumyopda, deiyo men kwapmarepapu, sun mali nengdi ikin keca sun nong deiki deipsenge pangeda, kange deipra ‘Telepe pua,’ tenenkamrume. Allahdi kange deipseredi, sun tep telep kweipkamsera tepa. Ware nesala do yuma tep, sun tep kware men kunkamre. Tonda sun teka tenena gum nengdi, kware kure keca tep nengeda, sun teka tenena nesaladi, akeca tep kware men dangkamrume.

15Kware men kunkamser dinin, sun dipru neitamaida, ‘Yesus Kristus ne Deiyo Ngebo erpu kunkamnere’ tenen, moupra ketenem dinkamrume. Sun kange dipru yumada, Yesus er deikipu derinkamrume. Sun asipetenkamseng neng yuma tep nengeda, ‘Allahdi lyepkamnere’ tenen, ‘Er deikipu ne dipru kange derinunada, lap pepra deipkamne’ tenen, ketenem dinkamrume. Yesus er lyemna upu lap penkamrum dinin, yuk neng yuma tep, gispal dopra bouna dipu penkamrume.

16Allah teka tenerum keca, lap pepra derinkamrum taru yumada, ila upu weika di pena gum dinin, yuk neng yuma tep, gispal dopra bouna di lap penkamrume. Yesus Kristus dipru dukdongopra telep kupra, dumsisipu kunkamrum dinin, mali upu pepra luludinkamseng nesalada, ‘Ali kupkamre’ tenen, sun kange dipru neitamaida, mali keca inimna gum di, dumsisipu kunkamrume. Ukumum pangeda, yu di luludinkamseng dinin, sun cap, Kristus cap, dipru dukdongopra kurumupa, telep kun keca epsengopda, ali kunkamre.

17Allahdi, ‘Ukunkamenge,’ teneseretopu, mali kuna gum dinin, teleppu kupmepepa, deiyo men kupmarepapu, yuk nengdi nun nong deiki ikin keca deipsengopda, ada telepe pua. Dinino, mali kupmepya deiki di, ikin keca nun nong deiki deipsengopda, ada mali pua. Telep ngeda, deiyo men kwapmarepapu, ikin keca nun nong deiki deipsengopda, ‘Angeda telepe pua,’ tenenkamepe. 18‘Mali kun nesalada, antapra Allah cap dipru dukdongopra kunkameng’ tenen, pio dumsisi kun ngebo Yesus Kristusdi, nun mali kun nesala kunumna tep, ue tenpu taru dipu depu. Yesusda, nimi nong utopu daudi kuramupane, popipa depu dinin, Allah er Lek Sambala puto deiki di, Yesus tep kange di tamupra gam bukra deipu.

19Uda, gam bukra deipupa, er sambala gam kuramudi, sun konum deramipa, Allahdi wenemnai dongoramu nesala, sun damai bena, Allah upu peterepra beu. 20Allahdi wenemnai dongoramu nesalada, menop taru Nun kuramu taru neitamaida, Allah tep yanirtamami. Sundi Allah tep yanirtamami taru ada, tuai mutu ban-ban yuma, ila mokon deipkamu taru tepa.

Ataruda, Nuhdi ila gapung co ketenepra doramu taru neitamai, Allahdi, ‘Anesala teka teneptenge’ tenen, bouna di kuramupane, sundi malipu kupra Allah tep yanirtamami. Nuhdi ila gapung co konum dopupa, nimi weik gum dinin, Nun er bungsilip yuma nukrap, ban bari nesalapu gapung co ati bo wekipa, ila mokon deipudi, mokon deiki agapung co dopra erepropka deiki di, Allahdi anesalapu lyepropu. Yuk mali kurami nesala yumada, ila mokon deipka deiki di jepupa depropi.

21Ila gapung co wekipa, amokon deiki Allahdi anesala lyepkada, peten kemdina tep kupseue. Ada teka tenepmepepa, Allah lyepseryopda, me dongosenunga utopu kurure. Teka tenepmepepa, me dongosenungada, nun nong bol deiki dereng kusere keca me kupsere dinin, nun mali keca men gum kudiserur dinino, me dongopkusenge taruda, mawa tenena gum di, ‘Allahdi lyepra melipnerepa, mali kun keca yuma tapra dumsisipu kunkamne’ tenen, katuai di penupe. Me dongosenunga deiki di, men lyemserur dinin, Yesus Kristus depupa, Allahdi Yesus gam bukra deipka deiki dipu, Allahdi lyemserure.

22Allahdi Yesus Kristus gam bukra deipupa, kange di tamupra im deiki welepudi, Allah er dumsisi tara buru damai bukudi, tupa akurure. Bukudi im deiki tarapu kurepa, Allah er im deiki pel don neng malaikat cap, tonda im deiki kunge ila deiyo neng utopu kunge neng cap, tonda tuai mutu neitamai kunge isok-isok yala yuma cap, uda, wareto puto kure keca do yuma, Yesus er amutarapu kununge. Yesusda, ila puto weik deiyo ngebo kuredi, akeca yala-yala yuma deiki tarapu kurura tepa.