1Pe 4 | XteSC | STEP | Ange tep nengeda, Kristus nimi nong utopu daudi kuramu taru neitamaida, er nong deiki ikin keca weik deriramipa, kange mun kange doupra kuramu. Yesusda ukupra kuramnga cadi, sun teka tenerum neng peda, er kuramu utopu, akangepu tenepra kunkamrume. Ada, ware nesala do yuma, sun nong deiki ikin kurepa, kange mun kange doupra kunge nesalada, mali kun keca ton cap men putarea yamdongonunge.

1 Peter 4

Ukupu gam kuna tep, pepu upu

1 Ange tep nengeda, Kristus nimi nong utopu daudi kuramu taru neitamaida, er nong deiki ikin keca weik deriramipa, kange mun kange doupra kuramu. Yesusda ukupra kuramnga cadi, sun teka tenerum neng peda, er kuramu utopu, akangepu tenepra kunkamrume. Ada, ware nesala do yuma, sun nong deiki ikin kurepa, kange mun kange doupra kunge nesalada, mali kun keca ton cap men putarea yamdongonunge. 2 Mali kun keca konum yamdongonung nesalada, kange mun kange doupra konum kuramya tep, sun tuai mutu tupa kunkameng taru neitamai yumada, nimi dipruai mali kun keca putarepa, men kunkamenge. Mali kun keca putarepa, ‘Mali kupkup’ tenen, men kunung dinin, Allahdi, ‘Ukunkamenge’ teneserur kecapu tenepra, akecapu talepra dumsisipu kunkamenge.

3 “Sun peda ukunkamrume,” pepmasenada, mesum tep men pepne. Sun kaele, sun teka men tenenunge nesaladi, mali-mali kunge kecada, pumun taru sun peda weika di konum kuramrum dinin, ukutaruda ange yumada konum tapmarume. Ange tep nengeda, amali kun keca ton cap pio men kunkamrume. Sun teka tenena gum nesaladi, mali-mali kunge kecada ake. Sunda, ner tali nyangna cap, upula dona cap, mali kun keca putana cap, kange yawaramne me weika di jena cap, ila kalemna kalepmengedi mali-mali kupra koudana cap kununge. Tonda, sun petupra ketkemnung keca do, isok-isok do, tali keca si eremnungada, Allahdi, ‘Akecada ne songe,’ tenerure.

4 Sun mali-mali kupra kunge keca, yala-yala weik kunung dinin, sun teka tenerum nengdi, aneng cap kikiman men kumum pangeda, amali kun nesaladi, ‘Warya tep, nun cap tali lupra mali men kunup do?’ tenen, yu doupra, mali upu weika di, sun nong deiki derisenunge. 5 Ukusenung dinino, sun mali-mali kunge keca tep nengeda, sun pe nengdi, adipapu Allah tep, “Nun mali kuramepu kecada ake-ake,” pepra katuai lap penkamenge. Allahdi, ‘Gam tupa kunge nesala pe, konum deami nesala pe, yuk-yuk bokra deipnedi wenepkamne’ tenen, konum ketenepra deiya kurure. Er tenepre taru di, upu bokeipredi, wenepkamsere.

6 Ange tep nengeda, konum deami nesala ^{▼▼deami nesala – Akayatda, er deiyo neitamai ngeda, pio ikin weik kurure. Alkitab ila di kael keami neng peda, yuk-yuk tenengedi peteremnunge. Ada sekitar 6 pendapat tapsiran. Nundi ange yuma dipetepmupudi, nundi, ‘Angeda tek sisinge ake,’ tenepmupungepu aca sekmepu. Dinin pio tek sisi nun kaele. Nimi tuai nesalada, Yesus tep, teka men tenepmengopda, Allah cap kikiman gam pio men kunkamenge.} damai bena, Allah er kai telep upu, nimi lyemna upu peteremami. ‘Teka teneptengedi, gam kunkameng’ tenen, Yesus er nimi lyemna upu peteremamipa, aneng ton gekerami. Sun aneng yumada, tuai mutu kuramya cadi, nimi tuai nengdi mali kupmenga deiki di denunga cadi, Allahdi tuai nesala yuma wenemrur utopu, sun peda wenemupa konum deami. Dinino, nimi lyemna telep upu konum gekeramya tep, adeami nesala kankan di, ton neng dingeda, ange teka tenerami teptoda, sun nong depu dinin, sun sambala deiki di tupa gam kunkamenge. Dinino, teka men tenemi nesala dangeda, gume. Teka tenena gum nesala yumada, Allah er Sambala deiki di pio gam kuramretopu, men kunkamenge. Sun nong pe, sun sambala peda denapu kunkamenge.

Allahdi, ‘Ne pel donkamneng’ tenen, mambul pel dona deiyo keca tali kareserura tep, pepu upu

7 Akeca-keca yuma sirya gawal dangne taru konum damai kupsera tep, pio moupra tenepmumdi, tenimtona gum di, ‘Mali kupnup’ tenen, moupra didamumdi, kalekdankamrume. Ukupra kumumyopda, Allah tep moronkamrume. Moupra men kalekdamumyopda, sun mali kurumu keca tep, Allah tep telep kupra men moroptume. 8 Apepmasen keca yuma kunkamrum dinin, ila mambul ngeda ukuda pepkusene. Sun yumadi, yuk teka tenena nesala yuma tep, pio tek sisi dipru karedamumdi, bicau tenepra makudanapu kunkamrume. Yuk neng tep, pio bicau tenepra makudamumnyopda, sun aneng mali kunge keca tep nengeda, tupa-tupa men tenenkamrume. Yuk neng tep pio bicau tenepra makudanapu kupmepyopda, yuk nengdi mali kunge keca tep, tupa tenenapu men kunkamepe. Yuk neng tep ila di bicau tenepmepya deiki di, sun mali kuna ngeda, kaukemnapu kunkamepe. Sundi mali kunge keca tep, tupa tenenapu men kunkamepe.

9 Sundi yuk nesala tep kange deipra makunkamrume. Sun jen cap, ati manai cap, karepmumdi, yuk neng tep gispal dopra namdodankamrume. Ukunkamrum taruda, mali upu pepra, dabal kange douna gum di, telep kange doupra, sun damai yakankameng neng tep, telep kupra namdodankamrume. 10 Allahdi sun yuma yuk-yuk tep, ‘Ne mambul pel donkamneng’ tenen, pel dona deiyo keca putonge, bicau teneseredi, er pe kange dipapu melipra konum karepseupa dopropmum pel dona deiyo keca deiki di, yuk teka tenena nesala tep, makudanapu kunkamrume. Allah, bicau teneseredi, er kange dipapu melipra kareserur pel dona deiyo kecada, yala yuk-yuk akwapseretopu, ange deiki di, yuk nesala tep, tamna gum di pio melimkamrume.

11 Ukupmanto ngeda, ware ngebo do, Allah upu perur ngeboda, Allah er damai yatudi, peptupa, angebodi ange gekepra dopropredi, kange di lap pepsetutopu, balila deipra, puto di peterenkamsere. Ange utopu, yuk nesala tep, melipra pel dorur ngeboda, Allahdi er puto kareserya deiki di, yuk nesala tep melipra pel donkamre. Allahdi, ‘Ne pel donkamneng’ tenen, bicau teneseredi, er kange dipapu melipra karesere pel dona deiyo keca deiki di, Yesus Kristus cap dipru dukdongopra kumumdi, er puto deiki di, sun kunkamrum keca yumada, telep kupra kunkamrume.

Yesus Kristus cap dipru dukdongopra kumumdi, er puto deiki di, telep pel domum pangeda, yuk neng epsengedi, Allah er si ila di eremengedi, Allah tep, “Kanda pio telepe,” pepra, er tep gispal donkamenge. Nesala ban-ban yumadi, Allah er si eremengedi, ‘Ila puto kure ngeboda, Allah er pua,’ tenepra, ‘Pio tep kunkameng’ tenen, Allah moronune. Akonuma.

Yesus teka tenemumpa, yuk nengdi ikin keca, sun nong deiki derinkamsenga tep, pepu upu

12 Ne kayapu, bicau tenesenedi, sun tep ne kange derisenune. Ikin keca weik, sun nong deiki deipsengepa, kange mun kange doupra, kumum taru neitamaida, sundi, ‘Uo, ange men kupsetue. Ware deiyo tep, aikin keca nun damai yanmaser do? Men kupmanto keca kupsere’ tenen, lukdamumdi, mambul kange doupra men kukamrume. 13 Lukdamumdi, mambul kange doupra, uo, men tenenkamrum dinin, Yesus Kristus nong deiki, ikin keca deipipa, ikin kange douputopu, nun peda utopu, ‘Ikin keca nun nong deiki deipsenga peda, telepe pua’ tenen, ila di telep kange derinkamrume. Yesus ikin keca weik kuramutopu kupserepa, kange deipra kumum pangeda, amenda taru Allahdi, Yesus er ila mambul kure keca cap, pio telep-telep kupra kure keca cap, dirine weik kuprepa, katuai lap pepkamser taruda, telep kange pio ila di deiprumudi, pingpinga kunkamrume.

14 Yesus Kristus teka tenepra er upu gekepra dombarumnya tep nengeda, yuk nesala epsengedi, yu doupra mali upu pepsengopda, kange derinkamrume. Ada, ‘Nunda mambule, Allahdi nun tep telep kudinkamser’ tenen, kange derinkamrume. Ada tali tep gume. Allah er Lek Sambala telep kupra dirine weik kuredi, sun dipru neitamai kurura cadi, kange deipra kunkamrume.

15 Ware mali kun keca do yuma, nimi portamna cap, upula dona cap, yuk pio mali kuna cap, uda, ‘Yuk nengda, mali kunung do, telep kunung do?’ tenen, dipterepra minina upu cap, luludina upu cap pepra embana cap peda, ukuramdenkap sun nong deiki ikin keca derirsenunga deiyonge tep, ayuma pio men kunkamrume. Ikin keca sun nong deiki derinkamsengada, deiyo men kapyopda, teleppu dinin, mali kupmumpa, deiyo tek sisi akapyopda, ada mali tep pepsene.

16 Amali kun keca yuma men kunkamrum dinin, Yesus teka tenepmumdi, er upu gekepra dombaramruma tep nengeda, yuk nengdi ikin keca, sun nong deiki deipsengopda, ali men kunkamsere. Ali men kunkamser dinin, Allah lyepseudi, er nyapu keipseupa, Kristen nesala pesenunga tep, ‘Angeda pio telepe’ tenen, Allahdi ukupseua tep, “Telepe,” pepra, er si eremkamrume.

17 Allahdi nesala ban-ban yuma tep, upu yuk-yuk bokredi wenepkamrada, er tep teka tenengedi, er nyapu kan-kan di gonga kepra, nun tep wenepkamsera cadi, ikin keca sun nong deiki deipsenge taruda, kange deipra, Allah er sipu eremkamrume. Tonda, er nyapu kan-kan di gonga kepserepa, yambul ikin kusere dinin, amenda gawal dangne taruda, teka tenena gum di, Allah er kai telep upu tep, yanirtamnung nesala tep nengeda, upu bokredi wenepkamre ngeda, ila mambule. Sun pio ikin weik kunkamenge. 18 Ange utopu, Allah upu neitamai, buku Amsal deiki seki ngeda, pepkusene. Ada,
‘Dumsisi kupra kunge nesalada, ikin kurya deiki di teka tenengepa, Allahdi lyemrura cadi, sun mali kun nengdi, ‘Allah erda tali ngebo’ tenepra, er upu yanirtamenge nesala tep nengeda, ware kuprap di, teka teneptengepa lyeptu do? Gume, ato nengda men lyepkamre.’ (Amsal 11:31)

19 Ange tep nengeda, ne kayapu, Allahdi teneamseutopu, mali nengdi ikin keca, sun nong deiki deipsengopda, tenimtona gum di, sun ketekeipseu ngebo Allah tep, sun nong cap, sun kange dipru cap, ayuma dopra, Allah er deikipu derinkamrume. Sundi, sun pe nong cap, sambala cap Allah tep karepmumnyopda, tamna gum, telep kun kecapu kupra, pio dumsisipu kunkamrume. Nun ketekeipseu ngebo Allahda, pio tamna gum, melipra dinapu kuserure.