1Pe 5 | XteSC | STEP | Sun kan-kan kungedi, Allah upu ati talena deiyo neng tep, aupu ton pepkusene. Ada, ne peda Allah upu ati talena deiyo ngebodi, ne pepkusen upu gekepra, ‘Ukunkamrum’ tenen, moropsene. Tonda, Kristus nong deiki ikin keca deipipa dounmaupane, popipa depkada, ne asuru di konum epsi. Tonda, Yesus tamupra yankamre taru, Allahdi ila telep kupra mambul keca cap, dirine weik cap kupkamser taruda, ne cap kunkamepe. Ange yuma ukunya deiki di, ne Peterusdi moropsene.

1 Peter 5

Allah upu ati talena deiyo neng tep pepu upu

1 Sun kan-kan kungedi, Allah upu ati talena deiyo neng tep, aupu ton pepkusene. Ada, ne peda Allah upu ati talena deiyo ngebodi, ne pepkusen upu gekepra, ‘Ukunkamrum’ tenen, moropsene. Tonda, Kristus nong deiki ikin keca deipipa dounmaupane, popipa depkada, ne asuru di konum epsi. Tonda, Yesus tamupra yankamre taru, Allahdi ila telep kupra mambul keca cap, dirine weik cap kupkamser taruda, ne cap kunkamepe. Ange yuma ukunya deiki di, ne Peterusdi moropsene.

2 Domba bisam peina deiyo nengdi, sun domba bisam tep bicau tenepra, telep kupra peiramengtopu, sun teka tenena nesala deiyo talepra kurum neng peda, Allah er nyapu sun amutara kunge nesala tep, bicau tenepra bouna di melimkamrume.

Ada, sun amutara kunge nesala tep, ‘Sun dipru mali kupnung’ tenen, melipmumdi, ‘Kalekra dinkamrum’ tenen, pepsene. Ukunkamrumada, ‘Ne song,’ tenepman dinin, ‘Allahdi pio pe derirnerya tep, kunkamne,’ tenena gume. Ange gum dinin, Allahdi, ‘Ne nyapu melimna tep tenimtona gum di, kange deipra melimkamenge’ tenen, ‘Putarepa teneseretopu kunkamrum’ tenen, pepsene. Tonda, ‘Anesaladi, co bo weik karepsetengepa, sun tep telep kupra makuptepe’ tenena gum di, kange deipra, tali lupra melidankamrume.

3 Tonda, Allahdi, ‘Ne nyapu melimkameng’ tenen, sun amutara deipseu nesala tep, utenenkamrume. Ada, ‘Nun telep-telep kupra dumsisipu kuramepepane, epsengedi sun peda utopu dumsisipu kunkameng’ tenen, peten kemdina neng utopu kunkamrume. ‘Neda ila mambul ngebo’ tenen, kange erepra sun amutara kunge nesala tep, men yanimkamrume. 4 Apepmasentopu konum kupmum pangeda, nun Domba Peina Deiyo Ngebo utopu ngebo, Yesus Kristusdi nun damai tamupra yaryopda, erdi sun tep, pio mambul mengne keca, pio telep kuredi, men gum kupmanto keca karepserepa, dopropkamrume.

Sun wisi derina gum di, gam neng utopu neng tep, pepu upu

5 Asurat deiki di, “Yuk neng tep, bouna di sun amutara kunkamrume,” peipmasentopu, sun wisi derina gum di, gam tupa kurum neng tep, aupu pepsene. Ada sun wisi neng amutara kumumdi, sun upu gekepra, bouna di kunkamrume. Buku Amsal upu neitamai sekeipsei upu akapmara tep, pepsene. Aupuda ake.
‘Sun kange erepra, gemenge nesalada, Allahdi anesala tep tamdongoredi sun upu sengrure.
Dinino, sun kange darapra, dipru bouna di amngai kunge nesala tep nengeda, bicau teneseredi, tali lupra melimserure.’ (Amsal 3:34)

Aupu tupa akwamseua tep, sundi yuk nesala yuma tep, sun pe kange darapra, dipru bouna di telep kupra kunkamrume.

6 Ange tep nengeda, Allah er puto pio weik kure ngebo, er amutara tara bukra, sun kange darapra, dipru bouna dipu kunkamrume. Ukupra kumum pangeda, Allahdi teneamseu taru konum kupyopda, sun dopra ereipkamsere. 7 Allahdi sun yuma tep, bicau teneseredi, pio melimserura cadi, sundi, ‘Uo, ware kupkup do?’ tenen, kange mun kange doupra, tenimtonapu kusere keca yumada, Allah er deikipu derinkamrume.

8 Uda, yuk upu ton pepkusene. Sundi sun pe tep, ‘Mali kupnup’ tenen, kange moupmumdi kalengdankamrume. Tonda, mali kunai tep, beipra kunkamrume. Kain Jen Ngebo, Seramkida, sun pona tep neng utopu kuserure. Erda, bura tara yu singa pus do, dumre kam do, utopu, ‘Ware keca popra jeptene do?’ tenen, sengkalengredi, orbenap yanap kemrure.

9 Ukuserura tep, balila deipra bisbisapu kamkamrume. Uda, sun teka tenerumtopu, ban-ban yuma teka tenenge nesalada, sun ikin kuseretopu, anesala yuma peda, ikin kurure. Angeda sun konum kael keamruma tep, sun konum teka teneamrumnge tamna gum di, puto di teka tenepra kumum dingeda, Kain Jen Ngebo tep, balila deipra, bisbisa kamkamrume.

10 Ukupra kumum taru neitamai, ikin keca ton kusere panen, adeiki di puto boun kupkamsere nge cap, gum kupkamsere nge capda, Allah er pedi sun tep, kange di ton cap telep kudiseredi, ‘Telep kupra dim pepra kunkameng’ tenen, puto karepsere dingeda, er kange dipapu pel pio palepra dona tep deiyo keca melipra karenkamsere. Gum kupseu ngeda, ka di ton tapakra karenkamsere. Allahdi, ‘Sirya taruda sun cap, Yesus Kristus cap, dipru dukdongopra kununga deiki di, pio gam kunkamenge. Mengne dirinai ne cap kikiman pio tep im deiki kunkamepe’ tenen, upupseue. Atep nengeda, Allah er pedi, sun tep, puto ton tapakra karepseredi, dim peprappu, kange di tamupra telep kweipkamsere. 11 Pio yuma taru yumada, puto kuredi akeca-keca yuma talepra, er ila puto deiki di akeca-keca yuma bisbisa kamre ngeboda, Allah er pua. ‘Pio angetopu kunkamre’ tenen, putanerepa, moronune. Akonuma.

Surat gawal dangna tep, “Telepe,” pepu upu

12 Silas makupneua deiki di, abum suratda, ne Peterusdi sekeipsene. Ne kabo Silasda, teka tenepu ngebo cadi, ne tep men tamneredi, makunerepa, nun cap, tonpa kikiman pel doamnume. Erda, ne weit utopu kunerure. Asurat sekeipsena deiyoda, sun dipru kwa dimna tep sekeipsene. Tonda, Allahdi, ‘Ne pel donkamneng’ tenen, er kange dipapu melipra kareserya pel dona deiyo keca cap, Allah er kange dipapu tali melimsere keca capda, sunda, ‘Tek sisi ngepu konum lap pepsere, tenenkamnerum’ tenen, asuratda sekeipsene. Apeipmasen upu yumada, tek sisinge cadi, tamna pio gum di, aupu talerumdi, dimpeprappu kunkamrume.

13 Allahdi sun tep, ‘Ne nyapu kunkameng’ tenen, wepra deipseutopu, Babilon mutu wepra deiamupa, teka tenenge nesaladi, sun yuk mutu kurum nesala tep, “Telepe,” peipsenunge. Ange utopu, ne mi utopu ngebo, Markusdi sun tep, “Telepe,” peipseu. 14 Sundi yuk teka tenenge nesala tep, pio tek sisi bicau tenepra, buru karedamumdi, gispal dodankamrume. Sun cap, Yesus Kristus cap, dipru dukdongopra kumum nesala yumada, ‘Kange deipdamumdi kikiman telep kupra kunkamrum’ tenen, nedi sun tep Allah morosenune.

Telepe, ne Peterusdi asurat sekeipsene.

Acapu deipne.