1Sa 1 | XteSC | STEP | Efraim yala ngebo, er si Elkana, Efraim mutu damai dinin, Ramat mutu kuramu. Elkana er nai boda, Yeroam er apu boda Elihu, er co puna ngeboda Tohu. Tonda Tohuda, er nai bo si Zuf kuramu.

1 Samuel 1

Elkana cap, er ner Hana capdi, Samuel deipreia tep upu

1 Efraim yala ngebo, er si Elkana, Efraim mutu damai dinin, Ramat mutu kuramu. Elkana er nai boda, Yeroam er apu boda Elihu, er co puna ngeboda Tohu. Tonda Tohuda, er nai bo si Zuf kuramu. 2 Elkana erda nerapu butene doamu. Sun sida, Hana cap, Penina cap kuramrei. Peninada nyapu deriramu dinin, Hanada mi ton men deiamu.

3 Ataruda, aketeng tamun, aketeng tamun yuma, Elkanadi, ‘Ne nai Allah er si Yahweh, akeca-keca deiki tara kure ngebo, er si eremkamne’ tenen, Ramataim mutu di, Allah karena tep, er peiramu gam keca tenpu-tenpu doupra, Silo mutu baramu. Ataruda, Allah Yahweh er si eremna ati pumbon pel dona deiyo nengda, Eli er nyapu butene, Hofni cap, Pinehas cap kuramrei. 4 Elkanadi Allah karena tep, gam keca popra karepne dingeda, ton tarada, akeca tu galepnedi bokra, er ner Penina cap, Penina er nyapu bung cap tep, ton kareramu.

5 Ukuramu dinin, Elkanadi Hana tep nengeda, gam keca popra, tu galemna weik ngeda bokra, Hana kareramu. Ada, butene kepra weika di kareramu. ^{▼▼Butene Butene kareramu pepi ngeda, ada Indonesia upu deiki di “Dua kali lipat” karena tep pepmepe.} Butene kareramunge deiyoda, Allah Yahwehdi Hana tep, ‘Mi men deipkamre’ tenen, you ner kepka cadi, Elkanadi bicau tenepnedi, weika di kareramu. Akuramnga deiki di, Elkana er ner Hana tep bicau tenen, dipru kareramu. 6 Allah er si Yahwehdi Hana tep, mi men meliamnga deiki di, mi men deiamudi, Hanada mundu men doupmanto kuramnga tep, ‘Hanada mali kange douptudi, engenkamre’ tenen, Peninadi Hana tep, “Kanda tali ner pua,” pepra yap-yap peramu.

7 Ange tep nengeda, aketeng tamun, aketeng tamun deiki yuma, ‘Yahweh ^{▼▼Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda lap pena upu nomor 49 dirume.} tep gispal dopkamep’ tenen, Allah er si eremna ati dam, yapi keca popra karer bena taruda, Peninadi Hana tep, “Kanda mi ton men deipmanto ner kuruma tep, mi men deipmume,” pepra yap-yap peramu pangeda, Hana mambul kange doupra engeramudi, sun cap jene tonpa men jerami. Hanada ikin kange douamnga cadi, jen meteka peda men jeramu.

8 Ukupne taruda, er doamu ngebo Elkanadi Hana tep uperamu. “Ware deiyo tep Hana kanda engenapu kumemdi, jen nun cap tonpa men jenup do? Tonda, ware keca deiyo tep, ikin kange dourum do? Tonda, kan dingeda, ‘Nyapu denge tenpu (10) akapyopda, ada yambul mambul dinin, ne nengeda, ila mambule,’ men tenenememdi do?” pepra asimpeteramu.

9 Tenpu tumi ton, Silo mutu neitamai di, sun yuma jene cap, me cap, konum jepra gawal dai taruda, Hana adipapu tekroudi Allah moronmaudi, engenmau. Engepra Allah moronmau taruda, Allah er ati pel dona deiyo ngebo, er sida Eli, Allah Yahweh tep karerami ati dam dinin, akati buplan dam tupa abukmaudi gekenmau. 10 Abukmaudi, gekenmaupa, Hanada pio mambul kange doupudi, mur-mur pepra weika di engenmaudi, Allah er si Yahweh tep moronmau. Ataruda aupu pepu.

11 “Ne nai Allah Yahweh, kanda akeca-keca deiki tara kumemdi, ila puto ngebo kurume. Kandi ne kange mun kunere ngeda dinerume. Neda kan amutarapu kunedi, kan upupu gekenune. Ange tep nengeda, Yahweh kandi ne tep lumdongona gume. Kandi ne ikin kunerur keca tep melipnememdi, sal mi tenpu karepnemempa, amida er potong peda toudona gum dipapu, er nong yumada, kanpu karepkamkene,” pepra moronmau.

12 Hanadi Allah tep pio moronmaupane, Elidi Hana er sipyal dam dinmaudi gekerterenmau. 13 Hanadi Allah moronmau taruda, er sipyal gam ponmau dinin, mur-mur pepra penmaua tep nengeda, Elidi Hana penmau upu men gekepmanto kupu. Er upu men gekepmaua cadi, Elidi, Hana tep, ‘Anerda, kange yawaramne me jepmaua di, mur-mur pepra engenmar do?’ tenenmaue.

14 Utenenmaua cadi, Elidi Hana tep pepu. “Ka nero, ware kupra taru ton, kange yawaramne me tupa jenkamrum do? Kange yawaramne anggur me akwapker ngeda, donoko. Angeda jena gume,” pepra wenepu. 15 Upepra wenepu pangeda, Hanadi tamupra pepu. “Gume ne naio, neda kange yawaramne me yala-yala yuma men jenune. Neda, mambul kange doupmana tep, ikin kunere keca tep engenmandi, ne nai Allah er si Yahweh tep, ne dipru neitamai kunerur keca di, er tep penmandi moronmane.

16 Atep nengeda, kandi ne tep, ‘Anerda pio mali kun ner,’ men tenenkamnerume. Angeda men kunun dinin, ila mambul kange doupmana tep, ne ikin kunerya deiki di, Allah moronmane. Neda kan amutara utopu ner kununa cadi, teleppu tenenkamnerume,” Hanadi Eli tep pepu. 17 Upepra moronmaupa, Eli gekepudi upepu. “Ka nero, ‘Telepe. Kange deipra kan pe ati tamupra benkurume’ tenen, Allah moropkukene. Tonda, ‘Israel nesala tep, kalekra pio melimrur Allahdi, kan moropmaum upu gekepkeredi, kan tenipmaremtopu karepkamker’ tenen, moropkune,” Elidi pepu.

18 Upepupa, Hanadi tamupra pepu. “Telepe ne nai. ‘Neda kan amutara pel don ner utopu kunune. Telep kuptenepa, kandi kange deipnetum’ tenen, Allah moropkune,” pepu. Upepudi, akati tapra bendopudi, jene bena jepropu pangeda, er kamo telep kupu. Ukupu taruda, mali kange tupa men douamu.

19 Atumida, sun yuma mapmaiya, Elkana er bung yuma ipna sisa di bukra, Yahweh er si konum erepi dingeda, ka tamupra sun pe mutu Ramataim mutu bei. Amenda taruda, Elkana cap, er ner Hana cap, konum antaprei dingeda, Allahdi karepupa, Hanadi Allah tep mororamu ngeda konum karepupa, amenda taru sal mi deipu. 20 Ada, Hana mumun douamnga sal mi deipu. Ange mi er sida, Samuel pepu. Samuel pepunge deiyoda ake, ada sun Ibrani upu deiki di, Samuel peraminge deiyoda, ‘Allah gekepmanere’ tenen, perami. Ada, ‘Neda Allah tep tupa pio mororamsipane, Allahdi gekepneudi karepneue,’ tenepka tep, ami si Samuel pepra karepu.

Hanadi er mi Samuel dopra, ‘Allah er pelpu donkamre’ tenen, karepu upu

21 Allah er si Yahweh, er gispal dona cap, karena cap tep, gam keca popra karen taru konum kepu pangeda, Elkana cap er bung yuma cap, adipapu Silo mutu bei. Ukupi taruda, Elkanadi, ‘Allah tep pediramsi upu tek sisi adipapu kupkamne,’ tenen, beu. 22 Elkana cap, er bung cap bei dinin, ataru Hanada men beu. Hanadi er akengebo tep pepu. “Neda ami moum karenmanepa, moum jenmaryane, amenda taru moum jeramrenge tapredi, jen sisa konum jeryopda, ‘Samuelda Elia damai kuredi, Allah er pel pio donkamre’ tenen, ami dopra Silo mutu dinin, nabi Eli er damai dubena doproipkamne. Elidi ami gwanapkamre. Ukupnepa pio abena kunkamre,” pepu.

23 Upepu pangeda, Elkanadi, “Telepe, kan tenepmarem tumi konum kepre pangeda, Allah tep peramum utopu kupkamrume. Ami moum jeramrenge tapredi, jen sisa konum jeryopda, ami dopra Allah tep kareryankamrume. Tonda, ‘Allah melipkerepa, kandi er tep peipmum upu tek sisi kupkamrem’ tenen, Allah moronkamkene,” pepu. Upepu pangeda, Hana Ramataim mutupu kuramudi, er mi tep moum kareramu.

24 Samuel konum moum cepropu pangeda, li taru dipapu, er nindi ami cap, sapi bisam keteng tamun weneringe cap, tonda yagung utopu keca, er sida gandum ikine 22 liter cap, anggur du me tenpu mau cap, (ada bol kin alen di kipra debeu ngeda), dopra Yahweh er si eremna ati, Silo mutu dubeu. 25 Ukupu dingeda, asapi bisam bena popidi, ami doprapudi, Eli damai dubeu. 26 Hanadi Eli tep pepu. “Naio, kanda tupa tenepnemum do? Tek sisi, ne akati neitamai yan tekra, Allah er si Yahweh tep moronmasipa, diramnemum nerda, ne adano.

27 Pio keteng tamun weik neitamai di, Allah tep mororamsanen, ukutaruda Allah mororamsitopu, Allah er si Yahwehdi ami konum karepmaner adano. 28 Atep amida, nedi Allah er si Yahweh tep karepne. Konum karepmana cadi, er gam kunkamre taru yumada, Allah Yahweh er pelpu donkamre,” pepu. Upepudi, er mi Samuel karepupa, Samueldi Allah er si Yahweh tep, akati pumbonpu er si eremamudi, pel dopra kuramudi nepbaramu.