1Sa 10 | XteSC | STEP | ‘Ila nimi deiyo ngebo Raja kunkamre’ tenen, Samueldi Saul tep wepra deipu. Tonda, ataru sun Israel nesala kuramitopu, Samueldi, zaitun co du me telep lyom mau di kipra deiamya doprapudi, Saul giso deiki dikra deipudi, Saul tep buru karepudi, ‘Telepe, konum telep kweipkene,’ pepudi, amutu neng kuramitopu, Saul mutupu. Samuel ukupudi upepu. “Allah er si Yahwehdi Israel nesala sun ila nimi deiyo ngebo kemna tep, konum wepra deiamkeu. Kandi Israel nesala tep, sun ila nimi deiyo ngebo Raja kepmemdi, talepkamrume. Ange tep nengeda, aminyak me kan giso deiki dikra deipmakenada, Allahdi peten kemna tep, nedi kan giso deiki dikipmakene,” pepu.

1 Samuel 10

Saulda, Israel nesala ila nimi deiyo ngebo Raja kemna tep, wepra deipi upu

1 ‘Ila nimi deiyo ngebo Raja kunkamre’ tenen, Samueldi Saul tep wepra deipu. Tonda, ataru sun Israel nesala kuramitopu, Samueldi, zaitun co du me telep lyom mau di kipra deiamya doprapudi, Saul giso deiki dikra deipudi, Saul tep buru karepudi, ‘Telepe, konum telep kweipkene,’ pepudi, amutu neng kuramitopu, Saul mutupu. Samuel ukupudi upepu. “Allah er si Yahwehdi Israel nesala sun ila nimi deiyo ngebo kemna tep, konum wepra deiamkeu. Kandi Israel nesala tep, sun ila nimi deiyo ngebo Raja kepmemdi, talepkamrume. Ange tep nengeda, aminyak me kan giso deiki dikra deipmakenada, Allahdi peten kemna tep, nedi kan giso deiki dikipmakene,” pepu.

2 Ukutaruda, Saul kan adipapu ne Samuel damai tapra bememdi, atumi sun nimi butene Zelza mutu dinin, Benyamin mutu neitamai, Rahel peiamya damaipu bena antapkamrume. Antapmem dingeda, sun butene nengdi, tamupra pepkamkerenge ngeda ake. “Saul kan enmarem keledai bisam yumada, yuk nengdi konum epmange. Atep ukutaruda, agam keca yuma tep, Saul kan nai bo nimi doproipupa, enmange dinin, er kange di, ‘Uo, ware kupkamne do?’ tenepu ngeda, tupa men kunkamre. Angeda tapkurure. Dinino, kan tep nengeda, erdi, ‘Uo, ne mi Saulda, dan mutu kunmar do?’ tenen, enmakerdi, ‘Ware kupkamne do?’ tenenmare,” pepkamakerenge.

3 Atep, abutene neng aupu pepkerenge pangeda, Saul kanda amutu tapra, acei di gonga kepra pio embaramemdi, Tabor mutu neitamai, ila tekamu co damaipu benkamrume. Ukupmem pangeda, nimi weneri ton, Betel mutu Allah si eremna tep yapi keca popra, uku dongorbana tep doupmarengedi, gonga kepra banmarengepa, kandi bena antapkamrume. Antapmumyopda, epkamrume. Animi weneri neitamai dinin, tenpu ngebodi kambing bisam nyapuda, weneri doupra banmarpa, epkamrume. Tonda, nimi tenpu ton, roti kwaneng weneri doupra, banmarpa epkamrume. Tonda, nimi tenpu ngebo ton, kambing bol getepra, anggur mokon kiamenge doupra, banmarpa epkamrume.

4 Sun aweneri nengdi, kan Saul tep, ‘Telepe,’ pepra, gispal dopkamkenge. Sun cap antapmumyopda, sundi kan tep roti kwaneng butene karepkengepa, kandi moupra dopropkamrume. 5 Ange konum ukupmem dingeda, Saul kan adipapu Gibea mutu neitamai dinin, amutu sida, ‘Gibea mutu dup, Allah ernge,’ peramenge mutu benkamarume. Amutu neitamaida, ‘Nun podan neng yakanung’ tenen, sun Filistin mutu nengdi, ila gel di, ila ati arum domi. Akunge mutu neitamaipu benkamrume. Amutu neitamai wengban bisi buplan damaida, sun nabi-nabi neng gung weike, tenpu mutu dup Allah er gispal dona tep, yapi keca popra, uku dongombenmanga kwereryakangepa, antapdankamrume. Sun anabi-nabi neng yumada, mut pengedi, dourameng keca, sun si gambus cap, rebana cap, bung-bung pena er si seruling cap, kecapi cap doupmangedi, ila upu deiki pepyakanmange nge cap, mut sepyakanmange nge cap, amenda kupkamre keca lap penkamenge nge cap yumada, kan epkamrume.

6 Saul kan ataru dipapu, Allah Yahweh er Lek Sambala kareprepa, er puto wekra dinipkerepa, kan cap, anabi-nabi neng cap, kikiman antapra mut semkamrume. Tonda, amenda kupkamre keca tep, lap penkamrume. Tonda, ila upu deiki di, sun nabi-nabi nengdi ngolongmange ngeda, kan peda penkamrume. Ukunmamempa, Allah Yahwehdi kan men di kuramumtopu, tupa men kunkamrume. Allah er Sambala puto deiki di, ukupu ngebo utopu keipkerepa, nimi yuk ngebo utopu kupkamrume.

7 Ange yuma konum kuprepa, epmemyopda, Saul kan dipapu, ‘Angeda telepe, ukupkamane,’ tenepmem ngepu, kunkamrume. Deiyoda, Allah cap, kan cap, kikiman kunkamruma cadi, Allahdi melimkerepa, kikiman kurerumdi, kan tenepkamum ngepu kunkamrume. 8 Ukumemnya tep nengeda, kan adipapu Gilgal mutu mepra bememdi, ue yoneitam bari tumi deiki di dinkamrume. Amenda taru, yoneitam bari tumi konum kupyopda, ne Allah karena tep, yapi keca doupra yanedi, popra uku dongoryankamne. Ataruda, nimi cap, Allah Yahweh cap, antapra deipnedi, telep kuna tep, yapi keca popra uku dongoryankamne. Ataru dipapu, kan ware kunkamrum keca yumada, nedi yana lap peryankamkene. Aupu yumada, Samueldi Saul tep pepu.

Saulda, Allah er Lek Sambala puto deiki di pepu upu

9 Saulda, aupu yuma gekepu dingeda, adipapu Samuel kunmauai taprapudi, ‘Benkun,’ tenepkopda, Allahdi Saul tep, er kange cap, er dipru neitamai tenenange cap, ukupungepu karepupa, er dipru neitamai wekra diniku. Ukupupa, Samueldi, “Ange kupkamker, ange ton kupkamreme,” pepra, lap pepu upu yumada, ange utopu konum kupu. Akeca yumada, Samueldi aupu pepmaunge yuma, ataru dipapu kupupa, katawai kepu.

10 Ange konum kupu pangeda, Saul cap, er melimna ngebo cap, Gibea mutu berei. Bisi banmarei taruda, bisi neitamai di, sun nabi-nabi neng gung tenpu ton antapdai. Antapdai taru adipapu, Allah er puto, Saul deiki wekra dinipu. Ukupra dinipupa, sun nabi-nabi neng mut semaidi, ila upu penmainge yumada, Saul er peda kikiman wisipra, upu penmaidi semai. Sun yuma kikiman Allah er puto deiki di, amenda kupkamu keca penmaidi, Allah tep si eremai. 11 Pumun taru di, er Saul konum kael keami neng yumada, er Saul kunmaunge epra kael kepidi, ukupya tep, tenpu ngebodi ton ngebo tep, asimdanapu kunmai. Ada, “Uo, nun kap Saul akunmarada dimaso! Kish er mi Saulda, ware keca deiyo tep, ange kupmar do? Tonda, Saulda, sun nabi-nabi neng, sun gung ton wisipra kunmardi, nabi ngebo konum kupmar do? Allah upu lap pena deiyo ngebo konum kupmar do, gum do?” pepra asimdanmai.

12 Upenmaipa, sun amutu kurami neng neitamai di, tenpu ngebo ton asipetepu. “Ware ngebo do yumada, nabi-nabi neng kuramengtopu, sun yuk nengdi sun kange dipapu, ‘Ne ton kupkune,’ tenepmengedi, tek sisi kuptenge do? Sun nai bo sisada, tali ngebo kunmarya peda, nabi-nabi neng, sun gung wisiptenge do? Ataru dipapu, amutu nengdi, gonga keprapidi, domon upu utopunge ton penmai. Ada, ‘Saul er peda, nabi ngebo tek sisi kurur do?” pepra, penmai. 13 Saul er adipapu mut semaudi, ila upu penmauanen, konum dim pepu pangeda, er adipapu amutu tapra bisi benmau. Bisi benmaudi, Allah er karena tep keca, mesba ketenepra deiamidi, si eremami mutu dup welepra beu.

14 Saul er mambodi, Saul er melimna ngebo nimi tenpu cap, Saul cap tep, adinmauanen, er mambodi sun aneng butene tep asipetepu. Erdi, “Sunda dan mutu benmarumdi, aca tamupra yanmarerum do?” pepra, asipetepupa, Sauldi tamupra pepu. “Nunda ne nai er keledai bisam wangapunge tep enmaneme. Enmanempanen, dinino nunda pio men epnumu. Men epnumnga cadi, ‘Angebo melipsetu do?’ tenen, adipapu Allah er upu lap perur ngebo, nabi Samuel, er damai benmanumu,” pepu. 15 Sauldi upepupa, er mambodi asipetepu, “Atep nengeda, Samuel erdi pepmau ngeda, ware upu pepmau do?” pepra, asipetepu. 16 Er mambodi upepupa, Saul erdi tamupra pepu, “Gume, Samueldi pepmauada, ne nai er keledai bisam yumada, ‘Nimidi konum epmange,’ peipmanue,” Sauldi pepu. Upepu dinino, Sauldi er mambo gekenaida, lap men pepu ada, Samueldi Saul tep, “Amenda taruda, kanda konum ila nimi deiyo ngebo Raja keipkamrume,” pepra, lap pepmau ngeda, katuai pio men pepu. Angeda iniptapudi, tali dim pepu.

17 Ataruda, Samueldi Israel nesala tep, “Sun yuma bupra Mispa mutu yamumdi, nun nai Allah er si Yahweh ^{▼▼Yahweh – Allah er si, tek sisi ngeda, Yahweh kurure. Ibrani upu penge nesaladi, ‘Allah er si sisada, katuai men peptepe’ tenen, kware kununga cadi, sundi huruf YHWH angepu sengnunge. Dinino, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} damai yankurume,” pepu. 18 Upepupa, konum bupra yai pangeda, Allah peipmaunge, Samueldi Israel nesala tep pepu. “Sun nai bo Allah, er si Yahwehdi keteng tamun denge weik deiki di kalekra meliamseudi uperamseue. ‘Mesir mutu nengdi ila ikin pel dipnepa, kange mun kuramseupa, lyepra konum doupra yanamsisi. Tonda yuk-yuk mutu nengdi, ‘Israel neng popbisiptepe,’ tenen, sun nong deiki ikin keca deriramseipane, anesala kan-kan di lyepropsisi,’ pepra Allahdi upeserure,” Samueldi pepu.

19 Upepudi aupu ton dukdongopra pepu. “Allahdi weik meliamseu dinino, ukutaruda, sun Israel nengdi, ‘Nun ila nimi deiyo ngebo Raja ton weipsetupa, nun talepsetue’ tenen, moroprume. Sun nai Allahdi, sun kange mun keca cap, ikin keca cap neitamai kuramrumai di lyepropseu dinin, ‘Deiyo ngebo Raja karepsetume,’ pepra moropmaruma deiki di, sun nai Allah si konum yanipmarume. Akeca moropmaruma tep, sun cap, sun nyapu cap yuma, sun yala si cap, sun bung cap akurumutopu yuk-yuk kepra, Allah Yahweh er damai yarume,” Samueldi pepu.

20 Upepupa, Israel nesala sun yala yuk-yuk kepra bupra yai pangeda, Samueldi Allah moropupa, Allahdi peten kemdin keca karepupa, Benyamin yala neng wepra deipu. 21 Konum kupka tep nengeda, Benyamin yala neng kan-kan dinin, sun yala yuma bupra deipudi, Allah moropupa, Allahdi peten kemdin keca karepupa, Matri yala neng wepra deipu. Ange utopu kupbanmauanen, siryada, ayala neitamai dinin, nimi si Kis, er mi Saul tep, er si wepra deipu. Ataruda, Samueldi, Kis er mi Saul tep, er si wepra deipu dinino, ‘Saul er nongda, dan kunmar do?’ tenen, dipetepi dinin, er nong ton men epi.

22 Men epya tep, kange di ton cap, Yahweh tep, “Nun nai Allaho, angebo Saulda, aca yanmar do, kapul do?” pepra asipetepra moropi. Moropipa, Allah Yahwehdi, “Tek sisa adamai yanmar dinino, ‘Epnenung’ tenen, sun duyanmamum bunga deipmarumai kan-kan inipra yan kunmare,” pepu.

23 Upepupa, gekepi dingeda, adipapu Saul inipmauai sepdara bena epidi, er dopra duyai. Duyaipa, anesala urasinai tekmaupa, sun Israel neng yuma bum neng kurami dinin, erda ila lyom ngebo cadi, er gisoda sun yuma banapu. 24 Samueldi Saul dopra acapu tekra deipudi, upepu. “Israel nesalao, sun nai bo Allah, er si Yahwehdi wepra deipser ngeboda dinmarum do? Israel nesala kan-kan neitamaida, er kamo utopu ngebo tenpu peda ton men kurure. Pio telep ngeboda er pua,” pepu. Upepupa, sun Israel nesala yumadi, “Ae, ‘Erda keteng tamun denge weik pio gam kunkamre’ tenen, putapsere,” pepra, kange deipidi ila upu deiki di pepi.

25 Uda, ataruda, Samueldi, Israel nesala yuma gekenmaiyaipu lap pepu. “Ila nimi deiyo ngebo, Raja kunkamre kecada ake. Erdi kupkamre ngeda, ake. Erdi men kupkamre ngeda ake. Sundi er tep kunkamrum ngeda ake,” peprapudi, aupu yuma sekra keteneipudi, Allah Yahweh er damai deipu. Ukupu dingeda, Samueldi, Israel nesala yuma tep, “Telepe sun pe ati yuk-yuk tamupra dabeso,” pepupa, bendopi.

26 Upepupa, anesala yuma konum sun pe mutu tamupra bendopi pangeda, Saul peda adipapu er pe mutu, Gibea mutu tamupra beu. Ada, er melimna tep, kware tenena gum, ila puto jen talen neng cap, kikiman Gibea mutu tamupra bei. Anengda, Allah Yahwehdi sun dipru neitamai pel dopmau nengpu, Saul cap kikiman bei. 27 Dinino, amutu kunmai neng kankan neitamai di, nimi yu neng ton, sundi upepi, “Gume anengo, angebo Saulda, nun Israel yala nesala kunup mutu neitamai ton, nun podan neng yangopda, angebodi lyepsetu do, gum do? Nun kangeda, gume,” pepi. Upeprapidi, sun anesala yumada, nimi deiyo ngebo Raja Saul tep malya nenepra penmai. Upenmaidi, yuk nengdi Saul tep, telep karena keca ton, duyakanmaidi karepi, dinino, sun amalye penmai nengdi, nimi deiyo ngebo Raja Saul tep, er kunumna keca ton pio men karepi. Men karepi dinino, Raja Sauldi amali neng upu penmai neng tep, sun upu gekepra kael kepu dinin, sun tep upu ton men pepu. Tali dim peprap kupropu.