1Sa 11 | XteSC | STEP | Amon mutu taleamu ngeboda, er si Nahasdi, er nyapu jen neng tep, “Gilead tara Yabes mutu bena warekurume,” pepu. Upepupa, Yabes mutu nesaladi tamupra Nahas tep upeipi. “Men popsememdi, menmena kandi nun tep, ‘Telep kupra kikiman kunkamepe,’ pepra deipsetum teptoda, nunda kan amutara nengpu kunkamepe,” pepra moropi.

1 Samuel 11

Sauldi Yabes mutu kurami nesala lyepropu upu

1 Amon mutu taleamu ngeboda, er si Nahasdi, er nyapu jen neng tep, “Gilead tara Yabes mutu bena warekurume,” pepu. Upepupa, Yabes mutu nesaladi tamupra Nahas tep upeipi. “Men popsememdi, menmena kandi nun tep, ‘Telep kupra kikiman kunkamepe,’ pepra deipsetum teptoda, nunda kan amutara nengpu kunkamepe,” pepra moropi. 2 Upepipa, Amon mutu taleamu ngebo Nahasdi sun tep tamupra pepu. “Gume, sun asuru dumsisinge lukropsenya deiki dipapu, nedi sun tep ‘Telep kupra kikiman kunkamepe,’ pepra deipsetene. Sun asuru lukropsenya deiki di, sun Israel nesala yuma tep ali dakeipkamsene. Ange men kupnyopda, telep upu ton men peipkamasene,” pepu.

3 Upepupane, sun Yabes mutu talepra kurami nengdi pepi. “Nun kandi komuni yoneitam bari (7) go karepsemempa, nundi nimi ton wepra deipmepepa, Israel neng kunungai yuma perbenkamenge. Ataru neitamaida, nimi ton men yangedi men lyepropsengopda, nundi kan pepmaseremtopu, men popdankamepe, kan amutarapu kupepa, kandi talenkamserume,” pepi. 4 Upepitopu, nimi ton wepra doproipi pangeda, anengdi Israel tara neitamai kai perbenmaiyane, Saul kuramu mutu, Gibea mutu bena lap pepipa, aneng gekepi dingeda, mambul kange doupra sun yuma ila di engenmai.

5 Ukunmai taru, Saulda wa penmaua tapra ati yakaudi, er sapi bisam mepra banmaipane, er amenda tara yakanmau. Yaudi, sun nimi yuma mali penmaidi, engenmaipa gekenmau. Ukunmaipa, Sauldi, “Warya tep do? Ware keca deiyo tep amutu neng yuma mali pepra engenmang do?” pepra asipetepu. Asipetepupa, amutu nengdi, sun Yabes mutu nengdi upu kai duyanapidi, lap pepi upu yuma er damai lap pepi. 6 Ange yuma lap pepipa, Saul gekepu. Agekepu taru dipapu, Allah er Sambala Saul deiki yaudi, er dipru neitamai pel dopupa, yu weike kupu.

7 Yu weik kupupa, Sauldi sapi bisam butene dopra poprapudi galepu. Galepudi, asapi bisam nong metek, metekapu galepra deipmaua dopra, nimi dopra deipudi, anengdi agalepmau sapi bisam tu doprapidi, Israel nesala kurami mutu yuma karepra embanmai. Karepra embanmai taruda, Sauldi peipmau upu perbenmai. Ada, Sauldi upepu. “Ware nesala do yuma, ne Saul cap, Samuel cap men melipsemum pangeda, sun sapi bisam peda poptapnedi galepkamne. Asapi meteka di galepmantopu, sun nge peda popra galepkamne,” pepu.

Upepupa gekepi pangeda, Allah er si Yahwehdi, kware kuna deiyo keca karepupa, Israel mutu neng yumada kware weik kupupa, adipapu Saul damai yana melipmai. Tenpu ngebo yakaretopu, sunda nimi weik dinin, tenpu taru dipu buluprapidi, Saul damai yan melipi.

8 Ukupi atep, sun yuma Besek mutupu bulupra wekipa, Sauldi sun aneng yuma nukra keteneipu. Sun Israel yala nengda, nimi dengeda, pio weike tiga ratus ribu neng keteneipi. Tonda, Yehuda yala neng nimi dengeda, tiga puluh ribu neng acapu bupra keteneipidi weki. 9 Aneng weika di konum bupra weki dingeda, Yabes mutu nengdi upu kai doproipmai neng tep upepi. “Sun perbeso. Yabes mutu kunung nesala damai bena upepkurume. ‘Ambutumi keteng welepra tengyaredi, bupu konum kupre pangeda, nundi sun damai yan lyepropkamasepe.’ Ange tep perberume,” pepra deipmai.

Upepi pangeda, anengdi apepmai upu dopra lap perbeipa, Yabes mutu neng gekepi dingeda, ila kange deipi. 10 Kange deipi dinin, mawa dipapu, sun Amon yala nesala tep nengeda, upepi. “Ambutumida, nundi sun tep podana gum dipapu, nun yumadi sun amutara bukra kunkamepe. Atep nengeda, sun tenepmaserumnge nun damai kuna telepe pua,” pepi.

11 Upepra mapmaipane, konum bereku pangeda, atumi neitamaida, Sauldi er jen talena neng bokra, gung weneri ketenepra deipu. Ukupra kunmaupane, alukunda konum kupu taru dinin, berekmanto kupu pangeda, er jen talen neng yumadi, sun Amon mutu keana dodin tenda ati mapmaiya neitamai yana wareki. Ataru dipapu gonga kepra, Saul er tara nengdi, sun Amon mutu nesala yuma tep podanmaipane, berekudi keteng tengyaupa, bupu kupu taruda, tupa ponmaiyane, nimi weika di poptapi.

Ukupi pangeda, Amon mutu neng metekanun tapi dinin, aneng yuma bura saka bendopi. Bei taruda, sun butene neng peda tenpu bisipu kikiman men berei. Sun yuma kware weik kupupa, yuk-yuk bokra tenpu-tenpu bendopi.

Israel nengdi, ‘Nun ila nimi deiyo ngebo kunkamser’ tenen, Raja kemna tep, Saul erepra deipi upu

12 Sun Amon yala nesala yuma popra sengpepidi, sepdara bendopi pangeda, Israel nesala yumadi, Samuel tep upepi. “Gume, arup taruda, ware nengdi, ‘Saul nun ila nimi deiyo ngebo tek sisi kunkamser do gum do? Erda nun Raja men kupsetue,’ pepra balila di mali pepi neng dan do? Aneng dopra nun damai duyasetengepa, nun adipapu aneng poptapkamepe,” pepi. 13 Upepi dinin, Sauldi tamupra pepu. “Gume, nun nai bo Allah er si Yahweh, atumi deiki di, nun Israel nesala yuma konum lyepropmasere. Atep nengeda, atumida Israel neng tenpu pe ton men poptapkamepe,” pepu.

14 Upepupa, Samueldi aneng yuma tep upepu. “Uda, sun yuma yakaso. Gilgal mutu bepedi, Saul tep nun ila nimi deiyo ngebo Raja kunkamsera tep, konum tenepmepu dinin, kange di ton cap, er tep ereipkamepe,” pepu. 15 Upepka tep nengeda, anesala yuma gekepidi, sun adipapu Gilgal mutu beidi, Allah er damai buluprapidi, “Saulda tek sisi nun ila nimi deiyo ngebo Raja kunkamsere,” pepipa, Allah gekepu. Upepi dingeda, yapi keca poprapidi, ‘Nun nai Allah er si Yahweh cap, nun cap telep kupra kikiman kunkamep’ tenen, Allah gispal dona tep karepi. Ukupi taruda, Saul cap, sun Israel nesala yuma cap, ila kailya kalepra kange deipra pingpinga di kunmai.