1 Samuel 12

Samueldi Israel neng tep, “Ne wisi konum deipsa tep, sun kan-kan di gopropkamne dinin, sundi ukunkamrume,” pepu upu

1Samueldi Israel nesala yuma tep pepu. “Sundi ne damai peryakanerumu ngeda, gekepsidi, sun moropnerumtopu, konum kupsisi. Ada, nedi, sun nimi ila deiyo ngebo kepra talepkamser ngebo, Raja Saul konum wepra deipsisi. 2Ange tep nengeda, ukutaru sun ila nimi deiyo ngebo Raja Sauldi talenkamsere. Ne tep nengeda, pepkusene. Sundi konum dinerume. Neda konum wisi deipsa cadi, ne kul potong konum kupneu. Ne kapul gangtamaneu taruda, kaber taru di sun taleamsisi. Ukuda, ne konum wisi deipsa tep, sun kaele, ne deiamsi nyapuda konum neproprei,” pepu.

3“Atep, ukutaruda, ne sun damai atekne. Tonda nun nai bo Allah, er si Yahwehdi dinmasere. Tonda, nun nimi deiyo talena tep, Allahdi wepra deipmaser ngebo, Raja Saul capdi dinmanere. Sun butene dinmaserenga cadi, ukupmanto nedi sun damai mali kudisengenge akwapyopda, adipapu jenek pepkamrume. Ukupmantoda, nedi ware ngebo sapi bisam upula dopramsi do? Tonda, ware ngebo er keledai bisam ton upula dopramsisi do? Tonda, sun damai mok upu cap, mali upu cap, inipra pepsisa deiki di, bul kalemna co bo cap ton dopramsisi do? Ware ngebo sun nong deiki ikin keca deiamsisi do?

Tonda, mali neng kurami keca upu bongdina deiyo ngebo kuramsi taru neitamaida, ware ngebodi co bo karepneua deiki di, mali neng tep men wenepsi do? ‘Nimidi mali kunge keca men epkamne’ tenen, ne asuru pio men puamneue. Tek sisipu upu bongdiramsidi, mali neng tep wenemamsisi. Apepmasen keca tenpunge peda kuamtene teptoda, ukuamsi pangeda, sundi ‘Ange ton kupmume,’ pepnurumpa, nedi ataru dipapu tamupra punupkamsene,” pepu.

4Samueldi upepu pangeda, Israel neng yumadi tamupra pepi. “Gume naio, kandi ton, nun damai apeprem keca pio ton men kuamsemume. Ikin keca nun nong deiki pio men deiamsemume. Tonda, mawa upu deiki di, nun keca upula pio men dororamsemume. Tenpu keca peda, yuk neng taleraminge kandi upula men dororamsemume. Ange yumada, pio gume,” pepi. 5Upepi pangeda, Samueldi tamupra pepu. “Ange tep nengeda, nun nai Allah, er si Yahweh cap, tonda erdi wepra deipseupa, nun ila deiyo ngebo kunkamser ngebo Saul capdi, sun butene gekenmaserenge. Sundi ne tep, ‘Mali kupsemum ngeda, pio men kupmare,’ konum pepra deipmanerume,” pepu. Upepupa, sun yumadi, “Tek pepreme, Allahdi dinmaserdi gekenmasere,” pepi.

6Upepipa, Samueldi Israel nesala tep aupu ton pepu.

Uda sun nai Allah, er si Yahwehdi, Musa cap, Harun capda wepra deiamu. Ukuramupa, nun co puna neng Mesir mutu di doupra yanamrei. 7Atep ngeda sun atekmarumpa, nedi tek sisi upu pepkusene. Nun nai Allah, er si Yahwehdi dinmaserdi gekenmasere. Atep, erdi pio dumsisi pel doramseua deiki di, sun apu yapu cap, sun cap tep, weika di meliamseunge tep lape pepkusene.

8Tenpu ngeda ake. Sun apu bo Yakub cap er bung cap, Mesir mutu neitamai beipa, Mesir nesaladi ikin pel dimamipa dorami. Amenda taru sun apu yapu ikin weik kuramipa, mali kange dourami pangeda, ‘Allahdi melipra lyepropkamser’ tenen, Yahweh tep mororamipa, gekepudi, Musa cap, Harun cap wepra deipupa, sun butene di sun apu yapu doupra, Mesir mutu neitamai di duyanamrei. Duyanamreipa, akunmap mutu wekra, ati dopra telep kupra akurami.

9Dinino, sun apu yapudi, nun nai bo Yahweh tep, tupa tenena gum dipapu, er tep luproidi, er si yanirami. Ukuramipa, erdi sun tep tapupa, Filistin yala neng, sun ila deiyo ngebo Hazor, er jen neng talena deiyo ngebo Sisera cap, Moab yala neng, sun Raja ngebo cap, sun deiki puto karepupa, yan popra gawal dakmanto kuramreidi, Israel nesala popbisipmanto kupi.

10Ukupi pangeda, sun apu yapudi tamupra, sun nai bo Allah Yahweh tep, “Nun nai, nun kan damai pio mali kunupe,” pepra mororami. “Nunda kan tapra, amutu neng si eremnung isok, sun sida, Bahal cap, Asytoret cap, talepra si eremamupke. Ukuramepu dinin, ukutaru nun podan nengdi talepkusenga tep, kandi lyepropsemem pangeda, kan tarapu tamupra yapedi, kan tenpu talepra kupedi, kan sipu eremkamkepe,” pepra mororami.

11Mororamipa, Allah Yahweh gekepudi, sun melimna tep nimi deiyo neng ton wepra deipu. Aneng sun sida, Yerubaal cap, Barak cap, Yepta cap, Samuel cap dopra deipu pangeda, anengdi Israel nesala lyepropi. Sun podan neng dana-dana tara weik dakurami dinin, Allah wepra deiamu neng meliamnga deiki di, anengdi Israel neng lyepramipa, kange di ton cap amutu neitamai dimpepra telep kupra kurami. Sun ataru kurum neng peda dimpepra telep kupra kuramrume.

12Ukuramrum dinin, Amon yala neng, sun ila nimi deiyo ngebo Raja Nahas, ‘Israel neng popkun’ tenen, yakaramupa, sundi ne tep, “Gume, nun putapser ngeda, ila nimi deiyo ngebo, Raja wepra deipsetumpa telep kutepe,” pepnerume. Tek sisi sun nai bo Allah er si Yahwehdi, sun ila deiyo ngebo konum talepra kuramseu dinin, sundi, “Gume, nimi tenpu ton wepra deipseo,” peipnerume. 13Ange tep nengeda, sun dirume. Sundi mororamrumdi, wepra deiprum nimi deiyo ngebo Raja Saul akurure. Sun dirume. Allah Yahwehdi sun Raja tep konum wepra deipmaserpa, atekmare.

14Ange tep nengeda, sun nai bo Allah, er si Yahweh tep, kware weik kuserepa, er sipu eremrumdi, er amutarapu kumumdi erdi, ‘Ukunkamrume, angeda men kunkamrume,’ pepra pedisere upu yuma gekepra domberumnyopda, akeca yuma teleppu kunkamsere. Tonda, sun Israel nesala yuma pe, sun Raja ngebo peda, sun nai bo Yahweh, er sipu eremrumudi, er upu gekepra domberumnyopda, teleppu kunkamsere.

15Dinino, sun nai bo Allah Yahweh tep, er upu men gekeprumudi erdi, ‘Angeda kunkamrume, angeda men kunkamrume,’ pepra pesere upu tapra yaniprumnyopda, erdi sun apu yapu tep tek sisi wenemamudi, ikin keca sun nong deiki deriramutopu, sun ukutaru kurum nesala cap, sun tep talenkamsera deiyo ngebo tep nengeda, utopu wenemseredi, ikin keca sun nong deiki derinkamsere. Sun tep men melimkamsere. Samueldi Israel neng tep pepu.

16Upepu dingeda, aupu dukdongopra pepu. “Ange tep nengeda, sun atekmarumdi, dinkamrume. Sun nai bo Allah, er si Yahwehdi, ila mambul keca, kunupsek pen pel dopre pangeda, adipapu dinkamarume. Deiyoda sundi, ‘Raja ngebo dipu talepsetue,’ pepra moropruma deiki di, mali keca moropmaruma tep pepsene.

17Uda tenipetepso. Ataruda sun gandum wa kin taru konum kupsere. Gandum du kin taru konum kupmaser dinin, nedi nun nai Yahweh tep moropne pangeda, erdi ila kulman cap, mo cap karepkusere. Akeca karepserya deiki di, sundi betapra tenenkamrume. Ada, Allah dipapu talepsetu dinin, sundi, ‘Ila nimi deiyo ngebo, Raja putapsera tep, wepra deipserume,’ pepra moropnerum ngeda, Allah er kangeda, ‘Angeda pio mali,’ teneserure. Ange kael kepkamarume.” Samueldi pepu.

18Upepudi, adipapu Samueldi, Allah er si Yahweh tep moropupa, gekepudi, atumi dipapu Allah Yahwehdi ila kulman cap, mo cap dokotepmaupa, sun yuma dinmai. Ukupka tep nengeda, sun Israel nesala yuma kael kepidi, er Allah Yahweh cap, Samuel cap tep, kware weik kupupa, sun yumadi, ‘Uo, sunda ila mambule,’ tenepi. 19Konum tenepi dingeda, sun Israel nesaladi Samuel tep pepi. “Uo, Naio. Kandi nun nai bo Yahweh tep moroptumpa, gekepketu dingeda, nun tep men popkusere.

Ada tali tep men pepmepe. Nun mali kuramepu keca weik akwamu dinin, ukutaruda tenpu ila mali kun keca ton konum tapakmape. Ada, nundi, ‘Ila nimi deiyo ngebo Raja dipapu talepsetue,’ pepra moropmepu ngeda, tek sisi mali kupmepu,” pepi. Upepipa, Samueldi tamupra pepu.

20Kware kuna gume. Tek sisi sunda mali kun keca weika di konum kuramrum dinin, ukutaruda ange yuma tapra teleppu kunkamrume. Ada, sun nai Allah, er si Yahweh tep tamna gum di, er sipu eremkamrume. Sun kange dipru yuma Allah Yahweh deikipu deiprumdi, er amutarapu kupra, er upupu moupra gekeprumudi dombankamrume. 21Tonda, tali isok-isok cap, nimidi gat keca dopra nimi urasin utopu petupra deipmengedi, ‘Nun nai, sundi melipsetenge’ tenen, sun si eremenge keca yala-yala yumada, men talenkamrume.

Akeca yumada, tali keca pua tep, men melipsetenge. Isok yala-yala yumada, tek sisi men melipsetenge. Isok yumada, puto gum cadi, nong men kupkamre keca cadi, sun ikin kuserenge neitamai di men lyepropsetenge. Isok yumada tali keca, gum kupkamre keca pua.

22Sun nai bo Allah, er si Yahwehdi, pumun taru sun Israel nesala tep konum wepra deiamseudi, ‘Anengda ne mawa nesala,’ konum peamseudi teneserya tepa. Ange tep nengeda, sun nai bo Allah Yahwehdi pio men tapkamsere. Er si pio ila mambul si kurura cadi, ‘Yuk yala nengdi ne si mali pepnenung’ tenen, erdi pio men tamkamsere. 23Tonda, ne pedi kunkamne ngeda, pepkusene. Nedi sun tep, Allah men moropne pangeda, pio mali kuptene. Amali kun keca pio men kupkamne tenenuna tep nengeda, ne pedi pio men tapkamsene. Nedi sun tep tupa-tupa Allah moronapu kunkamsene. Tonda, ‘Israel nesaladi telep dumsisi kuna bisi ace, tenepra, kael kemkamrum’ tenen, nedi dumsisi kun keca tupa peteremkamsene.

24Ukunkamsen dinino, ila mambul ngeda pepkusene. Ada, sun nai bo Allah, er si Yahweh tep pio kware kunkamrume. Sun kange dipru yuma Allah tep karepmumdi, er tepapu gispal dopra dukdongopra talepmumdi telep dipapu kunkamrume. Er tep tamna gum dipapu, er amutara kupra er upupu pio moupra gekenkamrume. Tonda, Allahdi sun melimna tep, pio mambul pel cap, kunupsek pen pel cap doramseunge yumada, tupa tenenkamrume. Ange yumada lumdongona gume.

25Telepnge konum lape pepmasen dinino, sundi ange betapra men gekeprumudi, tupa mali-malipu kumumnyopda, sun pe, sun Raja ngebo peda gum kupkamrume. Allah wenepseredi, gawal dakamsere.

Samueldi Israel nesala yuma tep pepu.