1Sa 13 | XteSC | STEP | Saul er ukupra keteng tamun denge weneri (30) tahun kuramu taruda, Israel sun ila nimi deiyo ngebo, Raja gonga kemne ngebo kupu. Ataru di dipra, keteng tamun denge weik dumbari cap, butene cap (42 tahun) deiki di, Israel nesala sun ila deiyo ngebo talepra kuramu.

1 Samuel 13

Israel nesaladi, Filistin nesala tep, porbenami upu

1 Saul er ukupra keteng tamun denge weneri (30) tahun kuramu taruda, Israel sun ila nimi deiyo ngebo, Raja gonga kemne ngebo kupu. Ataru di dipra, keteng tamun denge weik dumbari cap, butene cap (42 tahun) deiki di, Israel nesala sun ila deiyo ngebo talepra kuramu. 2 Ataru neitamaida, Sauldi, ‘Anengda ne jen talen neng kunkamenge’ tenen, Israel nesala nimi denge weik tiga ribu neng wepra deipu. Ukupupa, dua ribu nengda, Saul er cap Mikmas mutu bei. Mikmas mutuda, Betel tara neitamai dinin, mutu buma kwangnai apu kunmai. Ton seribu nengda, Saul er mi Yonatan cap, Benyamin yala neng kurami tara dinin, Gibea mutu bei. Bei dinin, ton yuk nengda, sun Israel neng yala-yala yuma tep, Sauldi, “Tamupra sun pe atipu yuk-yuk benkurume,” pepupa, sun ati tamupra bei.

3 Ukupipa, Yonatandi Filistin nesala sun jen talena neng kurami mutu si Geba mutu bena aneng poptapu. Ukupupa, Filistin nesala gekepi. Atarupu Sauldi pepu. “Ukutaruda, bung-bung pena er si terompet, pung pena ila di pepmumpa, Ibrani nesala kunge mutu yuma gekepkunge,” pepra deipupa, pung pepi pangeda, Israel nesala dana-dana tara yumadi gekepra bulupi.

4 Upepupa, Israel nesala gekepyopda, ‘Saul cap, er mi capdi, Filistin nesala sun jen talena neng, Geba mutu kurami neng yuma popmanga cadi, Filistin nengdi, nun Israel nesala tep, pio song tenepkamsenge’ tenepidi kael kepi. Tonda, atep nengeda, ‘Israel neng cap, Filistin nesala cap, kikiman men kutepe’ tenen, kael kepi. Atep, Sauldi peipupa, Israel nesala yuma, Sauldi gonga kepupa, Gilgal mutupu yana bulupi.

5 Ataruda, Filistin nesaladi Israel nesala porbana tep, nimi weika di bulupi. Sun jen talen neng dengeda, laut mokon pirman gel wenenga, pasir utopu kupya tep, men nukmanto kupi. Tonda, sun kuda bisamdi gipra, kereta bukra, tu deiki embana kecada, denge weik, tiga ribu (3.000) keteneipi. Ange utopu, akereta talen neng, jen talena deiyo nengda, enam ribu (6.000) wepra deipi. Israel nesala porbana tep, Mikmas mutu bena ketenepi. Mikmas mutuda atara, keteng yakan tarada Bet-Awen mutu bena ketenepi.

6 Ukupi pangeda, Israel nesala epidi, ‘Uo anengda, men nukmanto kununga cadi, nun jen talena nengdi sun Filistin neng men popbisiptenge’ tenen, sun kware kupupa, mali kange doupidi, nimi yuma sepdara bura tara bena, gel imir pumbon cap, mutmuta kan-kan cap, gel tengne pumbon cap, mutu buma amu cap, tonda, ‘Mo ceptudi, mokon deiptu’ tenen, tu pumbon palipyai cap, bena inimbei.

7 Tonda, Israel nesala ton, Yordan me goupra ortara Gad yala neng talepra kurami tara cap, Gilead yala neng talepra kurami tara cap bei. Saulpuda Gilgal mutupu tupa kuramupa, nimi weika di er cap melipra kurami jen nengda, kware di yo moropsepdara kunmai. 8 Ange tep nengeda, Samueldi Saul tep, er peiamutopu, Sauldi diramu. Yoneitam bari taru di Samuel yakana tep, diramu. Dinino, Samuel adipapu Gilgal mutu men yau. Ukupu pangeda, Saul er jen talena neng neitamai di bokra, ton neng ataruda, ‘Uo, nun nai Samuel men melipkamser’ tenen, datapra yuk-yuk bendopi.

9 Atep nengeda, Sauldi er nyapu tep pepu. “Ukutaruda, ‘Nun mali kun keca daepseredi, men wenepra popkamser’ tenen, nun nai Allah er gispal dona tep gam keca popra uku dongopkamep keca cap, tonda ‘Allah cap nun cap kikiman telep kupra kutepe’ tenen, ‘Karepkup’ tenepmum keca duyankunerume. Ada, sun gam keca cap, yuk karen keca cap dopra, ne damai deriyarume.” Upepupa, duyai pangeda, Sauldi, ‘Nun yo pununa tep, Allahdi men wenepra poptapkamser’ tenen, er gispal dona tep uku dongona kecada, er dipapu doprapudi, Allah tep karepu.

10 Dinino, angeda ukupudi akunmai taru dipapu, Samuel yau. Yau pangeda, Sauldi Samuel tep, benapudi er tep “Telepe,” pepra buru karepu. 11 Upepu dinin, Samueldi tamupra Saul tep pepu. “Kao, kandi ware kupmarem do?” pepu. Upepupa Sauldi tamupra, “Ne jen talena neng yuma ne tapra bendopmanenge. Ada mesum tep gume. Kandi ‘Yankamne,’ peiamumpa, diramkeipane, kapul men yanapmum taruda, sun Filistin neng weika di buluprapidi, Mikmas mutu wengyai atep, ne dipapu apel dopmandi, akeca dopra Allah karepmanue,” pepu.

12 “Tonda, tenepmanu ngeda, ake. Neda, Filistin jen talen neng, ne damai konum poryankunenge. Ada Gilgal mutu damai men yanmang taruda, ‘Ne nai Allahdi, melipnerepa, ne podan neng bisbisa kaptene’ tenen, er tep gispal dopra kapul men karepmanue. Atep, ‘Ne dipapu kika deipra Allah er uku dongon keca karepkune,’ tenepmanudi apel dopmanue,” Sauldi pepu. 13 Upepu pangeda, Samueldi tamupra Saul tep pepu. “Gume, pio moupmemdi kunkurume. Walwal di pio mali kupmarume. Nun nai bo Allah, er si Yahwehdi, ^{▼▼Yahweh – Allah er si, tek sisi ngeda, Yahweh kurure. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} ‘Ukupkamrume,’ pepra pediserenge utopu, kandi men kupmareme. Uda, ange gum dinin, kan kange dipapu tenepmarum ngeda, konum kupmarume. Allahdi ‘Ukupkamrume,’ pepra pediserenge utopu konum kupmatum teptoda, Allahdi Israel nesala kunkameng mutu neitamai tep, melipketupa, kan cap, kan nyapu cap, kan yala neng capdi, Israel nesala sun ila nimi deiyo neng pio kunkamtenge.

14 Dinino, kika di mali konum kupmaruma tep, ukutaruda, amutu neitamaida, pio ila nimi deiyo ngebo men kunkamreme. Kanda, Allahdi pediramseu upu konum yanipmarema cadi, Allah er pe dipru dumsisi kuretopu, erdi dipetepudi, er dipruai kuramunge utopu ngebo konum kael kepudi, wepra deipkamare. Angebodi Allah er mawa nesala tep, ila nimi deiyo ngebo, Raja kunkamre. Ukuredi, kan yo punupkamkere. Punupkeredi, Raja kupra Israel nesala yuma talepra kunkamre,” Samueldi Saul tep lap pepu.

15 Samueldi upepu dingeda, Gilgal mutu di tapra, Benyamin yala neng kuramyai Gibea mutu welepra beudi kunmau. Ataruda, Sauldi, ‘Ne jen talena neng ware kupra kunung do?’ tenen, nukterepupa, denge weik enam ratus (600) neng kurami.

Israel yala nesala, sun jen talen neng, nimi podan keca yuma men kwamupa, men talerami taru tep upu

16 Uda, Saul cap, er mi Yonatan cap, sun tara di, kikiman yanmai jen neng cap yuma, Benyamin yala neng tara neitamai, Geba mutu dodin tenda ati bendopidi, dakunmai dinin, Filistin nengda, opkal bol tenda ati, Mikmas mutu yan deipmaidi, ke taru tep yana kunmai.

17 Ayan donmaipapu, sun Filistin neng dipu, ‘Israel neng tali-tali warekmepedi, popra akapre keca upula dopropkamep’ tenen, sun jen neng neitamai di bokra, gung weneri deipi. Gung weneri deipi dingeda, sun gungda weneri cadi, ton nengda Syual mutu damai dinin, Ofra mutu damai bei. 18 Ton gungda Bet-Horon tara bei. Ton weneri gungda, tu wilimdanai damai dinin, Seboim ban tara kalengbei. Seboim mutu di, ortarada me gumai cadi, nimi men kurami mutu ton dinmai.

19 Uda, ataru neitamaida, Israel nesala kurami mutu neitamai yuma, gat keca besi di betamna kael neng, tenpunge peda men kurami. Deiyoda, Filistin nengdi uperami. “Gume, sun Israel yala nesaladi, ‘Nun damai yana popsenung’ tenen, gat keca di betamna kael neng yumadi sun pel dona pio meme. Besi keca betamna neng tep, Israel yala neng go karepmepepa, sun pel dopmengopda, sun gat keca besi takke nge keca betamna cap, parang ya betamna cap yumada, pel dopmengedi, akeca talepmengopda, nun yana posenunga tep, angeda pio gume. Men pel donkamenge,” perami.

20 Upepra uperamya tep nengeda, sun Israel yala nengdi sun gat keca takke luna tep nengeda, Filistin nesala damai mororbenami. Ada, sun wa tu palina tep besi keca cap, sun kapak ya cap, gandum manmaneng sengne tema cap, uda sun gat keca yuma takke ketenem dina tep nengeda, Filistin neng moropnepa, aneng dipu ketenem dirami.

21 Ukurami dinin, mesum dipapu atakke keca men keterami. Kunumna weik keca, gel uang karepnedi moropnepa, adeiki dipu takke keca keterami. Atep nengeda, sun Israel nengda, ikin kange dourami. Sun wa tu palina tep besi keca takke luna tep nengeda, gel uang kunumna weiknge 2 karerami. Sun kapak ya ketena cap, sapi bisam ‘Sepra benkung’ tenen, pona tep besi keca cap, gandum betei capra eremdon keca cap, takke ketena tep nengeda, gel kunumna weiknge tenpunge karerami.

22 Atep nengeda, Israel jen nengdi Mikmas mutu bena Filistin neng tep kapul men popdanmai taru di, Israel neng tenpu ngebo peda, nimi pon takke keca men talepi. Ada sun parang ya cap, nimi pona tep lurami co takke cap, pio men talerami. Sun Saul cap, er mi Yonatan cap puda, akeca tupa douramrei. Sun yuk jen talen nengda, ton pio men dourami.

23 Ataruda, Filistin jen talen nengdi, tenpu gung bokrapidi, ila mutu dana-dana bukamu bongboi neitamai, amutuda Mikmas mutu damai beidi kalengmai.