1Sa 14 | XteSC | STEP | Tenpu tumida, kaber ngebo er si Yonatandi, er jen doupra benmau ngebo tep pepu, “Ukutaruda, nun adipapu nun podan neng, sun Filistin yala neng jen talen nengdi domi ati, ortara goupra benkuneme,” pepu. Upepu dinino, er nai bo Saul tep, “Naio nunda benkamneme,” pepra, men moropu.

1 Samuel 14

Saul er mi Yonatan cap, er kap capdi, Filistin nesala tep porberei upu

1 Tenpu tumida, kaber ngebo er si Yonatandi, er jen doupra benmau ngebo tep pepu, “Ukutaruda, nun adipapu nun podan neng, sun Filistin yala neng jen talen nengdi domi ati, ortara goupra benkuneme,” pepu. Upepu dinino, er nai bo Saul tep, “Naio nunda benkamneme,” pepra, men moropu. 2 Saul ataru dipapu, Migron mutu neitamai delima co tekamnga damai bena keana tep kunmau. Abena kunmauaida, karenai gum dinin, Gibea mutu damai di dipra, metekanun ortara kupu. Pio meneng damai cadi, Saul tep melipra benmai jen talena neng sun dengeda, ukupmanto nimi denge weike, 600 neng cap amutu bena wekmai. 3 Ataru sun imam yala neng, sun kenengna tep, efot opkal doupra beitopu, Saul er melipra bena kunmai neng kan-kanda, tenpu ngebo er si Ahitub, er mi Ahiya kunmau. Ahitub er weit boda Ikabod cadi, Ikabod erda, Ahiya er mambo kuramu. Sun nai boda, er si Pinehas kuramu. Pinehas er mi nai bo sida, imam Eli kuramu. Erda Silo mutu neitamai Allah Yahweh, er pel dona tep imam ngebo pel talepra kuramu.

Amutu neitamai kunmai neng yuma, Saul cap, er jen talena neng cap yumadi, ‘Yonatanda konum amutu tapra, ormutu sun Filistin tara neng damai benmare’ tenen, pio men kael kepmai. 4 Sun Filistin nengdi, dodina ati dopra, deiamidi kalengamaiai dinin, atara di ortara bana tep, gil dup mutu tenpu bukamodi bona dakroamupa, agil sirik dana-dana tara di, yan antapdopmanto kwamu. Yonatanda, abisi neitamaipu beu. Aila gil mutu bukamodi, dana-dana tara di yana denepdongoamunge tep nengeda, si yuk-yuk si perami. Ada, utara cap tonda iknapi dam tara cap, bukamu mutuda, tenpunge tep nengeda, er si Sene perami. Tonda, ortarange tep nengeda, er si Bozes perami. Aperami mutu dana-dana bukamoa neitam bonada, Yonatan wekra beu. 5 Utara mutu, dapu tara bukamu gelda, Mikmas mutu tara urasin deiamu. Utopu, iknapi selatan dam tara bukamu gelda, er urasin Geba mutu tara deiamu.

6 Yonatandi akaber ngebo, er jen cap, nimi podanai kenengamu gat opkal cap melipra doupmau kaber ngebo tep pepu, “Kan adipapu menmena yakamempa, nun tonpa benemedi, Allah er si men kael kepidi, men eremnung neng, sun Filistin nengdi, sun kalengna tep dodina ati dopra yankungeya damai benkuneme. Benemepa, nun nai bo Allah Yahweh, erdi nun tep melipkuserdi, nimi porbisina keca nun deiki deipkamasere. Melipseryopda, Allah erdi sun Filistin neng dopra, nun buru deiki deipserepa, sun aneng yuma popkuneme. Ada, nimi yambul do, weik do, men tenenkuneme. Allah er puto deiki di, nimi weik akunga peda, ‘Popnedi gawal dakune,’ tenepyopda, akonuma erdi porure. Atep, erdi melipserya deiki di, orbenemedi bena, aneng yuma popbisipkuneme,” pepra, Yonatandi er melimna kaber ngebo tep pepu. 7 Upepupa, Yonatan er jen cap, nimi pon keca, yuk gat keca dopra dubana tep melimna kaber ngebodi tamupra pepu, “Ne deiyo ngebo, kandi, ‘Angeda telepe,’ tenepmemdi, ‘Ukupkune,’ tenepmemtopu, angepu kupkuneme. Kanda tenememtopu, ne peda angepu konum tenepnedi, kupkuneme,” pepu.”

8 Upepupa, Yonatandi pepu. “Jo telepe, ataru dipapu, nun ortara goupra benkuneme. Ukupnemedi, nun nong yuma doupra benemedi, sun Filistin nengdi epkamasenge. Sun kalengnungai, nun nong lap perbenkaneme. 9 Ukupnemepa, sun Filistin mutu bisi kalengmenge nengdi nun tep, “Gume, aceipu dim pepra tekmarerumdi, dinmarerumpanen, nundi sun atekmarerumaipu, yana popdankupe,” pepsengopda, nun ortara men goupra benkamaneme. Aceipu tekamaneme. Sun Filistin nengdi, nun damai yankamenge taruda, nun pio aceipu kunkamaneme.

10 Dinino, sun Filistin neng sun bisi banai bisi bon kalengna nengdi, nun tep, “Ukuda nun damai yarerume,” pepsengopda, sun damai ortara benkamaneme. Ange lap pepmakentopu, peten kemna keca utopu kupkamasera cadi, adeiki di kael kepkamaneme. “Sunda, nun tara yarerume,” pepsengopda, angeda konuma, Allah Yahwehdi sun Filistin neng dopra nun Israel yala neng tep konum karepmaserpa, nun butenedi aneng popbisipkamaneme,’ tenepnemedi, adipapu sun tara porbenkuneme.” Yonatandi pepu.

11 Atep nengeda, ataruda Yonatan cap, akaber ngebo, er jen cap, yuk nimi pona tep gat keca cap, talepra melipmau ngebo cap, ortara adipapu Filistin neng sun dodina ati dopra deiamidi, kalengamya damai bena genekdoprei. Ukupreipa, sun Filistin neng aneng butene epidi upepdai, “Sun yuma moupra epso. Ukutaru sun Ibrani yala neng buteneda, mutu bon neitamai inimbenmaiya di, gupmarengdi katuai yakanmarenge,” pepra nyek-nyek pepi. 12 Tonda, amutu deiki wekmai Filistin jen talen neng yumadi, Yonatan cap, tonda er melipmau kaber ngebo cap tep upepi, “Sun aweleryarerumpa, nundi sun tep mambul keca peterepkusepe. Ada, nundi sun tep adipapu popkusepe!” pepi. Upepipa, Yonatandi er melipmau kaber ngebo tep pepu. “Akonuma, ukuda nun kael kepneme. Allah Yahwehdi sun Filistin neng dopra, nun Israel yala neng konum karepmaserpa, er puto deiki di aneng tek sisi popbisipkuneme. Atep, ne welepnedi, kanda nepu domyankurume,” pepu.

13 Upepu dingeda, Yonatan er jen cap, yuk nimi pona tep gat keca cap dubaramu melimna kaber ngebo cap, Yonatan cap, sun adipapu kikiman puto di genepdongopra weleprei. Kware tenena pio gum dipapu, balila di welepreidi, Yonatandi awekmai Filistin neng weika di, menmena popbanmau pangeda, ange utopu ton, er jen doupra melipmau kaber ngebodi, amenda banmaudi, aneng ton popbanapu kunmau. 14 Yonatan cap, er melipmau kaber ngebo capdi, menmena taru porberei ngeda, ukupmantoda dua puluh (20) neng poptapreipa, sun aneng nong saka kupmauaida, aila pala mutu yuma ukupmantoda, tenpu tumi deiki di tali wa sisa peramenga utopu kupu. Amutu er palada, seper empat hektar peramengtopu kupu. Aceipu aneng poptapreipa, sun nong saka adana-dana tara kupu.

15 Ukuprei pangeda, akupunge tep nengeda, sun Filistin neng ati dopra kuramya neitamai kunmai nesala yumadi epyopda, kware pio weik kupu. Tonda, akatawai mutu neitamai ban-ban yuma dakurami nesala yuma, sun kwar kupu. Filistin mutu neitamai taleamipa kurami mutu bisi bon kalengna tep domi ati-ati cap, popnedi upula dalupra dorona Filistin neng yala-yala yuma cap yumada, sun kware weik kupu. Tonda, amutu yuma peda, long-long pepra, berber pepnapu kupu. Ange ukupka tep nengeda, sun Filistin mutu neng yuma peda, kware pio weik kupupa, sepra ortara benapna atara yanapna keptopi.

Israel yala nengdi sun Filistin neng tep, popbisipi upu

16 Ataruda, Saul er jen nengdi Gibea tara dinin, Benyamin mutu melipra kalengmai nengda, sun Filistin neng sepra ortara benapna, atara yanapna kemaidi, sun kangeda pio wang-wang pepdanen, yakanmaipa epidi lukdai. 17 Epidi lap pepipa, Sauldi er melimne jen talen neng cap, er cap kikiman awekmai neng yuma cap tep pepu, “Ukutaruda adipapu, nun tara jen talen neng yuma nukurume. Tonda, adipapu lepetepmumpa, ‘Ware ngebo ton acei men yanmar do?’ tenen, nundi kael kepkupe,” pepu. Upepupa, sun adipapu aupu pepra deiputopu, epra nukra embanmaianen, Yonatan cap, er jen cap, nimi pona tep yuk gat keca cap doupra embaramu melimna kaber ngebo cap, men kupmareipa, epra kael kepidi, Saul tep lap pepi.

18 “Ukupi dingeda, imam nengdi, efod ^{▼▼efod – Akeca efodda sun imam neng, sun deiyo ngebodi akeca dopra, er nong urasin tara er taram deiki kenengamu. Akeca efot deikida, urasin pio telep gel warna-warna yuk akapunge palepra deiami. Ton gelda er si Urim, ton gelda er si Thumin kwamu. Agel-agel yuma dipeteramipa, Allah er puto deiki di, agel warna yuk kepra deiamnga deiki di, sun imam nengdi, ‘E, Allah Yahweh, erdi nun tep, ‘Ukupkurume, tek sisi ngeda ake, sun kael kepkurum ngeda ake,’ pepra deipserada, akonuma’ tenen, kael kemamidi, Israel tara nesala yuma tep lap perami.Atep nengeda, akeca efod deiki deiami gel, Urmin cap, Thumin cap, diramya deiki di, peten kemna keca kupka cadi, adeiki di sun kunkameng keca kael keami.} opkal kenengnungada, aceipu doupra yarume. Angeda peten kemna keca kurura cadi, efod dipetepmepya deiki di, Allahdi, ‘Ukupkamrume,’ teneserurada, nundi kael kepkupe,” pepu. Ada, Raja Sauldi imam ngebo Ahia tep pepu. Ataru neitamaida, sun Israel yala nesala yuma dinmai taru dipapu, imam Ahiadi, er taram deiki efod opkal doupra kenengamu. Atep, erdi akeca efod duyau. 19 Imam ngebo Ahiadi, efod dopra duyanmaupa, ‘Allahdi ware pepkuser do?’ tenen, akeca dinmareidi, er cap, Saul cap upu sisingmarei. Saul erdi aimam deiyo ngebo Ahia cap upu penmarei taru dipapu, sun Filistin nesala wengami ati dam yumada, ila upu pedanmaidi koudanmai. Ukunmaidi lelim weik kupmaupa, Sauldi aimam ngebo tep pepu. “Ukutaruda, akeca efod dinada dakwapye. Nundi Allah Yahweh asimna cap, morona cap tep, kupmanto taruda, go ton pio men kupsere. Adipapu ortara kunmang Filistin neng damai bena popbisipkupe!” pepu.

20 Upepu dingeda, Saul cap, er cap kikiman kunmai neng cap, sun jen talen neng cap yumada, sun yuma kikiman adipapu mar podarbanai bei. Sun anengdi bena, Filistin neng damai bena dinmaipa, sun Filistin nengda, kware weik kupka cadi, sun kange yawarapka tep, moupra tenena gum dipapu, kange wang-wang kunmaidi, sun pedi sun pe tara Filistin neng tep, podanapu kunmaipa, Israel nengdi epi. 21 Angepu gum dinin, menop taru neitamaida, sun Israel tara nesala yambulanun weika di, Filistin mutu nesala kan-kan bena kuramidi, Filistin tara keproidi, amutu melipra yanami neng yuma peda, ataru dipapu Filistin yala jen talen neng tep, gonga kepra popnapu ukunmai. Ada, sun Israel yala neng yumadi, adipapu tamupra Saul cap, Yonatan cap, sun tara jen talen neng dam tarapu, sun kikiman kepropidi, sun Filistin yala neng tep popnapu kunmai.

22 Ange utopu, sun Israel yala nesala weikanun ton, ‘Filistin nengdi, popsengedi gawal dakamsenung’ tenen, kware kupupa iknapi dam tara, Efraim mutu dupai bena, inipmai neng yuma peda, yuk nengdi, “Filistin tara neng yumada, kware kupmarpa, sepra banmange,” pepipa, gekenmai dingeda, sun peda adipapu sun inimbenmaiyai di tapra, Filistin yala neng sepra banmai bisi bena, Saul cap, er jen talena neng capdi, kikiman wisiprapidi, Filistin yala neng porbei. 23 Ataruda, sun Israel yala nesala jen talen nengdi Filistin yala neng tep bisi neitamai di apopdanen banapu kunmaiyanen, ila mutuda Bet-Awen mutu peda, Filistin neng pona tep, porbenmaidi yaproi. Tek sisi atumida Allah Yahweh, er puto weik karepka deiki di, sun Israel yala nesala tep lyeprapudi, telep kupra deipu.

Konum popdai taru kupunge tep, pepu upu

24 Ataru neitamaida, Sauldi pepu. “Ne tek sisi pepsene. Atumida, ne mar podan neng, sun Filistin neng tep, sun deiki yu tenepsinge kapul men kupmandi sun yuma kapul men popnedi gawal daknyopda, ataru neitamai di, ware keca do yuma, jen keca jenmang nengda, tek sisi konum wipdongopkune. Atep jen keca pio men jenkamrume,” pepra deipu. Atep nengeda, nimi deiyo ngebo Raja Sauldi aupu pepka cadi, atumi ipna taru di dipra, atumi keteng komuni cap, lukunda cap yumada, tenpu ngebo peda jen ton pio men jepu. Jen keca men jenmaiya cadi, sun Israel yala nesala yumada, jen keca men jenmaiya tep, jen putapupa, sun nong yuma bounpu kupka tep, kange mun kange deipra kunmai. 25 Ataru nimi deiyo ngebo Raja Saul, er jen talen neng yumada, bisi banmaiyanen, tenpu mutu bura, co palpal wengbei taruda, amutu neitamaida, mong mokon pio weik wengamunga cadi, tu deiki ton sakupa epi. 26 Mong mokon weik akamu dinino, nimi tenpu ngebo peda, among mokon neitamai kwamu keca tenpu ton, dopra men jenmai. Deiyoda, nimi deiyo ngebo Raja Sauldi konum pepra wipdongomunge tep, kware weik kupu.

27 Sun ukunmai dinino, Yonatanda, er nai bo Sauldi er nyapu sun jen talen neng tep, “Sun yumada, jen keca jena pio meme. Men jepkamrume. Jen keca jepre ngeboda konum wipdongopmane,” pepmau upuda, men gekepmau. Yonatanda aupu men gekepmaua cadi, ange tenena gum dingeda, Yonatan adipapu, er doupmau macada dopra, amaca urupda, mong mokon neitamai lukdongopupa, mong mokon me embaunge damai bena deipu. Ukupu dingeda, Yonatan adipapu among mokon doprapudi jepu. Dopra jepu taruda, adipapu er nongda puto weik tamakudi, pio telep kupu.

28 Ukupkopda, jen talena neng awekmai neng neitamai di, jen ngebo tenpu dipapu Yonatan tep pepu, “Kan dipapu akupmarema deiki di, mali kupmarem do? Deiyoda, nun peda jen putanmaser di boun kupmasere dinin, kan nai bo nimi deiyo ngebo Raja Sauldi pepseu. ‘Atumi ton jena jepre ngeboda, konum wipdongopmane,’ pepra puto upu pepmara deiki di, ateng koupra deipseua cadi, atumi neitamaida, nun yumada jena men jenmape. Atep nun yuma puto boun kupmasere,” pepu.

29 Upepupa, Yonatandi tamupra pepu, “Tek sisi ne nai bo erdi konum nun mutu neitamai yuma tep, ikin keca nun nong deiki deipmasera deiki di, mali kupra deipseue. Ukutaruda, ne kununa urasinda dinkamrume. Ada, ne peda puto boun kupmanu dinin, yambulanun mong mokon ton dopra jepsi taruda, puto tamaknudi, yambul telep kunune,” pepu. 30 Upepudi aupu ton dukdongopra pepu. “Ukupmantoda, atumi ne nai bo, erdi sun jen talen neng tep, ‘Telepe,’ teneptudi, sun Filistin neng popmaipa, aneng tapmai jen keca yumada, sun adipapu dopropnedi, jeamtenge teptoda, sun mar podan neng tep, weikanunton popbisiamtenge. Ada, jen keca jepmatengdi, puto kuptengopda, tek sisi sun Filistin nengda, adipapu pio weika di popra gawal dakmatepe. Atep, telep ngeda, ne nai bodi pepmau upu men pepmatue,” Yonatandi pepu.

31 Ataruda, sun Israel yala nesaladi, Filistin neng weika di popbisipra banmai. Ada, Mikmas mutu bisi bana neitamai di, dipdongopra popdanen banmaianen, Ayalon mutu bei. Ukupbanmai dinin, sun Israel yala nesala jen neng yumada, jen keca men jenmaiya cadi, sun puto boun kupu. 32 Pio puto boun kupya tep, sun Israel yala nesala jen talen neng yumadi, Filistin neng sun bung keca tapmainge yumada, sun Israel yala jen talen nengdi, upula di dalupra dopra sengpepi. Adalupi keca neitamaida, domba bisam cap, kambing bisam cap, ton dopropi dingeda, adipapu adalupra dopropmai gam keca weika di popra, sesek-sesek peprapidi, aceipu deipidi, jepropi. Tonda, adipapu adomba bisam tu cap, sapi bisam tu cap, yapi tupa kunmaunge yumada, tali lupra jenapu kunmai.

33 Ukunmai taruda, yuk nengdi epidi, nimi deiyo ngebo Raja Saul tep, bena lap pepi, “Nun ila nimi deiyo ngebo Raja, kan amutara jen talen nengdi, Allah Yahwehdi, ‘Ange pio men kunkamrume,’ pepra deipunge tep, yaniptapidi, gam keca popmaidi, yapi tupa kupmau dinin, tali lupra jepmaiya deiki di, konum mali kupra deipmange. Deiyoda, sun bisam tuda yapi tupa kupmaunge jepmanga deiki di mali kupra deipmange.” Nimi deiyo ngebo Raja Sauldi, er jen talen neng tep pepu, “Sun anengda, ‘Nun mutu tep konum songe,’ tenepmarumdi, mali kupmarume. Ukutaruda, ila gel tenpu lukra gamupkotepmumpa, aceipu duyankurume,” pepu.

34 Sun deiyo ngebo Raja Sauldi, aupu doupra yanmai neng yuma tep pepudi, aupu ton cap dukdongopra pepu. “Ukupmum dingeda, ne amutara kumum jen nengda, dan mutu do dana-dana yuma, nedi pepsenepa bemumdi, amutu kunge nesala yuma tep, “Sun sapi bisam cap, domba bisam cap, doupra yakankamrume. Ukupmum dingeda, agam keca doupra yamum ngeda, aceipu kwamu ila gel deikipu sekmepedi, aceipu jenkamrume. Ange tep nengeda, sun anengda, abisam tu cap, er yapi capda, wisipra pio men jenkamenge. Tonda, sun aneng tep nengeda, Allah Yahwehdi peipseu upu tep men yanipmengedi, mali kupra men deridankamenge.” Raja Sauldi pepu. Upepka tep nengeda, atumi lukunda neitamai dipapu, Raja Saul er jen talen neng cap, erdi taleamu mutu neitamai kurami neng cap yumada, sun Filistin nesala popbisipidi, dalupra doprami gam keca yumada, aila gel kwamngaipu duyanapidi, aceipu popra seki. 35 Tonda, nimi deiyo ngebo Raja Saul konum ukupu dingeda, aceipu adipapu Allah Yahweh er karena cap, gispal dona cap tep, ila pala gel deipudi, uku dongonai tep mesba dopu. Amesbada, nimi deiyo ngebo Raja Sauldi, menmena taru dopunge kupu.

36 Ukupu dingeda, Sauldi er jen talen neng tep pepu, “Nun Israel yala nesala yumada, yamumpa ukutaru dipapu, sun Filistin neng tep, atumi lukunda dipapu bena ponmapedi, sun tangedi talepra peinung keca yuma dalumapepanen, ipmarya berekredi, atumi ipna kupkamare. Tonda, sun Filistin mutu neng yumada, popra gawal dakamape.” Upepupa, Raja Saul er jen talen nengdi, ‘Jo naio, kandi, ‘Ange telepe,’ tenepmemtopu, angepu kupkamepe. Kan upu gekenkamepe,” pepi. Upepi dinino, imam ngebo tenpudi pepu. “Naie Raja Saul, ne kangeda ake. ‘Nun adipapu ware kuptepe do?’ tenena ngeda, telep ngeda menmena taru dipapu nun nai bo Allah tep, ‘Ware kupkop do?’ pepra moropmepepa, er dipapu, ‘Angeda ukupkurume,’ pepseretopu, angepu kupkampe,” pepu. 37 Imam ngebodi aupu pepka tep nengeda, nimi deiyo ngebo Raja Sauldi Allah tep asipetepu, “Naie, ne tenepmanada, telep do? Ada, ne cap, ne jen talen neng capdi, ukutaru sun Filistin neng tep porbenkup do? Naie, tek sisi ukutaruda kandi Filistin neng dopra, nun Israel yala nesala nun buru deiki deipkuserem do?” Raja Sauldi upepu dinino, atumi neitamaipu, Allahdi nimi deiyo ngebo Raja Saul penmau upu tep, ton tamupra upu men pepu.

38 Ange tep nengeda, nimi deiyo ngebo Raja Sauldi, Israel mutu neitamai talepra kurami deiyo-deiyo neng yuma tep pepu, “Sun ukutaru dipapu bulupra ne damai yamumdi, ne jen talena neng sun atumi deiki di ware mali kupmarumnge yumada, yana wepkurume. Dan ngebodi mali kupmaua deiki di, nun nai Allahdi upu men pepmaser dinin, dim pepnapu kuserure. Ange deiyoda, dipetepkamepe. 39 Angeda, tali tep men peptapmane. Ne tek sisi pepsene. Allah Yahwehda, gam pio kurur ngebo kurura cadi, er si deiki di pepne. Yahweh er dipapu, nun mar porbisina tep deiyo kecada, nun Israel yala nesala deiki deipserepa, porbisinupe. Ukunupa tep, ‘Ware ngebo do yuma, atumi er mali kupmar ngebo acei’ tenen, kael kepmepyopda, ne dipapu peipnepa, angebo tep wenepra popmepepa depkamre ja. Angeda tali men peplopne. Ada, ne mi sisa Yonatan peda, ‘Mali kupmar ngebo er akonuma,’ teneprumudi, pepmumpa, kael kepmepyopda, er peda poptapkamape,” pepu. Upepu dinino, nimi deiyo ngebo Raja Saul, erdi penmau upu er amutara kunmai neng yumadi, tenpu ngebo peda, balila di upu ton tamupra men pepi. Dim pepnapu kunmai.

40 Ukunmai pangeda, Saul adipapu sun Israel yala nesala cap, er jen talen neng yuma cap tep pepu, “Sun yumada, ortara di tekra keteneipkurume. Angetopu atara peda, ne cap ne mi Yonatan capda, yuk tara ortekamaneme,” pepu. Upepupa, er upu gekenmaidi, amutu wengmai nesala yuma tamupra pepi, “Jo naio, nun ila deiyo ngebo kandi, ‘Ukupra kupkamane’ tenenmarum ngepu, nun deiyo ngebo Raja, kandi tenepmarem ngeda, pio telepe pua. Angepu kupkupe,” pepi. 41 Upepu dingeda, nimi deiyo ngebo Raja Saul adipapu Allah tep moropu, “Allah Yahweh kanda, pumun taru Israel nesala, sun nai Allah kuramumdi, melimamsemum ngebo kurum dinin, ukutaru atumi deiki ne moronman ngeda, deiyo ware keca tep, upu tamupra men pepmanerem do? Ne nai Allah Yahweh kandi, ne melipnememdi, pio telep lengna gel deiki dipapu, lap pepra deipneo.

Amali kupmap ngeda, ‘Ne mi Yonatan cap, neda Israel nesala, sun deiyo ngebo Saul capdi mali kupmanem do? Adingeda, Allah Yahweh kandi Urim gel deiki di deipra lap peipkuserume’ tenen, moropkene. Dinino, amali kupi ngeda, kan nyapu sisa sun Israel yala nesala kankan di, yuk nengdi mali kuamengopda, Allah Yahweh kandi Tumim gel deiki di lap pepra deipkuserume,” pepu. Aupu pepra moroputopu, efod deiki di kwamu gel, Urim cap, Thumin cap dipetepipa, Allah Yahwehdi Urim gel deiki peten kemna keca deipupa, sun yumadi, ‘Uo, Saul cap, Yonatan capdi, mali kupmarenge’ tenen, kael kepi. Ange konum kupu pangeda, sun Israel yala nengdi mali men kupi ngeda, konum katuai kupupa kael kepi.

42 Konum kael kepi dingeda, Raja Sauldi pepu, “Uo Allah Yahweh, kandi Yonatan cap, ne Saul cap atekmanem dinin, tek sisi ware ngebo mali kupu do?” pepra moropu. Moropupa, Allah Yahwehdi, efod deiki palepra deiami gel deiki di, peten keipupa, adeiki di kael kepi. Ada, ‘Mali kuna deiyo ngeboda, Saul gum dinin, Saul er mi sisa, Yonatan er dipapu mali kuamnge,’ tenepidi kael kepi. 43 Ukupu pangeda, nimi deiyo ngebo Raja Sauldi, tamupra Yonatan tep asipetepu, “Ne mio, kanda ware keca tep mali kuamum do?” pepupa, Yonatandi tamupra pepu. “Gume naie, neda ne buru deiki douamsi maca, gum-gum tara di, mong mokon kwamngai di, mokon yambulanun dopra jeamsa cadi, ukutaruda ne akunmana cadi, popnemempa depkune. Ne dena tep keteneipne,” pepu. 44 Upepu pangeda, nimi deiyo ngebo Raja Sauldi, Yonatan tep pepu, “Uo, nedi Yonatan kan deiki ikin keca deipkenepa men depmemnyopda, Allahdi ne wenepra popnerepa, ne depnune. Agum dingeda, ila kange mun keca, ne deiki deipnetue. Atep, kanpu dadepkamarume,” pepu.

45 Raja Sauldi upepu dinino, sun Israel yala nesala awekmai nesala yumadi Saul tep pepi, “Uo, nun nimi deiyo ngebo Raja Saul, kan adipapu Yonatan popmempa depkamar do? Nundi tenepmapada, ‘Angeda pio men kupkurume,’ tenepmepe. Deiyoda, nun ortaru Filistin neng mar podanmapu ngeda, Yonatan er deiki di nun Israel yala nesalada, weik porbisina ngeda, nundi sun Filistin neng tep popbisipmapu. Atep, Yonatan ponada, pio gume pepmepe!

Ada, nun tek sisi Allah Yahweh er gam pio kurur ngebo cadi, er si deiki di pepmepe ngeda, Yonatan er giso deiki kupu potong tenpunge peda, ton men wangapkamre. Ada, Allah Yahwehdi angebo tep melipupa, angebo er deiki di, er cap nun cap kikiman tenpu tumi deiki di, Filistin neng yuma konum popbisipmape,” pepra, puto di pepi. Awekmai neng yumadi aupu pepmaiya tep nengeda, sun Israel yala nesala yumadi Yonatan tep, Sauldi, ‘Ikin keca deipnepa, depkamre,’ tenepmau ngeda, konum lyeprapidi, Yonatan telep kupra deipipa, men popu. 46 Ange konum kupi dingeda, sun Filistin neng, tupa gam kunmai nengda, tamupra sun pe mutupu bei. Ataru peda, nimi deiyo ngebo Raja Sauldi, ton cap kange di dukdongopra, ‘Filistin nesala popkun’ tenen, men dombeu.

Israel nesala, sun podan neng cap, tonda Saul er nyapsilip cap tep, sengna keca sekeipu upu

47 Ada, sun Moab yala nesala cap, Amon yala nesala cap, tonda Edom mutu nesala cap, Zoba mutu neitamai talepra kurami nimi deiyo-deiyo neng cap, Filistin yala neng cap yumada, porbanapu kuramu. Tonda, ware mutu do yumada, porbanapu benamu mutu-mutu yumada, popbisipudi, ayuk yala nesala tep, popra gawal daku. Nimi deiyo ngebo Raja Sauldi, ukuramu taruda, er dipapu porbisinapu kuramu. Ukupu dingeda, yuk mutu nesaladi, Israel mutu nesala sun bung keca dalupra taleami ngeda, lyepropudi, kange di tamupra duyakaramudi, telep kupra deriramu. 48 Ataru neitamai yumada, Raja Saul konum Israel yala nesala, sun ila nimi deiyo Raja ngebo wepra deipipa teku. Ukupra teku taru neitamai yumada, dan mutu neng do yumadi, sun Israel yala nesala tep, podan neng porbaramudi, yuk mutu nesala yumada popbisipudi yaniptapu. 49 Nimi deiyo ngebo Raja Sauldi deriramu neng, sun sida ake. Ada, Yonatan cap, Yiswi cap, Malkisua cap, deiamu. Tonda, Saul er ner mida, menmena deipu du ner er sida, Merab cap, tonda er ner mi weit ner amenda deipu ner mida, er sida Mikhal cap deiamu. 50 Tonda, nimi deiyo ngebo Raja Saul, er domu ner sida Ahinoam. Aner er nai bo sisada, er si Ahimaas kuramu. Tonda, Raja Saul er jen talen neng yuma, sun ila deiyo jen talena ngebo, er sida Abnar kuramu. Ada, Saul er mamboda Nar, er mi Abnar akuramu cadi, Saul er mambo Nar, er mida, Abnar kuramu. 51 Saul er nai bo sisada, er sida Kish kuramu. Tonda, Abner er nai bo sisada Nar kuramu. Nar er nai boda, er sida Abiel kuramu.

52 Nimi deiyo ngebo Raja Saul gam tupa kuramu taruda, er puto dipapu Filistin neng damai porbaramu. Ange tep nengeda, nimi deiyo ngebo Raja Sauldi dinmanpanen, ila puto neng cap, kware tenena gum neng capda, epu dingeda, adipapu er amutara jen talena neng erepra deriramupa, er tara jen talena neng kurami.