1 Samuel 15

Allahdi, Saul Raja tapkamnga tep, pepu upu

1Samueldi Saul tep pepu. “Neda Allah er si Yahwehdi wepra deipneupa, nedi kan ila nimi deiyo ngebo Raja erepra tekeipkesi. Ukupsipa, kandi Israel nesala talepra kuramrume. Ange tep nengeda, Allah er si Yahwehdi peipkeu upu, gekepsi ngeda, pepkukena tep, kandi gekepra kunkamrume,” pepu. 2“Uda, akeca-keca yuma deiki tara kuredi, akeca yuma talerura deiyo ngebo Allah, er si Yahwehdi upepmakere. ‘Nedi Amalek nesala yuma wenepra popkamane. Ada mesum tep gum dinin, sun apu yapu Mesir mutu di bisi yai taruda, Amalek nengdi iniproipa, sun Israel nesala mangkau kange doupra yakanmaipa, Amalek nengdi popya tep, aneng wenepra popkamane.

3Atep ukutaruda, sun yuma bemumdi bicau tenena gum dipapu, Amalek nesala yuma poptapkamrume. Tonda, sun talepi keca yumada, tenpunge pe ton men tapkamrume. Ange yuma popra sengpepkamrume. Nimi cap, nerapu cap nyapu cap, ner nyapu cap, alen bo kin nyapu cap poptapkamrume. Tonda, Amalek neng, sun sapi cap, domba cap, unta bisam cap, keledai bisam cap yuma popra gawal dakurume,’ Allahdi pepkere,” Samueldi pepu.

4Upepka tep nengeda, Sauldi nimi jen talen neng kongpepupa, Telaim mutu bulupi pangeda, erdi yuma dipetepu. Dipetepu dingeda nukrapudi, Israel jen talen neng dengeda dua ratus ribu cap, sepuluh ribu neng cap kupi. Ada, Yehuda yala nengda sepuluh ribu neng (10.000) bulupi dinin, yuk yala nengda dua ratus ribu neng bulupi.

5Akonum kupu pangeda, Saul cap, er jen talen neng cap, Amalek nesala kurami mutu damai bei. Bei dingeda, Amalek neng, sun podana tep, me kitamne ban mutu bena warekmai. 6Konum ketenepi dingeda, Sauldi, sun Keni mutu nesala tep pepu. “Sun yuma Amalek mutu nesala kan-kan di gopra benkurume. Aneng cap wisipmumpa, ne jen talen nengdi, ‘Sun cap mangkau di tapakra popsenung’ tenen, pepsene. Pumun taru, sun co puna nengda, Israel nesala Mesir mutu neitamai di bisi yakarami taru, sun tep telep kange doupra, nun apu yapu melipi. Ange tep nengeda, sun Keni nengda, Amalek nesala kan-kan kurumai di gopra yukai benkurume,” pepu. Upepupa Keni neng adipapu bei.

7Sun konum gopra beipa, ataruda Saul cap, er jen talen neng capdi, Amalek nesala yuma popra gawal dakbei. Ada Hawila mutu di gonga keprapidi, Syur mutu cap, ortara keteng yakan tara Mesir mutu damai, aneitamai yuma Amalek nesala popbei. 8Ataruda Sauldi, Amalek neng sun ila deiyo ngebo Raja Agag puda, men popidi talipu tomopra debei. Dinino, sun Amalek nesala, er amutara nesala yumada, Saul er jen talen nengdi sun ya doprapidi, aneng yuma popra gawal daki.

9Dinin Saul cap, er nyapu capdi, Raja Agagda talipu tomopi. Ange utopu, atara nesala sun pio telep domba cap, sapi cap, kambing cap, sapi mi nong pio telep weiknge cap, domba mi urasin telepnge yuma cap, yuk yala keca, kunumna weik keca telepnge yumada, men poptapi. Akeca-keca yuma, urasin malinge cap, puto malinge capda, poptapi dinin, urasin pio telep ngeda, dopropi.

10Ukupi pangeda, Allah er si Yahwehdi Samuel tep yana pepu. 11“Uo, nedi Saul tep, ‘Ware keca deiyo tep do?’ tenen, mali kange doupmane. Ada nedi, ‘Saulda ila nimi deiyo ngebo Raja kunkamre’ tenen, ereipsipane, erdi ka tamupra mali kupra deipmanerdi, tapmanere. Nedi er tep, ‘Ukunkamrume,’ pepra deipsi upu, ne pepsi utopu men kupmanera tep, er tapkune,” pepu. Upepu pangeda, Samuel er dipru pio pu jepupa, Allah tep lukunda neitamai yuma pio mali penmaudi, moronmau.

12Ukupudi mapmauanen, bereku pangeda, Samueldi, ‘Ipna taru Saul cap epdankuneme’ tenen, er damai benmau dinin, Saul aca men kupmau. Yuk nengdi upepi. “Gume, Saulda Karmel mutu konum bendopmau. Erdi, ‘Ne si Saul tupa pio tenenkamneng’ tenen, ila gel dopra Karmel mutu ikra deipkamare. Ukupre dingeda, adine, Gilgal mutu benkamare,” pepi. Upepipa, Samuel kael kepudi, adipapu Gilgal mutu beu.

13Beupane, Gilgal mutu konum yau pangeda, sun butene antapdarei dingeda, Sauldi, Samuel tep upepu. “Uda, Allah Yahwehdi, ‘Ukupkurume,’ peipneutopu konum pel dopmane. Tonda, ‘Allahdi kan tep telep kupra melimkamker’ tenen, Allah moropkukene,” pepu. 14Upepu dinin, Samueldi tamupra pepu. “Uda, kandi, ‘Allah peipneutopu konum kupmane,’ pepmanerem dinino, ukutaruda ware keca upu penmarpa gekenman do? Domba upu cap, sapi upu cap, ila di penmangpa, gekenmanada, dano?” pepu.

15Upepupa, Sauldi tamupra pepu. “Ne jen talen nengdi, akeca bulupra deipmangpa, upu penmangada, ada Amalek nesala sun taleami keca, domba cap, sapi cap, urasin pio telepnge. Akeca yumada, ‘Nun nai bo Allah tep karenkamepe’ tenen, duyanmap adano. Dinino, ila tara ngeda, yuk-yuk keca yumada, poptapmepudi, gawal dakmepu,” Sauldi pepu.

16Upepupa, adipapu Samueldi tamupra Saul tep pepu. “Aupu penmaremada, yapo. Angeda akonuma. Allahdi lukunda neitamai peipmau upu ton, lap pepkenepa gekepkurume,” pepu. Upepupa, Sauldi, “Telepe pepneo,” pepu. 17Apeputopu Samueldi Saul tep pepu. “Uda pumun taruda, kandi kan pe tep, ‘Uo, neda tali ngebo pua,’ tenedaramum dinin, Allahdi erepra tekeipkeupa, Israel nesala yala-yala yuma, sun ila nimi deiyo ngebo, Raja men wepra deipkeu do, gum do? Allahdi, ila nimi deiyo ngebo tekeipkeupa, ukumemdi Israel nesala kunge mutu yuma talepra kurume.

18Ukuramumpane, amenda taru Allahdi, ‘Sun pio mali kunge nesala, Amalek neng yuma tep poptapra bememdi, gawal dakamrume,’ pepra deipkeue. Ada, ‘Amalek nesala bena popra gawal dakamre’ tenen, doproipkeupa bemum dinino, men kupmume. 19Atep kandi ware keca deiyo tep, Allah peipu upu moupra men gekepmum do? Tonda, ware keca deiyo tep amutu nesala taleami keca dopra inipmuma deiki di, Allah er upu tapra men gekepmumdi, er dinai mali kupra deipmum do?” Samueldi Saul tep pepu.

20Upepupa, Sauldi tamupra Samuel tep pepu. “Teka. Neda bouna di Allah peamneutopu besidi, Amalek nimi yuma poptapra gawal daksi. Ukupsi dinin, Amalek nesala sun ila nimi deiyo ngebo Agag puda, tapsidi tomopra duyasi. 21Tonda, ne jen talen nengdi, Amalek nesala taleami keca yuma poptapra men gawal dai dinin, urasin pio telep domba pe, sapi peda dopropi. Angeda musum tep gume. Ada, ‘Gilgal mutu neitamai yan kupedi, Allah er si eremna tep, er karepkamepe’ tenen, akeca duyanmape. Tonda, ‘Allah tep uku dongonkamep’ tenen, kupya,” Sauldi pepu.

22Upepu dinin, Samueldi tamupra pepu. “Allah er putaprepa, ‘Akeca kuptenge,’ tenesere kecada, bouna di er amngai kuna telep do? Agam kure keca dopra, Allah tep uku dongorbana telep do? Pio ila telep ngeda, dan do? Allahdi pesere upu gekepra dombanada, pio telepnge. Yambul telep ngeda, sun mali kun keca kaukemna tep, yapi keca popra uku dongorbana pua. Ange utopu, yambul telep ngeda, domba bisam meta dopra uku dongorbana, dinino, ila telep ngeda, Allahdi pesere upu gekepra dombana pua.

23Ada mesum tep gume. Allah er kangeda, mali kun keca akapmarepapu, Allah tep tamnada ila mali kun keca. Deiyoda, Allah upu tamnada, nimi ker dona utopu kun keca tepa. Ange utopu, dipru neitamai gemepmenge nengda, sun kunge kecada, isok si eremna neng kuramenga utopu kununge. Ange tep nengeda, kanda Allah Yahwehdi, ‘Ukunkamrume,’ peamkeunge, yaniptapmuma cadi, Allahdi kan tep, ‘Nimi deiyo ngebo kunkamre’ tenen, erepra tekeipkeu ngeda, konum tapmakere,” Samueldi Saul tep pepu.

24Upepupa, Sauldi tamupra pepu. “Gume, kandi tek sisi upu pepmanereme. Neda mali kupsi. Allahdi, ‘Ukunkamrume,’ pepneu upu yaniptapsi. Ange utopu, kan pedi pepnemum upu peda yaniptapsi. Ukupsinge deiyoda, ne amutara kunge nesala tep kwar kupneupa, sun pepnei upu gekepsi adeiki di mali kupsi.

25Ukutaruda, nedi moropkene. Naio, ne mali kupsi keca tep, kaukepnetumdi, ne cap tamupra beteneme dingeda, nun nai Allah, er si Yahweh tep, er si erepkamne,” pepra moropu. 26Sauldi upepupa, Samueldi tamupra pepu. “Gume, kan cap tamupra men benkamneme. Deiyoda, Allah Yahwehdi, ‘Ukunkamrume,’ pepra deipkeu upu yaniptapmuma tep, Allah er si Yahwehdi, kan tep konum tapmakere. Atep ne cap men benkamaneme,” pepu.

27Upepu dingeda, Samueldi, ‘Adipapu benkun’ tenen, tamupra benterepu dinin, ukupu pangeda, Sauldi napra deipudi, Samuel er deiki keneku opkal talepdongopu. Ukupupa, er deiki opkal adipapu gwelepu. 28Er opkal gwelepu pangeda, Samueldi Saul tep tamupra pepu. “Uda, kandi ne opkal gwelepmanerema utopu, ukutaruda Allahdi kan pel dona keca, Israel nesala sun ila nimi deiyo ngebo pel talena tep kareramkeu kecada, ataru Allahdi dopra yuk ngebo deiki deipkure. Ada, kan damai kure ngebo dinin, erda pio telep ngebo, kanpuda mali kurum ngebo.

29Ada mesum tep gume. Israel nesala talepra kurur ngebo Allahda, pio ila mambul ngebo kurure. Erda pio teleppu kurur ngebo cadi, Israel nesala yumadi, er si eremnunge. Tonda, ‘Ukupkamne, ukupkamne,’ tenere keca yumada, tenimtona pe pio gum ngebo. Erda nimidi teneramenga utopu gum ngebo. Erda mok upu pio men perure. Dumsisi upupu perure. Tonda, nimidi, ton keca tenepra, ange tapra, yuknge teneramengtopu pio men kurure. Er teneretopu, angepu kurure,” Samueldi pepu.

30Upepupa, Sauldi tamupra pepu. “Teka ne mali kupmasi dinin, kandi melipnemempa, tamupra benemedi, nedi talepsi nesala cap, sun deiyo talepra kunge wisi neng cap, dinkamsengai di, gispal dopkamnerume. Ada, kan cap, ne cap kikiman, Allah er si erepkamneme. ‘Ukupnemepa, ne mutu nengdi, telep tenepkamneng’ tenen, moropkene,” Sauldi upepra moropu. 31Upepra konum moropu pangeda, Samuel kange di tamupra Saul melipu. Melipu pangeda Sauldi Gilgal mutu bena, Allah sipu erepra gispal dopu.

32Konum kupu pangeda, Samueldi pepu. “Amalek nesala, sun ila nimi deiyo ngebo, er si Agag, ne damai duyankurume,” pepu. Upepupa, Saul er nyapsilipdi, Agag dopra duyaipa, Agagda, Samuel damai yankou taruda, utenepu. ‘Gume, ne cap, ne amutara neng capdi, Israel neng popmepu ngeda, men di kupmupka cadi, konum luproiya tep, telep upupu pepkamnenge,’ tenepudi adipapu yau.

33Yau pangeda, Samueldi pepu. “Kan nimi pon keca ya doproamumdi, nerapu sun nyapu weika di potamamumtopu, kan nin peda er mi gum kupkamre,” pepu. Upepu dingeda, Samueldi Gilgal mutu neitamai dipu, Agag poptapu. Erdi poptapu ngeda, Allah er damai cadi, Allahdi dinmau.

34Ukupu dingeda, Samuel adipapu Rama mutu beu. Dinin Raja Saulda, er pe ati Gibea mutupu tamupra beu. 35Ataru di gonga kepra, dorketeng tamun yuma neitamaida, Samuel er yuk dakuramu. Er gam kuramu taru yuma, kange di ton cap, Saul er damai men beu. Er depkamu taru peda, Saul cap ton men didaramrei. Dinino, Samueldi Saul tep, pio teneramudi engeramu. Tonda, Allahdi Saul tep, ‘Uo, angebo wepra deipsipa, Israel nesala talepra sun ila ngebo Raja kuramngada, ne kange mali kupnere,’ teneramu.