1 Samuel 16

Allahdi peipupa, Samueldi, ‘Daudda, Israel nesala sun ila ngebo Raja kunkamre’ tenen, wepra deipu upu

1Allah er si Yahwehdi Samuel tep pepu. “Ware kuprap taru mapmemdi, Saul tep engenkamrem do? Ada mesum tep gume. Sauldi Israel nesala deiyo talena tep, ila Raja kemamu ngeda, ne konum tapsa tepa. Tonda, ukutaru kandi minyak zaitun mokon gwepra doupmemdi, Betlehem mutu benkurume. Ada, nimi deiyo neng kemna tep, peten kemdina tep nengeda, aminyak me sun giso deiki likeipmengedi, eremnunge. Amutu neitamai dinin, mutu si Betlehem mutuda tenpu ngebo, er si Isai, er damai benkurume. Deiyoda, Isai er nyapu kan-kan neitamai tenpu mida, nedi konum wepra deipsa tep, kandi ila nimi deiyo ngebo Raja wepra deipkamrume,” Allahdi Samuel tep pepu.

2Upepu dinin, Samueldi tamupra pepu, “Naio, nedi ware kupra perbenkun do? Angeda, Saul gekepre dingeda, tek sisi ne popkamanere,” pepu. Upepu pangeda, Allahdi tamupra pepu. “Ange tep nengeda, Saul tep upepkurume. ‘Sapi bisam nernge tenpu, Allah er si Yahweh, er karena tep, keteneipmana tep, yanmane.’ Upepmemnyopda, gekepkamakere.

3Ukupmem dingeda, akupkumem taruda, Isai tep upupmempa yare pangeda, amenda kupkamrem ngeda, nedi lape pepkamkene. Nedi, ‘Wepsi ngeboda ake,’ pepra betapra lape pepkamken ngeboda, kaile kepmemdi, er giso deiki minyak zaitun mokon dikipkamreme. Ukupmem pangeda, Israel nesala yumadi, ‘E, angeboda, Israel ila nimi deiyo ngebo Raja kupkamra tep, minyak gwepra er giso deiki dikeipmar adano’ tenen, kael kepkamenge.” Allahdi pepu.

4Upepu pangeda, Samueldi Allah peiputopu, kupu. Ukupu taru neitamaida, adipapu Betlehem mutu beu. Beu pangeda, amutu kuramya deiyo neng yuma epidi, ‘Uo’ tenen, kware kupudi, moropsepu. Moropsepupa upepi. “Naio, nun mutu ayanmaremada, telep kudina tep do? Nun mali kudina tep do?” pepra asipetepi. 5Upepipa, Samueldi tamupra pepu. “Teka. Nedi sun telep kudina tep yanmane. Tonda, ne gam keca dopra Allah er gispal dona tep karepkune.

Atep, sun mali keca yuma tapra, sun kange dipru ketenepmumdi, me gekmumdi, telep opkal konum kenekmumnyopda, sun cap, ne cap, kikiman Allah tep yapi keca popra, er tep karepmepedi, er si eremkamepe,” pepu. Upepu dingeda, Samueldi, Isai cap, er nyapu cap, ‘Allah tep yapi keca kareptenge’ tenen, telep kweipupa, sun kange dipru neitamaida telep kupra keteneipidi, sun yuk-yuk keteneipyopda, aneng tep upepu. “Uda, sun cap, ne cap bulupmepedi, Allah er gispal dona tep, yapi keca popra kikiman karepkupe,” pepu.

6Upepra upupmaupa, sun gekepidi konum yana weki pangeda, Samueldi Isai er mi Eliab epudi tenepu. ‘E amida, Allah er si Yahwehdi konum weipmar mida, adano,’ tenepu. 7Utenepu dinin, Allah er si Yahwehdi tamupra Samuel tep pepu. “Kan dipapu epmemdi, ‘Angeboda er urasin telepe, er nongda lyom weike tep, pio telep ngebo kurure,’ tenepra wedina gume. Nedi angebo konum tapmana tep, men wepkune. Deiyoda pepkukene. Ada, ne Allahdi nimi nonge cap, sun urasin cap eprapnedi men wepra derinune. Nimidi nong bol deiki keca epmengedi, ‘Ange mambule, angeboda telepe,’ teneramenga utopu men tenenune. Tonda nimidi urasinda, didarum dinin, neda Allah, Yahweh nedi sun dipruai moupra disenune,” pepu.

8Upepu pangeda, Isaidi er mi Abinadab tep upupu pangeda, er mida adipapu Samuel damai yau. Dinin, Samueldi pepu. “Gume, angebo peda, Allahdi men weipmare,” pepu. 9Tonda atarupu Isaidi er mi Syama tep, “Samuel damai yarume,” peipupa yau. Dinin, Samueldi, “Angebo peda, Allahdi men wepra deipmare,” pepu. 10Ange utopu, ton cap Isai er nyapu tujuh neng yuma upupupa, bulupra yai pangeda, Samuel damai yanmai. Yai dinin, kange di ton cap, Samueldi Isai tep, pepu. “Aneng yumada, Allahdi men wepra deipmare,” pepu.

11Aneng yuma konum bei pangeda, Samueldi Isai tep asipterepu. “Kan nyapuda nimi ukupra akonum deiamumtopu, akonum kunmang do? Tonda tup do?” pepu. Upepupa, Isaidi tamupra pepu. “Gume kale ngebo sisa tenpuda dakunmar dinin, angeboda domba peina ngebo dakunmare.” Upepu pangeda, Samueldi tamupra Isai tep pepu. “Ange tep nengeda, angebo kongpepmempa, er kapul men yanapre taruda, Allah er karen keca men karepkupe. Er yarepa, er cap kikiman bulupmepedi akeca dopra Allah er gispal dona tep, karepkamepe,” pepu.

12Upepupa, Isaidi upupupa, yuk nengdi perbeidi ami doupra duyai pangeda, Isai er mi yau. Akaber ngeboda, er kamo cap, er nonge cap yumada pio telep kupu. Yauopda, Allah er si Yahwehdi Samuel tep pepu. “Ukuda angebo doprapmemdi, peten kemna tep, minyak zaitun me gwepra er giso deiki dikipmem pangeda, awekmang neng yumadi, ‘E erda nun ila deiyo ngebo kunkamsere’ tenen, kael kepkamenge. Tonda ila deiyo ngebo kemna tep, er wepra deipkurume. Angeboda, ne konum wepra deipne.” Allahdi pepu.

13Upepka tep nengeda, Samuel adipapu menmena minyak zaitun mokon dopropu dingeda, er du yapu neng wekmaiya kan-kan neitamai, Samueldi Daud wepra deipu. Atumi di gonga kepra dorkupbaramu taru yumada, Allah er Lek Sambala Daud deiki yaudi, puto keipka deiki di meliamu. Samueldi Daud konum wepra deipu dingeda, adipapu Rama mutu tamupra beu.

Saul kuramngai Dauddi meliamnga tep, pepu upu

14Saulda Allah er Lek Sambala melipra kuramunge yuma gopropupa, ataruda, ‘Isok sambalapu Saul dipruai wekamre’ tenen, Allahdi dokotepupa er dipruai wekudi, mali kweipupa, mali kange doupra kuramu. 15Ukuramupa, Saul er pel don neng yumadi pepi. “Gume nun kael kepmapada, Allahdi isok sambala wepra dokotepmarada, kan dipru neitamai kukerepa mali kange doupra kunmareme.

16Tonda, nun deiyo ngebo, kandi, ‘Telepe,’ pepsemem pangeda, kan melimna nengdi, bung-bung pena er si kecapi upu pena tep, ila kael ngebo damai bana tep dirbetepe. Keteneipmapyadi kan damai duyaketepe. Angeda musum tep gume. Allahdi, ‘Isok er deiki amupkamemer’ tenen, dopra deipmaker ngeda, angebodi bung-bung pena upu pekerepa, kan kange telep kunkamkere,” pepi.

17Upepya tep, Sauldi tamupra er melimna neng tep, “Yo telepe. Sun bemumdi, bung-bung pena er sida kecapi, pena tep ila kael ngebo dopra ne damai duyanerume,” pepu. 18Upepupa, er pel don ngebo gekepudi pepu. “Isai Betlehem mutu kurur ngebo, er sal mi ton kurure. Ange mida ne konum epra kael keamsi. Ange mida bung-bung pena, er sida kecapi (gitar utopu keca) dounada, pio kael mi kurure. Tonda, er ila kika jen ngebo kurure. Er kware pio men kurur ngebo. Tonda, er upu perya pepeda, telep upupu perure. Er kamoda, urasin telep ngebo kurure. Tonda, Allah er si Yahwehdi angebo tep weika di melimredi, er cap kikiman kurure,” pepu.

19Upepupa, Sauldi Isai damai perbana tep, er pel don neng ton wepra deipupa, Isai damai perbenmai. Sun upu kai perbenmaiyada, “Raja Sauldi upepkere. Kan mi Daud, domba bisam pein ngebo wepra, kandi pepmempa, ne damai yankamare,” pepra upu perbei. Upepipa, Isai gekepu. 20Aupu bena pepipa, Isai gekepudi, er keledai bisam tenpu doprapudi, akeledai deiki roti kwaneng cap, anggur me gwen keca tenpu cap tonda, kambing bisam gam kepman ateng koupmaunge cap, akeledai deiki deipu. Akeca yuma ketenepra doproipupa, er mi Dauddi akeca dopdara Saul damai dubeu.

21Ukupu dingeda, Daudda Saul damai bena kuramudi, er pel melipra doramu. Ukuramupa, Sauldi Daud tep, kange deipra, bicau teneramudi, ‘Nimi podan taru melimkamner’ tenen, wepra deipu. Ukupupa, Dauddi, Saul er jen talena tep, nong deiki kenekamu keca cap, ya cap, mar cap, kelapye cap doupra embana ngebo kuramu. 22Ukuramu taruda, Sauldi Isai tep upu doproipudi, pepu. “Ka Isaio, kandi telepe pepmempa, kan mi Daudda ne cap pio kunemedi, melimkamnere. Ada, nedi er tep kange deipsa cadi, ne cap, er cap kunada pio telepe tenenune,” pepra upu doproipu.

23Ukupupa, Isaidi, ‘Telepe,’ pepka cadi, ataru di gonga kepra, dortaru yumada, sun kikiman kuramrei. Ataru neitamai yuma, Allahdi, ‘Saul wenepkuna tep, ukupkure,’ teneramu taru yuma, isok Saul deiki yakaramu. Yakaramupa, Saulda, mali kange douamu. Mali kange doupne taruda, Dauddi bung-bung pena, er si kecapi dopra, doupnedi, mut peramupa Saul gekeramu. Ukupnepa, Saul bouna di, dimpepra kuramudi, ka di ton cap, telep kange doupra kuramu. Ukupnepa, aisok er damai di gopra baramu.