1Sa 17 | XteSC | STEP | Ataruda, Filistin nesala, sun jen talen neng yuma buluprapidi, keteneipi. Ada mutu si ton Soko mutu bulupi. Yehuda yala neng talepra kurami mutu tara, sun atida Soko mutu bulupi. Sun dodin opkal atida, Azeka mutu atara, Soko mutu ortara, daneitamai mutu si Efes-Damim mutu damai yana dopi.

1 Samuel 17

Nong ila weik ngebo er si Goliatdi, Israel neng porbana tep, keteneipu upu

1 Ataruda, Filistin nesala, sun jen talen neng yuma buluprapidi, keteneipi. Ada mutu si ton Soko mutu bulupi. Yehuda yala neng talepra kurami mutu tara, sun atida Soko mutu bulupi. Sun dodin opkal atida, Azeka mutu atara, Soko mutu ortara, daneitamai mutu si Efes-Damim mutu damai yana dopi. 2 Ukupi pangeda, Saul cap, Israel neng cap yuma buluprapidi, sun dodin opkal atida Ela ban mutu neitamai yana dopi. Ukupi dingeda, Filistin neng cap mar podarbana tep keteneipi. Jen talen neng yuma baris kepra, yuk-yuk ketenepi. 3 Ukupi dingeda, sun Filistin neng ton atara mutu deiki, Israel neng ton ortara mutu deiki bulupra baris yuk-yuk kepidi, ketenepi. Tonda, amutu neitamaida, ila go ton kwuamudi, ban pio weik kuamu.

4 Ataruda, nimi podana tep, ila kael keamu ngebo, er sida Goliat, Gad yala nengdi deipi ngebo kuramu. Filistin neng sun kunmai mutu di, Filistin neng sun keana tep dodin tenda ati deipmaidi, kunmaiyai yau. Ada mesum tep gume. ‘Israel nesala porbenkun’ tenen, yau. Angebo, er nong lyomda, ila lyom weike, tiga meter tinggi ton perami.

5 Tonda angebo er giso galun kecada, topi utopunge dinin, jen nengdi kenengamenge ngeda, gat keca tembaga di domipa keneku. Er opkale capda pio gatnge, tembaga di keteneipi. Ada ‘Mar gopera tamupkamre’ tenen, akeca er sida tembaga keteneipipa keneku. Akecada, er ikinda ‘Ado, ado?’ tenen, pepi ngeda, lima puluh tujuh (57) kilogram kupu. Pio ikin weik kupu dinin, Goliatda puto weik ngebo cadi, aikin opkal talipu kenekra baramu.

6 Angebo er yanda gat keca tembaga di dongomu. Tonda er dangol deiki dan-dana capda, ila gat keca tembaga di deiamu. Ange utopu, angebo er nimi pon co takke tombakda, gat keca er si tembaga di dominge, er bali deiki gerekudi embaramu. 7 Er co takke tombakda, ilange ikin weike, men erepmantonge besi keca di domipa, Goliatdi douamu. Aco takke tombak ikinda ‘Ado, ado?’ tenen, penungada, 7 kilogram ton pepi. Uda, er kelapida, akecada tenpu jen talen ngebodi menmena nimi dinmai tara doupra banmaupa, Goliat amenda yau.

8 Ukupra kuramnga tep, ataruda, Goliatdi tekrapudi, upu ila di Israel nesala jen talen neng ketenepra wekmainge tep pepu. “Sunda ware keca deiyo tep baris kepra keteneipmarum do? Neda sun pona tep keteneipsi. Neda Filistin ngebo kununada, men kael kepmanerum do? Sunpuda, tali ngebo Saul er melimna neng kurume. Atep, ‘Tek sisi tenpu ila balila ngebo ton, Goliat cap popdankamreng’ tenen, wepra deipmumpa, angebo mepra yakarepa, ne cap popdankamneme.

9 Ukupmumpa, angebo cap, ne cap, nun podana deiki di epkamepe. Sun wepkurum ngebodi, ne popkamner do? Nedi sun tara ngebo popkamne do? Sun tara ngebodi ne popneryopda, nun Filistin nengda sun amutarapu kunkamepe. Dinin, nedi sun tara ngebo popnyopda, sun Israel nengda, nun amutarapu kunkamrume,” pepu.

10 “Atep ukutaru dipapu, ‘Sun Israel tara ngebodi, ne tep men popbisipnetue,’ pepsene. Israel nesala, sun jen talen neng kan-kan di, tenpu ngebo wepra deipmumpa, angebo cap, popdankamneme,” Goliatdi pepu. 11 Aupu pepu pangeda, Saul cap, Israel neng cap yuma, aupu gekepidi, lukdanapidi, anesala pio ila kwar kupu. Goliatda, ila puto weik ngebo cadi, sun yuma kwar kupu.

Dauddi Saul er dodina ati tenda dam beudi kupu keca tep upu

12 Efrata yala ngebo, er sida Isai, erdi deipu mida, Daud kuramu. Isaida Yehuda tara neitamai dinin, mutu sida, Betlehem mutu neitamai kuramu. Isai erdi deipu neng nimida, banbari (8) nyapu deiamu. Ataru neitamaida, nimi deiyo ngebo Raja Saul konum tekamudi, upu peramu taru, Isaida, er konum pio wisi deipu. 13 Isai er nyapu menmena deiamu du neng wenerida, sun yumada nimi deiyo ngebo Raja Saul cap, kikiman melipipa wisiprapidi, mar podanai benami. Isai er mi menmena deipu ngebo, er sida Eliab, butene ngebo er sida, Aminadab, weneri deipu ngebo er sida, Syama deiamu. Isai er nyapu du nengda, ukupra weneri konum deiamudi, amenda sirik deipu mida Daud kuramu.

14 Isai er mi menmena deiamu du nyapu weneri nengda, nimi deiyo ngebo Raja Saul cap, wisipra mar podarbanai bei. Dinin, Isaidi sirik deipu mida, sun weit ngebo Daud kuramu. 15 Dinino, Dauddi er du neng melimna tep, nimi deiyo ngebo Raja Saul er damai keana bena kuramnganen, kange di taprapudi, tamupra er nai bo damai Betlehem mutu bena, er nai bodi peiramu domba bisam damai bena melipra peiramu.

16 Ataru neitamaida, ue empat puluh tumi deikida, tumi-tumi yuma, ipna taru cap, tonda idona taru cap yumada, Filistin ngebo tenpu, er nong ila lyom cap, ila puto cap kuramu ngebo, er sida Goliatdi, sun Israel yala nesala, sun jen talen neng meneng damai yan pangeda, sun Israel yala jen talen neng tep, ila upu deiki di nyek-nyek peramu. 17 Ataru neitamai, tenpu tumida, Isaidi er mi Daud tep pepu, “Ne mio, gandum du dapmapenge bongopropada, sepuluh kilo (10 kg) cap, roti kwaneng dapmapnge morokyo (10) cap dopropmemdi, adipapu doupra, kan du yapu neng damai dubena karepkurume. Ada, sun Israel yala nesala tara jen talen neng, sun keana tep, opkal bol di dodin tenda ati deipmainge damai, dakunungaipu dubenkurume. 18 Ange utopu, kambing bisam moum teyung di, keteneipi jen keca, er si keju denge sepuluhda (10) doupra, jen talen neng sun gung denge weik seribu (1.000), sun upu pena deiyo ngebo, er damai dubena karepkurume.

Ukupmem dingeda, kan du yapu neng tep, ‘Sunda ware kupra kunung do?’ tenen, sun deiyo ngebo asipetepkurume. Asipetepmempa, tonda sun cap antapmem dingeda, sun kunga keca yuma kael kepmemyopda, ne sun nai bo Isai damai tamupra lap peryankamnerume. Upepnemem pangeda, nedi, ‘Ukutaruda, konuma, er du yapu neng damai bena epmare ngeda, telep deikipu kungepa, epmardi yana lap pepnere,’ tenepkamne.

19 Uda, Isaidi aupu pepu taruda, Daud er du yapu neng cap, sun Israel nesala nimi deiyo ngebo Raja Saul cap, er jen talen neng capda, mutu si Ela mutu neitamai dinin, tenpu bongboi neitamai kunmai. Ukunmaidi, sun Israel yala jen talen neng yumadi, sun podan neng Filistin yala neng damai bena, ‘Porbenkupe,’ tenenmaidi, keteneipmai. Ton tumi ton popdanmai, ton tumi ton tali dakunmai. 20 Isaidi, aupu yuma pepupa, mapmaiya berekupa, atumi ipna sisa di, Daud mapmaua bukropudi, er nai peiamu domba bisamda, melipra kalengna ngebo damai dopra deipudi, ‘Adipapu mutu si Ela mutu benkun’ tenen, keteneipu. Ada, Daud benkurya tep, agandum cap, ajen keca er si keju cap, dopra kipudi, bisi benmauanen, Ela mutu beu.

Ange yumada, er nai bo Isaidi Daud tep peipmautopu kupu. Daud adipapu Isarel yala nesala, sun jen talen nengdi dodin tenda ati dopra keana kuramyai yau taruda, sun Israel yala jen talen nengda, ‘Filistin neng porbenkup’ tenen, konum keteneipmaidi, porbanai damai konum bena tekmai. Ataruda, sun jen talen neng yala-yala yumadi, kange pio deipra, upu weika di penmaidi, ‘Sunda popkusepe,’ pepra, ila upu deiki di pedanmai.

21 Atep nengeda, sun Filistin yala jen talen neng cap, sun Israel yala nesala jen talen neng cap yumada, adipapu sun urasin damai didanapu kunmaidi, tekanada nepra tekmaidi, ‘Podarbenkamap’ tenen, didanmaidi, nalena upu pedanmaidi, ketenepra wengmai. Aceipu, Daudda dirbeu. 22 Ukunmai pangeda, Daud adipapu er doupra yakanmau keca yumada, jen neng sun bung keca melipra kalengna tep deiyo ngebo, er damaipu deipu. Ukupu dingeda, Daud adipapu sepra mar podarbenkamaiya tep, nepra tengmaiya, amutu damaida, er du yapu neng ton, ‘Epkamne,’ tenepmaudi, sun damai sepra bena atekmaudi, er du yapu neng tep, antaprapudi, ‘Telepe,’ pepu.

23 Dinino, Daud cap, er duyapu cap, antapidi kikiman upu tupa sisingdanmai taru dipapu, Filistin ngebo, ila puto weik cap, nong lyom cap kuramu ngebo, Gat mutu nengdi deiami ngebo, er sida Goliatda, yana yambul ortara sun urasin damai teku. Sun tekmaiya urasin dam tara yaudi, sun Israel yala nesala jen talena neng wekmayai yaudi, mali upu cap, nyek-nyek pena upu capda, ila puto adi yana pepu. Ada, tumi-tumi yuma, angebo Goliat men di acei yana mali upu peramutopu, atumi peda yana kupu. Aila puto weik ngebo, Goliat yana kunmaudi, nyek-nyek upu penmau ngeda, Daud er peda konum gekepu.

24 Ange menmena sun Israel yala nesaladi konum Goliat yaupa epi. Goliat epidi, erdi pepu upu gekepi dingeda, sun Israel yala jen talen neng yumada, kwar kupka tep, yukai sepra beidi, sun pe dodin tenda ati tamupra bei. 25 Tumi-tumi yumada, Goliat yakanmaudi, nyek-nyek upu penmaupa, sun Israel jen talen nengdi epi. Yakanmaupa epmaidi, sun Israel jen talen neng kware kupupa, sepdaro tamupra, sun dodin tenda ati pumbon bukmaidi, tenpu-tenpu nengdi upu pedanmai. “Uo, angebo er yaredi penmare upuda, nun yumadi gekenupe. Goliatdi nun deiki pio mali upu pepra derinmaser ngebo tep nengeda, nun deiyo ngebo Raja Sauldi, ‘Neda angebo pio songe,’ tenerura cadi, nun kangeda erdi ukupkamsere. Ware ngebo di do, aFilistin puto ngebo Goliat popkamre ngebo tep nengeda, Raja Sauldi Goliat popkamre ngebo tep, er menenga keca pio weika di karepkamre. Tonda, nun nimi deiyo ngebo, Raja Sauldi deipu ner mi peda, Goliat popre ngebo, tek sisi angebo Goliat popyopda, angebopu buru dipkamre. Angeboda, Saul er ner mi kareprepa, dopkamre ja. Tonda, angebo er nai sun nyapsilip yuma peda, Raja Saul tep karenung co bo, er si pajak karenung ngeda, tali tapmengedi, tupa men karenkamnunge. Tali kange deipra teleppu kunkamnunge,” pepra, aupu pedanmai.

26 Uda, Dauddi atumi sun damai tengbeudi, sun meneng damai atekmai neng tep asipetepu, “Uo, sun Filistin nengda, pio telep kuna keca men kununge. Allahdi, ‘Ukunkamrume, angeda pio men kunkamrume,’ peipseu upu pio men gekengedi, Allahdi peipseutopu, sun sal nyapu den bam bol deiki tarange men sengnunga cadi, Allah damai men yatenge. Nun nai bo Allahda, pio gampu kurur ngebo cadi, ware keca deiyo tep, amali ngebo Goliatda, nun si eremnup Allah cap, erdi wepra deiamseu nesala cap tepapu, nyek-nyek pepredi, balila di mali upu pepsetu do? Angeda pio mali kurure,” pepu. Upepu dingeda, Dauddi atekmau jen talena ngebo tenpu tep asipetepu, “Raja Sauldi, aFilistin ngebo popre ngebo tep, wareto menenga keca karepkamre do? Tonda, angebodi Isarel yala nesala tep, song tenena upu pepra deiamu ngeda, angebo poptapre deiki di, amali peserur upu kilitaptapkamre. Atep, Goliat popre ngebo doproptu menenga kecada, nun nimi deiyo ngebo Raja Sauldi, wareto keca karepkamre do?” pepra asipetepu.

27 Asipetepu pangeda, ajen talena ngebo cap, sun ajen talena neng yuma capdi, Daud tep pepi. “Gume, arup pepmapengepu konuma. Nun ila deiyo ngebo Raja Sauldi, Goliat popmanto ngebodi, tek sisi Goliat popmaryopda, nundi pepmape ngeda, tek sisi karepkamre ja. Erdi, ‘Konum ukupkamsene,’ pepra pedina upu konum peiamseua tep pepmepe,” pepi.

28 Daud er menmena kuramu dubo Eliabdi, Daud er cap, sun jen talen neng yuma capda, upu kikiman talepmaidi penmai upu yumada, moupra gekenmau. Gekepudi, Eliabdi er weit bo Daud tep wenepudi pepu, “Kanda ware keca deiyo tep, amutu yanmarem do? Tonda, kan ware ngebo tep moropmumpa, nun nai domba yambul weika di, dopra katawai mutu neitamai deiptapmumpa, yuk ngebodi kalengmar do? Ne kaele, kan balila di tenepmarum ngeda, ne kaele. Kanda, kwar gum deiki dipapu ace yanmarumdi, kan dipru neitamai di, ‘Ukupkamne,’ tenepmarum nge peda, ne kaele. Ne kangeda, kan amutu neitamai yanmamuma deiyoda, ‘Nimi podanmange nge ton, nedi epkamne’ tenen, kan konum yanmarume. 29 Daud er dubodi, aupu pepu dinino, Dauddi er tep tamupra pepu. “Ne ware keca ton mali kupman do? Neda, tali asimna tep, aupu pepra asipetepmanue!” pepu.

30 Aupu pepu dingeda, er dubo Eliab tep tapudi, Dauddi yuk atekmai neng tep, arup asipetepmaunge utopu upu tep, kange di ton cap yuk jen talena neng tep asipetepu. Upepupanen, sun yuk jen talen nengdi tamupra, “Gume, nun nai Raja Sauldi Goliat popmanto ngebo tep, “Ukunkamre, ukupra karepkamre,” pepipa, Dauddi gekepu ngeda, men taru Dauddi asipetepmaupa, gekepmau upupu tamupra lap pepipa aupupu gekepu.

31 Dinino, akunmai neng kankan di, nimi ton Dauddi pepmau upu cap, asipetepmau upu cap, gekepmai. Sun aupu gekepmai nengda, agekepmai upupu, nimi deiyo ngebo Raja Saul er gekenai peda, aupupu yana lap pepi. Upepya tep nengeda, nimi deiyo ngebo Raja Sauldi Daud tep kongpepupa, Daudda Saul er damai yau.

32 Ataru dipapu, Dauddi aupu gekepudi, Saul tep pepu. “Angeboda, ‘Sun dipru boun kupkamre do?’ tenen, aupu penmasere. Balila kepra aupu penmasereng tep nengeda, nunda Filistin neng tep, kwar dangna gume. Neda kan amutara tali pel don ngebo kununa cadi, kandi telepe pepnemempa, angebo tep nedi bena er popbisipkamane,” pepu. 33 Upepu dinin, Sauldi tamupra Daud tep pepu. “Kandi Filistin neng cap, ila puto ngebo Goliat cap tep, bena men popdatume. Kanda pio metek mi cadi, ila ngebo Goliatda kandi men popbisipmanto. Erda, pio metek taru di jen talen ngebo kuramudi, nimi weik konum poramu. Nimi ponada konum kael kepka tep, bena men poptume,” pepu.

34 Dinin, Dauddi tamupra Saul tep pepu. Neda kan amutara tali melimna ngebo kunune. Keteng tamun denge weik deikida, ne nai bo er domba kalekra peinune. Ataru neitamai yumada, bura kam pe, nong weik ila puto pus, er sida singa peda, ‘Domba bisam popra jepkun’ tenen, yakarami taruda, nedi popra gawal dakaramsi.

35 Bura tara di yakaramu yu keca yumada, domba doupra, ‘Kum sekra porberur’ tenen, akeca enembanune. Ayu keca giso deiki popnedi, domba tep lyepra deipnepa, teleppu kuramsi. Tonda dumde kam do, nong weik ila puto pus, singa do, yuk yu keca do, angedi, ‘Adomba popkup’ tenen, yakarami taruda, ‘Angebo popkup’ tenen, ne damai yai pangeda, nedi sun giso deiki potong talepdongopra, poptapnepa, adipapu derami.

36 Ange tep nengeda, ne kan pel melimna ngebodi, dumde kam do, ila yu pus do, yuk yu keca do, ne dipapu akeca yuma ponune. Atep, angebo Goliatda, tali bura tara yu keca portamamsi utopu poptaptene. Erda Filistin ngebo cadi, sun den bam bol men sengmenge nengda, tali neng cadi, er tep popbisiptene. Deiyoda ake. Ada erdi akeca-keca yuma deiki tara kure Allah, Gam Kuna Deiyo Ngebo kuredi, Israel nesala sun jen talen neng yuma weiamudi kalekra melimrure. Dinino, Goliatdi Allah er mawa nesala tep mali upu penmardi, Israel jen talen neng tep, ‘Popbisipkamne,’ tenen, yanmara cadi, Allah melipnerepa, angebo poptaptene.

37 Ada mesum tep men pepne. Gume, Allah er si Yahwehdi ^{▼▼Yahweh – Allah er si, tek sisi ngeda, Yahweh kurure. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} ne tep loptapmaneupa, ila yu pus cap, dumde kam cap, poptapsitopu, Allahdi melipnerepa angebo Goliat peda tali lupra poptapkamane.

Dauddi upepu pangeda, Sauldi “Telepe, ange tep Allahdi pio melimkamkera cadi, angebo porbeo,” pepu.

38 Upepudi Sauldi mar podarbana tep, kenengna baju gat ngeda, ernge pe, Daud tep karepudi kenekeipu. Tonda, Sauldi gat topi, gat keca er si tembaga di ketekeiaminge, Daud er giso galupra deipu. 39 Ukupu pangeda, Dauddi apodana tep lyom parang ya dopra agat baju deiki gerekdongopu. Ukupu dingeda, sun kenengameng baju gatnge cap, gat topi cap, lyom parang cap yuma keprapudi, ‘Bisi betene do?’ tenen, benpetepu dinin, Daud men benmanto kupu. Ikin weik kupka tep, Dauddi Saul tep, pepu. “Podana tep kenengameng kecada, gat baju cap, topi capda, men di ton men kenengnuna cadi, men kupmanto kupnere,” pepudi, apodan taru kenengameng kecada, ayuma kwiriptapu.

Dauddi Goliat popu upu

40 Aikin gat keca kenengaminge kwiriptapu taruda, adipapu er bisam peiramudi douramu maca dopra, doupu dingeda, me pumbon gel duya ulapne kuramrenge pamu bari doprapudi, er domba bisam peiramudi douamu alen pumbon kipra doupu. Tonda, agel deipra dopkamau keca, nelnel utopu keca, er sida umba, er buru deiki doupu dingeda, Filistin ila ngebo Goliat damai beu.

41 Daud banmau taru peda, Goliat adipapu Daud damai yakanmau. Tonda, er melimna ngebodi, sun podan neng dourami keca, er sida kelapi doupra, Daud dam tara yakanmarei. 42 Yareidi, Filistin ngebodi Daud tep dipetepudi, utenepu. ‘Gume angeboda, er pio metek mi kurure. Tonda, er kamo telep cap, er nong capda, puto boun neng utopu kurura tep, erda men kupmanto tep, dakwaprie,’ tenepu. Atep ngeda ila ngebo Goliatdi, Daud tep epudi autupra nyek-nyek penmau.

43 Filistin ngebo Goliatdi Daud tep nyek-nyek penmaudi pepu. “Kanda ware keca deiyo tep amacada doupmaremdi erepyakanmarem do? ‘Erda tali kam utopu kurure,’ tenepneremdi tali lupra ne damai yanerem do?” Upepudi isok puto deiki, “Angebo mali kupra deipkurume,” peprapudi, er isok si deiki di pepra, Daud tep wipdongopu. 44 Ange utopu Filistin ngebodi ton cap Daud tep pepu. “Kanda adipapu ne damai yamempa, nedi kan poptapkenedi, kan tu dopra ma yala-yala yuma embarameng ma cap, tali tuai kuramre keca, dumre kam cap, bura bisam cap, karepnepa jepkukenge,” pepu. Upepu dinin, Dauddi tamupra Filistin ngebo tep pepu.

45 “Kanda nimi podana tep lyom co takke cap, parang ya cap, akeca yuma ketenepra yanmanereme. Dinino, neda, akeca-keca yuma deiki tara kuredi ila puto weik ngebo, Allah Yahweh, er si deiki di yane. Allahda, ila puto deiyo ngebo, er si Yahweh puto deiki dipapu yanmane. Allahda, Israel nesala sun jen talen neng kalekra melimrure. Kandi mali upu peprema deiki di Allah tep yanipreme.

46 Tonda atumi Allahdi kan tep konum keteneipmakere. Allahdi melipnerepa, kan konum poptapkenedi, kan giso du buluktapkamakene. Popkenedi, kan nong cap, Filistin jen talena deiyo neng cap, sun nong yuma pe, poptapsenepa, ma cap, tuai tali kuramre keca yumadi jepkamakenge. Ukupkere pangeda, mutu-mutu yuma dakunge nesaladi kael kepsengedi, ‘Teka Israel nesalada Allah cap kununge’ tenen, kael kepmengedi, Allah er tep gispal donkamenge.

47 Ange tep nengeda, akunmang nesala yuma epmengedi kael kepkamenge. Ada teka, Allah er si Yahweh, erda tali keca co takke cap, parang ya cap deiki di nimi men lyemserure. Nimi yuma podanung dinin, porbisina cap, lyemna capda, Allah er si Yahweh, er puto deiki dipu kareserure. Er dipapu lyemserure. Utenepmengedi kael kepkamenge. Atumi podankamapada, Allah er dipu melimserura cadi, apodan taruda Allah er puto nun deiki deipserepa, sun Filistin nesala popbisipkamsepe,” Dauddi pepu.

48 Ataruda, Goliat cap, sun Filistin nesala capdi, ‘Angebo popkup’ tenen, yambulanun ton Daud kunmaua damai yaipa, adipapu Daud menmena sepdara beudi, sun podan neng baris ketenepra wekmai tara, Filistin ila ngebo Goliat damai beu. 49 Ukupu dingeda, Dauddi er alen pumbon buru dongopra, gel du pukra dopropu dingeda, deipra don keca nenel utopu, er sida umba deiki di Goliat giso deiki dopupa, er aso deiki dourbeudi, giso yo copra wekrou. Ukupu pangeda, Goliat ulunglungupra tuai loka dourbeudi depu.

50 Ange tep nengeda, Dauddi Filistin neng, sun ila deiyo ngebo metek gel du deiki di popu. Angebo popu kecada, takke keca gume, parang ya di gume. Erdi tali gel du cap, gel deipra don keca cap, er sida umba cap, akeca deiki dipu popu.

51 Ukupu dingeda, Daud adipapu sepdara Goliat dourbenmaua damai beudi, nimi podana tep kenengamu gat opkal utopu keca, ila lyom parang ya bena gupdaropu. Akeca konum bena dopropu dingeda, Goliat er pe parang ya di, er giso sekra buluktapu. Filistin nesala sun podana tep, ila gonga kemna deiyo ngebo depupa, epi dingeda, adipapu bura saka sepdaro bendopi.

52 Ange ukupi pangeda, Israel yala nesala puto kupra, balila di sun cap, Yehuda yala jen talen neng yuma kange deipidi, ila upu di upupdaidi, ‘Filistin neng popkup’ tenen, dombanmai. Dombanmaiyanen, sun si Gad yala neng talepra kurami mutu bei. Tonda Ekron mutu ati domidi ongopgenepra wiami gel beilya buplan damai beidi, Filistin neng porbei. Filistin neng yuma popra dombanmaipane, sun nong yumada, mutu si Ekeron mutu cap, Gad mutu cap bana tep, Saraim mutu lyom bisi neitamai, popipa sakmaiyaipu dourbena kupmai.

53 Israel nengdi, sun Filistin tara jen neng popbanmaiyanen, konum poptapi dingeda, Filistin nengdi keana tep, dodin tenda ati dopmaiyaipu tamupra yaidi, sun keca yuma dalupra dopropidi gawal daki. 54 Dauddi, Filistin neng sun ila deiyo ngebo Goliat, er giso dopra Yerusalem mutu dubeu. Er ila lyom parang yada, Daud er pe ke taru tep dodin opkal ati pumbonpu bena dopra mawa deipu.

Daud doupra Saul damai dubeipa, kael kepu upu

55 Ataruda, Saul dinmaupa Daudda, ‘Filistin ngebo Goliat popkun’ tenen, er damai benmaupa, Saul epu. Daud beudi Goliat popu pangeda, Saul epu dingeda, Sauldi jen neng sun deiyo ngebo Abner tep, asipudi upepu, “Anero, Filistin ngebo Goliat popmau ngeboda, erda ware ngebodi deipu mi kurur do?” pepra asipetepu. Asipetepupa, Abnerdi tamupra pepu, “Ne deiyo ngebo Raja, kanda ila mambul ngebo gam kuruma cadi, tali men peptaptene. Tek sisi pepne, angeboda ne kael kemna gum ngebo cadi, er nai bo sisa sida ne walwale,” pepu.

56 Upepu pangeda, Sauldi tamupra, Abner tep pepu, “Atep, ukutaruda bememdi, akaber ngeboda, ware ngebo er mi kurur do?’ tenen, asipbankurume,” pepu. 57 Dauddi, Filistin ngebo Goliat konum popu dingeda, er opkal bol dodin tenda ati dampu tamupra yau. Ukupu taruda, Abnardi, orbena Daud douprapudi, Raja Saul damai duyau. Ataruda, Goliat er giso duda, Dauddi sekra tupa doupmautopu Saul damai duyau. 58 Yau pangeda, Sauldi tamupra Daud tep asipetepu, “Kaber ngebo, kanda ware ngebodi deipkeu do? Kanda ware ngebo mi kurum do?” pepra asipu. Upepra asipupa, Dauddi, tamupra pepu, “Ne nai boda, kan amutara kurur ngebo, er si Isai, erda Betlehem mutu ngebodi deipneue,” pepu.