1 Samuel 18

Daud cap, Yonatan cap tep upu

1Ataruda, Daud cap Saul cap, sun konum upu sisikrei. Ukuprei dingeda, dakuramyane, Saul er mi Yonatan cap, Daud cap, sun butene neng antapra tenpu kange doupreidi, pio kange deipdarei. Yonatandi, Daud tep, dipru karepka cadi, bicau teneramudi, pio kange deriramu. 2Akuprei taru dipapu, Sauldi Daud doupra er ati deipu. Sauldi, ‘Daud tamupra er nai damai berur’ tenen, upu pio sengamu. Atep er nai ati tamupra pio men baramu.

3Yonatan cap, Daud cap kange deipdarei dingeda, Yonatandi Daud tep pepu. “Kan nongeda, ne nonge utopu kurume tenekenuna cadi, ne dipru karekenerure. Nedi kan tep pio bicau tenekenuna cadi, kan tep pio kange deipkene. Atep nengeda, nun kikiman pio melipdanemedi, telep kupra kunkamneme,” pepra pedina upu pepdarei.

4Upepreidi, Yonatan kemamu lyom opkal deikinge kwiriprapudi, Daud kepra deipu. Tonda, podankuna tep, kemameng opkal cap, deiyo deiki kourameng keca cap, tonda er pe parang ya cap, er mar cap, jen cap, ange yuma dopra, ‘Ne kabo sisa’ tenen, Daud tep karepu. 5Konum tenpu kange douprei dingeda, adine ortaru yuma, Sauldi Daud tep, “Ukupkurume, apel ton ukupra donkamrume,” pepra deriramunge yumada, Dauddi pio telep kupra gekepudi apelpu doramu. Ukuramnga tep nengeda, Sauldi, er jen talen neng tep, ila nimi deiyo ngebo kemna tep wepra tekeipu. Ukupupa, Saul er jen talena deiyo neng, yuk neng yuma cap, er taleamu nesala yuma capdi, ‘Ae, Daudda walito wepra deipre. Angeda nun kange deipmepe,’ tenerami.

Sauldi Daud tep, yu teneramu upu

6Uda, Daud gonga kemna, Filistin neng porbenamya, sun deiyo ngebo, nong ila lyom ngebo Goliatda, Dauddi konum popudi tamupra, sun pe mutu yakanmai taruda, dana-dana tara yumadi, sun Israel nerapu yuma bupra wekmaidi, ‘Nun Raja Saul antapkamepe’ tenen, yakanmai. Saul cap, er jen neng cap bisi banmaipane, anerapu yumadi, ‘Telepe’ tenen, kange deipidi, mut penmaidi, mut semna cap kunmai. Mut pepra semai taruda, sun sipyal dam deipra pung pepmengepa pong-pong peramre keca er si kecapi cap, tonda lelim peramre keca er si rebana cap, sun buru di bongopnedi, mut penmaidi, ajen talen neng tep gispal donmai. 7Mut penmaidi aneng tep gispal donmai taruda, mut deiki di aupu penmai.
“Saul kandi nimi dengeda yambul weike beribu-ribu neng porume.
Tonda, Daudpuda, nimi dengeda, pio weika di, men nukmanto sepuluh ribu ton, sepuluh ribu kepra weika di porume,” penmai

8Upenmaiya tep nengeda, Sauldi sun penmai upu gekepu dingeda, dipru neitamai pio ila tulum kupu. Ada, utenepu. ‘Anerapuda, Daud nimi pio weik berpuluhan ribu porure penung dinin, ne Saulda yambul atonunpu ribuanpu porure pepmanengada ware keca deiyo tep do? Ukunmankap, amenda taruda, sun anesaladi Daudpu nimi deiyo ngebo wepra deipmengedi, neda tapnenung,’ teneramu.

9Uteneramudi, Saulda atumi di gonga kepra, pio tulum weik kupbaramudi, ‘Bisbisa kapneredi, ne tapra deiyo ngebo kepterepkamre do?’ tenen, Daud tep pio moupra kalengamu. Er dipru neitamaida, Daud tep dipru wilimdiramu.

10Utenepmaua cadi, berekupa, Saulda lyom takke maca doupra, er ati bo neitamai bukmau. Ukupmaupa, Allahdi isok dato-dato di doproipupa, Saul dipru neitamai yan wekda pepupa, upu penmau. Ataruda Daud men di kuramutopu bung-bung pena er si kecapi doupmaudi mut penmaupane, Saul gekenmau. Ukunmaupane, aisok Saul dipru wekmaupa, Saulda mutana taleamre neng semamengtopu kunmaupa, mali kange doupu. 11Ukunmau pangeda Sauldi tenepu, ‘Adipapu lyom takke balana donoknedi, Daud bukmarai dipapu dela cap maraipkune,’ tenepudi, ue butene dopupane, adipapu Daud gopropupa, delapu marapu.

12Sauldi ange kupunge deiyoda, Sauldi Daud tep, kware kuramnga cadi, kupu. Er tenepu ngeda, ake. ‘Ada, tek sisi Daudda, Allah er si Yahwehdi melimrure dinin, ne tep nengeda, konum tapra bendopnere,’ tenepudi, Daud tep popterepu. 13Saulda ukupra teneramnga cadi, Sauldi peipupa, Daud er damai di gopra yukai beudi, Saul damai ton men kuramu. Tonda, ataruda, Sauldi, ‘Daudda jen talen neng, sun deiyo ngebo kuredi, gung denge seribu neng talenkamre,’ tenepudi, wepra deipu. Ukupupa, Dauddi, ajen talen neng dopra, sun yuk mutu podan neng tep, porbarami taruda, er dipapu melipra embarami.

14Ataru yumada, ware keca do yuma, Dauddi pel doramunge yumada, pio telep kupra doramupa, telep kupu. Deiyoda, Allah er si Yahwehdi, Daud tep weika di melimamnga deiki di, teleppu kuramu. 15Teleppu kuramu pangeda, Saul diramudi, Daud tep kware weik kuramu. 16Sauldi Daud tep kware kuramu dinin, sun Israel tara kurami nesala cap, Yudea tara kurami nesala yuma capdi, Daud tep kange derirami. Deiyoda, ‘Dauddi nun podan neng porbana tep, erdi mepra baramupa, nundi yuk mutu nesala porbenamupka tep, erda pio telepe,’ teneramidi, Daud tep kange derirami.

Dauddi Saul er ner mi dopu atep, pepu upu

17Raja Saul er kange tenepu ngeda, ‘Daudda Filistin neng cap, mar podange taruda, sun Filistin neng dipapu, er tep popkamenge,’ tenepu. Tonda, ukupmengadi, ne tara nengdi, ‘Saul erdi ami popmara gume,’ tenepkamnenge,’ tenepu. Utenepka tep, tenpu tumida Sauldi, Daud tep upepu.

“Ne ner mi er si Merap erda, du ner kurura cadi, er dopra kan tep karepkenepa, dopkamreme. Ne ner mi dopkamrema tenepne ngeda, ake. ‘Ataruda, kan adipapu mar porbana tep, keteneipmum ngepu kupkurume. Ada, tek sisi Allah Yahwehdi, er tenepre taruda, ‘Ormutu neng mar porbenkurume,’ tenepredi, pepseryopda, aneng porbenkamepe. Kanda atarupu melipra kikiman mar porbenkamepe,” Sauldi pepu.

18Upepu pangeda, Dauddi tamupra pepu. “Uo ne nai Rajao, neda wareto ngebo kununa tep, aupu pepnerem do? Neda mambul ngebo pio gume. Tonda, ne nai bo cap, nun nyapsilip yuma cap, ne nai er yala neng capda, tali kan-kan nesalapu kunupe. Nun yumada, mambul nesala gume. Tonda neda, tali melimna ngebopu kununa tep, neda mambul ngebo men kununa cadi, kan ner mi men doptenedi, kan yamal bo men kutene, tenepne,” Dauddi pepu. 19Dauddi, aupu peprapudi, tali dakunmaupane, Sauldi, “Ne ner mi Merap karepkenepa, kandi dopkamreme,” pepu dinin, tek sisi ngeda, er ner mi Merap, Dauddi dopkamau tumi kepu pangeda, Daud kael kepudi, ‘Dopkaman ja’ tenen, ketenepmau dinino, ngedi Sauldi, aner dopra Daud men karepu. Daud tep men karepu dinin, er ner mi dopra yuk mutu ngebo, Mehola mutu ngebo er sida, Adriel karepupa, angebodi aner Merap dopu.

20Dinino, Sauldi deipu ner mi ton, er sida Mikhal, anerda Daud tep nengeda, kange deipudi, er kange tenenange yumada, ‘Daud dipapu dopkamne,’ tenepu. Anerdi tenepu ngeda, yuk nesaladi gekepra kael kepidi, Saul damai lap pepipa gekepudi, ‘Angeda telepe,’ tenepudi kange deipu. 21Ange tep nengeda, Sauldi Daud tep, ‘Ne songe,’ tenepka tep, er Sauldi ange ton tenepu. ‘Ukutaruda, ne ner mi Mikhal dopra, Daud tep karepnyopda, aner doptuopda, Daud er ikin keca dopropkamre. Ada, ne kangeda, ukupnya deiki di, sun Filistin yala jen nengdi, Daud erpu popkamenge,’ tenepu. Er kange tenenange neitamai di, ange tenepu dinin, Sauldi Daud tep ange katuai men pepu. Sauldi ue butene taru di Daud tep pepu, “Ukutaruda, ne ner mi karepkenepa, dopmemyopda, kanda ne yamal bo kunkamreme,” pepu. 22Upepu dingeda, ataru dipapu, Sauldi er ati pumbon pel dona neng yuma tep, aupu mawa di pepu. “Sundi mankau kange doupra bemumdi, Daud er gekenai bena pepkurum upuda ake. ‘Nimi deiyo ngebo Raja Saul cap, er amutara pel dona neng cap, sun yuma dingeda, kan tep kange derikenunge. Ataruda, ‘Raja Saul er ner mipu dopkamre,’ tenepmakenga tep, kanda er yamal bo kunkamreme,” pepra, er gekenai bena pepkurume,” peipu.

23Saul er amutara pel dona nengdi, Daud gekenai bena, aupu lap pepipa, aupu gekepu dingeda, Dauddi tamupra pepu. “Sundi ne tep nengeda, ‘Nimi deiyo ngebo Raja, er yamal bo kunada, kanam kecapu kurura cadi, Raja Saul ner mida, adipapu tali lupra dopmayo,’ tenepmarumdi pepnerum do? Dinino, neda tek sisi tali kan-kan ngebo kunune. Neda, deiyo ton kuna gum ngebo kununa cadi, aupu pepmanerum ngeda, ‘Kanam dipapu kuptene,’ pio men tenenune,” Dauddi pepu. 24Upepupa, Saul er amutara pel dona nengdi, Daud pepu upu yuma gekepi dingeda, tamupra Saul er damai bena, lap pepi.

25Upepra bena lap pepipa, Saul aupu gekepu dingedi, tamupra er pel don neng tep upepu, “Daud damai bemumdi aupu bena pepkurume. Ada, ‘Nun deiyo ngebo Rajadi pepmakerada, ake. ‘Ne ner mi karepkenepa dopmemyopda, aner dopmemdi er tapua karena tep nengeda, yuk kunumna weik keca gume. Ne putapnere ngeda, Filistin neng denge weik, seratus neng popmemdi, sun den bam bol deiki tarange sekamrume. Akeca sektapmemnyopda, akeca seratus sekeipkamnerume. Ukupmemyopda, akeca kareryankamnerume,’ peipmakere,” pepra Daud damai bena pepkurume,” pepupa, yana lap pepi. Ada, sun Filistin nesalada, Israel tara taleamu ngebo, nimi deiyo ngebo Saul, er podandam neng kuramya cadi, erdi aupu peipu ngeda, tali men pepu dinin, erda mawa di pepu. Sauldi tenepkada ake. ‘Aupu pepnya deiki di, Daudda, aFilistin mutu neng porbarepa, sundi er tep popmengepa depkamre,’ tenepudi pepu.

26Sauldi tenepu ngeda, Dauddi men kael kepu. Atep, Saul er pel don nengdi, er peipmau upu yumada, Daud damai lap pepipa, Raja Sauldi peipmau upu yuma gekepu dingeda, ‘Jo, Raja Saul er ner mi dopnyopda, er yamal bo kunkamna cadi, angeda telepe pua,’ tenepu. 27Ukupra tenepu dinin, sun Filistin nesala porbana tep, Sauldi, “Ataru neitamaipu sun Filistin neng porbenkurume,” pepra deiputopu, Dauddi, ‘Go karepmau taru gawal dakrur’ tenen, Daud adipapu er melimna neng cap, tonpa Filistin mutu bena mar porbei. Filistin mutu bei dingeda, Daud cap, er melipra benmai neng capdi, Filistin jen talena neng dengeda, 200 neng bena popi. Ukupi dingeda, aneng sun den bam bol deiki tarange yuma sekra dopropidi, Dauddi ange yuma dopra, Saul damai yana karepu. Ada, tenpu pe ton men tapu, ayuma karepu. Ange kupu pangeda Sauldi, er ner mi Mikhalda, Daud karepupa dopu.

28Ataru di, Saulda tenepudi kael kepu ada, ‘E, tek sisi Daudda, Allahdi melipka deiki di telep-telep kurure. Tonda, ne ner mi Milkada, Daud tep pio kange deipu,’ tenepudi kael kepu. 29Dinino, ataruda Daud tep nengeda, Saulda kwarepu kuramu. Tonda, Saulda, ataru di dipra, orkwamu taru, er gam kuramu taru yumada, Daud tep, ‘Ne songe,’ teneramudi, pio yu tenepra mar peramu.

30Tonda, ataru-ataru neitamai yumada, Dauddi Filistin neng cap, mar podanmananen, podanmananen, pio kuramipa, Daud er dipapu Filistin jen talena neng, weika di popra gawal dangdoramu dinin, Saul er jen talen nengda, ange utopu men kurami. Dauddi ange kuramua tep nengeda, amutu neitamai kurami nesala yumadi, Daud er sipu weika di kael kemamidi, ‘Erda ila mambul ngebo,’ perami.