1 Samuel 19

Sauldi, ‘Daud popkune,’ teneramudi, Daud tep domamu upu

1Sauldi er mi Yonatan cap, er ati pel don neng yuma cap tep, “Daudda poipkamnerume,” pepu. Dinino, er mi Yonatanda, er kabo Daud cap tenpu kange doupra kuramreiya tep, Yonatandi, Daud tep, ‘Pio moupkamrume,’ peipu. 2Yonatandi Daud tep upepu. “Gume bote, kanda ne nai bodi ‘Angebo Daud dan taru poptene do?’ tenen, pio tenenmakere. Ne naidi, ‘Daud popkamane,’ pepmakera cadi, ambutumi ipna taru pio moupra kalengdamemdi, inipra kunkamarume.

3Ukunmamemya, ambutumida ne nai bodi ‘Daud popkun’ tenen, kan kunkamarem mutu damai bere taruda, ne cap benkamane. Er cap ne cap kuneme taruda, kan tep nengeda, ne nai tep, ‘Ware tenepmarem do?’ pepra, asipetepkamane. Erdi penere upuda, lape pepkamkene,” Yonatandi Daud tep pepu.

4Upepupa, mapmaiya, berekyopda, Yonatandi er kabo Daud tep, upu telepnge er nai bo Saul tep penmau. “Naio, kan pel don ngebo Daud tep ‘Poptene’ tenena gume. Ne naio, Daudda kan damai ton mali men kukerure. Er pel telep kupra dokerepa, kan tep weika di melimkerure. Telep kupra pel dokerure. 5Ada mesum tep men pepne. Dauddi Goliat popkou taruda, ‘AFilistin ngebodi ne popnerur,’ tenena gum dipapu, balila kupra, tali lupra beudi Goliat poptapu. Dauddi angebo popua deiki di, Allah er si Yahwehdi Israel nesala tep weika di meliamupa, sun Filistin neng weika di popbisipi.

Daud cap, Allah capdi ange kupsereipa, ne nai kan pedi ange epmumdi kange deiamume. Ukuamum dinin, ukutaruda ware keca deiyo tep, ‘Daud popkun,’ tenepmarem do? Dauddi kan damai ton mali men kukerura cadi, warya tep, deiyo men kupmarpapu, angebo popkaman tenepmarem do?” pepra asipetepu. Yonatandi er nai Saul tep pepu.

6Upepupa, Saulda Yonatan pepmau upu gekepudi, aupu pepra deipu. “Gume, Daud men popkune. Nun nai bo Allah, er si Yahweh gam kure ngebodi dinmasera cadi, er si deiki di pepkene, angebo men popkune,” pepra pedina upu peipu. 7Upepra deipka tep, Yonatandi Daud upupupa, yaudi, sun penmarei upu yuma Daud tep lap pepu. Konum pepkopda, Yonatandi, Daud dopra er nai Saul damai tamupra duyaupa, Daudda, men di kuramutopu, Saul damai kuramudi, melimamu.

8Ukupra dakuramyane, amenda taruda, sun Filistin nengdi ka di ton cap, ‘Israel neng popkupe,’ tenen, gonga kepidi, sun cap Israel neng cap podanmai. Sun podanmai taruda, Daud ila puto deiki di, sun Filistin neng yuma popbanmaupa, sun aneng yuma kurapra bura saka sepra bendopi. 9Ukurami dinin, ataruda tenpu komuni ton, Saulda takke balana doupra, er ati bo bukmau. Ukupmaupane, Allah er si Yahwehdi er wenemna tep, dato-dato di isok doproipupa, dipru neitamai yan wekda pepu. Ukupu taruda, Daud men di kuramutopu, bung-bung pena er si kecapi doupmaudi mut penmau.

10Upenmaupane, Sauldi lyom maca takkenge doprapudi, ‘Daud popkun’ tenen, dopu dinin, Daud geipdongopupa, delapu bekeipu. Ukupupa, alukunda neitamai Daud adipapu Saul ati tapra, bura saka beu. 11Beu pangeda, Sauldi er melimna neng dopra deipupa, Daud er ati dam bena wareki. Ada, ‘Ipna taru di Daud popkup’ tenen, wareki dinin, Daud er ner Mikaeldi pepu. “Kao, kanda alukunda dipapu inimbenkurume. Gum dingeda, ambutumi ipnada, yan popkamakenge,” pepu. 12Upepudi, ataru dipu Mikaeldi jendela bisi bon tapu gerekotepupa, Dauddi atapu deiki kwerepudi adipapu yuk mutu inimbeu.

13Konum beu pangeda, er ner Mikhaldi, sun cap tonpa kurami nesaladi, isok si eremna tep, nimi utopu kupra petuprapidi deiami keca patung doprapudi, Daud er manai deipu. Tonda, er apatung er giso deiki tarada, kambing potong di wiaminge keca doprapudi, ange epmengedi, ‘E angeda Daud atupa mapmare,’ tenepkameng’ tenen, akeca deipu. Ukupu dingeda, patung nong lelimna tep nengeda, selimut bol di singipdongopu. 14Ataruda, Daud tomona tep, Sauldi nimi dopra deipupa yai. Yai pangeda, Daud er ner Mikhaldi, aneng tep, “Gume, Daudda pu jenmare pepu.”

15Aupu yuma doupra, Saul damai bena lap pepipa gekepu dingeda, Sauldi aneng tep tamupra pepu. “Gume, ukutaruda tamupra bemumdi, sun asuru di, er nong tek sisi epra kael kepmum dingeda, Daud er pu jenmarepa mapmare ason amapmarepapu, akepman erepdaro doupra yankamarume. Ukupmum pangeda, nedi angebo popkamane,” pepu. 16Upepupa, Sauldi nimi wepra doproipmau neng beidi, Daud er ati bo wekrapidi, Daud er manai dipetepipa, nimi urasin utopu keca, Mihaldi apatung deipu ngeda, er giso deiki kambing potong di wiamingepu kapmaupa, bena epi.

17Epidi, akupmaunge tamupra lap perbenmaipa, Saul kael kepudi, Mikhal tep upepu. “Teka kandi, ne tep iniptapmaremdi pepmanerem upuda adano. Ne podandam ngeboda, kandi melipmarempa bendopmare. Ware deiyo keca tep, mok upu deiki di iniptapmarum do?” pepu. Upepupa, Mikhaldi tamupra, Saul tep upepu, “Gume naie, nakenge bodi upepneu. ‘Kandi men melipnemempa, men betenyopda, tek sisi kanpu popkukene,’ pepra pepneupa, nedi kau keptapnupa benmare,” pepu.

Dauddi, Samuel damai Ramah mutu beua tep, seki upu

18Daud konum bendopuopda, adipapu Rama mutu Samuel ati kuramngai beu. Beu dingeda, Sauldi er tep mar peamudi kuramunge yuma lap pepu. Ange konum lap pepu pangeda, Samuel cap, Daud cap tonpa, Nayot mutu berei. Ukupreidi, sun tonpa amutupu bena kuramrei. 19Ukupreidi, dakuramreianen, amenda taruda, nimi ton Saul damai beidi, “Daudda Rama mutu damai mutuda, Nayot mutu kuramre,” pepipa, kael kepu. 20Upepipa, Saul kael kepu dingeda, ‘Daud tomopkameng’ tenen, nimi dopra deipupa, Nayot mutu dirbei. Sun aneng beidi dinmaipa, Allah er upu lap pena neng, ada nabi-nabi neng ton buluprapidi, Allah er Sambala puto karepka deiki di mut semai. Ada, nabi Samueldi gonga kepmaupa, ila upu deiki di penmaidi, puto di semaipa epi. Ange epi taruda, adipapu Saul erdi dopra deipmau neng peda, Allah Sambala puto, sun damai yana wekupa, sun aneng peda, tonpa mut semaidi, ila upu deiki di penmai.

21Yuk nengdi, ange epidi, Saul damai lap perbenmaipa, Saul aupu gekepu dingedi, nimi ton doproipupa, dirbei. Sun aneng peda bei dinino, amutu konum yai pangeda, Allah er Sambala puto karepka deiki di, sun kayapu neng kunmai utopu kupra, mut sepmaidi, ila upu deiki di penmaidi kunmai. Ange peda, Saul kael kepu dingedi, ue weneringe ton nimi doproipupa bei. Abei neng peda utopu kupi. 22Ukunapu kunmaiya tep nengeda, Saul adipapu Rama mutu bana tep bisi banmauane, ila bunkwan me paleamiya damai ada, Sekhu mutu beu. Beudi, amutu kurami nesala tep Sauldi, “Samuel cap Daud cap, kurenge mutuda dan do?” pepra asipetepu. Upepu pangeda, amutu nesaladi tamupra, “Sunda Nayot mutu kurenunge,” pepi.

23Upepipa, aupu gekepudi, Saulda amutu tapra, tu bisi banapu kunmauane, Rama mutu beu. Beupa er peda, Allah Sambala wekupa, Nayot mutu bana tep, bisi tupa banmau taruda, mut seprapudi, ila upu deiki di pepbanmau. 24Bisi banmaua konum beu dingeda, Saul opkal kwiriptaprapudi, Samuel damai mut semaudi, ila upu deiki di penmau. Upenmau taruda, opkal bananga tuai deiki dourbena mapmaudi, alukunda cap komuni cap yuma, acaipu kunmau. Ukupka tep nengeda, ataru di dipra dorkuramu taruda, nimidi, ukupmanto upu deiki di, gonga kepidi, uperami. “E, Saul er peda, Allah upu lap peramre ngebo, nabi kurur do, gum do?” pepra, asipeteami.