1Sa 2 | XteSC | STEP | Uda Hana erdi Allah tep moropudi, upepu. Allah Yahweh er dipapu ne dipru kange pio telep kupra deipmanerpa, ne dipru kange deipmane. Apel erdi dopmanera deiki di, ne kange mali kuramneu ngeda, telep kupra deipmanere. Adeiki di, ne kange deipnedi, ne tenepmanada ake. Ne kangeda, ‘Allah Yahweh erdi puto keipmanere,’ tenepmane. Adeiki di, yu tenenenung neng tep, mali penkamne. Ne podan neng tep, ne sipyal di mali pepnedi, ‘Ne dabale,’ tenepne. Deiyoda, ne konum kael kepne. Tek sisi Allahdi ne tep konum melipmanera tepa.

1 Samuel 2

Hanadi Allah morona cap, mut pena cap pepu upu

1 Uda Hana erdi Allah tep moropudi, upepu.
Allah Yahweh er dipapu ne dipru kange pio telep kupra deipmanerpa, ne dipru kange deipmane. Apel erdi dopmanera deiki di, ne kange mali kuramneu ngeda, telep kupra deipmanere. Adeiki di, ne kange deipnedi, ne tenepmanada ake. Ne kangeda, ‘Allah Yahweh erdi puto keipmanere,’ tenepmane. Adeiki di, yu tenenenung neng tep, mali penkamne. Ne podan neng tep, ne sipyal di mali pepnedi, ‘Ne dabale,’ tenepne. Deiyoda, ne konum kael kepne. Tek sisi Allahdi ne tep konum melipmanera tepa.
2 Tonda, Allah Yahweh er dumsisi pio telep kuretopu, yuk neng ton utopu pio men kununge! Angeda, Allah er dipapu ne tep melimne kecada, pio tupa karenerure. Nimidi, ‘Nun podan nengdi popsenung’ tenen, ila mutu yungne gel damai, gel imir pumbon bena inimengetopu, Allah er dipapu erepra deiki tara kuredi, er puto deiki di kalengserepa, er amutarapu kunupe.
3 Atep nengeda, sun mali kurum nengda, tali pemum upu yumada, adipapu yapkurume! Sun gemena upu deiki di pemum upu peda, aceipu deiptapkurume! Ada, Allah Yahweh erda, tek sisi akeca-keca yuma tep, ila kael kemna deiyo ngebo kurure. Atep nengeda, Allah Yahweh er dipapu nimi yumadi sun kunge keca yuma tep, ‘Malinge acei, telep ngeda acei’ tenen, kupetemseredi, kael kemserure.
4 Allah erdi teneretopu, akeca-keca yuma tamurtamredi, telep kupra derirure. Ukupmantoda, nimi pona ila kael kemengedi, puto weik kunge nengda, sun mar yumada, adipapu Allah Yahwehdi konum copra tapmare. Dinino, sun puto gum tep boun kuprepa, amutara kurami nengda, erdi konum puto kepra deipmare.
5 Pumun taru di, sun jen keca weik kuamupa, sun jen ila di konum jeramipa, bouamu nengda, ukutaru sun jen keca gum kupra deipupa, sunda jen putanapu kungedi, ‘Uo, ware kupra jeptepe do?’ tenena tep, yuk neng damai bena, ‘Pel ton dipsemumpa, pel doptepya deiki di, jen keca kunupra jeptepe do?’ pepra mororbanunge. Pumun taru, yuk nimida, jen putaramu nesalada, ukutaru Allahdi jen keca weik karerepa, konuma sun jen keca weika di jepra bouprepa, kange deipra dim peprappu kununge. Tonda, pumun taru er mi derina gum di youpu kuramu nerda, konum er nyapu dengeda ngangtan bari deipredi, ila di kange derirure! Dinino, pumun taru yuk nerapu ton, sun nyapu pio weik deiami nerapuda, ukutaruda, sun nyapu ton derina gum dipapu kununga cadi, mi men deipmanto kungedi, ‘Uo’ tenen, mali kange doupra kununge.
6 Allah Yahweh er dipapu gam bungdina cap, depra derina cap, ayumada er dipapu kudirure. Ada, Allah Yahweh er dipapu nimi tep, ‘Gam kunkamre,’ tenepyopda, angebo gam kurure. Tonda utopu, yuk ngebo tep, ‘Er dipapu depkure,’ tenepre pangeda, adipapu derure. Tonda, Allah er dipapu, depre ngebo, dena nesala kun damai, Sheol ^{▼▼Sheol – Aupu deiyoda, sun Ibrani yala nesalada, ‘Nimi depmengopda, sun sambalada Sheol mutu bena kununge,’ tenemya cadi, dena nesala banungaida, ‘Sheol mutu’ perami.} mutu dokotemrure. Utopu, er dipapu, ‘Gam bukamre,’ tenepyopda, ton ngebo ila kange mun pu jerepa, depmanto kupmarya peda, Allah dipapu telep kupra deiprepa, kippu kunkamre. Depmarya peda, gam bukeiprepa, tamupra teleppu kunkamre.
7 Ange utopu ton, nimi tenpu ngebo ton, Allah Yahweh er dipapu angebo tep, ‘Ikin kuprepa, akeca-keca yuma men talenkamre,’ tenepyopda, angebo tep, tali kankan ngebo kemdirure. Tonda, pio kankan nesala tep, ‘Isomka kunkamenge,’ tenepyopda, er dipapu anesala tep, telep kupra deipre pangeda, isomka neng kepra derirure. Tonda, dipru amu kepra kuna ngebo ton, Allah Yahweh dipapu erepredi, telep kupra deiprepa, kange deipra kunkamre. Utopu, er dipru eremna ngebo tep nengeda, Allah dipapu, angebo ton, amutara kepra deiprepa, mambul kange doupra kunkamre.
8 Ange utopu, nimi ton ila kange mun kange doupra, sikke but deikipu kuramredi, akeca-keca yuma gum ngebo kuramrepanen, Allah Yahweh dipapu, angebo erepra deipre pangeda, teleppu kurure. Utopu ton, ‘Uo’ tenen, ila kange mun deikipu kuramredi, nimidi pio mali keca uku dongombanaipu, ‘Nun songe,’ tenenapu kuramrepanen, Allah Yahweh dipapu, angebo erepra deiprepa, nimi deiyo ngebo Raja, er mi cap bungrure. Tonda, Allah Yahwehdi anesala yuma tep, ‘Pio telep kunkameng’ tenen, ila deiyo neng utopu kepra deipre pangeda, yuk nesaladi aneng tep, gispal donkamenge. Apel yuma dorurada, tali tep gume. Allah Yahwehdi, tuai mutu ban-ban yumada, Allah ernge pua. Nimidi ati don taruda, gat ayumnya co ikmengedi, akati telep kupra doramengtopu, Allah Yahwehdi, tuai mutu ketekepra deipudi, ‘Apio kunkamre’ tenen, puto di telep kupra ketekepra deipudi, akeca-keca yumada, lelepra deipu.
9 Nimi ton, Allah tep, ‘Nun nai bo ake,’ tenengedi, tamna gum dipapu, er pere upu moupra talepmengedi, dombanung nesalada, sun pio bouna di kuramre nesalada, Allah Yahwehdi sun tep kalengredi, pio telep kupra melimrure. Dinino, mali kun kecapu pio talepra kunung nesalada, amutara deiprepa, sunda kunungnaipu pio kunkamenge. Aneng gum kupra deipre pangeda, nimidi men dinkamenge. Angeda tali tep gume. Nimi yumada, sun pe puto deiki dipapu, telep kupra men kunkamenge. Allah dipapu melimserura deiki dipapu telep kunkamepe.
10 Allah Yahwehdi, er tep, ‘Nun songe. Er upu men gekenkamepe,’ tenepmengedi, er upu yaninung nesala yuma tep nengeda, erdi popra sikke bungtamkamre. Anesala sun kware dangna tep, im deiki di ila kulman dokoteprepa, lelim pio weika di peramretopu, er upu penkamre. Allah Yahweh er dipapu, tuai mutu ban-ban neitamai kunge nesala yuma tep nengeda, ‘Telep ngeda ake, mali ngeda ake,’ pepra, lepsisikredi, bokra deipredi wenepkamre ja. Ukupre dingeda, Allah Yahweh erdi, ila nimi deiyo ngebo Raja kuna tep, wepra deipre ngebo tep, ila puto karepkamre. Tonda, awepra deipre nimi deiyo Raja ngebo tep, ila di puto keiprepa, puto weik ton cap tapakra kupbankamrure.
Hana erdi aupu pepu dingeda, konum sengpepupa, upu pena ton kum di, dim pepra buku.

11 Ukupu pangeda, Elkana cap, sun nyapsilip yumada, amutu tapra, tamupra sun pe mutu, Rama mutu bendopi. Dinino, sun mi Samuelda, acapu tapra, Silo mutu imam Eli er amutarapu kuramudi, er pel tep melimamnga deiki di, Allah Yahweh er gispal dona tep, pel doramu.

Eli er nyapudi mali kurami upu

12 Eli er nyapudi mali-malipu kuramidi, Allah er si Yahweh tep, ‘Erda mambule’ men teneramidi, er si men eremami. ‘Erda dakwapye, nun songe,’ tenerami. 13 Ataruda, Israel nesaladi, ‘Nun nai Allah, er gispal dona tep, gam keca popra karepkupe,’ teneramidi, karerbarami. Ataru yumada, akeca dopra Allah er ati pel dona deiyo neng tep kareramipa, anengdi atu keca dopra uku dongorami. Ton ngeda bokra, mau pumbon gamami. Atu keca gamne mau di gapman taruda, Allah er ati pel dona deiyo neng, sun melimna nengdi yana, lyom garpu utopu keca dinin, er takkeda weneri di, amau pumbon neitamai di lukra, tu keca potokra dororami.

14 Uda, alyom garpu talepra tu keca gapman mau pumbon dokoteramidi, atakke garpu di potokdongopra dororamidi, Allah er ati pel dona deiyo ngebo tep karerami. Ada, ‘Pio telepngepu dopropkup’ tenena gum dinin, lukra dopropi ngepuda dororamidi, Allah er ati pel dona deiyo neng tep kareramipa, sun jerami. Ware neng do yuma, sun Israel nesaladi, ‘Allah gispal dona tep karepkupe,’ teneramidi, Silo mutu yakarami neng yuma peda, angetopu kurami.

15 Ukurami dinin, Eli er nyapuda, pio mali kurami. Sundi peipreipa, sun amutara pel melipra dorami nengdi ukurami. Israel nesala Allah karena tep gam keca popnedi, tu doupra yanpa, ukudi meta keca kapul danman taru di, Eli er nyapu sun melimna pel dona nengdi, “Gume tu telep keca ton dopra, Allah er ati pel don ngebo tep, embek tu ton karepseo. Erdi uku deiki dapkamara tepa. Tu keca mau pumbon di gamne kecada, men karepsetume. Mau gamne tuda gum dinin, embek tupu karepsemempa, er jepkamara tepa,” pepra yan peramrei.

16 Upepnepa, Israel nengdi, “Gume, telep ngeda, uku dongopmepepa, ukudi meta keca yuma konum jepropredi, gawal tupa kupmarenge neitamai di, sunda tu kecapu doproptumdi jenkamruma,” pepmengopda, anengda, ila di kika deipra, uperamrei. “Gume, adipapu embek tu karepserume. Men karepsemumnyopda, nun adipapu upula dalupra dopropkuneme,” peramrei. Uperamreidi, yana dopra jerbaramrei.

17 Eli er nyapu butene di uperamreiya tep, sun melimna neng yumadi ukuramya tep nengeda, Allah tep kareryakarami nengda, mambul kange dourami. Tonda Eli er nyapu butene di, ange kuramreiya deiki, Yahwehdi yu weik kuramu. Ada, sun mali weik kuramrei keca diramudi, ‘Angeda ne song’ teneramudi, mambul kange doupudi yu weik kupu. Deiyoda, atu kecada, Israel nengdi, ‘Yahweh er gispal dona tep karepkupe,’ tenerami dinin, abutene nengdi, ‘Dakwapye, ada tali tu keca pua,’ teneramreidi, ‘Angeda, Allah er mawa keca cadi, mambul pio weike,’ men teneramrei.

18 Uda, Eli er nyapu butene di, mali weik kuramrei dinin, ataru peda, Samuel er nong nena gum dinin, Allah er ati pumbon pel tep melimna ngebo kuramu. Ataruda, Allah er ati pel don neng kemameng opkal, pio telep lek kurun opkal kepra apel doramu. 19 Ukuramu taru yumada, er nindi opkal lyomnge er kiklipnge tep, wipra deriramu dingeda, tupa-tupa er akenge cap, Allah karena tep gam keca dopra, Allah er gispal dona tep karerbaramu taru yuma, aopkal peda doupra karerbaramrei. Ada, tenpu taru dinin, keteng tamun, keteng tamun yuma, alyom opkal dopra, Samuel tep karerbaramrei.

20 Ukuramreipa, Allah er ati pel dona deiyo ngebo Elidi, ‘Angebo Elkana cap, er ner Hana cap tep, kange telep kweipkamre’ tenen, Allahdi aneng butene tep, pingping keca sun deiki deipudi, Allah tep moropudi peramu. “Yahwehdi kan ner tep, nyapu ton cap karepkamkere. Ada kan ner, er mi menmenange, er si Samuel tep moropupane, Allah er si Yahwehdi karepupa, konum deiamu dinin, ka tamupra Allah tep karepka cadi, ami er yo pununa tep, nyapu ton karepkamkere,” pepra Allah mororamu. Upepu pangeda, sun tamupra Rama mutupu tamupra baramrei.

21 Ange tep nengeda, Allah Yahwehdi Hana tep, telep kweipu. Ukupka cadi, ataru neitamai, Allahdi nyapu weik kareramupa, Hanadi sal nyapu weneri cap, ner nyapu butene cap deiamu. Ukuramu taru peda, Allah Yahweh, er si eremna ati yakaramupa, Samuelda, akati damai dinin, Elia melipra moupra pel doramudi, er nong ton cap neramu.

22 Eli konum wisi deipu taruda, er nyapu butene pio mali kuramrei ngeda, Israel nesaladi ange yuma peramipa gekeramu. Tonda, Allah cap, nimi cap, antamna tep, opkal bol di dodina tenda ati, Allah er si eremna ati bublan dam melimna nerapu, er nyapu butene di, anerapu dopra, sun cap kikiman maramipa, yuk nengdi epra lap perami. Peramipa, Eli gekeramudi kael keamu. 23 Ange tep nengeda, Eli er nyapu butene, sun damai bena, sun tep pepu. “Sun pio mali kurerum keca yumada, ware keca deiyo tep kurerum do? Israel nengdi ne damai peryakanenunga cadi, ware keca tep sunda ange kurerum do?” pepra wenepu.

24 Tonda, upepu. “Gume ne nyapu. Allah er si Yahweh, er mawa neng yumadi, sun kurerumunge tep, ‘Nun songe, angeda sun mali kurerunge,’ tenesenunga cadi, mali upu pesenunge. Atep, ton cap ukuna gume,” pepra wenepu.

25 Tonda upepu. “Ukupmanto, nimi tuai neng tep mali kudinada, Allahdi tek sisi ‘Angeda mali kununge’ tenen, bicau tenepra kaukeptudi lyepropsetue. Dinino, Allah er si Yahweh tep, mali kupmepe ngeda, ware ngebodi lyepropsutu do? Ware ngebodi, amali kuna neng tep, Allah cap antamdina deiyo ngebo kuptudi, pel doptupa, telep kupra kikiman kuptepe do?” pepra wenepu. Ukupra wenepu dinin, er nyapu sun butene di apepne upu ton pio men gekeramrei. Sun men gekeramreia deiyoda, Allah er si Yahwehdi abutene neng tep, ‘Aneng wenepra poptapkamne,’ konum tenepka tepa.

26 Dinino, ataru neitamaida, Samuelpuda tupa nong neramudi wisi cap deiamu. Tonda, Israel neng cap, Yahweh capdi er Samuel tep, ‘E, erda telep ngebo,’ teneramidi, pingping kange dourami.

“Allahdi Eli er nyapu deiki wenemna keca karepkamre,” pepra lap pepu upu

27 Tenpu tumi ton Allah er upu kai pen ngebo, amenda kupkamu keca lap pen ngeboda, Eli damai yaudi, Allah peipmaunge tep pepu. Allah er si Yahwehdi upepkere.

“Mesir mutu neitamai Firaundi sun co puna neng, mambul pel dimamupa, ikin weik kuramipane, nedi lyepramsa deiki di, kael keamnei. Allahda ne pua,” pepu. 28 “Israel nesala yala-yala weik akurami dinin, ne dipapu, ‘Angeboda, Allah cap, nimi cap antamdina deiyo ngebo pel donkamre,’ tenepsidi, kan apu bo wepra deipsi. Angebo, konum anuamsidi, ‘Ne ati talepra pel donkamre. Erda, ne morona tep, nintong telep keca dopra uku dongonkamre. Tonda, ne gispal dona cap, Israel nesala mali kuna keca kaukemna cap tep, pala gel taplakra yakeipyai deiki, yapi keca popra, uku dongoryakana tep, apel donkamre,’ teneramsi.

Tonda, siltong telep keca dopra, uku dongopnedi karenkamnere, teneramsi. Tonda, ne ati pel don neng kenengameng lek kurun opkal ton kenengamredi, ne damai yana pel donkamre, teneramsi. Tonda, Israel nesala, ‘Allahdi, nun mali keca kaukepra lyepkamser’ tenen, yapi keca popra, ne Allah karena tep, uku dongonkameng keca, neitamai bokra, kan apu bo cap, er yala neng yuma cap tep kareramsi,” Allahdi pepu.

29 Upepudi aupu ton pepu. “Tonda, nedi Israel nesala tep, ‘Yapi keca popra ne si eremna ati pumbon karenkamnerume,’ peramsi keca yumada, sundi, ‘Angeda mambule gume, angeda tali keca pua,’ tenerume. Akurumu ngeda, ware keca deiyo tep do? Israel nengdi akeca dopra yan karepmengepa, eprumudi, ‘Nun dipu jepropkupe,’ tenerumada, warya tep do? Ukuruma deiki di, ne Allah tep yaninerume. Tonda ware keca tep, Eli kan nyapu mali kurerenge keca tep, kandi kaukemem dinin, ne peramsisi keca cap, ne pe nong cap tep, ‘Mambule,’ men tenenerum do? Ukurume pepmakena deiyoda ake.

Ada, ne mawa nesala Israel nengdi, ne gispal dona tep yan karenenung keca, kan nyapu butene di eprengedi, telep-telep ngepu dopra, sun cap jerumupa sun nong galemna weik nerurunge. Apio malipu kumum ngeda warya tep do? Ukuruma deiki di, kan nyapu tep ila di eremem dinin, ne tep nengeda, sun amutara derinerume. Ukurumudi, mali kunerume,” Allahdi Eli tep, upepra wenepu.

30 Upepudi, aupu ton dukdongopra pepu. “Ange tep nengeda, neda Israel nesala sun nai Allah, Yahweh nedi pepkene. Pumun taru di uperamsi. ‘Eli kan yala neng cap, sun nyapu yuma cap, ataru-ataru yumada, ne ati pum pel dongedi, ne tepapu si eremkamnenunge,’ peramsi. Uperamsi dinin, ukutaruda ne Yahwehdi ange tapra yuk upu pepkene. Ukutaruda, ne kange yuk kupnere. Ada ware neng do, ne tep gispal dopra ne si eremenge neng tep, nedi sun tep erepra deipkamne. Dinino, ware neng do yuma, ne tep, ‘Erda mambule gume’ tenen, gispal dopra men si eremnenung nesala tep nengeda, nedi sun tep, ‘Dakwapye, sunda tali neng’ tenen, tamkamne. Sun tep pio men melimkamne.” Allahdi pepu.

31 Upepudi, aupu ton pepu.

Tek sisi ne tenepne taru konum kupre pangeda, Eli kan yala neng, kaber neng yumada, popra tapkamne. Ukupnyopda, kan yala neng yuma, sun puto boun kupre pangeda, tenpu ngebo peda, wisi men deipkamenge. Kaber taru dipu denkamenge. Kan yala neng neitamaida, wisi men derinkamenge, kaber taru dipu denkamenge.

32 Israel nesala yuk yala neng kan-kanda, telep kweipnepa, telep kunkameng dinin, kan yala neng neitamaipuda, ikin keca karepne pangeda, kan yala kaber neng yuma denkamenge. Tenpu ngebo peda, wisi ton men deipkamre. Ukupre pangeda, epmemdi, ‘Uo’ tenen, pio mambul kange dounkamrume.

33 Eli kan yala nengda, kandi deipmempa, deipdanen bankameng neng tep nengeda, weik tarada, ne si eremna ati pumbon pel tupa men pel donkamenge. Aneng tapkamna tepa. Kan yalapu dinin, ton nengda men popra gawal dakamne dinin, gam tupa kungedi, telep kupra men kunkamenge. Anengdi, mali-mali weik kupmenge pangeda, kan epmemdi weika di engenkamrume. Tonda, kan kange dipru pio ikin weik kupkamkere. Deiyoda, kan yala neng neitamai kaber neng yumada, tenpu ngebo peda wisi men derinkamenge. Kaber taru dipu denkamenga tepa. Ange yumada, nedi sun yala neng wenepkamsena tepa. Allahdi Eli tep pepu.

34 Allahdi aupu pepudi, aupu ton cap dukdongopra pepu.

Angepu gum dinin, tonda nedi wenepnepa, kan nyapu butene Hofni cap, Pinehas capda, tenpu tumi dipapu depkamrenge. Sun butene depkamrengada, tali tep gume. Ada kandi, ‘Uo, angeda, Allahdi wenepmanera’ tenen, kael kepkamrema tep, kupkamre.

35 Ukupne dingeda, ne ati pel dona deiyo ngeboda, yuk ngebo ton wepra ereipnepa, ne tep moupra pel donkamnere. Ne kange dipru neitamai tenenetopu, awepkamne ngebodi angepu moupra kupkamre. Tenpunge peda men tapkamre. Ukupre pangeda, nedi er yala tep kalekra melimnepane, er deipgerekdanen bange nesala yuma, teleppu kunkamenge. Ereipkamne ngebodi, ne si eremna ati pumbon pel tupa donkamreaida, nedi wepra deipkamne ila nimi deiyo ngebo damai kunkamre.

36 Ukupra kunkamra cadi, ukupre pangeda, Eli kan yala nengdi, ne weipne ngebo damai bengedi, er gispal dona tep, gutam tu dipdongopra, moronkamenge. Sundi, ‘Uo nun kabo, nun jen putana weik cadi, jen keca kunupra jeptepe’ tenen, kunumna weik keca perak ton karepsetumpa, jen keca kunupra jeptepe. Agum dingeda, roti jen keca, yambul kwal deipmatumnge peda, karepsetumpa jeptepe. Tonda, Allah er ati pel ton bokra karepsetumpa, apel doptepya deiki di, menenga keca dopra, nun jen kunupra jeptepe. Gum dingeda, ‘Mesumpu kunkamepe,’ pepra, moronkamenge. Ada ne weipkamne ngebo, er damai bena moropkamenga tep, pepne.

Allahdi Eli tep, upepra lap pepu.