1 Samuel 20

Yonatandi Daud melipu upu

1Uda Daud sepdarapudi Rama mutu damai dinin, Nayot mutu damai tapra beu. Yonatan er damai beupa, antapdareidi, Dauddi asipetepu. “Ne kabo, ne ware mali kun keca kupman do? Ne ware mali keca kupmanpa, kan nai bodi, ‘Erda mali kun ngebo’ tenenmanerdi, ‘Angebo popkune,’ tenenerur do?” pepra asipetepu.

2Asipetepupa, Yonatandi tamupra pepu. “Gume ne kabo, apepmaremtopu pena gume. Ne tek sisi pepkene, kan popkerepa men depkamreme. Atep tenipkamrume. Ne nai bodi kure keca yumada, ila di tenena pe, yambul di tenen nge peda, ne ton penerure. Ne tep kapul men penere taruda, tenpu pel peda, men dorure. Atep nengeda, atopu upuda ne damai kapul men pepmanera cadi, ware keca deiyo tep ato keca inipkamner do? Ange pio men kupkamre. Ne men pepnera tep, ne kangeda, kanda tek sisi men popkamakere,” pepu.

3Upepu dinino, Dauddi, “Allah er si deiki di pepkene. Kan nai bodi konum kael kepkeu. Kandi ne tep, bicau teneneremdi, kange derinerume. Ange tep nengeda, ne kangeda, erdi konum tenerure. ‘Gume, ne mi Yonatan tep, Daud popkamne ngeda, men lap pepkamemene. Ange gekepyopda, er mambul kange doupkamra cadi, er tep men pepkamne,’ konum tenerure, tenepne.

Atep nengeda, ne tek sisi pepkene, kan cap nun nai bo Allah cap gam tupa kurerume. Ange tek kuretopu, tenimtona men kunerure. Ne tek sisi kaele. Sauldi popkamner cadi, ne dena damai kupnere,” Dauddi Yonatan tep pepu. 4Upepupa, Yonatandi tamupra pepu. “Ange tep, kandi putapkerepa dipruai di tenepremtopu pepnemempa, kan putapker kecapu tek sisi melipra kupkamkene,” pepu.

5Upepka tep, Dauddi tamupra pepu. “Atep kael kepo. Ambutumida, war tengdongon taru ila kailya kalemnup ngeda konum kupmara cadi, ne cap, kan nai Raja Saul cap jepkamaneme. ‘Ukupkamneme’ konum peipneu dinin, kandi telepe tenepmem pangeda, ne adipapu bura tara benedi, inipra kunkamane. Inipra dakunmanepane, tumi butene konum kupyopda, dakunmanepane sintara kupkamare.

6Bura dakunmane taru neitamaida, kan nai bodi, ‘Daud dan do?’ pepra, asipetepkeryopda, kandi, ‘Gume, Daudda, puto di moropneupa, nedi ‘Telepe dabenkurume,’ pepmasi. Dauddi, upepneu. ‘Ne mutu sisa Betlehemda, ne yala neng yumadi, keteng tamun, keteng tamun yuma neitamai, Allah gispal dona tep, gam keca popra Allah tep karenkamenge. Ange tep, ne menmena Betlehem mutu tamupra benkamane,’ pepra moropneupa, ‘Daberume,’ pepsipa beu,’ upepkurume.” Dauddi Yonatan tep pepu.

7Upepudi aupu ton pepu. “Upepmempane, kan nai bodi, ‘Telepe,’ pepkeryopda, adeiki di ne kael kepkamne. Neda ‘Teleppu kunkamne’ tenepkamne. Dinino, apepmaken upu pepmempa, kan nai bo Sauldi yu kupyopda, adeiki di kael kepkamane. ‘Tek sisi erdi popkamner’ tenen, kael kepkamane. 8Kao, neda kan amutara kunedi, kan tali pel dona ngebo utopu kunune. Nun nai bo Allah, er si Yahwehdi dinmaseupa, kandi ne tep, telep upu pepra deipnemume. Atep nengeda, bicau tenepnememdi, telep kupra melipkamnereme. Ne kangeda, ne tek sisi mali keca konum kupnyopda, kan dipapu poipkunerume. Ware keca deiyo tep, kandi ne ateng koupra kan nai bo karepkamnetum do? Telep ngeda, kan dipapu popnetume,” Dauddi Yonatan tep pepu.

9Upepupa, Yonatandi tamupra pepu. “Gume angeda pio men kupkamne. Ne nai bodi, kan tep ‘Daud popkamne,’ konum tenepkere pangeda, kael kepnedi, men pepketene do? Ange konum kael keptenyopda, tek sisi konum pepketene,” pepu. 10Upepupa, Dauddi, “Kan nai bodi, kan tep yu upu deiki di pepkeryopda, ware ngebodi ne damai yan pepnetu do?” pepra asipetepu. 11Upepupa, Yonatandi, “Ne kabo yarume, nun butene bura mutu kikiman benkuneme,” pepupa, sun bura saka berei.

12Bura mutu konum berei dingeda, Yonatandi Daud tep pepu. “Nun nai bo Allah er si Yahwehdi, nun Israel nesala pio kalekra melimserure. Er dinmasera cadi, er si deiki di pepkene. Tumi butene ton konum kupre pangeda, akunmap ketengto konum kupre pangeda, ne nai bo tenere keca konum kael kepkamane. Erdi kan tep, telep kange doupyopda, ne tek sisi upu doproipkamakene.

13Dinino, ne nai bodi, ‘Daud popkamne,’ tupa teneprepa kael kepnyopda, ne tek sisi lape pepkenedi, telep kupra men popketengaipu dokotepkamakene. Ange men kupnyopda, nun nai Allah ila di wenepnetudi, pio ikin keca ne nong deiki deipkamnere. Dinino, ne putapner ngeda, pepkukene. ‘Allah er si Yahwehdi kan tep pio weika di melimkamker’ tenen, Allah moronkamkene. Ada, pumun taru Allahdi ne nai bo tep, weika di meliamutopu, ukutaruda, kan Daud tep ‘Weika di melimkamkere’ tenen, putanerure.” Yonatandi Daud tep pepu.

14Upepudi aupu ton dukdongopra pepu. “Allahdi pio melimkamker dinin, yuk nengdi ne ton popnenung tenen, moropkene. Ada, Allahdi nun tep, tamna gum dipapu, bicau teneseredi, pio telep kupra melimserurtopu, kandi ne tep, ne gam kunkamne taru yuma, kandi kange deipnememdi, pio melimkamnerume.

15Tonda, angetopu, kandi ne ner cap, ne nyapu cap, ne bungsilip yuma tep nengeda, telep kange deipra pio melimkamserume. Ne kangeda, amenda taru Allah er si Yahwehdi, ‘Daud poptepe’ tenenge nesala yuma tep, wenepra poptapkamre. Anesala popredi gawal dakre pangeda, tuai mutu ban-ban yuma kunge nesala pio gum kupkamenge. Ataru peda, ‘Ne bungsilip tep, tupa melimkamserume’ tenen, moropkene,” pepra Yonatandi Daud tep moropu.

16Yonatandi aupu pepra moropka deiki di, Daud er yala neng yuma tep nengeda, pedina upu pepra deipu. Tonda, Yonatandi pepu. “Nun nai Allah er si Yahwehdi ‘Daud er podan neng yuma tep wenepra poptapkamre’ tenen, Allah moronkamne,” pepu. 17Tonda, Yonatandi Daud tep bicau teneramudi, kange deriramnga cadi, Daud tep moropu. “Kao men taruda, kandi pedina upu pepra deipnemum ngeda, kange di ton cap aupupu pepra deipnerume,” pepra moropu.

18Upepu dingeda, Yonatandi Daud tep pepu. “Ambutumida, war tengdongon mi konum yaryopda, ila kailya kalepkamepe. Kailya kalepra jen jenkamap taruda, kan bungrumai men bukamarema tep, akati nengdi kael kepmengedi, ‘Daud dan do?’ pepra, asipetepkamkenge.

19Atep, alukunda cap, ambutumi lukunda cap mapmamemyanen, ue weneri tumi sintarada, aikin keca gonga kepkeu taru bena inipmamumaipu ka tamupra benkurume. Amutuda ila gel er si Ezel buku gel damai bena, apu inipkamarume. 20Ukupmamempa, nedi mare weneri agel damai dopkamane. Ada, ‘Akapmar keca dan cei dopkun’ tenen, pirirtererameptopu, mare dopetepkamne.

21Ukupnedi jen tapu dipra dopne pangeda, nedi tenpu mi tep upepkamne. “Kanda ne dopmane marda, erbenkurume,” pepra doproipkamane. Ukupnepa, ami erberyopda, ne pepkaman upu moupra gekepkamarume. Nedi, ‘Kao ne dopman marda, atara kurura cadi, yambulanun tamupra yamemdi, amar dopra denerume’ pepnyopda, kandi ange tenipkamarume. Ada, ‘E, ukutaruda, ne tamupra Saul ati betene. Sauldi men popkamnere’ tenenkamrume. Angeda tali men pepkene. Nun nai Allah er si Yahweh tek sisi gam kuretopu, neda tek pepkene. Nedi, ‘Amarda atarapu kurure’ pepnyopda, kanda tali kange doupra, Saul ati tamupra yatume.

22Dinino, nedi ami tep, ‘Gume, ne dopman marda, kan kunmaremai dine pera ortara kapmare. Ortara karenai dorbenkurume,’ pepnyopda ange tenepkurume. Ada, ‘E ne adipapu yuk mutu sepdaro benkamane,’ tenepkurume. Aupu pepnyopda, tek sisi ‘Allah Yahwehdi, dokotepnerepa, yuk mutu benkamane,’ tenepkurume.” Yonatandi Daud tep pepu.

23Upepudi, aupu ton dukdongopra pepu. “Tonda, kan cap, ne cap, sisiknemu upu tep nengeda, tupa tenenapu kunkamrume. Nun nai bo Allah, er si Yahwehdi, nun pepdanemu upu gekepseudi, pio moupra dinkamsere. Kan kaele, ne cap, kan capdi aupu pepdanemu. Ada, ‘Tek sisi bicau tenedanume. Atep, nun pio telep kupra, dipru dukdongopra kunkamneme,’ pepra pedina upu deiki di pepdanamnemu. Atep, angeda pio men tapdankamneme,” Yonatandi Daud tep pepu.

24Yonatandi Daud tep ukupra pepka cadi, Daudda bura tara iniprapudi kunmau. Dakunmaupane, amenda taru war tengdongon taru konum kupupa, ila kailya kalemami tumi konum kupu pangeda, Raja Saul cap, er nyapsilip cap, ‘Jen jepkup’ tenen, er ati pumbon yana kikiman bukmai. 25Saul bukamotopu, akati dela dam bukmau. Er mi Yonatanda, er urasin tara bukmau. Tonda, Saul er jen deiyo ngebo Abner, Saul damai bukmau dinino, Daudda akati men yaua tep, Daud bungamngaida, gopu kupu.

26Sauldi ange epu dinin, atumida upu men pepu. Erdi utenepu, ‘Gume, Daud men yanmara deiyoda, Allahdi, ‘Akecada talena meme,’ peamseu keca, mali keca mangkau di bepka cadi, erdi ‘Ne mali kunmana tep, aneng cap kikiman jen men jeptene,’ tenepmara cadi, men yare.’ Sauldi angepu tenepu. 27Utenepu dinin, mapmaiya berekuopda, ila kailya kalemami war tengdongon taru dinin, ue butene tumi konum kupupa, ‘Jen jepkup’ tenen, sun yuma akatipu kikiman bungbenmai taru peda, Daud men yaupa, er men di bungamngaida gopu kupu. Ukupu pangeda, Sauldi er mi Yonatan tep asipetepu. “Ne mio, Isai er mi Daud, ware keca deiyo tep jen jena taruda men yanmar do? Ambutumi cap, atumi capda, akati men yanmare. Warya tep do?” pepra asipetepu.

28Asipetepupa, Yonatandi Saul tep inimna upu deiki di pepu. “Gume naio, Dauddi, ‘Uo, kandi telepe pepnemempa, ne mutu Betlehem mutupu tamupra betene’ pepra, pio pe deipra moropneu. 29Dauddi upepneu. ‘Nun nai Allah gispal dona tep, ne yala neng yumadi, gam keca popnedi, Allah tep karepkamenge. Ukupkamenga cadi, ne du bodi, ‘Kanda adipapu yarume,’ pepneu. Ange tep nengeda, kandi ne tep telep tenepnemem dingeda, ‘Daberume,’ pepnememnyopda, nedi ne du yape dirbenkamane,’ pepra moropneue. Moropneupa, nedi, ‘Telepe dabenkamarume,’ pepsipa, beu. Beua tep, ne nai Raja Saul, Dauddi, kan ati men jeryanmarada, deiyo konum lap pepkene,” Yonatandi Saul tep pepu.

30Yonatandi upepupa, Saulda yu weik kupupa, mali kange doupudi, Yonatan tep upepu. “Ne upu yanitamna ner, tonda mali kun nerdi deipkeua cadi, kan peda pio mali kuna ngebo kurume. Nedi kan tenerum keca men kael keamkesi do? Gume, ne kaele. Isaidi deipu mi Daudda, kandi ne tapra, Daud tep konum bicau teneremdi, er tara konum kepropmume. Ukupmuma tep nengeda, ali dangkamreme. Tonda, akupmuma deiki di, kan deipkeu ner ton ali dangkamre.

31Ne tek sisi pepkene. Isai er mi Daud tuai mutu neitamai tupa gam kunkamre taruda, amutu nengdi kan tep men ereipkamkenge. Tonda, kandi amutu yuma talepra nimi deiyo ngebo Raja pio men kunkamrume. Dauddi yo punupkamkera tepa. Atep nengeda, Daud tamopmemdi ne damai duyankamnerume. Angeboda adipapu poptapkamne,” pepra yu di pepu.

32Upepu pangeda, Yonatandi tamupra pepu. “Gume naio, Daudda, ware keca tep er popmempa depkamre do? Dauddi ware mali kun keca kupka deiki di wenepra poptapkamrem do?” pepra er nai Saul tep asipetepu. 33Asipetepupa, Sauldi er lyom co takke, er si tombak doprapudi, ‘Ne mi Yonatan popkun’ tenen, Yonatan damai dopudi, popmanto kupu. Ukupka deiki di, Yonatan kael kepu. ‘Gume, tek sisi ne nai bodi, ‘Daud popkamne,’ tenerure.’ Yonatandi ange betapra tenepudi kael kepu.

34Kael kepudi, yu weik kupu pangeda, akati taprapudi akeca-keca yuma jena gum dipapu tapra beu. Atep, ukupu war tep kailya, ue butene tumida, sun cap kikiman men jepu. Deiyoda, er nai bodi Daud tep, pio mali weik pepmaua cadi, mambul kange doupudi, ali kupupa, bendopu. Ada, ‘Ne nai bo Sauldi Daud popkamre ngeda, warya tep do?’ tenen, dipru pu jepupa akati tapra beu.

35Ukupupa, mapmaiya bereku pangeda, ipna taruda Yonatandi, ‘Daud cap, ne capdi, antapkaneme peipnemutopu, kupkamnem’ tenen, Daud bura mutu inimbenamngaipu benmau. Yonatandi, yambul mi tenpu er melimna tep dopropupa, bura berei.

36Yonatandi ami tep upepu. “Kanda sepdara bememdi, ne dopkun mar yuma erbenkurume. Epmemdi bulupra denkunerume,” pepu. Upepupa, ami sepdara benmaupa, Yonatandi mar tenpu dopupa, ami benmauai giso deiki tara dourbeu. 37Mar dopmaupa dourbenmauai baupane, amida amar damai benmaupa, Yonatandi ami tep ila upu di pepu. “Adopmanu marda, kan tekmaremai dortara karenai dourbenmaue tenepmane,” pepu. 38Upepudi, menmena di aupu ton pepu. “Uda menmena sepdara berume. Men tapkurume, sepdara bankurume,” pepu. Yonatan dopmau marami douprapudi, ka tamupra er deiyo ngebo Yonatan damai yau.

39Yonatandi aupu pepu ngeda, ada Daud tep pepu dinin, amida ange yuma men tenepudi aupu deiyo men kael kepu. Daud cap, Yonatan cap, sun butenepuda aupu deiyo konum kael keprei. 40Ayambul mi, Yonatan damai tamupra yaupa, Yonatandi ami tep, er jen cap, mar cap karepudi, pepu. “Ukuda akeca dopra nimi ati tamupra berume,” pepu.

41Ami konum beu pangeda, Daudda er inimbenamngai, ila gel utara di tekrou. Tekra, Yonatan damai yau dingeda, Yonatan gispal dona tep, giso genepdongopra gutam tu dipdongopu. Angeda ue weneri deiki di, ka di ton cap kupu. Ukupupa, Daud cap, Yonatan cap aso lulakra mutudanmareidi, engedanmarei dinin, Daudda ila weika di engenmau.

42Ukupra ange konum mutupdareidi, engepdarei dingeda, Yonatandi Daud tep pepu. “Telepe, ukutaru telep kange doupra dabenkurume. Kan cap ne cap, nun nai bo Allah er si Yahweh si deiki di konum pedina upu pepdanumu. Ada, nun telep kange deipdanemudi, pio dipru dukdongopra telep kupra kikiman kunkamneme pepnemu.

Tonda, Allah Yahweh gekeseredi, pio dinkamsera cadi, nun pepdanumu upuda er kaele. Kan cap, ne cap, tonda kandi deipmempa dadeipdanen bankameng nesala pe, ne yala nesala peda, Allahdi ‘Sun pepdarei upuda tupa kunkameng do?’ tenen, pio dinkamsere. Erdi melimserepa, ange tupa kunkamneme,” Yonatandi pepu. Upepu pangeda, Daud adipapu yuk mutu bendopu dinin, Yonatanda ka di ton cap nimi ati tamupra beu.