1Sa 21 | XteSC | STEP | Daud adipapu Allah er si eremna ati pumbon pel don ngebo, er si Ahimelek, Nob mutu kuramngai beu. Ukupu pangeda, Ahimelekdi Daud epka tep, lukdaudi gupsaka, Daud damai yaudi asipetepu. “Kanda ware keca deiyo tep kan pe yuk yarem do? Nimi ton men melipmakengada, warya tep do?” pepu.

1 Samuel 21

Daudda Nob mutu beu upu

1 Daud adipapu Allah er si eremna ati pumbon pel don ngebo, er si Ahimelek, Nob mutu kuramngai beu. Ukupu pangeda, Ahimelekdi Daud epka tep, lukdaudi gupsaka, Daud damai yaudi asipetepu. “Kanda ware keca deiyo tep kan pe yuk yarem do? Nimi ton men melipmakengada, warya tep do?” pepu.

2 Upepupa, Dauddi tamupra Allah er ati pumbon pel don ngebo Ahimelek tep pepu. “Neda nun ila nimi deiyo ngebo, Raja Sauldi ne tep mambul upu karepneudi, upepneu. ‘Yuk neng gekenai ton aupu cap, nedi peipkenepa, pel donkamremnge cap tep, lap pena gume. Inipra bena pel dopkamrume,’ pepneu. Ange tep nengeda, talipu doproipneupa, ‘Kan tenpu tep, epdankamnem’ tenen, yanmane. Ne melimna neng ton kan damai kikiman men yanmape. Ne melimna neng tep, ‘Sunda ormutu bena dakunmarumpane, amenda taru ne yankamne. Ormutupu antapkamepe,’ pepsi,” Dauddi pepu.

3 Upepu dingeda aupu ton pepu. “Ange tep, wareto jen keca akwapmaker do? Akapyopda, jen keca roti pamu bari karepkunereme. Ange men kapyopda, ware keca do, akaprengepu karepneo,” pepu. 4 Dauddi upepu dinin, Allah er ati pum pel dona ngebodi pepu. “Ataru neda roti kwaneng talinge ton, pio men deipmane. Allah er karenange tep, er ati pumbon derinup rotipu ton akapmarada doproptume. Dinino, kan melimna nengdi, kapul yanmarum taru ner cap konum mapmengopda, aroti men jeptenge. Ware kuprap taru neitamai di, ner cap men mapmengopda, aroti jeptenge. Kan nyapuda moupkamnunge. Angeda, menop taru Allahdi peipseutopu tep pepkene.” Ahimelekdi Daud tep pepu.

5 Upepu pangeda, Dauddi tamupra Allah er ati pumbon pel dona deiyo ngebo, Ahimelek tep pepu. “Teka angeda konum tenepmane. Uda nundi yuk nesala porbana tep, bankunup taru yumada, ange utopu kunupe. Nerapu cap tonpa men manupe. Ange utopu, Allahdi, ‘Ne damai yakana cap, ne mambul pel dona cap tep, men kunkamrum ngeda ace, ace,’ peamseutopu, kunupe.

Nundi tupa-tupa nun nong tep kalekdape pangeda, ne cap, ne nyapu cap teleppu kunupe. Ange utopu, ne nyapuda, Allah er mambul pel dona gum taru dinin, tali pel don taru peda, ange utopu kununge. Ne jen neng, sun keca cap, sun nong capda, teleppu kununge. Tonda, atumi ngeda pio mambulnge cadi, tali-tali men kuptepe, teleppu kunupe,” Dauddi pepu.

6 Dauddi, aupu pepka tep nengeda, Allah er ati pumbon pel dona deiyo ngebo, Ahimelekdi, Allah er gispal dona tep karen roti kwanengda, Daud tep karepu. Ada musum tep gume. Atumida, tali roti kwaneng ton men kupmaua tepa. Tonda atumida, ‘Allah aca kurure’ tenen, derirami roti kwanengda, Allah er karena ati pumbon di Ahimelekdi dopropmau ngepu kupmau. Angeda, men di deipungepu dopropmaupa, aroti pununa tep, sun yuk nengdi ukupunge dapra keteneipmangu ngepu, punupipa akati pumbon deipu.

7 Uda, Daud cap, Ahimelek cap upu sisikmarei tumida, yuk ngebo er si Doeg ton epudi gekepu. Angebo er mutu sisada Edom mutu. Tonda, Raja Saul er nyapu peirami domba bisam kalengami neng, sun deiyo ngebo kuramu. 8 Dauddi, angebo Doeb epu dingeda, imam Ahimelek tep upepu. “Kao, nimi pona tep, lyom co takke akwapmaker do? Agum dingeda, nimi pon parang ya akwapmakerpa men karepnetum do? Ne deiyo ngebo Raja Sauldi doproipneu pelda mambul weik cadi, ‘Adipapu kan damai menmena yankaman’ tenen, ne benkosi taruda, ne parang ya cap, tonda yuk nimi porbana tep doupra banup keca ton arup taru me dopra yanmanua cadi, ukutaru akeca yuma men kwapmanere.”

9 Upepu pangeda, imam Ahimelekdi Daud tep upepu. “Gume, yuk parang ya men kwapmaner dinin, Filistin yala ngebo, ila lyom cap, puto weik cap kuramu ngebo, er si Goliat er parang yapuda, akwapmare. Angebo Goliatda, kandi menop taru, Ela banai bena angebo popmumpa, er parang ya dopropsidi, lyom opkal di getepra mawa deipsi. Aparang yada, ortara efod iriamu tara mawa deipsipa, tupa akwapmare. Angeda, putapreyopda, angepu dopra betume. Yuk parang ya ton aca men kwapmara tepa,” Ahimelekdi Daud tep pepu.

Upepupa, Dauddi, tamupra pepu. “Gume aparang yapuda telepe pua. Yuk parang ya ton weike akwapmar dinin, angeda ila mambul weiknge cadi, Goliat er parang yapuda, karepkunerume,” Dauddi pepu. Upepupa, Ahimelekdi akeca karepu.

Daudda Samuel damai di, bura saka beu upu

10 Upepu pangeda, Daud ataru dipapu, bura saka sepdaro, Gad yala nesala sun deiyo ngebo, er si Raja Akhis damai beu. 11 Daudda, Raja Akhis damai konum beu pangeda, er pel don nengdi Akhis tep pepi. “Ada, Daud er pe mutu neitamai nimi deiyo kepu ngeboda, ayanmar do?” pepra asipetepi. Tonda, sun nerapu yuma, mut semaiya deiki di, Daud er tep upenmai. “Saulda, nesala denge weik, sepuluh ribu (10.000) neng atonun poamu dinin, Daudda nesala denge pio weik beratusan ribu (100.000 lebih) neng poamu,” pepra, mut penmai ngeboda, er akonum do?” pepi. 12 Aupu pepra, Akhis mutu nesala sun deiyo ngebo tep Raja Akhis asimai taruda, Daud gekepudi, ‘Angeda Akhisdi ne tep ware pepkamner do?’ tenen, dipruai dapu tenenmaudi kwaredanmau.

13 Daudda kware kuramnga tep nengeda, ataruda Daudda, nesala weik kunmayai embanmau dingeda, mutana taleamre ngebodi kuramretopu, kuptapembanmau. Ukunmaua tep, ‘Er nongda, dim peptu’ tenen, yuk nengdi talepetepmai dinin, nimi kange dumsisinge doupmengedi kurameng neng utopu men kupmaudi, mutana neng men kange douramengtopu kuptapra embanmau. Ila kota dopra, kurami ati arum neitamai wengbana tep bisi buplan dam tekrapudi, buplanpu giringmau. Tonda, ukunmaudi ul me meda, kau keptapmaupa, bana potong deiki di duldul pea sangmau. 14 Ukunmaupa, Raja Akhis epudi, er pel dona neng tep pepu. “Sunda men kaelkepmarum di, mutana talepmau ngeboda doupra, aca duyanmarum do?” pepra asipetepu. 15 Er autopu wisi yung gum nengda, amutu neitamai, ton men kunge atep, amutuna ngeboda, ne ati duyanmarum do?” pepu.