1 Samuel 22

Dauddi, ‘Ila nimi deiyo ngebo, Raja Sauldi popnerur’ tenen, gil imir pumbon inimbeu upu

1Ila nimi deiyo ngebo, amenda taru Raja kunkamu ngebo Daudda, mutu si Gat mutu kuramnganen, amutu tapra, Adulam mutu damai gel imir pumbon inimbeu. Ada, ‘Raja Sauldi popnerur’ tenen, inimbeu. Ukupu taruda, Daud er du yapu sisa cap, tonda, er nai er bungsilip yuma cap gekepidi, Daud yan inipra kunmauaipu sun yuma er damai bei. 2Tonda ataruda ikin kange douami neng cap, tonda ‘Raja Saulda nun songe,’ teneramidi, mali kange dourami neng cap, yuk neng co bo weik ke dorami dinin, ka tamupra men punupmanto neng cap, sun yumada, Daud er tamna keproami. Ukuramipa, Daudda sun deiyo ngebo kuramu. Sun aneng dengeda, empat ratus neng (400) kurami.

3Daud agel imir akuramngane tapra, Moab tara neitamai dinin, Mispa mutu beu. Konum amutu beu dingeda, Moab mutu talepra kuramnya deiyo ngebo, Raja Moab tep benmoropudi pepu. “Naio, kandi ne nai cap, nanin cap, kan talepmum mutu ayana kuretenge do? Kan mutu neitamai akuramrengepane, Allahdi ne melimna tep tenepneu ngeda, ‘Wareto kupkamner do?’ tenen, kael kepnyopda, sunda ne damai tamupra yaretenge. Ange tep yan moropkene,” Dauddi Moab mutu taleamu ngebo tep pepu.

4Konum bena moropu pangeda, Raja Moabdi, ‘Telepe, amutu kunkamrenge,’ pepka cadi, Daud tamupra beu dinin, er nai cap, er nin cap doupra, Moab mutu nimi deiyo talepra kuramu ngebo damai deipupa, sun tonpa kurami. Daud tupa gel imir pumbon tamupra yan kuramu taru yumada, er nai cap, er nin cap Moab mutu neitamaipu kuramrei.

5Daudda tamupra gel imir pumbon beudi, ukuramupane tenpu tumi ton, Allah er upu lap pena ngebo, er sida Gad, Daud damai yau. Yau dingeda, Daud tep upepu. “Kanda gel imir pumbon akuna gume. Adipapu Yehuda yala neng sun kunge mutu benkurume,” pepupa, Daud adipapu Keret mutu co palpal neitamai inimbeu.

Nimi deiyo ngebo Raja Sauldi, Allah er upu lap pena neng, Nob mutu kurami imam neng popka tep upu

6Uda, ton nengdi kael kepidi, “Daud cap, er melimna neng cap, sun inipra kungaida konum epmape,” pepi. Upepra lap pepipa, Raja Saul ton gekepu. Aupu gekepu taruda, Gibea mutu deiki dinin, co si Tamariska co amu bukmaudi, nimi pon co takke doupra bukmau. Er bukmauai dan-dana tara, er amutara pel dona deiyo nengdi ongomgenem pepmaidi gekenmai.

7Sun yuma er upu gekepi pangeda, Raja Sauldi er amutara pel don neng tep upepu. “Sun Benyamin yala nengo, ne pepkusen upuda moupra gekepkurume. Isaidi deipu mi Daudda, angebodi sun yuma tep, wa bun cap, anggur wa cap yumada, talipu karepkamser do? Tonda Daudda, ila nimi deiyo ngebo Raja keptuopda, erdi sun tep erepra deipserepa, jen neng talena deiyo neng kunkamrum do? Sunda, jen neng denge weik seribu neng talepra jen deiyo neng kunkamrum do? Ton nengda, jen neng denge weik seratus neng talepra jen deiyo neng kunkamrum do? Sun yuma tep, jen deiyo neng kemna tep erepra deipkamser do? Ne kangeda, gume, ange men kupkamre tenepne.”

8“Sunda, ‘Dauddi nun yuma ila jen talena deiyo neng kupra deipkamsere’ tenenmarumdi, ne tep yanipkamnerum do? Sun yumadi, ‘Raja Saul yanipkamepe’ tenen, ange sisingmarum di do? Ukunmaruma cadi, ne deipsi mi Yonatan cap, Isaidi deipu mi Daud capdi upeprei. ‘Nunda telep kupra kikiman kunkamneme. Nun men podankamneme,’ pepra deipdarei ngeda, tenpu ngebo pe ton ne damai men lap peryakanerume, tenepne.

Tonda, ‘Nun nai bo Raja Saulda, ikin kupkamre do, wareto kunkamre do,’ tenen, moupra men tenerume. Ange utopu, ne mi sisi Yonatanda, Daud er tamna kepudi, ‘Daud kandi ne nai Saul popkamrume,’ pepra upu sisikrei ngeda, men lap peipnerume. Ukutaruda Daud, ne melimne ngebo kuramu dinin, erdi ne popkamnera tep kalengnerure. Ange peda sundi men lap peryakanerume. Sun kan-kanda tenpu ngebo pe ton, ne damai men peryakanerume. Ukuruma deiki di, ne peipmane upuda bisbisapu kamnerume.” Raja Sauldi er amutara pel don neng tep pepu.

9Upepu taruda, tenpu Edom yala ngebo, er si Doeg, erda Saul er amutara pel don neng kan-kan abena tekmauadi, pepu. “Naio, Isaidi deiamu mi Daudda, epsi. Er Daudda, Ahitub er mi Ahimelek, Nob mutu kuryai yaupa, epsi. Ahimelekda Allah er upu lap pena ngebo kurure. 10Dauddi moropupa, angebo imam Ahimelekdi, Daud er kunkamunge makuna tep, Allah er si Yahweh tep, ‘Daudda ware kupkamre do?’ tenen, Allah moropu. Ukupu dingeda, Daud er bisi ban taru tep jen keca karepu. Angepu gum dinin, tonda pumun taru Dauddi Filistin yala ngebo, nong puto cap, nong ila lyom cap ngebo Goliat pomngada, er douramu lyom parang yada, Ahimelekdi aparang doupra Daud tep karepu. Ange ton epsi,” angebo Doegdi Raja Saul tep pepu.

11Angebodi upepu pangeda, nimi deiyo ngebo Sauldi er nyapu tep pepu. “Bemumdi Ahitubdi deipu ngebo Ahimelek, ada Allah er si eremna ati pumbon pel don ngebo, er cap, er nai bo bungsilip cap, sun yuma dopra ne damai duyankurume. Aneng yumada, Allah er si eremna ati pumbon pel don neng, imam neng kununge.” Upeipupa, er nyapudi bena peipipa, aimam neng yuma gekepidi adipapu Saul damai yai. 12Konum yai pangeda, Sauldi aneng tep asipetepudi pepu. “Ahitub deipu mi Ahimelek, kanda ne pepkuken upu gekepneo,” pepupa, Ahimelekdi, “Jo ne deiyo ngebo, ne gekenaipu kan tenipmarem upu peipneo,” pepu.

13Upepupa, Sauldi, Ahimelek tep pepu. “Kanda, ware keca deiyo tep, Isai er mi Daud cap, kan cap, ‘Saul yanipnemedi popkamneme,’ tenen, upu sisingamnerum do? Ukupmumdi Daud er bisi bana tep jen keca, roti kwaneng cap, nimi pon keca parang ya cap, karepmumada warya tep do? Tonda, kandi Daud er amenda kupkamunge tep, Allah moropmum do? Ukupmaruma deiki di, ukutaruda Dauddi ne upu yanitamneredi, ‘Saul popkamne’ tenen, kalengnerure. Ukupmumada, ware keca deiyo tep do,” pepra, Sauldi Ahimelek tep wenepra asipetepu.

14Upepra asipupa, Ahimelekdi tamupra pepu. “Ne deiyo ngebo Raja Saul, ne kangeda, kan amutara pel don neng weik dakunung dinin, tek sisi pio telep kure ngeboda Daud pua. Dauddi, kan tep yanipra men tapkamkere. Yuk nengdi ukuptenge dinin, Daudpuda men taptue. Erda kan yamal bo kukerure. Tonda, ‘Yuk mali nengdi, kan popkenung’ tenen, kalengna jen neng, sun deiyo ngeboda, Daud akurure. Kan bungsilip kan-kanda, pio telep neng weik dakunung dinin, yuk neng yumadi, ‘Erda ila mambule, pio telep ngebo,’ tenenung ngeboda, er Daud pua.

15Kandi pepmaneremtopu, teka nedi Daud, er kunkamrenge tep Allah moropmasi. Dinino, angeda atumipu men kupmasi. Ne men di kuramsitopu, atumi peda er makuna tep, ‘Daud er kupkamre ngeda, Allahdi lap pepkamner’ tenen, Allah moropsi. Naio, yuk-yuk taru ton kuramsitopu, ataru peda ukupsi. Atep ne deiyo ngebo, yuk nengdi kan pona tep upu sisingnung do, gum do? Apepmakengpa gekepmarem ngeda, pio ne walwale.

Ange yumada ne cap, ne bungsilip cap nun walwale. Neda kan amutara ngebo kununa cadi, ne cap, ne nai er bungsilip cap, nun yumada, akeca yuma tep men gekepra kael kepmepu. Nun cap, Daud cap, kan yanina tep, mali upu pio men sisikmakepu. Nun gume. Atep, ‘Sunda mali kweipmanurume,’ pepra, men pepkuserem tenen, moropkene naio.” Ahimelekdi Saul tep pepu.

16Ahimelekdi Saul tep upepu dinin, nimi deiyo ngebo Raja Sauldi pepu. “Gume, upeprem dinino, Ahimelek, kan cap, kan bungsilip cap, kan nai bodi deiamu neng yuma capda, poptapkusene,” pepu. 17Upepudi, nimi deiyo ngebodi er nyapu jen neng damai awekmai neng tep, diudi pepu. “Allah Yahweh, er si eremna ati pumbon pel dona deiyo neng, awekmanga yuma popso. Sunda ne pona tep, Daud cap sisingnenung neng adano. Tonda Daudda, ne damai tapra sepdaro bendopu taruda, aneng konum kael kepi dinin, sundi iniptapidi, men lap pepneiya tep, aneng poipneso,” pepu.

Sauldi upepu dinin, er amutara pel dona deiyo neng cap, er jen neng cap, er pepmau upu gekepi dinin, Ahimelek cap, er bungsilip yuma cap men poptapi. Ada, ‘Gume, Allah Yahweh, er si eremna ati pumbon pel don neng, nun men poptepe’ tenen, kware kupka cadi, men popi.

18Saul er amutara nengdi, aneng men popi pangeda, Sauldi yuk ngebo er si Doeg tep pepu. “Kandi, Allah, er si eremna ati pumbon pel dona neng yuma poipo,” peipupa, Edom mutu ngebo Doegdi, tamuprapudi aneng yuma poptapu. Atumi Doeg cap, er melimna neng cap, sundi popi neng dengeda, delapan puluh lima (85) neng popipa depi. Sun anengda, Allah er si eremna ati pumbon pel dorami neng cadi, sunda pio lek kurun opkal, er si efod opkal kemami.

19Angepu gum dinin, tonda Doegdi peipupa, er cap er nyapsilip capdi, Nob mutu kurami nesala yuma peda poptapi. Ada, Allah, er si eremna ati pel dona neng ton kurami dinin, ange tenena gum dipapu, aneng cap, sun nerapu cap, sun nyapu cap, milo nyapu cap, sun peirami keca domba bisam cap, sapi cap, keledai bisam cap, ange-ange yuma poptapidi gawal daki.

20Aneng yuma poptapi dinin, Ahimelek er mi Abiyatar puda, adipapu bura saka beu. Ada Daud koripu menmena beudi, Daud tara kepropu. 21Beu dingeda, adipapu Daud tep, “Raja Sauldi peipupa, er nyapsilipdi, Allah Yahweh, er si eremna ati pumbon pel dona deiyo neng, weika di konum popmangdi gawal dakmangpa peryakene,” pepu.

22Upepupa, Dauddi Abiyatar tep pepu. “Uo, tek sisi pepreme. Men taruda, Ahimelek cap, ne cap, upu sisiknemu tumida, Edom mutu ngebo Doeg ton dinmaseupa epsi. Angebo epsi taruda konum tenipsi. ‘Angeboda, tek sisi Raja Saul damai lap perbankamre ja’ tenepsi. Utenepsi dinin, angebo men tomopsa cadi, kan nai bo Ahimelek cap, er bungsilip yuma cap, Sauldi peipupa poptapmanguada, deiyo ne ca. Atep nengeda, sun apopmangpa depmang neng yumada, sun yapi ne nong deiki kwapmanere. Atep nengeda, nedi sun tep yuk taru kwangdangkamne,” pepu.

23“Ukutaruda, kandi diman telep duyanereme cadi, kanda kware kupkerepa bana gume. Nun tonpa kunkamneme. Sauldi kan tep, ‘Angebo poptene’ tenen, kan enmakere. Ange utopu, ne tep ton, ‘Angebo popkun’ tenen, enmanere. Atep, kan cap, ne cap kikimanpu kunkamepe. Ne damai yarem ngeda telep kupreme,” Dauddi pepu.