1Sa 23 | XteSC | STEP | Tenpu tumi ton Daud gekenmauai upepi, “Filistin yala nesaladi, Kehila mutu nesala poprapmengedi, sun gandum yanipra taikmengedi mawa derinung nge yumada, dalopra doropmange,” pepi.

1 Samuel 23

Dauddi Kehila mutu nesala lyepra deipu upu

1 Tenpu tumi ton Daud gekenmauai upepi, “Filistin yala nesaladi, Kehila mutu nesala poprapmengedi, sun gandum yanipra taikmengedi mawa derinung nge yumada, dalopra doropmange,” pepi. 2 Aupu konum gekepu dingeda, Dauddi Allah tep upepu, “Ne adipapu Filistin nesala porbetene do?” pepra, asipetepu. Upepupa, Allahdi, “Jo angeda kuna telepe. Kandi Filistin mutu nesala bena popbisipmemdi, Kehila mutu kunung nesala tep, lyepra deipkurume,” pepu. 3 Allahdi Daud tep upepupane, Daud er nyapudi tamupra er tep pepi, “Filistin nesala porbenkamap dinin, nun pe akunup mutu neitamaida, Yehuda yala nesala tep, yambul kwardangna pu kunup dipapu, Filistin mutu neitamai Kehila mutu kunung nesala porbenterepmepepa, kware pio weika di kunkamepe,” pepra asipetepi.

4 Upepya tep Dauddi, “Allah er dipapu ukupkurume-ukupkurume,” pepra, ‘Peterepnetu’ tenen, moropu. Moropupa, Allah Yahwehdi upepu, “Kan kange bongtona gume, adipapu Kehila mutu benkurume. Nedi kan deiki di puto karepkenepa, Filistin mutu jen talena neng yumada, popra gawal dakamareme,” pepu. 5 Upepu pangeda, Daud cap er melimna neng cap, sun yuma Kehila mutu beidi, Filistin mutu jen talena neng yuma bena popra gawal daki. Ukupidi, sun amutu nesala peirami gam keca yumada, dalopra doropi. Ukupi deiki di, Filistin nengdi, Kehila mutu kurami nesala tep, bisbisa kapra taleami dinin, ataru dipapu, Dauddi Kehila mutu nesala yumada lyepra deipu.

6 Amenda taruda, Abimelek er mi Abyatarda, ‘Dauddi, ne melipra kalengneredi, melimkamner’ tenen, Daud damai sepra yau. Erdi Kehila mutu yau taruda, imam nengdi, sun taram deiki kenengami opkal, er si efod cap doupra yau. 7 Daud cap, er jen talen neng cap, Kehila mutu bei taruda, yuk neng epidi, Saul damai bena, Saul tep, “Daudda Kehila mutu kunmare,” pepra lap pepipa, Saul gekepudi, Saul erdi utenepu, “Gume ada, Allahdi, ‘Raja Sauldi Daud poptu’ tenen, ne damai duyanmanere. Tonda, ila ati arum dopra kungedi, ila lyom gat beilya wipra ongopdongopidi, besi keca di buplan moupra betapdongopiai, konum wekra yanmara, cadi, kanam dipapu men sepra bura saktue. Atep, kanam dipapu tomoptenedi, poptene,’ tenepu. 8 Utenepu dingeda, Raja Sauldi, er taleamu mutu kurami neng cap, er kalengna jen talena neng yuma cap tep, “Sun yuma ketenepso. Adipapu Kehila mutu benkupe. Ada, Daud cap, er melimna jen talen neng cap yumada, Kehila mutu kunmanga cadi, bena warekmepedi, popkamepe,” pepupa, sun yumadi er upu gekeprapidi, bulupra yai.

9 Yai dinin, Sauldi, ‘Daud tep popkamane,’ tenepmau ngeda, yuk nengdi Daud damai bena lap pepipa gekepu. Daud konum kael kepu atep, imam Abyatar tep upepu, “Sun imam nengdi sun taram deiki kenengrum opkal, er si efod doupmarem ngeda, ne damai duyarume,” pepu. 10 Akeca efod duyau pangeda, Dauddi akeca doupdi, Allah tep moropudi upepu. “Uo, ne nai Allah Yahweh, nun Israel nesala yumadi, kan tepapu, kan si eremkenupe. Kanda nun Deiyo Ngebo kurume. Ne gekepmanada, Raja Sauldi ne Kan mi tep, ‘Kehila mutu kunmarai di popkaman’ tenen, ketenepra yakanmare. Ne amutu wekra kunmana tep nengeda, Saul cap, er jen talen neng capdi, amutu kunge nesala yuma peda, popbisipredi gawal dakamare. Yuk nengdi, aupu lap pepmangupa gekepmanue. 11 Atep, ne nai Allah Yahweh, kandi nun Israel nesala melipra kalengseruma cadi, kange mun kange doupnedi, moropkene. Aupuda yuk nimidi, ne damai yana pepmanenga tep, angeda tek sisi pepmang do, gum do? Uo, ne nai Allah, ‘Kandi lap pepnetum’ tenen, moropkene,” pepu. Upepra moropupa, Allah Yahwehdi tamupra upepu. “Teka, Saulda bisi neitamai konum yakanmara cadi, amutu yana popbisipterepkamakere,” pepu.

12 Upepu pangeda, Dauddi ton cap Allah tep asipetepu. “Naie, sun Kehila mutu kunge nesaladi, Saul yaryopda, kware kuprepa, sundi ne cap, ne melimna neng cap tep, ‘Sauldi popkamare’ tenen, tapsengedi, Saul tep karepkamaseng do, gum do?” pepra asipetepupa, Allahdi, “Teka ange peda kupkamenge,” pepu.

13 Allahdi ange upepupa, Daud gekepuopda, er pe ngebo Daud cap, er melimna jen talen neng cap, Kehila mutu tapra bendopi. Er jen talen neng sun gungda, denge weik enam ratus (600) neng kunmai. Sun yumada, adipapu Kehila mutu di taprapidi, bura saka yuk mutu benapidi, amutu kunmana tapra, yuk bena kunmana tapra, yukai ton benmana kunupra kemami. Ukupi pangeda, nimidi Raja Saul tep lap pepipa, Saul ange gekepudi, ‘Kehila mutu Daud kunmarai porbenkune,’ tenepmau ngeda tapu.

Daud bura mutu neitamai bena, inipra kuramu upu

14 Daud cap, er melimna jen talen neng cap, konum bura saka benamidi sun yumada, mutu si Zif perami mutu neitamai, gil imir bena inipra kurami. Ukuramu taru yumada, Sauldi, ‘Daudda poptene’ tenen, tumi-tumi yuma, pio epetepra domamu. Ukuramupane, Allahdi Daud dopra, Saul buru deiki men deipupa, men tomopmanto kupu. 15 Ukuamupanen, Daudda, ‘Sauldi popnerur’ tenen, kwar tupa kuramu cadi, tenpu tumi ton Daud cap, er melimna neng cap, Zif mutu neitamai katawaipu dinin, mutu si ton, Hores perami mutu neitamai kunmai taruda, nimidi lap penmai ngeda, “Raja Saul kange di, ‘Daud poptene’ tenen, enmakerdi, amutu neitamai kalengyakanmare,” pepipa, Daud gekepu. 16 Amutu kunmau taruda, Saul er mi Yonatandi, ‘Ne kap sisa Daud cap, ton antapdateneme’ tenen, Hores mutu neitamai, er kuramuaipu beu. Beuopda, ‘Daudda Allah Yahweh tep, teka tenerur ngeda, angepu putoa di talepredi kunkamre’ tenen, Yonatandi, er kabo Daud damai bena, dipru kwadimna upu melipra peramu.

17 Yonatandi Daud tep bena upepu, “Kan kwar kuna gume, ne nai bo Sauldi men epkeredi, tomopra men popkamkere. Ada, tek sisi erdi kan tep, konum kael kepkeu. Israel nesala sun deiyo ngeboda, kan dipapu kepmemdi sun talenkamrume. Ukupmempa, kan amutara melimna deiyo ngeboda, ne kunkamne. Tonda, ne nai Saul ange konum kael keamu dinin, ‘Songe,’ tenerure,” pepra, Yonatandi, Daud er dipru kwadimna upu tep pepu. 18 Yonatandi aupu pepupa ngeda, Daud cap, Yonatan cap, sun butene nengdi pedina upu pepdarei. Ada, ‘Ne cap, kan cap, nunda Allah dinmaserai di, pedina upu konum pepra deipdaneme. Nunda pio melidanapu kunkamneme,” pepra deiprei. Aupu pepreiopda, Yonatan adipapu tamupra er ati beu dinin, Daudda Hores mutu acapu kuramu.

19 Daudda, amutupu kuramupane, Zif mutu nengdi, Saul cap Gibea mutu di antapdaidi upepi. “Naie, Daudda nun tara Hores mutu neitamai dinin, Akhila mutu buma deiki mutu dam, gil imir inipra bena kurure. Er kururaida, Yehuda yala nesala sun mutu deiki tarato, amutuda dapu taruto, (arah selatan) tamna mutu kurure,” pepra lap pepi. 20 Upepi dingeda, aupu ton dukdongopra pepi. “Ada nun konum kael kepkepmepu. Raja kandi Daud tep, ‘Tomopkamne,’ tenepmumdi eruma tep, yana lap pepkepe. Atep, nimi deiyo ngebo kandi, ‘Daud tomopkun,’ tenepmem dingeda nun mutu yarume. Yamem pangeda, nundi Daud tomopmepedi, kan tep karepkamkepe. Ukupkepepa, Daud tomopkamareme,” pepi. 21 Upepipane, Sauldi tamupra, sun aneng tep upepu. “Sundi ne tep weika di melipmaneruma cadi, ‘Allah Yahwehdi sun tep ila di melipkamsere’ tenen, moronkamsene,” pepu.

22 Tonda, sun adipapu tamupra bemumdi, kange di ton cap betapra kael kepkurume. ‘Daudda, dan tamna gel imir pumbon kurur do?’ tenen, epra embenkurume. Tonda, ‘Ware nengdi ton Daud konum epmangue’ tenen, asipetenkamrume. Sundi pepsenge pangeda, Daud tek sisi kurengepu kael kepkurume. Tonda, Daud kureai epra, yana pepseu ngeboda, ware ngebodi yan pepseu do?’ tenen, betapra kael kepkurume. Angeda tali tep men pepne, ne gekenune. Erda ila kael deiki di inipra embaramre ngebo tep pepsene.

23 Atep nengeda, Daud er inipra kurur gel imir yumada, sundi moupra dipetepra dipembemumdi, kael kepmumnyopda, sun adipapu tamupra ne damai peryankamnerume. Yana pepnemum pangeda, sun melipsenepa, ne cap tonpa benkamepe. Ukupmanto, Daud er Yehuda mutu neitamaipu tupa kuramreyopda, amutu nesala pio weik kuramtenga peda, amutu neitamaida, Daud er kururai betapra epembenkamne.” Sauldi pepu. 24 Saul upepuopda, ayanmai nimida Saul er damai di tapra adipu tamupra Zif mutupu tamupra bei. Ataruda, Daud cap er melimna jen neng cap, sun yumada, Yehuda yala nesala sun mutu neitamai dinin, dapu taru utonun, arah selatan tamna, nimi pepe gum mutu katauai mutu, er sida Maon mutu tupa kunmai.

25 Ada, Saul cap, er jen talena neng cap, sun yumadi Daud tep, ‘Kalengbenkamape,’ tenepmai ngeda, yuk nimidi Daud gekenai bena lap pepipa, kael kepuopda, Daud er dipapu benapudi, ila lyom gel mutu dam katauai ada, Maon mutu neitamai kunmau. Ukunmaupane, ton yuk nimidi, “Daudda Maon mutu dam kunmare,” pepra, Saul damai yana pepipa, adipapu Raja Sauldi epra doumbeu. 26 Ataruda, Saul cap, er jen talena neng cap, sunda Maon mutu dinin, atara sirikai di kepra benmai dinin, ataru puda Daud cap, er melimna neng cap, sunda Maon mutupu dinin, ortamna sirikai kunmai. Ukunmaiya cadi, Sauldi Daud cap, er melimna neng cap, ‘Warekdongopra tomopkun’ tenen, konum damai kupu pangeda, Daud cap, er melimna jen talen neng cap, sun menmena adipapu, Saul damai di tapra bendopi.

27 Ukupra kunmai dinino, ataru neitamai dipu, Saul er tara ngebo tenpu, angebodi Saul er damai perbana tep, doproipmaipa, dato-dato di, adipapu Saul damai yana upepu, “Ne deiyo ngebo Raja, kan adipapu tamupra, kan pe mutupu benkurume. Ada, Filistin mutu jen talena nengdi, nun kunup mutu neitamai yanmangudi, warekra ponmasenge,” pepu. 28 Aupu gekepuopda, Sauldi Daud tep, ‘Dombenedi popkune,’ teneapu ngeda, tamupudi, Saulda kange di tamupra, Filistin mutu jen nengpu porbeu. Akupunge tep nengeda, amutu kunmauaida, er si tep nengeda, ‘Daud lyepdapudi bendopunge,’ pepra, si siperami. 29 Ataru dipapu, Dauddi amutu taprapudi, yuk mutu si, En-Gedi mutu bena kuramu. Ada, ‘Nun pona tep nengdi yana popsenung’ tenen, amutu nesalada, menop taru di, ila gel ati arum konum doamyaipu, bena kuramu.