1 Samuel 24

Dauddi, ‘Raja Saul men popkamne,’ tenepu upu

1Uda yuk taruda, Saul cap, er jen talen neng capdi, Filistin nesala podana tep, warekra embaramyane, amenda taru tamupra yai. Yai pangeda, yuk nengdi, Saul tep, “Daudda me cap, nimi cap gum mutu, mutu si En-Gedi mutu kurure,” pepra lap pepipa, Saul gekepu. 2Gekepu dingeda, Sauldi Israel nesala kuramyai kankan, jen talen neng, sun dengeda, tiga ribu neng wepra deipu. Deipudi, Saul cap, ajen neng capdi, ‘Daud cap, er jen talen neng capda, dan mutu kunmang do?’ tenen, bura mutu erbenmai. Amutuda, sun amutu kurami nengdi, ‘Bura mutu jem kambing weik kunung mutu, tonda gel si katuai kure mutu,’ perami mutu, Saul cap, er jen neng cap, amutu welepra Daud tep erbenmai.

3Saul cap er nyapsilip cap banmaiyane, abisi pirmanaida, domba beilya wipdongomnyai bei. Amutu damaida, gel imir ton akamo. Saulda ‘Lin bupnera cadi, lin kurbenkun’ tenen, agel imir pumbon weku. Saul men tenepu dinin, Daud cap, er jen talen neng capdi, agel imir amu sisa konum inipmai dinin, pio pumbon tara kunmaipa, Saul men epu.

4Saulda agel imir wekroupa, Daud er jen talen neng epi dingeda, Daud tep upepi. “Uo naio, nun nai Allahdi menop taru kan tep peipkeu ngeda, ataru konum kupre. Allahdi upepkeu. ‘Kan podan neng dopropnedi, kan damai deipkenepa, pona do, tamna do, kandi tenepremtopu, adipapu kunkamrume,’ peipkeue. Aupu peipkeu ngeda, konuma. ‘Daud popkamne,’ tenekerur ngebo, Raja Saul orkupmar adano,” pepi. Upepipa, Daud bukrou dingeda, upu pena gum, dimpeprappudi, Saul kupmauai bena, Saul opkal sirikai sekra dopropu. Dopropupa, Saul men kael kepka cadi, Daudda er jen neng damai tamupra benmau.

5Daudda, ange konum kupmau dinin, atarupuda, ‘Uo, Raja Saul er opkal sirikai sekropmandi, dopropmanu ngeda, tek sisi mali kupmane,’ tenepudi ikin kange doupu. 6Ikin kange doupudi, er jen talen neng tep upepu. “Gume nun nai Allah er si Yahwehdi, menop taru, ‘Israel nesala sun Raja kupmare’ tenen, Saul wepra deiamseua cadi, Saulda Allah erdi erepra deipu ngebo tupa kurura tep, ne deiyo ngebo kurure. Neda er amutara ngebo kunune.

Ange tep nengeda, nedi Raja Saul tep mali men pepra deiptene. Tonda nedi Saul tep men poptene. Ukupnyopda, Allahdi ne tep wenepkamnere. Atep, Saul er opkal sirikai sekropmanu ngeda, tek sisi mali kupmanua cadi, ‘Allahdi wenepnerur’ tenen, ne mali kange doupne,” pepu.

7Daud aupu pepka deiki di, er jen talen neng tep, “Sundi, ‘Raja Saul popkupe,’ men tenenkamrume,” pepra wenepudi upu sekupa, sundi Saul men popi. Ange tep nengeda, Saul tali mangkau kange douprapudi, lin konum kupu dingeda, agel imir pumbon taprapudi dukdongopra bura ban bisi benmau. 8Bura benmau pangeda, amenda Daud agel imir pumbon di bura beudi, Saul orbenmauai tep, ila upu deiki di upupu. “Raja Saul, ne deiyo ngebo kurume,” pepu. Upepupa, Saul gekepudi, tamupra er amnyo tara diryaudi, Daud tep epu. Daudda, Saul er gispal dona tep, giso tuai genepdongopmaua di pepu.

9“Raja Saul, yuk nengdi kan tep, ‘Dauddi kan tep mali kange dourure. Erdi tek sisi mali kupkamkere,’ pekenung taruda, warya tep aneng upu gekerum do? 10Atumi kan asuru dipapu konum dinmarumdi kael kepmarume. Kanda agel imir pumbon benmaum taruda, nun nai Allah, er si Yahwehdi ne damai karepmakeneupa, ne buru di konum popmaketene dinin, men popmakeneu. Arup taru agel imir pumbon kunmaum taruda, ton nengdi, ‘Konuma, Saul poptaprume,’ pepmaneng dinin, men poptapmakeneue. Nedi, ‘Gume, ne ila nimi deiyo ngebo Saulda, Allah Yahwehdi ‘Angebo Israel nesala talepra sun Raja kunkamre’ teneramudi, Saul wepra ereipka tep, er tep men poptene,’ pepmanue.

11Ne nai Saul kan dinerume. Kan opkal sirikai sekra adoupmaken adano. Kan meneng damai kupmanu dinin, kan nong tep men poptapmakene. Ange tep nengeda, moupra tenepmemdi kael kepkurume. Ne tek sisi mali men kweipmakenune. Tonda, kan nun deiyo ngebo kuruma cadi, kan men yanitamkenune. Kan amutara tupa kununa pepkene. Nedi kan tep mali men kupkesi dinin, kandi ‘Daud popkun’ tenen, ne tep domembaramnemume. Nedi ‘Ware mali keca kweipkesipa poryakanmanerem do?’ tenen, asipetepkene,” Dauddi Saul tep pepu.

12Upepudi aupu dukdongopra pepu. “Atep nengeda, nun nai Allah, er si Yahwehdi, nun kan-kan neitamai upu bongdinkamsere. Kandi ne tep mali kweipnumumnge tep, Allah dipapu wenepketu dinin, ne pe buru dipapu kan tep men popkamkene. Nedi mali men kweipkamkene. 13Kan kaele, nun apu yapudi pumun taru uperamidi, nun yala neng tupa penunge. “Dipru mali nengdi mali kun kecapu kununge,” penunge. Dinino, ne pe buru dipapu kan tep mali men kweipkamkene. Kan nong deiki ikin keca men deipkamkene.

14Kanda Israel nesala sun ila nimi deiyo ngebo, Raja kurume. Wareto ngebo tep, ‘Popkun’ tenen, yanmarem do? Wareto ngebo tep dombaramum do? ‘Poptene’ tenen, dombaramnerum ngeboda, tali poptapi kam utopu ngebo tenepnerumdi poryanmanerem do? Tonda, nimi giso potong kan-kan jeramre keca kuredi er sida amnye utopu, ‘Pio puto gum ngebo kurure,’ tenepnerumdi yanmanerem do? Gume, neda tali ngebo men kunune.

15Ange tep nengeda, nun nai Allah er si Yahwehdi, kan kurumnge cap, ne kunun keca cap, moupra dipetepseredi, nun upu bongdina deiyo ngebo kuseredi, upu bokeipkamsere. Er dipapu ‘Ange telepe, ange mali,’ tenepredi upu bokeipseredi, pepkamsere. Tonda, Allah dipapu ne kune keca pe, ne kunkamnenge peda melimkamnere. Kandi ne tep, ‘Popkumemene’ tenen, piripetenerum dinin, Allah melipneredi lyemkamnere. Ukupkamnera deiki, yuk nesala yumadi kael kepkamenge. ‘E tek sisi Daudda, dumsisipu kurure. Saulpuda mali kuramu’ tenen, kael kemkamenge.” Dauddi, Raja Saul tep pepu.

16Dauddi Saul tep aupu yuma konum pepra sengpepkopda, Sauldi Daud tep pepu. “Uo, kandi pepnerem ngeboda, ne mi Dauddi pepmanerem do?” pepu. Upepudi ila upu deiki di engepudi aupu ton pepu. 17“Kanda teka dumsisi kurum dinino, nepuda malipu kunune. Kandi ne tep telep kudiramnemum dinin, nedi kan tep nengeda, mali kudiramkesi. 18Ange utopu ukutaru konum lape pepmanereme. Allah er si Yahwehdi, ne dopra kan damai deipmaneupa, agel imir pumbon kandi adipapu konum poptapmanetum dinin, men popmanereme. Ukunmamuma deiki di, telep kupra deipmanereme.

19Ware neng do yuma, sun podan neng tep, pio erterenmanganen, epmengopda tapmengedi, ‘Tali daberume,’ penung do? Gume, sun podan neng epmengopda, adipapu potamnunge. Ukunung dinin, kandi ne tep, men poptapmanemuma tep, Allah moropkamkene. Ada, ‘Allah er si Yahwehdi, menenga keca karepkamker’ tenen, Allah moronkamkene. Deiyoda, atumida, kandi telep kweipmanerema tep pepkene.

20Tonda, ne konum kael kepmane. Amenda taru, kanda Israel nesala sun ila nimi deiyo ngebo Raja kunkamrume. Ukupmemdi, Israel nesala cap, sun mutu-mutu yuma capda, kandi telep kupra taleamempane, sun yuma teleppu kunkamenge. Yuk nengdi kan tep men bisbisa kapkamkenge.

21Ukupkamruma tep nengeda, ne putanerenge tep, ‘Pedina upu peipkunerem’ tenen, moropkukene. Ada, Allah Yahweh er si deiki di pepkunereme. Nedi deipsipa, dadeipdanen, bankameng nesala yumada, ‘Kandi men popra gawal dangkamserum’ tenen, moropkene. Tonda, ‘Ne naidi deipneupa, nun yala nesala yuma cap, nun yala si cap, ne pe si cap, men kiliptapkamserem’ tenen, moropkene. Ada, kandi ne tep, ‘Sun yala nesala popnedi, gum kupra men deipkamsene,’ pepra, pedina upu pepkunerum tenen, moropkene. Kandi, ‘Angeda men kupkamne. Kan yala neng men poryankamne,’ pepra, pedina upu pepra deipkunerume,” Sauldi Daud tep upepra moropu.

22Ukupra moropupa, Dauddi Saul tep, ‘Allah er si deiki di, angeda tek sisi men kupkamne,’ pepra pedina upu pepra deipu. Ukupupa, Saul tamupra er pe mutu beu. Ataru dipapu Daud cap, er jen talen neng cap, sun inimbenami mutu tamupra bei.