1 Samuel 26

Ue butene ngeda, Dauddi, ‘Saul tep men popkune’ tenen, kaukepra tapu upu

1Tenpu tumi ton Zif mutu kurami nengdi, Saul Gibea mutu kuramngai yana upepi, “Daudda, Yehuda yala nesala, pio katawai tara, Hakhila mutu dam itara dinin, utarada, Yesimon ati arum domyaida, inipra kunmare,” pepi. 2Upepipa, adipapu Saul cap, Israel mutu jen talena neng, pio telep-telep neng sun dengeda, tiga ribu (3.000) jen neng cap melipipa, nimi men kurami katuai mutu, Zif mutu bena, ‘Daud popkupa tep, akunmar do?’ tenen, Daud tep erbei. 3Saul er tenda opkal bol dodina atida, Hakhila mutu dam deiki deipu. Ada, ortara nimi pio men kurami katuai mutu kwamngai deipudi, amutu bana tep, bisi kwamngaida, dinapu kunmau. Ataruda, yuk nengdi, “Saulda kan tep enmakerdi, amutu bisi damai pio enmare. Amenda dumyakanmakerane, amutu katauai apu yana kunmare,” pepipa, Daud gekepudi kael kepka cadi, amutu katauai neitamaipu kunmau. Amutu bana tep bisi damai men yakaramu.

4Yuk nengdi pepi upu gekepuopda, Dauddi, tali kange doupra embanmandi, mipra kael kemna neng ton wepra deipupa, dirbei. Dipra embeidi, “Tek sisi Saulda amutu damai yana kunmare,” pepipa, er kael kepu. 5Ukupuopda, Daud adipapu Raja Saul, er opkal bol dodina tenda ati dam beu. Aca beuopda, Raja Saulda, nimi si Nar, er mi Abner kunmaua damaipu mapmau. Dauddi, amapmau opkal bol dodina tenda atida, epra kael kepu. Ada, sun jen talen nengdi dodina tenda ati weik dopra deipi ngeda, dana-dana tara ongopgenepra kunmaiya, Saulda aneitamai mapmaupa, Dauddi epu.

6Ange tep nengeda, Dauddi, Het mutu ngebo, er si Ahimelek cap, tonda Zeruyadi deiamu mi, er si Yoab, er kabo Abisai cap tep, “Ware ngeboda, kware pio gum dipapu, balila kupredi, ne cap tonpua, Saul mapmarai, dodin tenda ati bo neitamai bena wekunem do?” pepra asipetepu. Upepra asipetepupa, Abisaidi, “Jo naio, ne cap ubena wekuneme,” pepu. 7Atep, atumi lukundada, Daud cap, Abisai cap, geipdongopra aopkal bol dodina tenda ati neitamai wekra bereidi eprei. Ada, Saulda er jen talena nengdi deipi dodina tenda atida, ongopgenepra akupmainge, pio aneitamaipu mapmaudi, nimi porbana tep, er douramu lyom takke balanada, er giso deipmaua damaipu, tu ikra deipmau. Er mapmauai dana-danada, er jen deiyo ngebo Abner cap, er amutu tara jen neng cap mapmai.

8Saul amapmaupa, sun butenedi epmareiya tep, Abisaidi Daud tep upepu. “Naie, konuma, nun nai Allahdi kan tep, go konum karepkere. Kan tep, ‘Angebo poptene,’ tenekere ngeboda, atumi lukunda di dopra, kan buru deiki konum deipkere. Atep nengeda, kandi ne tep, ‘Angebo popo,” pepnemem pangeda, Saul er meneng deipmar tombak dipu doroprapnedi, ue butene gum dinin, ue tenpu taru dipapu lukdongopnepa, tu cap bekdongopkure. Ukupnedi, angebo poptene,” pepra moropu.

9Dinino, Dauddi tamupra Abisai tep pepu. “Gume, kandi Saul tep, ‘Ukupkune,’ tenepmarumada, ange tenena gume. Apepkenada, tali tep gume. Deiyoda, Allah Yahwehdi, ‘Raja kepkamre’ tenen, konum wepra deipu nimi deiyo ngebo popmem pangeda, Allah erdi akupmemnge tep, ‘Dakwapye,’ men tenepkamre. Ange gum dinin, tek sisi tamupra wenepkerura tep, ukuna gume. 10Nun dipapu men popkuneme. Allah Yahweh, tupa gam pio kurura cadi, tek sisi er teneamutopu kupkamre ja. Ne kaele, yuk taruda, Allah er pedipapu, ‘Ukutaru Saul popkune,’ tenepyopda, popkamre ja. Ange gum dingeda, nedi, ‘Ataru acei,’ men teneptene dinin, Allah er kange dipapu, ‘Saulda, atumi depkamre,’ teneamu tumi konum kepre pangeda, depkamre ja. Ange gum dingeda, Allahdi, ‘Mar podandam banmare taruda, yuk mutu nengdi popmengepa depkamre,’ tenepyopda, mar podanmange taru di popmengepa, depkamre ja,” Dauddi pepu.

11Atep nengeda, ne nai Allah tep moropnepa, melipneryopda, angebo tali lupra men popkamne. Er Yahwehdi, Saul tep, ‘Angeboda, Israel nesala sun nimi deiyo kepra kunkamre’ tenen, wepra deiamu ngebo kurura cadi, nedi men popkune,” pepu. Upepu dingeda, aupu ton Abisai tep pepu. “Kandi men popkurum dinin, Saul er giso damai tu ikmau nimi pon tombak balana cap, er me kina mau cap, doropra dubenkuneme,” pepu. 12Upepkopda, Dauddi Saul er douramu nimi pon tombak cap, kendi me mau cap, Saul er giso dam tara deipmau ngepu, doropra duberei. Adoropra duberei ngeda, sun amapmai neng yuma neitamaida, tenpu ngebo peda, ton men bukroudi, ‘Angeda acei’ tenen, epra ton men kael kepi. Deiyoda, Allah Yahwehdi sun aneng yuma tep, ‘Maptenge,’ tenepupa, mapra u dakmaiya cadi, tenpu ngebo peda ton men bukroudi, angeda ton epra men kael kepmai.

13Daudda, sun dodina tenda ati dopra kunmai katawai men di tapra, yuk ortara yambul karenai mutu deiki welepra beu. Ada, Saul er tenda ati deipra kunmauai tapra, pio karenai ortamna beu. 14Karenai beuopda, Dauddi, Nar erdi deiamu ngebo Abner cap, Saul er jen talena neng cap tep, kong pepudi upepu. “Abnero kanda, ne upu gekepneremdi, tamupra men pepkunerum do?” pepu. Upepupa, Abnerdi tamupra pepu, “Kanda ware ngebo yana ngolongmaremdi, nun nai Raja Saul tep upu penmarem do?” pepra asipetepu. 15Asipetepupa, Dauddi tamupra, Abner tep nyek-nyek pepu, “Kandi, ‘Israel mutu neitamaida, nepu ila puto ngebo kunune,’ tenepdarum do? Yuk neng ton dakunung dinin, kan puto weik kuremtopu, yuk neng ton men kununga cadi, kanda ware deiyo keca tep, kan deiyo ngebo, Raja Saul tep men kalekmamum do? Alukundapu, nimi ton sun opkal bol dodina tenda ati neitamai wekrapseudi, ‘Raja Saul, sun deiyo ngebo ‘Popkun’ tenen, wekmau dinin, kange di bendopmau adano,” pepu.

16Abner kan pel dona tep karepkei ngeda, putoa di, telep kupra men dopmanto ngebo kurume. Ada, Allah Yahweh gam kuna deiyo ngebo, er si deiki di, tek sisi pepkene. Allah Yahwehdi, ‘Angebo Israel nesala, sun deiyo ngebo kunkamre’ tenen, wepra deiamu ngebo tep, telep kupra men kalekmarume. Atep, walito poptapketenge. Tonda, dipterepo, kan deiyo ngebo er douamu nimi pon tombakda, dan kwapmar do? Tonda, kan deiyo ngebo, er me jen mau giso dam deipmau me mauda, dan kwapmar do? Kan ton tenipmarum do?” pepra nyek-nyek pepu.

17Dauddi, upepra asipetepupane, Sauldi Daud upu penmaua gekepudi, ‘E, aupu penmar ngeboda, Daud akunmardi penmasere’ tenen, kael kepu. Kael kepudi tamupra pepu. “Kanda ne mi Dauddi aupu penmaserem do?” pepra asipetepu. Asipetepupa, Dauddi, “Jo ne deiyo ngebo, nedi penmana,” pepu. 18Upepudi, Dauddi aupu ton cap dukdongopra pepu. “Ne deiyo ngebo Rajao, ware keca deiyo tep, kan amutara kure pel dona ngebo tepapu, epra domembanmarum do? Tonda, neda kan amutara kure pel dona ngeboda, ware mali keca kupsa tep, ‘Popkun’ tenen, erbanmanerum do?

19Atep nengeda, ne kan amutara pel dona ngebodi penmaken upuda gekepkunerume. Ada, ukupmantoda, ne kan pel dona ngebo tep, Allah Yahwehdi, “Angebo popkamrume,” peiamkerepa, dumanememnyopda, kandi ne popnemem pangeda, Allah er kange deipkamare. Dinino, ukupmanto, ‘Kandi men popkunerum’ tenen, Allah tep telep karen keca kareptenyopda, Allahdi, kange deipnetudi, “Dakwapye, angebo men popkamrume,” pepra, kaukepnetu do? Dinino, ukupmantoda, ne deiyo ngebo, Allahdi gum dinin, tali nimi dipapu tenepra pepmakenge deiki di, ‘Angebo popkune,’ tenepmemnyopda, Allahdi sun aneng tep nengeda, wipdongopkamre.

Deiyoda, sun anesala kununga deiki di, ne kan pel dona ngeboda, Allah er damai di enepropneipa, Allahdi kalengrur nesala, Israel nesala kankan ton, men kuptene. Atep, ‘Ware kupkuna guma’ tenen, sun yuk karen mutu nesala damai tengbesidi, amutu nengdi, tali keca isok-isok sipu erepra kungetopu, ‘Sun cap kune taruda, ne peda isok si erepnun’ tenen, pepkene.

20Atep nengeda, ne deiyo ngebo Raja, ware keca deiyo tep, yuk mutu nesala kundam ada, Allah Yahweh er si eremna gum mutu nesala damai popnemempa depkamne do? Tonda, ware keca deiyo tep, Israel mutu yuma talepmum ila nimi deiyo ngebodi, neda tali amnye utopu ngebo tep, ‘Popkun’ tenen, eryanmanerum do? Tonda, ware keca deiyo tep, kandi, ‘Angebo popkun’ tenepmemdi, neda mambul ngebo gum tep, eryanmanerum do? Neda, tali bura tara kuramre ma utopu ngebo kununa cadi, ware deiyo keca tep, kan ila ngebodi, ‘Atali ngebo poptene,’ tenepmarumdi, domyakanerum do?

21Dauddi aupu yuma konum pepu pangeda, Sauldi tamupra pepu, “Uo, ukuda ne kael kepmane. Nedi konum tek sisi mali kupsi. Ne mi Daud, kan adipapu ne damai tamupra yankurume. Nedi ton cap, kange di tamupra, kan damai mali men kweipkamkene. Ada, ambutumi lukundada, kandi konum popmanetum dinin, kandi ne tep bicau tenepmaumumdi, kau kepmaneremdi, men popmanerema tep, ne tupa gam kunmana tepa. Nedi kan tep mali kupsi ngeda, walwal di kupsi. Ada, tek sisi ne wang-wang pepneua deiki di, mali kupsi,” Sauldi pepu. 22Upepupa, Dauddi tamupra aupu pepu. “Ne deiyo ngebo, kan nimi pon tombakda, adoupmakene. Atep, kan jen neng ton pepmempa, aca yana doupra bengedi, kan damai tamupra duyankamaketenge,” pepu.

23Tonda, moupra tenepkurume. Allah Yahwehdi, ware ngebo do yuma tep, er dingeda, dumsisi teleppu kungedi, tamna gum dipapu, er upu moupra talepmengedi, er tep tek sisi teka tenepra, dombanung nengda, sun menenga tep nengeda, melimredi telep kupra derirure. Ange tep, atumi lukundada, ne deiyo ngebo kanda, Allah Yahwehdi dopra, ne buru deiki deipmaneupane, nedi, ‘Gume, Allah Yahwehdi, ‘Angebo Raja kunkamre’ tenen, konum wepra deiamu ngebo tep, nedi mali men kuptene’ tenen, kan men popmakenue.

24Atep nengeda, ne kan amutara tali pel dona ngebodi kan tep, ‘Erda ila mambule,’ tenen, men popmakendi tapmakena utopu, Allah Yahwehdi ne tep, ‘Erda ne mawa ngebo,’ tenepnetudi, melipra talepneredi, melipra kalengkamnetue’ tenen, moronune. Tonda, Allahdi ne tep, ‘Erda, ila kange mun kuprepa, ikin weik kuprur’ tenen, erdi pio kalekra melimkamnere’ tenen, moronune. 25Upepupa, Sauldi Daud tep tamupra upepu, “Allah Yahwehdi ne mi utopu ngebo kan tep, ‘Telep kupra deipkamkere’ tenen, moronkamne. Ukupkerepa, kan pel donkamrema yala yumada, nongpu kepredi, pio teleppu kunkamkere,” pepu. Aupu yuma konum sisikroprei dingeda, Daud adipapu, er bisipu dukdongopra beu. Atarupu Saulda tamupra, er pe ati Israel mutu neitamaipu beu.